1. Mang e da filed ko annual meeting nni tay ko duw ni 2023?

 NAP’AN fare annual meeting a nni tay ko duw ni 2023, min tamilangnag boch ban’en u boch e machib rodad mu kud rung’aged boch ban’en ni kan thilyeg u rogon e machib rodad. Bod nda filed ni mus nga tomuren ni yira thang fare Babylon nib Gilbuguwan ma sana ka bay boch e girdi’ nra mab e kanawo’ ngorad ni ngar uned ko girdi’ rok Jehovah. Kud filed nra taw ko November 2023, ma dab ku unog ko pi tamachib ni ngar yoloyed ko report rorad urngin ban’en ni kar rin’ed u nap’an e machib. Ere gur, gathi ri kab ga’ fan e machib ni gad be tay ni bochan e pi n’ey ni kan thilyeg? Danga’!

2. Mang fan ni gubin e rran ni be yan nri be gel feni ga’ fan e machib ni gad be tay? (Mark 13:10)

² Gubin e rran ni be yan ma ri be gel feni ga’ fan e machib ni gad be tay. Mang fan? Ya ke lich e tayim ni ka bay. Am lemnag e n’en ni yiiynag Jesus u murung’agen fare maruwel ni machib ni yira tay ko tin tomuren e rran. (Mu beeg e Mark 13:10.) I yog u lan e babyor rok Matthew ni yira machibnag fare thin nib fel’ u gubin yang u fayleng u m’on ni nge yib e ‘tomur.’ (Matt. 24:14) Re thin ney e be yip’ fan e ngiyal’ ni yira thang e re m’ag rok Satan ney nib kireb. Ke dugliy Jehovah e ‘re rran nge re awa’ ni nge buch riy e pi n’ey ni ka bay nga m’on. (Matt. 24:36; 25:13; Acts 1:7) Gubin  e rran ni gad be chugur i yan ko re ngiyal’ i n’em. (Rom. 13:11) Ma chiney ndawori yib e tomur e thingar da ululgad ko machib.

3. Mang e ma k’aringdad ni ngad machibgad?

³ Baaray reb e deer nib ga’ fan ni gad gubin ni gad baadag ni ngad lemnaged, ni aram e: Mang fan ni gad ma machibnag fare thin nib fel’? Bochan e t’ufeg ni bay rodad. Nap’an ni gad ra machib, ma aram e gad be dag nib t’uf rodad fare thin nib fel’, ma kub t’uf e girdi’ rodad, ma bin th’abi ga’ fan riy e ba t’uf Jehovah nge ngachal rok rodad. Ngad weliyed e pi n’ey nreb nge reb.

GAD MA MACHIB YA BA T’UF RODAD FARE THIN NIB FEL’

4. Mang e gad ma rin’ u nap’an ni gad ra rung’ag murung’agen ban’en nib manigil?

⁴ Ka be yib ngan’um ba ngiyal’ nim rung’ag murung’agen ban’en nib manigil, fa? Sana bay be’ u tabinaw rom ni ke gargel ara ke yag reb e maruwel ngom nrib t’uf rom. Dariy e maruwar riy ni ga baadag ni ngkum weliy e re n’ey ngak yugu boch e girdi’ u lan e tabinaw rom nge pi fager rom. Aray e n’en ni buch u nap’an nim rung’ag e n’en th’abi fel’ ni kan weliy ni aram fare thin nib fel’ ni murung’agen Gil’ilungun Got, fa?

5. Uw rogon lanin’um u nap’an nim fil e tin riyul’ u lan e Thin rok Got ko yay nsom’on? (Kum guy e sasing.)

⁵ Am lemnag rogon lanin’um u nap’an nim fil e tin riyul’ u lan e Thin rok Got ko yay nsom’on. Kam fil ni gab t’uf rok e Chitamam ni bay u tharmiy, ma baadag ni ngam mang reb e tapigpig rok, ma ke micheg nra chuweg e amith nge gafgow, ma ka bay e athap rom ni ngam guy bayay e piin nib t’uf rom ni kar m’ad ni kan fasegrad u lan e bin nib beech e fayleng, nge ku boch ban’en. (Mark 10:​29, 30; John 5:​28, 29; Rom. 8:​38, 39; Rev. 21:​3, 4) Pi n’ey e ri yibnag e felfelan’ ngom. (Luke 24:32) Ri ga baadag e n’en ga be fil ndabkiyog ni ngam tay rom!​—Mu taarebrogonnag ko Jeremiah 20:9.

6. Mang e kam fil ko n’en ni buch rok Ernest nge Rose?

⁶ Am lemnag ban’en ni buch. Bay reb e walag ni pumoon ni ka nog Ernest ngak ni yim’ e chitamangin u nap’an ni ke gaman sogonap’an ragag  e duw rok. I yog ni gaar: “Ma lungug u wan’ug: ‘Gur, ke yan nga tharmiy? Fa ke yim’ ndariy n’umngin nap’an?’ Ma awan’ug ko tin ka bay e bitir ni kab fos e chitamangirad.” Gubin ngiyal’ ni ma yan nga teliw nge yan i ragbug nga daken e malang ko chitamangin, me meybil ni gaar: “Got wenig ngom, gu baadag ni nggu nang e gin bay e chitamag riy.” Sogonap’an 17 e duw nga tomuren ni yim’ e chitamangin Ernest, ma aram me ognag be’ e fol Bible ngak me m’agan’ ngay. Ri felfelan’ u nap’an ni fil ni piin kar m’ad e dariy ban’en ni yad manang ya gowa ri yad be mol, ma be micheg e Bible ni bay e fos ko yam’ boch nga m’on. (Ekl. 9:​5, 10; Acts 24:15) Tomur riy me pirieg e fulweg u boch e deer ni ke n’uw nap’an ni ma lemnag! Ri felfelan’ Ernest ko tin riyul’ ni be fil u Bible. Ki un Rose ni leengin ngak ko fol Bible maku baadag e n’en be fil. Ere nap’an e duw ni 1978 mar unew ko taufe. Ur weliyew ngak chon e tabinaw rorow, nge pi fager rorow, nge yugu boch e girdi’ e tin riyul’ ni kar filew u fithik’ e pasig. Bochan e re n’ey mab pag 70 e girdi’ ni kar ayuwegew ni ngar mon’oggad mar uned ko taufe.

7. Mang e ma buch u nap’an nra t’uf e tin riyul’ u Bible rodad? (Luke 6:45)

⁷ Ba tamilang nnap’an nra t’uf e tin riyul’ u Bible rodad, ma ri gad baadag ni ngad weliyed ko girdi’. (Mu beeg e Luke 6:45.) Taareb rogon e lem rodad ngak pi gachalpen Jesus ko bin som’on e chibog ni faani lungurad: ‘Dabiyog ni nge dab kug weliyed e n’en ni kug guyed nge n’en ni kug rung’aged.’ (Acts 4:20) Bochan nib t’uf e tin riyul’ rodad, ma aram fan ni gad baadag ni ngad weliyed ngak urngin e girdi’ nrayog.

GAD MA MACHIB YA BA T’UF E GIRDI’ RODAD

8. Mang e ma k’aringdad ni ngad weliyed fare thin nib fel’ ko girdi’? (Mu guy fare kahol ni kenggin e “ Love People​—Make Disciples.”) (Kum guy e sasing.)

⁸ Ba t’uf e girdi’ rodad ni bod Jehovah nge Fak. (Prov. 8:31; John 3:16) Ri ma kireban’dad ko piin ‘de moy Got rorad’ ma ‘dariy ban’en ni ke l’agan’rad ngay.’ (Efe. 2:12) Ri boor e magawon rorad, ma gadad e gad be fek e n’en nib t’uf rorad ni aram fare thin nib fel’ ni murung’agen Gil’ilungun Got. T’ufeg nge runguy rodad ngorad e ma k’aringdad ni ngad athamgilgad u rogon nrayog rodad ni ngad weliyed fare thin nib fel’ ngorad. Aram e n’en nrayog ni nge pi’ e athap ngorad, me ayuwegrad ni ngar pirieged e bin th’abi fel’ e yafos e chiney, me bing e kanawo’ ngorad ni nge yag e “bin riyul’ e yafos” ngorad, ni aram e yafos ni manemus u lan e bin nib beech e fayleng rok Got.​—1 Tim. 6:19.

9. Mang e gad be yog ko girdi’ ni bayi buch boch nga m’on, ma mang fan? (Ezekiel 33:​7, 8)

 ⁹ Bochan nib t’uf e girdi’ rodad maku aram e n’en ma k’aringdad ni nga dogned ngorad ni ke chugur ni ngan thang e re fayleng nib kireb ney. (Mu beeg e Ezekiel 33:​7, 8.) Ma kireban’dad ko pi buguli yoror rodad nge girdien e tabinaw rodad ndawor ra nanged e tin riyul’. Boor e girdi’ e yad be rin’ e tirorad ma darur nanged ni bay yib ba gafgow ni “kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.” (Matt. 24:21) Gad baadag ni ngar nanged e n’en nra buch u nap’an e pufthin nra tay Got. Som’on e yira thang e pi yurba’ i teliw ni googsur, ngemu’ min thang e re m’ag nib kireb ney u nap’an e Armageddon. (Rev. 16:​14, 16; 17:​16, 17; 19:​11, 19, 20) Gad be meybil ni nge motoyil urngin e girdi’ nrayog ni ngar motoyilgad ngodad e chiney mar uned ngodad ko bin nib machalbog e liyor. Machane uw rogon e piin ndarur motoyilgad ngodad e chiney nib muun chon e tabinaw rodad ngay?

10. Mang fan nrib t’uf ni ngaud weliyed ko girdi’ e n’en bayi buch ndab ki n’uw nap’an?

¹⁰ Kan weliy ko fa binem e article nsana ra m’agan’ Jehovah ngay ni nge ayuweg e yafos rok e piin nra thil lanin’rad u nap’an ni yad ra guy ni kan thang fare Babylon nib Gilbuguwan. Faanra arrogon ma aram fan nrib t’uf ni ngaud weliyed murung’agen e re n’ey e chiney. Am lemnag e re n’ey: N’en gad ra yog ngorad e chiney e rayog ni nge yib ngan’rad e ngiyal’ nem. (Mu taarebrogonnag ko Ezekiel 33:33.) Sana ra yib ngan’rad e n’en ur rung’aged rodad me k’aringrad ni ngar uned ngodad ko bin nib machalbog e liyor u m’on ni nge sagaal. Sana ra moy boch i yad ndarur motoyilgad e chiney nra thil lanin’rad u tomuren ni yira gin ngay ni kan thang fare Babylon nib Gilbuguwan ni bod fare pilungen e kalbus u Filippi ni fini thil laniyan’ u tomuren ni “yib ba durru’ nrib gel.”​—Acts 16:​25-34.

GAD MA MACHIB YA BA T’UF JEHOVAH NGE NGACHAL ROK RODAD

11. Uw rogon ni gad ma yog e sorok ngak Jehovah, ma gad ma tayfan, ma gad ma fanay gelngidad ni fan ngak? (Revelation 4:11) (Kum guy e sasing.)

¹¹ Bin th’abi ga’ i fan ni gad ma machibnag fare thin nib fel’ e bochan nib t’uf Jehovah Got nge ngachal rok nib thothup rodad. Gad ma sap ko machib ni gad ma tay ni aram reb e kanawo’ ni ngad pininged e sorok riy ngak fare Got nib t’uf rodad. (Mu beeg e Revelation 4:11.) Ba puluw u wan’dad e n’en ni yog e piin yad bay u tharmiy ni faani lungurad: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom.” Nap’an ni gad ra weliy ko girdi’ e mich riy ni ir e ke “sunumiy urngin ban’en” ma gad ba fos ni bochan e ke pi’ e yafos ngodad, ma aram e gad be yog e sorok ngak ma gad be  tayfan. Gad ma fanay gelngidad ni fan ngak u nap’an ni gad ra fanay e tayim rodad, nge gelngidad, nge tin bay rodad ya nge yag nda machibgad u rogon nrayog rodad. (Matt. 6:33; Luke 13:24; Kol. 3:23) Bin riyul’ riy e gad baadag ni gad ma weliy murung’agen fare Got nib t’uf rodad. Ku gad baadag ni ngad weliyed murung’agen fithingan nge rarogon ko girdi’. Mang fan?

12. Uw rogon ni gad ma thothupnag fithingan Jehovah u nap’an e machib?

¹² T’ufeg rodad ngak Jehovah e ma k’aringdad ni ngad thothupnaged fithingan. (Matt. 6:9) Gad baadag ni ngad micheged nde riyul’ e pi ban ni ke yog Satan nib togopuluw nga fithingan. (Gen. 3:​1-5; Job 2:4; John 8:44) Gad baadag ni ngad weliyed e tin riyul’ u murung’agen ngak urngin e piin yad ra motoyil u nap’an e machib. Gad baadag ni nge nang gubin e girdi’ ni t’ufeg e aram e bin th’abi lingagil i fel’ngin, mab mat’aw rogon e gagiyeg ni ma tay, ma dabki n’uw nap’an ma bayi chuweg Gil’ilungun urngin mit e gafgow me yibnag e gapas nge felfelan’ ko girdi’. (Ps. 37:​10, 11, 29; 1 John 4:8) Nap’an ni gad ra weliy e pi n’ey u murung’agen Jehovah ko girdi’, ma aram e gad be thothupnag fithingan. Ku gad ra felfelan’ ni bochan e gad manang ni gad be ngongol nib puluw nga fithingdad. Ni uw rogon?

13. Mang fan ni gad ba felfelan’ ngay ni yima yog e Pi Mich Rok Jehovah ngodad? (Isaiah 43:​10-12)

¹³ Ke mel’egdad Jehovah ni ngad manged “mich” rok. (Mu beeg e Isaiah 43:​10-12.) Boch e duw ni ke yan me yog fare Ulung ni Ma Pow’iyey u lan bangi babyor nra yoloyed ni lungurad: “Bin th’abi fel’ e tow’ath nra yag ngak bagadad e aram e nga unog ni ir reb e Pi Mich Rok Jehovah.” Mang fan? Baaray rogon nrayog ni ngan susunnag. Faanra ba t’uf be’ ni nge mang mich rom u reb e tagil’ e puf oloboch ni nge micheg nib fel’ e rom, ma ga ra mel’eg be’ ni ga manang ma be pagan’um ngak, mab fel’ thin,  ma rayog ni nge pagan’uy ko n’en be yog. Bochan ni ke mel’egdad Jehovah ni ngad manged Pi Mich rok, ma be dag ni manangdad nrib fel’ rogon mab pagan’ ngay ni gad ra weliy ko girdi’ ni kemus ni yigoo ir e bin riyul’ e Got. Ri gad ba felfelan’ ngay ni gadad e Pi Mich rok ma gad ma guy rogon ni ngad weliyed fithingan ngan nang ma gad micheg nde riyul’ e pi ban ni kan weliy u murung’agen. Gad ra rin’ e pi n’ey ma aram e gad be ngongol nib puluw nga fithingdad ni gadad e Pi Mich Rok Jehovah!​—Ps. 83:18; Rom. 10:​13-15.

GAD RA ULUL KO MACHIB NGE MADA’ KO TOMUR

14. Mang boch ban’en nrib manigil ni gad be athapeg ni bayi buch?

¹⁴ Rib manigil e pi n’en bayi buch ndab ki n’uw nap’an! Gad be athapeg ni ngkud guyed boor e girdi’ ni ngar bad ko tin riyul’ u m’on ni nge tabab fare gafgow nib ga’. Ku gad ba felfelan’ nra taw ko fare gafgow nib ga’ ni aram e ngiyal’ ni kari mo’maw’ e par ma rayog ni ku boor e girdi’ ni yad ra chuw ko re fayleng rok Satan ney ngar bad ra uned ngodad i pining e sorok ngak Jehovah!​—Acts 13:48.

15-16. Mang e gad ra ulul ni ngad rin’ed, ma mingiyal’ e gad ra tal?

¹⁵ Machane chiney e ka bay e maruwel ni ngad rin’ed. Gad ba tow’ath ni ngad rin’ed ba maruwel ndakuriy ba ngiyal’ ni yira rin’ bayay, ni aram e ngad machibnaged fare thin nib fel’ ni murung’agen Gil’ilungun Got u ga’ngin yang e fayleng. Kub t’uf ni ngad ginanged e girdi’ u murung’agen e n’en bayi buch. Ba t’uf ni nge nang e girdi’ ndab ki n’uw nap’an ma bay ni thang e re m’ag nib kireb ney. Gad ra rin’ e pi n’ey ma nap’an nra taw ko ngiyal’ ni ngan pufthinnagey ma yad ra nang ni thin ni ud machibnaged e Jehovah Got e ke yib rok.​—Ezek. 38:23.

¹⁶ Ere mang e kad dugliyed u wan’dad ni ngad rin’ed? Bochan nib t’uf rodad fare thin nib fel’, ma kub t’uf e girdi’ rodad, ma bin th’abi ga’ fan riy e ba t’uf Jehovah Got nge ngachal rok rodad, ma aram e gad ra ulul ko machib u fithik’ e pasig nge mada’ ko ngiyal’ ni ke gaar Jehovah, “Ke m’ay fare maruwel ni machib!”