1. Mang ban’en nib ga’ fan nib t’uf ni nge dugliy urngin e girdi’?

 BAY ban’en nib ga’ fan nib t’uf ni nge dugliy e girdi’ e ngiyal’ ney. Ba t’uf ni ngar dugliyed ko yad ra fol rok Jehovah Got ni ir e bay mat’awun ni nge Gagiyegnag ga’ngin e palpalth’ib, ara ngar folgad rok Satan ni Moonyan’ ni toogor rok Got. Dabiyog ni ngar pared u mathilin. N’en yad ra mel’eg e ra dugliy ko ra yag e yafos ni manemus ngorad fa danga’. (Matt. 25:31-33, 46) Nap’an “fare gafgow ni ba ga’” e ra dugil ko yad ra magey ni yad ba fos fa yira thangrad.​—Rev. 7:14; 14:9-11; Ezek. 9:4, 6.

2. (a) Mang e be pi’ e Hebrews 10:35-39 e athamgil nga lanin’dad ni ngad rin’ed? (b) Uw rogon nrayog ni nge ayuwegdad fare babyor ni Revelation?

² Mu beeg e Hebrews 10:35-39. Faanra kam mel’eg ni ngam fol ko gagiyeg rok Jehovah, mab fel’ e n’en kam dugliy. Ma chiney e ga baadag ni ngam ayuweg yugu boch e girdi’ ni ngar mel’eged e n’en nib fel’ ni ngar rin’ed. Ere rayog ni ngam fanay e n’en bay ko fare babyor ni Revelation ni ngam ayuwegrad. Re ke babyor ney e be tamilangnag e n’en nra buch rok e piin yad be togopuluw ngak Jehovah, machane ku be weliy murung’agen e pi tow’ath nra yag ngak e piin yad ra fol ko gagiyeg rok u fithik’ e yul’yul’. Ere ba t’uf ni ngad filed murung’agen e pi n’ey nib ga’ fan. Faan gad ra rin’, ma ra ayuwegdad ni ngar da dugliyed u wan’dad ni ngad ululgad ko pigpig rodad ngak Jehovah. Maku reb e, rayog ni ngad fanayed e pi n’en kad filed ni ngad ayuweged yugu boch e girdi’ ni ngar dugliyed e n’en nib fel’ ni ngar rin’ed mar folgad riy.

3. Mang e gad ra weliy ko re article ney?

³ Baaray l’agruw e deer ni gad ra weliy e fulweg riy u lan e re article ney: Mang e ra buch rok e piin yad ra fol ko gagiyeg rok Got? Ma mang e ra buch rok e piin yad ra mel’eg ni  ngar ayuweged fare gamanman nib row ramaen ni kan weliy murung’agen ko fare babyor ni Revelation?

4. Kun ulung i girdi’ e guy apostal John ni yad bay rok Jesus u tharmiy?

⁴ Nap’an nni pilyeg e changar rok apostal John me guy l’agruw ulung i girdi’ ni yad be fol ko gagiyeg rok Jehovah ma kan pi’ e tow’ath rorad ni yafos ni manemus. Bin som’on e ulung e 144,000 urngirad u gubin. (Rev. 7:4) Pi cha’ney e kan fekrad u fayleng ni ngar uned ngak Jesus ngar manged bang u reb e am ni bay u tharmiy ni ngar gagiyegnaged e fayleng. (Rev. 5:9, 10; 14:3, 4) Ki guyrad John ni yad ba sak’iy Jesus u daken fare Burey ni Zion ni bay u tharmiy.​—Rev. 14:1.

5. Mang e bayi buch ko tin ka bay ko fare 144,000?

⁵ Ka nap’an e pi apostal keb i mada’ ko chiney ma bokum biyu’ e girdi’ ni kan mel’egrad ni ngar manged bang ko fare 144,000. (Luke 12:32; Rom. 8:17) Machane nog ngak John nra yan i taw ko tin tomuren e rran, ma ri in ko pi girdi’ ney e yad ra magey u fayleng. Aram e “piin” yira tay e bin tomur e “pow” nga peri’rad u m’on ni nge tabab fare gafgow nib ga’ ni be yip’ fan ni yad ba fel’ u wan’ Jehovah. (Rev. 7:2, 3; 12:17) Ma ba ngiyal’ u nap’an fare gafgow nib ga’ ma yira fekrad nga tharmiy ni ngar uned ko tin ka bay ko fare 144,000 ni kar m’ad ni yad ba yul’yul’. Aram e gin yad ra un riy ngak Jesus ko gagiyeg u Gil’ilungun Got.​—Matt. 24:31; Rev. 5:9, 10.

6-7. (a) Kun ulung i girdi’ e guy John ni migid, ma mang e gad be fil u murung’agrad? (b) Mang fan nsusun e nge athapeg e tin ke magey ko piin kan dugliyrad nge fare ulung i “girdi’ ni ke muulung ni pire’ ni pire’” ni nge taw ko ngiyal’ nra lebug e n’en bay u Revelation ko guruy ni 7?

⁶ Tomuren ni guy John e re ulung i girdi’ ney ni yad bay u tharmiy, ma aram miki guy ba ulung i “girdi’ ni ke muulung ni pire’ ni pire’.” Biney e ulung e ba thil ko fa binem ni 144,000 urngirad, ya dabiyog i theegrad. (Rev. 7:9, 10) Mang e gad be fil u murung’agrad? I lunguy ngak John: “Pi cha’nem e fapi girdi’ ni kar thapgad ngaray u fithik’ fare gafgow ni ba ga’ ntay ngorad. Kar lukniged e mad rorad kar wechwechniged nga rachaen fare Fak e Saf.” (Rev. 7:14) Tomuren nra thap e re ulung i girdi’ ney ni “pire’ ni pire’” nga barba’ fare gafgow nib ga’, ma aram e yad ra par u roy u fayleng ma boor e tow’ath nra yag ngorad.​—Ps. 37:9-11, 27-29; Prov. 2:21, 22; Rev. 7:16, 17.

⁷ Demtrug ko kan mel’egdad ni nga darod nga tharmiy ara ngad pared u roy u fayleng, ma gur ba mich u wan’dad ni gad ra guy ni ke lebug e pi n’en kan weliy u Revelation ko guruy ni 7, fa? Susun e nge mich u wan’dad. Ba gel e felfelan’ nra tay e gal ulung i girdi’ ney ni yad be pigpig ngak Got e ngiyal’ nem! Ri gad ra felfelan’ ni kad mel’eged ni ngad folgad ko gagiyeg rok Jehovah. Ku mang e be yog fare babyor ni Revelation ngodad u murung’agen fare gafgow nib ga’?​—Matt. 24:21.

8. Uw rogon nra tabab fare gafgow nib ga’, ma mang e ra rin’ yooren e girdi’?

⁸ Kad filed ko fa binem e article ni ke yan nra chel e pi am nu fayleng ngar chamgad ko fare Babylon nib Gilbuguwan ni be yip’ fan e pi yurba’ i teliw ni googsur u fayleng. (Rev. 17:16, 17) Aram e n’en nra tababnag fare gafgow nib ga’. Machane gur, ra k’aring e re n’ey boor e girdi’ ni ngar tababgad ni ngar pigpiggad ngak Jehovah, fa? Danga’, ya be dag e Revelation ko guruy ni 6 nra taw ko ngiyal’ nem, ma piin ndarur pigpiggad ngak Jehovah e yad ra sap ko pi am nge siyobay ko re fayleng ney ni kan taarebrogonnag ko burey ni nge ayuwegrad. Ere bochan dab ra ayuweged Gil’ilungun  Got, ma aram e ra tayrad Jehovah ni yad e piin yad be togopuluw ngak.​—Luke 11:23; Rev. 6:15-17.

9. Uw rogon nra gagiyel nib thil e girdi’ rok Jehovah u nap’an fare gafgow nib ga’, ma mang e ra buch ni bochan e re n’ey?

⁹ Riyul’ nra taw ko ngiyal’ nem nrib gel e gafgow riy, ma ra gagiyel nib thil e pi tapigpig rok Jehovah ni yad ba yul’yul’. Ngiyal’ nem e yigoo yad e ka yad be pigpig ngak Jehovah Got u roy u fayleng ma darur ayuweged “fare gamanman.” (Rev. 13:14-17) Bochan e re n’ey, ma ra damumuw e piin yad be togopuluw ngak Jehovah. Ere ra chagil ba ulung i nam nga taabang ngar chamgad ko girdi’ rok Got u ga’ngin yang e fayleng. Be yog e Bible ni ireray e cham nra tay Gog nu Magog.​—Ezek. 38:14-16.

10. Mang e ra rin’ Jehovah u nap’an ni yira cham ko girdi’ rok nrogon ni be weliy e Revelation 19:19-21?

¹⁰ Mang e ra rin’ Jehovah u nap’an ni yira cham ko girdi’ rok? Be gaar: “Bay gu damumuw.” (Ezek. 38:18, 21-23, BT) Be weliy e Revelation ko guruy ni 19 e n’en nra buch ni migid. Ra l’og Jehovah Fak ni nge yib i ayuweg e girdi’ rok me gel ko pi toogor rok. Ku ra un e pi “salthaw nu tharmiy” ni aram e pi engel ni yad ba yul’yul’ nge fare 144,000 ngak Jesus ko cham nra tay. (Rev. 17:14; 19:11-15) Mang e ra buch ni bochan e re mahl nem? Yira thang gubin e girdi’ nge ulung ni yad be togopuluw ngak Jehovah!​—Mu beeg e Revelation 19:19-21.

11. Mang e th’abi ga’ fan nra buch ni kan weliy murung’agen ko fare babyor ni Revelation?

¹¹ Am susunnag rogon laniyan’ e piin yad ba yul’yul’ u fayleng ni kar mageygad ni yad ba fos u tomuren ni kan thang e pi toogor rok Got! Gubin e girdi’ u fayleng ni yad ra felfelan’! Yugu aram rogon nib gel e felfelan’ ni yira tay u tharmiy u nap’an ni yira thang fare Babylon nib Gilbuguwan, machane ka bay ban’en nib gel e felfelan’ ni yira tay riy. (Rev. 19:1-3) Re n’em e aram e ‘mabgol nra tay fare Fak e Saf’ ni aram e n’en th’abi ga’ fan nra buch ni kan weliy murung’agen ko fare babyor ni Revelation.​—Rev. 19:6-9.

12. Mingiyal’ e ra mabgol fare Fak e Saf nrogon ni be yog e Revelation 21:1, 2?

¹² Mingiyal’ e yira tay e re m’agpa’ ney? U m’on nra tabab fare mahl ni Armageddon ma ke yan urngin i girdien fare 144,000 nga tharmiy. Machane gathi aram e ngiyal’ nra mabgol fare Fak e Saf. (Mu beeg e Revelation 21:1, 2.) Tomuren ni ke m’ay fare mahl ni Armageddon ma kan thang urngin e pi toogor rok Got, ma aram e ngiyal’ nra mabgol fare Fak e Saf.​—Ps. 45:3, 4, 13-17.

13. Mang e ra buch u nap’an e mabgol nra tay fare Fak e Saf?

¹³ Mang e ra buch u nap’an e mabgol nra tay fare Fak e Saf? Nap’an nra mabgol reb e pumoon nge reb e ppin, ma aram e kar taarebgow. Ere ku arrogon e mabgol nra tay fare Fak e Saf nra taarebnag Jesus Kristus ni Pilung nge fare 144,000 ni aram fare ‘pin ni nge mabgol.’ Re n’em nra buch nib ga’ fan e ra tababnag fa bin nib beech e am nra gagiyegnag e fayleng u lan 1,000 e duw.​—Rev. 20:6.

14-15. Mang e ke taarebrogonnag e Revelation ko guruy ni 21 fare 144,000 ngay? (Mu guy e sasing ni bay u wuru’ e re ke babyor ney.)

¹⁴ Bin migid e taarebrogonnag e Revelation ko guruy ni 21 fare 144,000 nga bbinaw nrib fel’ yaan ni ka nog e “bin nib beech e Jerusalem” ngay. (Rev. 21:2, 9) Re binaw nem e kan ubung nga daken 12 i malang ni kan yoloy fithingan “fa ragag nge l’agruw i apostel rok fare Fak e Saf ngay.” Mang fan ni mit owchen  John ko re n’ey? Ya bay reb fapi malang ni kan yoloy fithingan ngay. Rib manigil e biney e tow’ath ni kan pi’ ngak!​—Rev. 21:10-14; Efe. 2:20.

¹⁵ Re binaw ney e yugu ba thil yaan ko tin ka bay e binaw. Bay e kanawo’ riy ni kan ngongliy ko gol ni yigoo gol, nge 12 i garog ni kan ngongliy ko churuwo’ nu lan l’ugun e yar, ma yoror nge def riy e kan nunuwnag ko malang nib tolang puluwon, ma taareb rogon n’umngin nge radan. (Rev. 21:15-21) Machane bay ban’en ndariy ko re binaw nem! Mu tay fanam i yan ko n’en ni migid ni yog John ni gaar: “Da gguy ba tempel u lan e re binaw nem, ya tempel riy e aram Somol ni Got, ni Gubin ma Rayog Rok, nge fare Fak e Saf. Ma re binaw nem e dariy fan e yal’ ara pul ni nge gal’ daken, ya ramaen Got e be gal’ daken, ma fare Fak e Saf e ir e magal riy.” (Rev. 21:22, 23) Piin yad bang ko fa Bin nib Beech e Jerusalem e yad ra moy rok Jehovah. (Heb. 7:27; Rev. 22:3, 4) Ere Jehovah nge Jesus e yow e tempel ko re binaw nem.

16. Mang e ra buch ko girdi’ u nap’an fare Biyu’ i Duw Nra Gagiyeg Gil’ilungun Got riy?

¹⁶ Ba gel e felfelan’ ni ma tay e piin kan dugliyrad u nap’an ni yad ra lemnag rarogon e re binaw ney. Machane ku bay fan ni nge adag e piin yad be athapeg e par u fayleng ni ngar nanged murung’agen e re binaw ney. Nap’an fare Biyu’ i Duw Nra Gagiyeg Gil’ilungun Got riy, ma boor e tow’ath nra yibnag fa Bin nib Beech e Jerusalem nga fayleng. I guy John e pi tow’ath ney ni be yib i yib ni bod ba “lul’ ni bay e ran ko yafos riy.” Ma ra barba’ e re lul’ nem ma bay e “gek’iy ko yafos riy” ni bay yuwan ni “ma chuweg e liliy rok e pi nam.” (Rev. 22:1, 2) Urngin e girdi’ ni yad bay e ngiyal’ nem nra yib angin e pi n’em ngorad. Urngin e girdi’ ni yad be fol ni yad ra flont i yan. Ma ra chuw e m’ar, nge amith, ma dab ku un yor ni bochan e be kireban’uy.​—Rev. 21:3-5.

17. Mini’ e piin nra yib angin ngorad e Gagiyeg ni Yira Tay u Lan Fare Biyu’ i Duw nrogon ni be dag e Revelation 20:11-13?

¹⁷ Mini’ e piin nra yib angin ngorad e pi n’ey nrib manigil? Piin som’on nra yib angin ngorad e aram girdien fare ulung nib ga’ ni yad ra magey ni yad ba fos u tomuren e Armageddon, nge bitir ni gomanga yira gargeleg u lan e bin nib beech e fayleng. Machane ku be micheg e Revelation ko guruy ni 20 ni yira faseg  e piin kar m’ad. (Mu beeg e Revelation 20:11-13.) Piin nib yul’yul’ ni aram e piin nib “mat’aw” ni kar m’ad kafram nge piin “de mat’aw” nde yag ni ngar filed murung’agen Jehovah e yira fasegrad u roy u fayleng. (Acts 24:15, NW; John 5:28, 29) Ere gur, re n’ey e be yip’ fan ni urngin e girdi’ ni yira fasegrad ngar pared u roy u fayleng u nap’an e Gagiyeg ni Yira Tay u Lan Fare Biyu’ i Duw, fa? Danga’. Piin nra siyeged ni ngar pigpiggad ngak Jehovah u m’on ni ngar m’ad e dab ni fasegrad. Kan bing e kanawo’ ngorad ni ngar pigpiggad ngak Jehovah ma kar micheged ndariy rogon ni ngar uned ko par u Paradis u fayleng.​—Matt. 25:46; 2 Thess. 1:9; Rev. 17:8; 20:15.

18. Uw rarogon e girdi’ u fayleng u tungun fare 1,000 i duw?

¹⁸ Ra taw nga tungun fare 1,000 i duw, ma urngin e girdi’ ni yad bay u fayleng ni kar flontgad. Dakuriy be’ ni ka bay wenegan e denen rok ni ke af ngodad rok Adam. (Rom. 5:12) Ngiyal’ nem e kari chuw gubin i wenegan e denen rok Adam. Bochan e re n’ey, ma piin yad bay u fayleng e ra taw nga tungun fare 1,000 i duw ma kar flontgad.​—Rev. 20:5.

19. Mang fan nib t’uf ni ngan skengnag e girdi’ ko yay ntomur?

¹⁹ Gad manang ni par Jesus nib yul’yul’ ngak Got ngki mada’ ko ngiyal’ ni skengnag Satan. Machane gur, gubin e girdi’ ni yad ba flont nra m’agan’rad ngay ni ngar pared ni yad ba yul’yul’ u nap’an nra guy Satan rogon ni nge skengnagrad, fa? Ra be’ ma ir rok e ra dugliy rogon e fulweg nra pi’ ko re deer ney u nap’an ni yira pag Satan u kalbus u tungun fare 1,000 i duw. (Rev. 20:7) Piin yad ra par ni yad ba yul’yul’ u nap’an e bin tomur e skeng e ra yag e yafos ni manemus ngorad nge bin riyul’ e puf rogon. (Rom. 8:21) Piin yad ra togopuluw e yira unegrad ngak Satan nge pi moonyan’ rok ngan thangrad ndariy n’umngin nap’an.​—Rev. 20:8-10.

20. Uw rogon u wan’um fapi yiiy ni bay ko fare babyor ni Revelation ni yira ngat ngay?

²⁰ Uw rogon e lem rom e chiney ni kad mu’gad i weliy e n’en bay ko fare babyor ni Revelation? Gathi ga be felfelan’ ni ga be guy rogon nib l’ag e pi yiiy ney ngom ni yira ngat ngay? Ba mudugil nra k’aringem e re n’ey ni ngam pining boch e girdi’ ni ngar uned ngodad ko bin riyul’ e liyor ni gad be tay ngak e Got rodad. (Rev. 22:17) Chiney ni kad weliyed murung’agen e pi n’ey ni bayi buch boch nga m’on e gad ba felfelan’ ngay, maku gad baadag ni nga dogned fapi thin ni yog apostal John ni faani gaar: “Nge par riy ni bod ni ka mog. Moy, Somol Jesus!”​—Rev. 22:20.