1. Mang boch ban’en nib ga’ ni ma k’aring e marus ko girdi’?

 AM LEMNAG e pi n’en baaray ni ke buch rok boch e Pi Mich Rok Jehovah. Nestor nge María ni leengin e yow baadag ni nga ranow ra pigpiggow ko gin nib t’uf e ayuw riy. * Ra ngar rin’ew e re n’ey mab t’uf ni ngar thilyegew rogon e par rorow. Machane rrusgow nri chey ma dab ra felfelan’gow nga rogon e par rorow ni ke lich e salpiy rorow. Nap’an ni mang Biniam reb e Pi Mich Rok Jehovah u reb e nam ni yima togopuluw ko maruwel rodad riy, me nang nrayog ni ngan gafgownag ni bochan e ir reb e girdi’ rok Got. Re n’ey e k’aring e marus ngak. Machane kub gel e marus ni tay ko n’en nra rin’ chon e tabinaw rok u nap’an ni yad ra nang murung’agen e biney e teliw ni ka fini un ngay. Valérie e yib ba mit e cancer ngak nrib mo’maw’ ni ngan gol riy, mab mo’maw’ ni nge pirieg reb e togta ni ma seyey nra tayfan e n’en ke fil u Bible u murung’agen e racha’ ni ke mich u wan’. Ere rusnag ir nri yim’.

2. Mang fan nib t’uf ni ngad filed rogon ni ngad gelgad ko marus rodad?

² Bay ba ngiyal’ ni kam rus nga boch ban’en ni aray rogon, fa? Boor i gadad e ke buch e re n’ey rok. Faanra dab da filed rogon ni ngad gelgad ko marus rodad, ma rayog ni ngad dugliyed boch ban’en nde puluw nrayog ni nge magawonnag e tha’ u thildad Jehovah. Aram e n’en baadag Satan. Ku ma gay rogon ni nge fanay e pi n’en gad ma rus ngay ni nge k’aringdad ni ngad th’abed e pi motochiyel rok Jehovah nib muun ngay e n’en kan tay chilen ngodad ni aram e ngad machibnaged fare thin nib fel’. (Rev. 12:17) Satan e ir be’ nrib kireb, ma der ma runguyey, mab gel gelngin. Machane rayog ni ngam ayuwegem rok. Ni uw rogon?

3. Mang e ra ayuwegdad ni ngad gelgad ko marus rodad?

³ Nap’an nra mich u wan’dad ni gad ba t’uf rok Jehovah ma gubin ngiyal’ nra ayuwegdad, ma aram e dabiyog ni nge k’aring Satan  e marus ngodad. (Ps. 118:6) Bod ni en ni yoloy e Psalm 118 e i mada’nag boch e magawon nib gel e mochuch ni i tay riy. Boor e toogor rok nib muun boch e girdi’ ngay nib tolang e liw rorad (verse 9, 10). Yu ngiyal’ e i mada’nag boch ban’en ni i tomalnag laniyan’ (verse 13). Ku bay ba ngiyal’ ni fonownag Jehovah nib gel (verse 18). Yugu aram rogon me tang ni gaar: “Dab gu rus.” Mang e k’aring ni nge par nib pagan’? Manang ni yugu aram rogon ni ke fonownag Jehovah, machane ri kab t’uf rok. Ba mich u wan’ ndemtrug e re miti magawon nra mada’nag, ma Got rok nib t’uf rok e gubin ngiyal’ nra ayuweg.​—Ps. 118:29.

4. Mang boch ban’en ni ma k’aring e marus ngodad nrayog ni ngad gelgad ngay ni faanra ba mich u wan’dad ni gad ba t’uf rok Got?

⁴ Ba t’uf ni nge mich u wan’dad ni gad ba t’uf rok Jehovah. Re n’ey e ra ayuwegdad ni ngad gelgad nga dalip ban’en nib ga’ ni ma k’aring e marus ngodad ni aram e, (1) gad be rus nri de yag ni ngad pied e tin nib t’uf ko tabinaw rodad, (2) marus ko girdi’, nge (3) gad be rus ni ngad m’ad. Fapi cha’ ni kan weliy murung’agrad ko bin som’on e paragraph e yag ni ngar gelgad ko pi n’en yad be rus ngay ni bochan e ba mich u wan’rad ni yad ba t’uf rok Got.

5. Mang boch ban’en nrayog ni nge k’aring e magafan’ ngak reb i lolugen e tabinaw? (Mu guy e sasing ni bay u wuru’ e re ke babyor ney.)

⁵ Be’ ni lolugen e tabinaw nib Kristiano e ba ga’ fan u wan’ e n’en nib milfan ngak ni aram e nge pi’ e tin nib t’uf ko tabinaw rok. (1 Tim. 5:8) Faanra gur reb i lolugen e tabinaw, ma sana rayog ni ka i magafan’um nri chey min n’agem ko maruwel rom u nap’an fare m’ar ni ke garer. Sana ka i magafan’um nri de yag ni ngam yognag e ggan nge bang ni nge par chon e tabinaw rom riy. Fa reb e ka ga be magar nrin n’agem ko maruwel rom ma daki yag ni ngam pirieg yugu reb e maruwel. Ku rayog ni kam lemnag ndabiyog ni nge fel’ e par romed e tabinaw rom ni ke lich e salpiy ni be yag ngomed ni bod e n’en ni lemnag Nestor nge María. Boor e girdi’ ni ke yag ni nge talegrad Satan ndab kur pigpiggad ngak Jehovah ni bochan e aray rogon e lem rorad.

6. Mang e ma guy Satan rogon ni nge k’aringdad ni ngad lemnaged?

⁶ Ma guy Satan rogon ni nge k’aringdad ni ngad lemnaged ndad t’ufgad rok Jehovah ma dabi ayuwegdad ni ngad yognaged e tin nib t’uf ko tabinaw rodad. Bochan e re n’ey ma rayog ni ngad lemnaged nib t’uf ni ngad rin’ed urngin ban’en nrayog rodad ya nge dabin n’agdad ko maruwel, ni kub muun ngay boch ban’en nrayog ni nge kirebnag e tha’ u thildad Got.

7. Mang e ke micheg Jesus ngodad?

⁷ Dariy be’ ni manang e en Chitamangiy nib fel’ rogon ni bod Jesus, ma ke micheg ngodad ni Got rodad e “manang e n’en nthingari yog [ngodad] u m’on ndawor [da] ninged ngak.” (Matt. 6:8) Ku manang Jesus nib m’agan’ Jehovah ngay ni nge pi’ e tin nib t’uf rodad. Gadad e piin Kristiano e gad bang ko tabinaw rok Jehovah. Ere bochan ni ir Lolugen e tabinaw rodad, ma rayog ni nge pagan’dad ngay nra rin’ e n’en ke yog ngak urngin i lolugen e tabinaw ni ngar rin’ed ko 1 Timothy 5:8.

8. (a) Mang e ra ayuwegdad ni nge dab kud rusgad nri de yag ni ngad pied e tin nib t’uf ko tabinaw rodad? (Matthew 6:31-33) (b) Uw rogon nrayog ni ngad folwokgad ko fa wu’ i mabgol ni bay yaarow ko sasing ni yad be abich reb e walag nib pin u taabang?

⁸ Nap’an nra mich u wan’dad ni gad ba t’uf rok Jehovah ma kub t’uf chon e tabinaw rodad rok, ma aram e ra pagan’dad ngay nra pi’ e tin nib t’uf rodad. (Mu beeg e Matthew 6:31-33.) Baadag Jehovah ni nge pi’ e tin nib t’uf rodad, ma ir e En Ma Pi’ e tin nib t’uf rodad nib gol ma gad ba t’uf rok! Nap’an ni sunmiy e fayleng, ma gathi kemus ni pi’ e tin nib t’uf nra ayuwegdad ni ngad pared ni gad ba fos, ya ki sunmiy boor  ban’en nra yibnag e felfelan’ ngodad. (Gen. 2:9) Mus ni faanra chuuw i n’en bay rodad e kemus nib gaman ni ngad afgad riy ko bin migid e rran, ma dab da paged talin ni chuuw i n’en bay rodad e be yag ni ngad afgad riy. Dariy ba ngiyal’ ni ke digeydad Jehovah nde pi’ e tin nib t’uf rodad. (Matt. 6:11) Thingar dab da paged talin ni n’en nra pi’ Got ngodad e chiney nge boch nga m’on e dabi chugur ni nge taareb rogon ko n’en gad be pag fadad riy e chiney. Ireray e n’en ni tamilang u wan’ Nestor nge María.​—Isa. 65:21, 22.

9. Mang e rayog ni ngam fil ko n’en ni rin’ Nestor nge María?

⁹ Nestor nge María e immoy e naun nge maruwel rorow u Colombia nib fel’. Rognew ni lungurow, “Gu lemnagew ni nggu momnagew rogon e par romow ma gamow yoornag e tin gamow be rin’ ni fan ngak Jehovah, machane gu rusgow nri chey ma dab gu felfelan’gow nga rogon e par romow ni ke lich e salpiy romow.” Ere mang e ayuwegrow ni nge dab kur rusgow? Ra lemnagew urngin e kanawo’ ni ke micheg Jehovah riy ngorow ni yow ba t’uf rok. Ere ra talgow ko maruwel rorow nib fel’ puluwrow riy ya ba mich u wan’row ni gubin ngiyal’ nra ayuwegrow. Ra piew e naun rorow ni chuway’ ma ranow ra parew nga bang ko re nam nem nib t’uf boch e tamachib riy. Uw rogon u wan’row e n’en kar dugliyew? I gaar Nestor, “Kug guyew nib riyul’ fare thin ko Matthew 6:33, ya gubin ngiyal’ ni bay e tin nib t’uf ko par romow mab gel boch e felfelan’ romow e chiney ko kafram.”

10. Mang fan ni ma rus e girdi’ ngak yugu boch e girdi’?

¹⁰ Kab kakrom i yib ni ma gafgownag e girdi’ yugu boch e girdi’. (Ekl. 8:9) Bod ni bay boch e girdi’ ni yad ma fanay mat’awrad ni ngar gafgownaged yugu boch e girdi’, ma girdi’ nib kireb e yad ma li’ yugu boch e girdi’, ma bay boch e bitir u skul ni yad ma gafgownag boch e bitir ni yad nga skul, ma boch e girdi’ e ba gel e gafgow ni yad ma tay ngak girdien e tabinaw rorad. Aram fan ni ma rus e girdi’ ngak yugu boch e girdi’! Ere uw rogon ni ma guy Satan rogon ni nge fanay e re n’ey ni nge bannagdad?

11-12. Uw rogon ni ma fanay Satan e marus ko girdi’ ni nge bannagdad?

¹¹ Ma guy Satan rogon ni nge k’aringdad ni ngad rusgad ko girdi’ ya ngad talgad ko machib fa reb e dab kud rin’ed boch ban’en ni be yog Jehovah ni ngad rin’ed. Ke fanay boch e am ni ngar taleged e maruwel rodad mar gafgownaged gadad. (Luke 21:12; Rev. 2:10) Boor e girdi’ ko re fayleng rok Satan ney ni yad ma wereg  boch ban’en u murung’agen e Pi Mich Rok Jehovah nde puluw maku de riyul’. Piin ma mich e pi n’ey u wan’rad e rayog ni ngaur moningniged gadad, ara ra lied gadad. (Matt. 10:36) Ere gur, gad be gin ko pi ban rok Satan ney, fa? Danga’, ya ku aray e pi n’en ni i fanay u nap’an e bin som’on e chibog.​—Acts 5:27, 28, 40.

¹² Gathi kemus ni marus ni yima tay nri chey me chel e am nge gafgownagey e aram e n’en ma fanay Satan ni nge bannagey, ya ku bay boch e girdi’ ni yad ma rus ko n’en nra lemnag chon e tabinaw rorad u nap’an yad ra nang ni kar manged boch e Pi Mich. Yu ngiyal’ e kab gel e marus rorad ko re n’ey ko bin ngar rusgad nri li’rad be’. Rib t’uf rorad girdien e tabinaw rorad ma yad baadag ni ngar nanged Jehovah me t’uf rorad. Ma kireban’rad u nap’an yad ra rung’ag boch ban’en ni yad be yog ni be darifannag e bin riyul’ e Got nge pi tapigpig rok. Yugu aram rogon, ma bay boch i girdien e tabinaw ni ur togopuluwgad ni yan i boch nga tomuren mar bad ko tin riyul’. Machane uw rogon ni faanra ke yog girdien e tabinaw rodad ni ngad math’gad ni bochan e michan’ rodad? Mang e gad ra rin’?

13. Faanra ba mich u wan’dad ni gad ba t’uf rok Got, ma uw rogon nra ayuwegdad u nap’an nra togopuluw chon e tabinaw rodad ngodad? (Psalm 27:10)

¹³ Fapi thin nrib manigil ni bay ko Psalm 27:10 e rayog ni nge fal’eg lanin’dad. (Mu beeg.) Ra ud lemnaged gelngin ni gad ba t’uf rok Jehovah, ma rayog ni ngad pared nib pagan’dad ni yugu aram rogon ni yibe togopuluw ngodad. Kub pagan’dad ngay nra tow’athnagdad ko athamgil ni gad be tay. Dariy be’ nrayog ni nge pi’ urngin ban’en nib t’uf ko par rodad, me ayuwegdad ni ngad pared nib gapas lanin’dad ma gad ba felfelan’, ma gad ba chugur ngak Got ni bod rogon nrayog rok Jehovah! Aram e n’en ni buch rok Biniam.

14. Mang e rayog ni ngam fil ko n’en ni rin’ Biniam?

¹⁴ Biniam e mang reb e Pi Mich Rok Jehovah ni yugu aram rogon ni manang nrayog ni ngan gafgownag nib gel. Am lemnag rogon ni yag ni nge dabki rus ko girdi’ ni bochan e manang nib t’uf rok Jehovah. I gaar: “Kab gel e gafgow nni tay ngog nga rogon nug lemnag. Machane kab gel e marus nug tay ko togopuluw nra yib ngog u lan e tabinaw rog ko gafgow ni be tay e am ngog. Gu magar nrug kirebnag laniyan’ e chitamag ni gathi ir reb e Pi Mich ma dabki tay chon e tabinaw rog fag ni bochan e kug dugliy ni nggu mang reb e Pi Mich Rok Jehovah.” Machane ba mich u wan’ Biniam ni Jehovah e gubin ngiyal’ ni ma ayuweg e piin yad ba t’uf rok. I gaar: “Gu lemnag rogon ni ke ayuweg Jehovah boch e girdi’ ni ngar athamgilgad ni yugu aram rogon ni  ke buchuuw e salpiy ko nam rorad, mab gel e laniyan’, ma be cham e girdi’ u toobrad. Gu nang ni faan gu ra par ni gub yul’yul’ ngak Jehovah, ma ra tow’athnageg. Nap’an nni koleg ni boor yay ngaun gafgownageg, mug guy ni Jehovah e gubin ngiyal’ nra ayuwegdad ni faan gad ra par ni gad ba yul’yul’ ngak.” I mang Jehovah ba Matam ngak Biniam, ma girdi’ rok e ra manged chon e tabinaw rok.

15. Mang fan ni gad ma rus ni ngad m’ad?

¹⁵ Be yog e Bible ni yam’ e aram reb e toogor. (1 Kor. 15:25, 26) Rayog ni ngad rusgad nri chey mad m’ad nib ga’ ni faanra kad m’argad ni gad ba ubchiya’ ara ke m’ar be’ nib t’uf rodad. Mang fan ni gad ma rus ni ngad m’ad? Bochan ni ke sunmiydad Jehovah ni gad baadag ni ngad pared ndariy n’umngin nap’an. (Ekl. 3:11) Machane ra gad be rus ni ngad m’ad ma rayog ni nge ayuwegdad ni ngad rin’ed boch ban’en ni nge ayuweg e yafos rodad. Bod nrayog ni nge k’aringdad ni ngaud ked e ggan nib fel’ nga fithik’ i dowdad ma gad be mithmith, ma nap’an nra t’uf ni nga darod da guyed e togta ara ngad unumed e falay ma gad ra rin’, maku ra ud siyeged boch ban’en nra tay e yafos rodad nga thatharen e riya’.

16. Bochan ni gad be rus ni ngad m’ad, ma uw rogon ni ma fanay Satan e re n’ey ni nge bannagdad?

¹⁶ Manang Satan nib ga’ fan e yafos rodad u wan’dad. Machane ma yog ni gad ra pag fan gubin ban’en nib muun ngay e tha’ u thildad Jehovah ya nge yag nda ayuweged e yafos rodad. (Job 2:4, 5) De puluw e n’en ma yog Satan! Machane bochan ni ir e en “bay e yam’ u pa’,” ma aram fan ni ma guy rogon ni nge fanay e re n’ey ni gad ma rus ni ngad m’ad ni nge k’aringdad ni ngad digeyed Jehovah. (Heb. 2:14, 15) Piin yad bay u tan gelngin Satan e bay yu ngiyal’ ni yad ma yog ni yad ra thang e fan rodad ni faanra dab ddigeyed e michan’ rodad. Ma yu ngiyal’ e faanra kad m’argad ara kad maad’adgad nib tomgin, ma rayog ni nge fanay Satan e re n’ey ni nge k’aringdad ni ngad rin’ed ban’en nib togopuluw ko michan’ rodad. Rayog ni nge towasariydad e togta ara girdi’ rodad ndar nanged e tin riyul’ ni ngad fanayed e racha’ ni ban’en nib togopuluw ko motochiyel rok Got. Fa reb e rayog ni nge k’aringdad be’ ni nge m’agan’dad ngab mit e tafalay nib togopuluw ko pi kenggin e motochiyel u Bible.

17. Mang fan ndariy rogon ni ngad rusgad ko yam’ nrogon nib puluw ko Roma 8:37-39?

¹⁷ Yugu aram rogon ni dubdad ni ngad m’ad, machane gad manang ni ka gad ra par ni gad ba t’uf rok Jehovah ni yugu aram rogon ni kad m’ad. (Mu beeg e Roma 8:37-39.) Nap’an nra yim’ e pi fager rok Jehovah, ma ma tayrad u laniyan’ ni gowa ka yad ba fos. (Luke 20:37, 38) Ma athapeg ni nge fasegrad ko yam’. (Job 14:15) Ba ga’ puluwdad ni ke pi’ ya nge “yog e yafos ndariy n’umngin nap’an” ngodad. (John 3:16) Gad manang nri gad ba t’uf rok Jehovah. Ere nap’an ni gad ra m’ar ara buch ban’en rodad nrayog ni ngad m’ad riy, ma gad ma taga’ ngak Jehovah ni nge fal’eg lanin’dad, me pi’ e gonop ngodad, nge gelngidad ko bin ngad digeyed. Ireray e n’en ni rin’ Valérie nge pumoon rok.​—Ps. 41:3.

18. Mang e rayog ni ngam fil ko n’en ni rin’ Valérie?

¹⁸ Nap’an ni gaman 35 e duw rok Valérie, me yib ba mit e cancer ngak ni gathi ri ma yib ko girdi’ ma rib mo’maw’ ni ngan gol riy. Am lemnag rogon ni ayuweg e t’ufeg ni nge dabki rus nri yim’. I gaar: “Rug gingow figirngig u nap’an nug nang ni ke yib e cancer ngog. Ba t’uf ni ngan seyeg ya nge dab gum’ ko re m’ar ney. Boor e togta ni yad ma sey e girdi’ nug non ngorad, machane dariy bagayad ni m’agan’ ngay ni nge seyeg ndabi pi’ e racha’ ngog. Gu rus, machane gu siyeg ni nggu fanay e racha’ ni bochan e ba togopuluw ko motochiyel rok Got! N’umngin  nap’an e yafos rog ni ke dag Jehovah ngog nri gub t’uf rok. Ere ireray e ngiyal’ ni nggu dag ngak nib t’uf rog. Gubin yay ni yira yog ban’en nib kireb ngog u murung’agen e m’ar rog, ma ma k’aringeg ni nggu dugliy u wan’ug ni nggu felfelan’nag Jehovah ma dab gu pag Satan ni nge gel. Munmun me yag ni ngan seyeg nda gu fanay e racha’. Yugu aram rogon nde chuw e m’ar rog, machane gubin ngiyal’ ni ma pi’ Jehovah e n’en nib t’uf romow. Bod nnap’an e muulung nni tay u m’on ni nggu nang ni kug m’ar, ma aram min fil fare article ni kenggin e ‘Ngan Yan u Fithik’ e Magawon nib Gel e Ngiyal’ Ney nib Mudugil Lanin’uy.’ * Re article ney e ri fal’eg lanin’mow. Boor yay ni ug sulow ngaug beegew. Bochan ni gamow ma beeg boch e article ni bod e re article ney ma da gur digeyew e machib nge muulung, ma aram e n’en ke ayuwegmow ni nggu parew nib gapas lanin’mow ma gamow dugliy boch ban’en nib fel’ ni nggu rin’ew.”

19. Mang e bayi buch ndab ki n’uw nap’an?

¹⁹ Bochan e ayuw rok Jehovah, ma ke yag ko pi Kristiano u ga’ngin yang e fayleng ni ngar gelgad nga boch e magawon nib mo’maw’ mar togopuluwgad ngak Moonyan’. (1 Pet. 5:8, 9) Ere ku rayog ni ngam rin’ e re n’ey. Dabki n’uw nap’an ma ra l’og Jehovah Jesus nge piin yad ra un ngak ko gagiyeg ni ngar ‘kirebnaged e maruwel rok’ Moonyan’. (1 John 3:8) Tomuren, ma girdi’ rok Got ni yad be pigpig ngak u fayleng e ‘dakuriy e gafgow nge marus nra yib ngorad.’ (Isa. 54:14; Mik. 4:4) Machane chiney ndawori taw ko ngiyal’ nem e ba t’uf ni ngad athamgilgad u rogon nrayog rodad ni ngad gelgad ko pi n’en ma k’aring e marus ngodad.

20. Mang e ra ayuwegdad ni ngad gelgad ko pi n’en ma k’aring e marus ngodad?

²⁰ Thingar da ululgad i gelnag rogon nib pagan’dad ni ma t’ufeg Jehovah e pi tapigpig rok ma ma yororiyrad. Rayog ni ngad rin’ed e re n’ey ni faanra ud fal’eged i lemnag rogon ni i yororiy Jehovah e pi tapigpig rok kakrom ma gad be weliy murung’agen e pi n’ey. Ku rayog ni ngad lemnaged rogon ni ke ayuwegdad u nap’an ni kad mada’naged boch e magawon nib gel e mochuch ni kad ted riy. Faanra ayuwegdad Jehovah, ma aram e rayog ni ngad gelgad ko pi n’en ma k’aring e marus ngodad!​—Ps. 34:4.