1-2. Mang e ba ga’ ni ma buch u nap’an nra un boch e girdi’ ko taufe? Mang e gad ra weliy ko re article ney?

 BAY bayay ni kam guy ba ulung i girdi’ ni ngar uned ko taufe, fa? Nap’an nra pied e fulweg ko fa gal deer nni fith ngorad u m’on ni ngar uned ko taufe, ma rayog ni ngam nang u lamrad ni kar ra dugliyed u wan’rad ni ngar uned ko taufe. Rayog ni ngam guy ni kari felfelan’ chon e tabinaw rorad nge pi fager rorad. Nap’an nra bad u fithik’ e ran nga lang, mag rung’ag lingan e wayway ni yibe tay mag ra guyrad ma kar ra felfelan’gad. Ba ga’ nra reb e wik ma bokum biyu’ e girdi’ ni yad be ognag e yafos rorad ngak Jehovah Got yad be un ko taufe ni kar manged boch e Pi Mich rok.

² Me gur e faanra ga be lemnag ni ngam un ko taufe, ma aram e gab gagiyel u lan e re fayleng nib kireb ney ni gur be’ ni ga be guy rogon ni ngam “liyor ngak Got.” (Ps. 14:1, 2) Re article ney e fan ngom ndemtrug ko kab fel’ yangarem ara kam pilibthir. Machane piin kar uned ko taufe e ku yad baadag ni nge ayuwegrad e thin riy ni ngar ra dugliyed u wan’rad ni ngar pigpiggad ngak Jehovah ndariy n’umngin nap’an. Ere ngad lemnaged dalip i fan ni gad baadag ni ngad pigpiggad ngak Jehovah.

3. Mang fan nib t’uf e tin riyul’ nge tin nib mat’aw ko pi tapigpig rok Jehovah? (Psalm 119:128, 163)

³ I tay Jehovah chilen ko girdi’ rok ni nge ‘t’uf rorad e tin riyul’.’ (Zek. 8:19) I pi’ Jesus e athamgil nga laniyan’ pi gachalpen ni ngar nameged e tin nib mat’aw ban’en. (Matt. 5:6) Re n’ey e be yip’ fan nthingari turguy be’ u wan’ ni nge rin’ e tin nib mat’aw, mab fel’, mab beech u p’eowchen Got. Ba t’uf rom e tin riyul’ nge tin nib mat’aw, fa? Gamad manang nib t’uf rom. Ga ma fanenikay e ban nge urngin mit e kireb. (Mu beeg e Psalm 119:128, 163.) Be’ ni ma ban e ma folwok rok Satan ni ir e be gagiyegnag e re fayleng ney. (John 8:44; 12:31) Reb e ban’en ni ma nameg Satan e aram e nge yog boch ban’en nde riyul’ u murung’agen e ngachal  rok Jehovah Got nib thothup. Ka nap’an e togopuluw nni tay u Eden keb i mada’ ko chiney ni be wereg boch ban’en nde riyul’ u murung’agen e Got rodad. Ke yog ni Jehovah e kemus ni yigoo ir e ma lemnag ir, ma der yul’yul’ u rogon ni be gagiyeg, ma bay ban’en nib fel’ nder pi’ ko girdi’. (Gen. 3:1, 4, 5) Pi n’en nde riyul’ ni ke weliy Satan u murung’agen Jehovah e ka be k’aring e girdi’ ni ngar lemnaged boch ban’en nib kireb u murung’agen. Nap’an nra dugliy e girdi’ ndab ki ‘t’uf rorad e tin riyul’,’ ma aram e rayog ni nge waliyrad Satan ni ngar rin’ed urngin mit e ngongol nde mat’aw nge ngongol nib kireb.​—Rom. 1:25-31.

4. Uw rogon ni ke micheg Jehovah nib “yul’yul’ ma der ma ban”? (Kum guy e sasing.)

⁴ Jehovah e “ba yul’yul’ ma der ma ban,” ma ma fil e tin riyul’ ngak e piin yad ma t’ufeg. (Deut. 32:4) Aray rogon ni ma ayuwegrad ni ngar chuwgad u tan e pi ban rok Satan. Ku ma fil ko pi tapigpig rok rogon ni ngaur yul’yul’gad ma yad be rin’ e tin nib mat’aw. Re n’ey e ma ayuwegrad ni nge yib farad u wan’rad miki gapas lanin’rad. (Prov. 13:5, 6) Nap’an nim tabab i fil e Bible ma ke rin’ Jehovah e re n’ey ni fan ngom, fa? Kam fil nrogon kanawoen ni ma rin’ ban’en riy e aram e bin th’abi fel’ ni fan ngak gubin e girdi’ ni ka gab muun ngay. (Ps. 77:13) Aram fan ni ga baadag ni ngam rin’ e tin nib mat’aw u wan’ Got. (Matt. 6:33) Ka ga baadag ni ngam gagiyelnag e tin riyul’ mag micheg nde riyul’ e pi ban ni ka nog u murung’agen Jehovah ni Got rodad. Ere uw rogon nrayog ni ngam rin’ e re n’ey?

5. Uw rogon nrayog ni ngam par ni gab mudugil ni fan ko tin riyul’ nge tin nib mat’aw?

⁵ Rayog ni ngam mel’eg reb i kanawoen e yafos nra m’ug riy ni be lungum: “Gu be siyeg e pi ban rok Satan ma gu be par ni gub mudugil ni fan ko tin riyul’. Gu baadag ni nge Gagiyegnageg Jehovah mug rin’ e tin nib mat’aw u wan’.” Uw rogon ni ngam rin’ e re n’ey? Aram e ngam meybil ngak Jehovah ngam ognag e yafos rom ngak mag un ko taufe. T’ufeg rom ko tin riyul’ nge tin nib mat’aw e aram e n’en nra k’aringem ni ngam mel’eg ni ngam un ko taufe.

6. Mang boch i fan ni be ayuwegem e Psalm 45:4 ni nge t’uf Jesus Kristus rom?

⁶ Mang fan nib t’uf Jesus Kristus rom? Baaray boch i fan ko Psalm 45:4. b (Mu beeg.) Ba t’uf rok Jesus e tin riyul’, nge ngongol u fithik’ e  sobut’an’, nge tin nib mat’aw. Faanra ba t’uf rom e tin riyul’ nge tin nib mat’aw, maku aram fan nib t’uf Jesus Kristus rom. Am lemnag rogon nde rus Jesus ni nge par nib mudugil ni fan ko tin riyul’ nge tin nib mat’aw. (John 18:37) Machane uw rogon nib ga’ fan u wan’ Jesus e ngongol u fithik’ e sobut’an’?

7. Mang e ga baadag u rogon e sobut’an’ ni i dag Jesus?

⁷ Ma dag Jesus nib ga’ fan u wan’ e ngongol u fithik’ e sobut’an’ u daken e ngongol rok. Bod ni ma guy rogon ni ngan pining e sorok ngak e Chitamangin ma gathi ir. (Mark 10:17, 18; John 5:19) Uw rogon u wan’um rogon e sobut’an’ ni i dag Jesus? Ba mudugil ni be k’aringem e re n’ey ni nge t’uf Fak Got rom mu um folwok rok. Mang fan nib sobut’an’ Jesus? Bochan nib t’uf e Chitamangin rok ni ir be’ nib sobut’an’ ma ma folwok rok. (Ps. 113:5, 6; Heb. 1:3) Ere ba mudugil nib t’uf Jesus rom ni ir e en ni i m’ug pi fel’ngin Jehovah rok nrib fel’ rogon.

8. Mang fan ni gad baadag ni nge mang Jesus e Pilung rodad?

⁸ Gad baadag ni nge mang Jesus e Pilung rodad ni bochan e ir e En th’abi fel’ ni Nge Gagiyegnagdad. Jehovah e ir e skulnag Fak me dugliy ni nge mang ir e nge gagiyeg. (Isa. 50:4, 5) Kum lemnag rogon ni ke pag Jesus fan ir ke dag ni gad ba t’uf rok. (John 13:1) Bochan ni ir e Pilung rom, ma aram fan ni bay rogon ni nge t’uf rom. I yog ni piin riyul’ ni yad ma t’ufeg ara piin ma yog ni yad e fager rok e yad ma dag nib t’uf rorad u rogon ni yad ma fol ko pi n’en ni tay chilen. (John 14:15; 15:14, 15) Gad ra mang reb e fager rok Fak Jehovah, ma aram reb e tow’ath nib manigil!

9. Uw rogon ni taareb rogon e taufe ni ma un e piin Kristiano ngay ko taufe ni un Kristus ngay?

⁹ Reb e ban’en ni tay Jesus chilen e aram e nge un pi gachalpen ko taufe. (Matt. 28:19, 20) Ir e dag e kanawo’ u rogon ni ngan rin’ e re n’ey. Bay boch e kanawo’ nib thil rogon e taufe ni un ngay ko taufe ni un pi gachalpen ngay. (Mu guy fare kahol ni kenggin e “ N’en nib Thil ko Taufe ni Un Jesus Ngay nge Taufe ni Ma Un Pi Gachalpen Ngay.”) Machane ku bay boch e kanawo’ nib taareb rogon. Nap’an ni un Jesus ko taufe, ma aram e ke ognag ir ni nge rin’ e n’en nib m’agan’ e Chitamangin ngay. (Heb. 10:7) Ere ku arrogon pi gachalpen Kristus ni yad ma un ko taufe ya ngar daged ko girdi’ ni yoor ni kar ognaged e yafos rorad ngak Jehovah Got. Nap’an ni yad ra rin’ e re n’ey, ma aram e yad be dag ni n’en th’abi ga’ fan u lan e yafos rorad e ngar rin’ed e n’en nib m’agan’ Got ngay ma gathi n’en yad baadag. Ere yad be folwok ko n’en ni rin’ e Masta rorad.

10. Mang fan nsusun e nge k’aringem e t’ufeg rom ngak Jesus ni ngam un ko taufe?

¹⁰ Ba m’agan’um ngay ni Jesus e ir Fak Jehovah ni kari maagirag rok, ma ir e ke dugliy Got ni nge mang Pilung rodad. Ga manang ni ir be’ nib sobut’an’, ma rib fel’ rogon ni ma m’ug rarogon e Chitamangin rok. Kam fil ni i pi’ gan e piin kar m’ad ko bilig, ma be fal’eg laniyan’ e piin ke mulan’rad, ma be golnag e piin nib m’ar. (Matt. 14:14-21) Ka ga be guy rogon ni be pow’iy e ulung rok e ngiyal’ ney. (Matt. 23:10) Maku reb e, ga manang ni ka boor ban’en nra rin’ boch nga m’on ni ir e Pilung u Gil’ilungun Got. Ere uw rogon nrayog ni ngam dag nib t’uf rom? Aram e ngam folwok ko n’en ni i rin’. (John 14:21) Reb e ban’en nrayog ni ngam rin’ nsom’on e aram e ngam ognag e yafos rom ngak Jehovah ngam un ko taufe.

11. Mang e bin th’abi ga’ i fan ni ngam un ko taufe, ma mang fan?

¹¹ Mang e bin th’abi ga’ i fan ni ngam un ko taufe? I tamilangnag Jesus e bin th’abi ga’ fan e motochiyel rok Got u nap’an ni gaar: “Thingari t’uf rom Somol, ni ir e Got rom, u polo’ i gum’irchaem, ngu polo’ i lanin’um, ngu polo’ i lem rom, ngu polo’ i gelngim.” (Mark 12:30) Be dag e pi thin ney gelngin e t’ufeg rom ngak Got, fa?

12. Mang fan nib t’uf Jehovah rom? (Kum guy e sasing.)

¹² Boor fan ni nge t’uf Jehovah rodad. Bod ni kam nang ni ir “enggin gubin e yafos,” ma Ir e Be Pi’ ‘urngin e tin nib fel’ ngodad nge urngin e tow’ath nrib manigil.’ (Ps. 36:9, BT; Jas. 1:17) Gubin ban’en nib manigil ni ma yibnag e felfelan’ ngom, ma ke yib rok e Got rodad nib gol ma gad ba t’uf rok.

13. Mang fan ni fare biyul e aram reb e tow’ath nrib manigil?

¹³ Fare biyul e aram reb e tow’ath nrib manigil ni ke pi’ Jehovah ngodad. Mang fan nrayog ni nga dogned e re n’ey? Am lemnag gelngin feni chugur e tha’ u thilin Jehovah nge Fak. I gaar Jesus: “En ni Chitamangiy e gub t’uf rok” mab “t’uf rog e en ni Chitamangiy.” (John 10:17; 14:31) Ri gel e chugur ko tha’ u thilrow u lan bokum bilyon e duw ni ur moyew u taabang. (Prov. 8:22, 23, 30) Am lemnag gelngin e amith ni tay laniyan’ Got u nap’an ni pag Fak ni nge gafgow nge yim’. Bochan nrib t’uf e girdi’ rok Jehovah ni gab muun ngay, ma aram fan ni pi’ fak nib t’uf rok ni nge mang maligach ya nge yag ni mab e kanawo’ ngom nge yugu boch e girdi’ ni nge yag e yafos ni manemus ngomed. (John 3:16; Gal. 2:20) Ireray e bin th’abi ga’ i fan ni nge t’uf Got rom.

14. Mang e n’en th’abi fel’ nrayog ni ngam nameg u lan e yafos rom?

¹⁴ Nap’an ni yoor ban’en nim fil u murung’agen Jehovah, ma aram mi ri gel feni t’uf rom. Ba mudugil ni ga baadag ni nge chugur e tha’ u  thilmew e chiney i yan nga m’on. Rayog ni ngam rin’ e re n’ey. Be pi’ e athamgil ngom ni ngam felfelan’nag gum’irchaen. (Prov. 23:15, 16) Rayog ni ngam rin’ e re n’ey u daken e thin nge ngongol rom. N’en ga be rin’ ko yafos rom e ra m’ug riy nriyul’ nib t’uf Jehovah rom. (1 John 5:3) Ma ireray e n’en th’abi fel’ nrayog ni ngam nameg u lan e yafos rom.

15. Uw rogon nrayog ni ngam dag nib t’uf Jehovah rom?

¹⁵ Uw rogon nrayog ni ngam dag nib t’uf Jehovah rom? Som’on e ngam ognag e yafos rom ngak e bin riyul’ e Got u daken e meybil. (Ps. 40:8) Ngemu’ mag dag ko girdi’ ni yoor ni kam ognagem ngak Got ni aram e ngam un ko taufe. Kad weliyed u tabolngin e re article ney ni ga ra felfelan’ u nap’an ni ga ra un ko taufe, maku aram ban’en nib ga’ fan ni ga ra rin’ u lan e yafos rom. Aram e ngiyal’ ni ke thil rogon e par rom ya gathi ka ga be yan nga tabon lanin’um, ya ga be yan nga laniyan’ Jehovah. (Rom. 14:8; 1 Pet. 4:1, 2) Ga ra lemnag ma dabisiy ni ireray ban’en nrib ga’ fan ni ga ra dugliy, ma riyul’ e re n’ey. Machane aram rogon nra yag e bin th’abi fel’ e yafos ngom. Ni uw rogon?

16. Uw rogon nra tow’athnag Jehovah e piin yad ra fanay e yafos rorad ni ngar pigpiggad ngak nrogon ni be yog e Psalm 41:12?

¹⁶ Jehovah e ir e En th’abi gol ni bay. Demtrug e n’en ni ga ra pi’ ngak ma ka boor e tin nra pi’ ni nge yan nga lon. (Mark 10:29, 30) Yugu aram rogon ni ka gad be par u lan e re fayleng nib kireb ney, ma ra ayuwegem ni ngam par ni gab felfelan’. Machane gathi aram e ke mus u rom, ya nap’an ni ga ra un ko taufe ma aram e rayog ni ngam pigpig ngak e Chitamam nib t’uf rom ndariy n’umngin nap’an. Ku ra ulul ni nge gel e t’ufeg e thilmew. Ma ra munmun ma ga ra par ndariy n’umngin nap’an ni bod ir.​—Mu beeg e Psalm 41:12.

17. Mang e rayog ni ngam pi’ ngak Jehovah ndariy rok?

¹⁷ Nap’an ni ga ra ognag e yafos rom ngak Got ngam un ko taufe, ma aram e bay ban’en nib ga’ fan nrayog ni ngam pi’ ngak e Chitamam. Urngin ban’en nib manigil ni bay rom nge urngin ban’en ni ke buch rom ni kam felfelan’ ngay, ma ir e ke yib rok. Ere n’en nrayog ni ngam rin’ e aram e ngam pi’ ban’en ko En nib Milfan e tharmiy nge fayleng ngak ndariy rok. Re n’em e aram e ngam pigpig ngak u fithik’ e yul’yul’. (Job 1:8;  Prov. 27:11; Rom. 11:35, 36) Dariy e maruwar riy ni ireray e n’en th’abi fel’ ni ga ra rin’ ko yafos rom! Ere bin th’abi fel’ i fan ni ngam un ko taufe e bochan nib t’uf Jehovah rom.

18. Mang boch e deer nrayog ni ngam fithem riy?

¹⁸ Ere uw rogon ni ga ra pi’ e fulweg ko fare deer ni be gaar, Ga ra un ko taufe fa danga’? Kemus ni yigoo gur e rayog ni ngam pi’ e fulweg ko re deer ney. Machane sana n’en nra ayuwegem e ngam fithem ni nge lungum, ‘Mang fan ndawor gu un ko taufe?’ (Acts 8:36) Dab mu pagtalin fa dalip i n’em ni kad weliyed. Som’on e ba t’uf rom e tin riyul’ nge tin nib mat’aw. Ere mu fithem ni nge lungum, ‘Gu baadag ni nge taw ko ngiyal’ ni gubin e girdi’ nra u rogned e tin riyul’ ma yad be rin’ e tin nib mat’aw, fa?’ Bin migid e ba t’uf Jesus Kristus rom. Ere mu fithem ni nge lungum, ‘Gu baadag ni nge mang Fak Got e Pilung rog mug folwok rok, fa?’ Ma bin dalip ni aram e bin th’abi ga’ fan e ba t’uf Jehovah rom. Ere mu fithem ni nge lungum, ‘Gu baadag ni nggu felfelan’nag Jehovah ni aram e nggu pigpig ngak, fa?’ Faanra fulweg rom ko pi deer ney e arrogon, me ere mang ndab mu un ko taufe e chiney?​—Acts 16:33.

19. Mang fan nsusun e dab mu tuntun ni ngam un ko taufe? Mu susunnag. (John 4:34)

¹⁹ Faanra be maruwar u wan’um ko ngam un ko taufe fa danga’, ma ngam lemnag ba fanathin ni weliy Jesus. (Mu beeg e John 4:34.) Mu tay fanam i yan riy ni yog Jesus ni n’en nib m’agan’ e Chitamangin ngay ni be rin’ e taareb rogon ko ggan. Mang fan? Ya ggan e ba fel’ ngodad. Manang Jesus ni gubin ban’en ni ma yog Jehovah ni ngad rin’ed e ba fel’ ngodad. Dabun Jehovah ni ngad rin’ed ban’en ni gad ra gafgow riy. Ere gur, ba m’agan’ Jehovah ngay ni ngam un ko taufe, fa? Arrogon. (Acts 2:38) Ere rayog ni nge pagan’um ngay ni faan ga ra fol ko re n’ey ni kan tay chilen ni ngan rin’, ma ra yib angin ngom. Faanra dab mu magagawon ni ngam kay e tin th’abi fel’ e ggan ni kan pi’ ngom, me ere mang fan ni ngam tuntun ni ngam un ko taufe?

20. Mang e gad ra weliy ko bin migid e article?

²⁰ Mang fan ndawori un boch e girdi’ ko taufe? Boor e girdi’ e sana ra lungurad, “Dawori bung rogog ni nggu un ko taufe e chiney.” Bin riyul’ riy e re n’ey ni ngam ognag e yafos rom ngak Jehovah ngam un ko taufe e aram e n’en th’abi ga’ fan ni ga ra dugliy ni ngam rin’ u lan e yafos rom. Ere ba t’uf ba ngiyal’ ni ngam fal’eg i lemnag e re n’ey mag athamgil ya nge yag ni bung rogom ni ngam un ko taufe. Machane faanra ri ga baadag ni ngam un ko taufe, ma mang e rayog ni ngam rin’ e chiney? Gad ra weliy e fulweg ko re deer ney ko bin migid e article.