1. Mang e rayog ni nge pagan’dad ngay, ma mang fan?

 GA RA guy rogon e pi n’en be buch u roy u fayleng, ma gur, ba mo’maw’ ni nge mich u wan’um nra fel’ rogon e par rodad boch nga m’on, fa? Ke war e t’ufeg u thilin e girdi’ u lan e tabinaw. Be gel e damumuw ko girdi’ i yan ma ra be’ ma yigoo ir e be lemnag ir. Boor e girdi’ nib mo’maw’ ni nge pagan’rad ko piin yad ma yog e thin. Machane pi n’ey e rayog ni nge pi’ e pagan’ ngom. Mang fan? Bochan ni be ngongol e girdi’ ni bod rogon nni weliy u lan ba yiiy ni murung’agen e “tin tomren e rran.” (2 Tim. 3:1-5) Be’ nib puluw rogon ni ma lem e dabiyog ni nge yog nder lebug e re yiiy ney. Ma rogon ni be lebug e be micheg ni ke tabab Kristus Jesus ko gagiyeg u Gil’ilungun Got ni ir e Pilung. Machane gathi kemus e re yiiy ni be weliy murung’agen Gil’ilungun Got, ya ka boor. Ere faan gad ra weliy murung’agen yugu boch e yiiy ni ke lebug u lan e pi duw ni ke yan, ma ra gelnag e michan’ rodad.

2. Mang e gad ra weliy ko re article ney, ma mang fan? (Mu weliy murung’agen e sasing ni bay u wuru’.)

² Gad ra weliy ko re article ney murung’agen (1) reb e yiiy nra ayuwegdad ni ngad nanged e ngiyal’ ni tabab Gil’ilungun Got ko gagiyeg, (2) boch e yiiy nra ayuwegdad ni ngad nanged ni ke Pilung Jesus u Gil’ilungun Got u tharmiy, nge (3) boch e yiiy ni be weliy rogon ni yira thang e piin yad be togopuluw  nga Gil’ilungun Got. Gad ra fil ni pi yiiy ney e bod bangi puzzle ni yibe chamiy ni nge dag yaan e gin gad bay riy u ngal’an e pi n’en ke dugliy Jehovah ni nge buch.

3. Mang e be micheg fare yiiy ni bay ko Daniel 7:13, 14 ngodad u murung’agen e en nra mang Pilung u Gil’ilungun Got?

³ Fare yiiy ni bay ko Daniel 7:13, 14 e be micheg ni Kristus Jesus e ir e En th’abi fel’ nra Gagiyegnag Gil’ilungun Got. Girdi’ u gubin e nam e ba felfelan’rad ngay ni ngaur “folgad rok,” ma dakuriy reb e Pilung nra yib nga tomuren. Ku bay reb e yiiy ko fare babyor rok Daniel ni be yog nra tabab Jesus ko gagiyeg u Gil’ilungun Got u tomuren ba ngiyal’ ni ka nog medlip e duw ngay. Gur, rayog ni ngan nang e ngiyal’ ni buch e re n’ey riy, fa?

4. Mu weliy rogon ni be ayuwegdad e Daniel 4:10-17 ni ngad nanged e re duw nra Pilung Kristus riy. (Kum guy e footnote.)

⁴ Mu beeg e Daniel 4:10-17. Fare “medlip e duw” e be yip’ fan 2,520 e duw. I tabab e re ngiyal’ i n’em ko duw ni 607 B.C.E. u nap’an ni chuweg piyu Babylon e bin tomur e pilung ko fare chiya ko pilung ni ke tay Jehovah u Jerusalem. Yan i mus e re ngiyal’ i n’em ko duw ni 1914 C.E. u nap’an ni dugliy Jehovah Jesus “ni ir e en bay mat’awun” ni nge mang Pilung u Gil’ilungun Got. *​—Ezek. 21:25-27, NW.

5. Mang reb e kanawo’ nrayog ni nge yib angin ngodad riy fare yiiy ni murung’agen fare “medlip e duw”?

⁵ Uw rogon nrayog ni nge yib angin e re yiiy ney ngodad? Gad ra nang fan fare “medlip e duw,” ma rayog ni nge pagan’dad ni ma lebguy Jehovah e tin ke micheg ko ngiyal’ ni ke dugliy ni nge rin’ riy. Ra lebguy e tin ka bay e yiiy ko ngiyal’ ni ke dugliy ni nge lebug riy ni bod rogon ni Pilungnag Jesus ko ngiyal’ ni dugliy. Arrogon, “dabi sowath” fare rran rok Jehovah.​—Hab. 2:3.

6. (a) Mang e gad be guy ni be buch u roy u fayleng ni be micheg ni ke tabab Kristus ko gagiyeg u tharmiy? (b) Uw rogon nni micheg e re n’ey ko fare yiiy ni bay ko Revelation 6:2-8?

⁶ Nap’an ni chugur nga tungun e machib ni i tay Jesus u fayleng, me yiiynag boch ban’en nra buch u fayleng nra ayuweg pi gachalpen ni ngar nanged e ngiyal’ ni ke tabab ko gagiyeg u tharmiy. Boch ko pi n’em e aram e mahl, nge uyungol, nge durru’. Ki yiiynag ni “gubin yang” nra yib e liliy riy ara m’ar nib machreg ni ma af ko girdi’ ni bod fare m’ar ni COVID-19. Be yog e Bible ni pi n’ey e aram bang ko “pow” ko ngiyal’ ni bay Kristus riy. (Matt. 24:3, 7; Luke 21:7, 10, 11) Ba pag 60 e duw nga tomuren ni yim’ Jesus nge sul nga tharmiy, ma aram miki micheg ngak apostal John nra buch e pi n’ey. (Mu beeg e Revelation 6:2-8.) Gubin e pi n’ey ni ke buch ni ka nap’an ni mang Jesus e Pilung ko duw ni 1914.

7. Mang fan ni ka nap’an ni Pilung Jesus ma boor ban’en nib kireb ni be buch u fayleng?

⁷ Mang fan ni gel e kireb u fayleng u nap’an ni Pilung Jesus? Bay ban’en nib ga’ fan ni be weliy e Revelation 6:2 u murung’agen e re n’ey. Nap’an ni Pilung Jesus, ma n’en som’on ni rin’ e yan ko mahl. Mini’ e ra mahlgad? Ra mahlgad Moonyan’ nge pi kan nib kireb ni yad ba muun ngak. Be yog e Revelation ko guruy ni 12 nnap’an nni mahl me war Satan, ma aram mi nin’rad e pi engel rok nga fayleng. Kari “gafgow e fayleng” ni bochan e kari  damumuw Satan ma be gafgownag e girdi’.​—Rev. 12:7-12.

8. Gad ra guy e pi yiiy u murung’agen Gil’ilungun Got ni be lebug, ma uw rogon nra yib angin ngodad?

⁸ Uw rogon nrayog ni nge yib angin e pi yiiy ney ngodad? Pi n’en nra i buch u fayleng nge pi n’en gad ra guy ni be thil u rarogon e girdi’ e ra ayuwegdad ni ngad nanged ni ke Pilung Jesus. Ere nap’an ni gad ra guy e girdi’ ni yigoo yad e yad be lemnaged yad ma ke gel e fanenikan rorad, ma dab da damumuwgad ya ngad nanged nrogon e ngongol rorad e be lebguy e yiiy u Bible. Ke tabab Gil’ilungun Got ko gagiyeg! (Ps. 37:1) Ma chiney nri be chugur i yib e Armageddon e ri bayi gel boch e kireb u fayleng. (Mark 13:8; 2 Tim. 3:13) Ere ri gad ba felfelan’ ni ke ayuwegdad e Chitamangidad ni bay u tharmiy ni gad ba t’uf rok ni ngad nanged fan ni ke yoor e magawon u fayleng.

9. Uw rogon ni be weliy fare yiiy ni bay ko Daniel 2:28, 31-35 murung’agen e bin tomur e am nra gel lungun u fayleng, ma mingiyal’ e tabab ko gagiyeg?

⁹ Mu beeg e Daniel 2:28, 31-35. Gad be guy e re yiiy ney ni be lebug e ngiyal’ ney. Fare lik’ay ni tay Nebukadnezzar e be dag e n’en “bay yib i m’ug [“n’en nra buch u nap’an e tin tomuren e rran,” NW]” u tomuren ni ke tabab Kristus ko gagiyeg. Pi toogor rok Jesus u fayleng e ba muun ngay e bin tomur e am nra gel lungun u fayleng ni kan yiiynag u Bible ni be yip’ fan “rifrifen ay fare liyos nni ngongliy ko wasey nge but’.” Re am ney e be gagiyeg e chiney. I tabab ko gagiyeg u nap’an e Bin Som’on e Mahl ko Fayleng u nap’an ni chag yu Ngalis ngak yu Meriken ngaur maruwelgow u taabang. Ku bay l’agruw ban’en u rarogon e re am ney ni guy Nebukadnezzar u lan fare lik’ay  rok ni murung’agen fare liyos ni be dag nre am ney e ba thil ko tin baaram e am ni i gel lungurad u fayleng u m’on riy.

10. (a) Mang e gad be guy u rarogon fare Am nu Ngalis nge Meriken ni yiiynag Daniel? (b) Mang e thingar da kol ayuwgad ndab da rin’ed? (Mu guy fare kahol ni “ Mu Ayuwegem ko Fare But’!”)

¹⁰ Som’on e fare Am nu Ngalis nge Meriken e ba thil ko tin baaram e am ni kun weliy murung’agen u lan fare lik’ay ni bochan e dan fanathinnag ko wasey ndan athukuy ban’en ngay ni bod e gol ara silber, ya kan fanathinnag ko wasey ni kan athukuy e but’ ngay. But’ e be yip’ fan e yug girdi’. (Dan. 2:43) Ngiyal’ ney e rayog ni ngad guyed nrogon ni be gagiyegnag e girdi’ e towal ni yima tay, nge rogon ni yad be guy rogon ni ngan pi’ mat’awrad ni ngar rin’ed boch ban’en, nge rogon ni yad ma muulung nga taabang ngaur togopuluwgad nga boch ban’en nde m’agan’rad ngay, ma yad be guy rogon ni ngan pi’ mat’awrad u tabon e maruwel e be mo’maw’nag ngak e pi tayugang’ ko re am ney ni ngar rin’ed e n’en yad baadag.

11. Chiney ni be gagiyeg e Am nu Ngalis nge Meriken e uw rogon ni be gelnag e pagan’ rodad ni gad be par ko tin tomuren e rran?

¹¹ Bin migid e, fare Am nu Ngalis nge Meriken ni kan fanathinnag nga rifrifen ay fare liyos nib ga’ e aram e bin tomur e am ni ke yiiynag e Bible nra gel lungun u fayleng. Dakuriy yugu reb e am nra yib nga tomuren. Ya ra thang Gil’ilungun Got e re am ney u nap’an e Armageddon ni kub muun ngay urngin e am ko girdi’. *​—Rev. 16:13, 14, 16; 19:19, 20.

12. Ku mang boch ban’en ni yiiynag Daniel ni be fal’eg lanin’dad ma be pi’ e l’agan’ ngodad?

¹² Uw rogon nrayog ni nge yib angin e re yiiy ney ngodad? Ku bay boch ban’en ni yiiynag Daniel ni be micheg ni gad be par ko tin tomuren e rran. Ba pag 2,500 e duw ni ke yan, me yiiynag Daniel ni ku bay aningeg e am nra gel lungurad u fayleng u tomuren yu Babylon ni yad ra gagiyegnag e pi nam ni boor e girdi’ rok Got riy. Ki tamilangnag ni fare Am nu Ngalis nge Meriken e aram e bin tomur ko pi am ney nra gel lungun u fayleng. Re n’ey e be fal’eg lanin’dad ma be pi’ e l’agan’ ngodad ndab ki n’uw nap’an ma ra thang Gil’ilungun Got urngin e am ko girdi’ me gagiyegnag e fayleng ni ga’ngin.​—Dan. 2:44.

13. Mang e be yip’ fan fa “bin meruk e pilung” nge fa “ragag i pilung” ni kan weliy murung’agen ko Revelation 17:9-12? Uw rogon ni ke lebug e re yiiy ney?

¹³ Mu beeg e Revelation 17:9-12. Bochan nib gel e magothgoth ni k’aring e Bin Som’on e Mahl Nni Tay u Fayleng, ma aram me buch ban’en ni lebguy yugu reb e yiiy u Bible ni murung’agen e tin tomuren e rran. Baadag e pi pilung nu fayleng ni ngar feked e gapas nga fayleng. Ere nap’an e January ko duw ni 1920, ma aram mar sunmiyed fare League of Nations ni ir e yan fare United Nations nga lon ko October ko duw ni 1945. Re ulung ney e ka nog ni “ir e bin meruk e pilung.” Machane gathi ir reb e am nib gel lungun u fayleng. Bay gelngin ni bochan e ayuw ni be pi’ e pi am nu fayleng ngak. Be yog e Bible ni pi am ney e yad fa “ragag i pilung.”

14-15. (a) Mang e be tamilangnag e Revelation 17:3-5 u murung’agen fare “Babylon nib Gilbuguwan”? (b) Mang e be buch ko ayuw ni be pi’ e girdi’ ko pi yurba’ i teliw ni googsur?

¹⁴ Mu beeg e Revelation 17:3-5. I pilyeg Got e changar rok apostal John nge guy be’ nib pin ni ma chuway’ ngak ni aram fare “Babylon nib Gilbuguwan” ni be yip’ fan urngin raba’ e teliw ni googsur u fayleng. Uw rogon ni ke lebug e re n’ey ni guy John? Ke  n’uw nap’an ni be maruwel e pi yurba’ i teliw ni googsur nge pi am nu fayleng u taabang, maku yad be ayuweg e pi am. Machane dabki n’uw nap’an ma ra tay Jehovah nga laniyan’ e pi am ney ni ngar “ngongliyed e tin ni be finey.” Ere mang e ra buch? Pi am ney ara fa “ragag i pilung” e yad ra chel ngar thanged e pi yurba’ i teliw ni googsur.​—Rev. 17:1, 2, 16, 17.

¹⁵ Uw rogon ni kad nanged ni ke chugur ni ngan thang fare Babylon nib Gilbuguwan? Ra ngad nanged e fulweg ko re deer ney, mab fel’ ndab da paged talin ni ran ni bay u lan fare Lul’ ni Eufrates e aram reb e ban’en ni i ayuweg fare mach nu Babylon kakrom. Fare babyor ni Revelation e be taarebrogonnag bokum milyon e taayuw ko fare Babylon nib Gilbuguwan nga “yungi ran.” (Rev. 17:15) Machane ku be tamilangnag nra “melik’” e pi lul’ ney ni be yip’ fan ni boor e girdi’ ni yad ra tal ndab kur ayuweged e pi yurba’ i teliw ni googsur u fayleng. (Rev. 16:12) Be lebug e re  yiiy ney e ngiyal’ ney ni bochan e boor e girdi’ ndakuriy barba’ e teliw ni yad be un ngay, ma yad be gay rogon ni ngar pithiged e magawon rorad u yugu boch e kanawo’ nib thil.

16. Faan gad ra nang fan fapi yiiy u murung’agen e ngiyal’ nni sunmiy fare ulung ni United Nations nge ngiyal’ ni yira thang fare Babylon nib Gilbuguwan, ma uw rogon nra yib angin ngodad?

¹⁶ Uw rogon nrayog ni nge yib angin e pi yiiy ney ngodad? Fare ulung ko United Nations ni kan sunmiy nge girdi’ ndakurur ayuweged e pi yurba’ i teliw ni googsur e be micheg ni gad be par ko tin tomuren e rran. Yugu aram rogon ni boor e girdi’ ndakurur ayuweged fare Babylon nib Gilbuguwan, machane gathi aram e n’en nra museg e pi yurba’ i teliw ni googsur. Kad weliyed faram nra tay Jehovah nga laniyan’ fa “ragag i pilung” ni be yip’ fan e pi am ni yad be ayuweg fare United Nations ni “ngar ngongliyed e tin ni be finey.” Ra chel e pi nam nem ngar thanged e pi yurba’ i teliw ni googsur nib tomgin, ma re n’ey e rra gin e girdi’ nu fayleng ngay. * (Rev. 18:8-10) Re n’ey e ra magawonnag e fayleng ni ga’ngin maku rayog ni nge mo’maw’nag e par, machane bay l’agruw i fan nra felfelan’ e girdi’ rok Got ko re n’ey. Ke n’uw nap’an ni ke par e pi yurba’ i teliw ni yad e toogor rok Jehovah Got, machane ra yan i taw ko ngiyal’ nem ma yira thang ndariy n’umngin nap’an, ma dabi n’uw nap’an nga tomuren min chuwegdad u lan e re fayleng nib kireb ney!​—Luke 21:28.

17-18. (a) Uw rogon ni ngaud gelnaged e michan’ rodad i yan? (b) Mang e gad ra weliy ko bin migid e article?

¹⁷ I yiiynag Daniel nra “ga’ e llowan’ i yan.” Ma aram e n’en ke buch! Chiney e ke tamilang u wan’dad e pi yiiy ni be weliy murung’agen e ngiyal’ ney ni gad bay riy. (Dan. 12:4, 9, 10) Bochan nrib puluw e pi yiiy ney ma aram fan ni kari ga’ fan Jehovah u wan’dad nge Thin rok ni kan thagthagnag. (Isa. 46:10; 55:11) Ere um gelnag e michan’ rom i yan ni aram e ngaum fal’eg i fil e thin nu Bible ma ga be ayuweg yugu boch e girdi’ ni nge fel’ e tha’ u thilrad Jehovah. Ra yororiy urngin e piin nri be pagan’rad ngak, ma ra i pi’ e “gapas” ngorad.​—Isa. 26:3, BT.

¹⁸ Bin migid e article e gad ra weliy riy boch e yiiy ni murung’agen e ulung ni Kristiano e ngiyal’ ney ko tin tomuren e rran. Gad ra fil riy ni pi yiiy ney e ku be micheg ni gad be par ko tin tomuren e rran. Ku gad ra guy e mich riy ni Jesus ni ir e Pilung rodad e chiney e be pow’iy pi gachalpen ni yad ba yul’yul’.