1-2. (a) Mingiyal’ e ba ga’ ni gad ma lemnag be’ nib t’uf rodad ni ke yim’? (b) Mang e rin’ Jesus ko fare nep’ u m’on ni nge yim’?

DEMTRUG n’umngin nap’an ni ke yim’ be’ nib t’uf rodad, ma dawor da paged talin. Ba ga’ ni gad ma lemnagrad ko rofen nra m’ad.

² Gubin e duw ni gad ma muulung bokum milyon e girdi’ u ga’ngin yang e fayleng nga taabang ni ngad madnomnaged e yam’ ni tay be’ nrib t’uf rodad ni aram Jesus Kristus. (1 Pet. 1:8) Gad ma yib nga taabang ni ngad pugeduran ngan’dad e en ke pi’ e yafos rok nib biyul ni nge chuwegdad u tan gelngin e denen nge yam’. (Matt. 20:28) Bin riyul’ riy e, baadag Jesus ni nga i puguran pi gachalpen ngan’rad e yam’ ni tay. Fare nep’ u m’on ni nge yim’, me tababnag ba abich nib ga’ fan me tay chilen ngorad ni gaar: “Um rin’ed e re n’ey ngi i pugurag ngomed.”​—Luke 22:19.

3. Mang e gad ra weliy ko re article ney?

³ Kemus ni in ko piin yad ma un ko fare Puguran ko yam’ ni tay Kristus e yad be athapeg e yan nga tharmiy. Machane bokum milyon e piin yad be athapeg e par u fayleng ni ku yad ma un ko re madnom ney. Gad ra weliy ko re article ney boch i fan ni baadag e gal ulung ney ni yad ma un ko Puguran u gubin e duw. Ku gad ra weliy rogon nra yib angin ngodad ni faan gad ra un ko re madnom ney. Machane som’on e ngad weliyed boch i fan ni ma un e piin kan dugliyrad ko re madnom ney.

4. Mang fan ni ma kay e piin kan dugliyrad e flowa mar unumed e wain u nap’an e Puguran?

⁴ Piin kan dugliyrad ni yad ma un ko Puguran u gubin e duw e yad ma kay e flowa mar unumed e wain. Mang fan ni yad ma rin’ e re n’ey? Ra ngam nang e fulweg riy, ma ngam lemnag e n’en ni buch ko bin tomur e nep’ ko yafos rok Jesus u fayleng. Tomuren fare abich ko Paluk’af, me tababnag Jesus fare Abich ni Blayal’ rok Somol. I pi’ e flowa ngak fa 11 i apostal rok nra pared ni yad ba yul’yul’ ngak me yog ngorad ni ngar ked, miki pi’ e wain ngorad me yog ni ngar unumed. I weliy ngorad murung’agen l’agruw e m’ag ni aram fa bin nib beech e m’ag nge fare m’ag ni fan nga Gil’ilungun Got. * (Luke 22:19, 20, 28-30) Gal m’ag ney e bing e kanawo’ ngak e pi apostal nem nge yugu boch e girdi’ nib mudugil urngirad ni ngar manged boch e pilung nge prist u tharmiy. (Rev. 14:1; 20:6) Kemus ni yigoo piin kan dugliyrad ni ka yad bay u fayleng ni yad bang ko gal m’ag ney e rayog ni ngar ked e flowa mar unumed e wain u nap’an e Puguran.

5. Mang e manang e piin kan dugliyrad u murung’agen e athap ni kan pi’ ngorad?

⁵ Ku baaray reb i fan ni baadag e piin kan dugliyrad ni yad ma un ko fare Puguran: Ku aram ba ngiyal’ ni yad ma fal’eg i lemnag e athap rorad. Rib manigil e athap rorad ni ke pi’ Jehovah, ya yad ra yan nga tharmiy ndab kur m’ad biid ma ke yag reb e dowef ngorad ndabi kireb, mi yad pigpig Jesus Kristus nge tin ka bay ko fare 144,000 u taabang. Ma bin nth’abi fel’ riy e yad ra guy Jehovah Got! (1 Kor. 15:51-53; 1 John 3:2) Yad manang ni kan dugliyrad ni nge yag e pi tow’ath ney ngorad u tharmiy. Machane ra nga ranod nga tharmiy, ma thingar ra pared ni yad ba yul’yul’ nge mada’ ko ngiyal’ ni kar m’ad. (2 Tim. 4:7, 8) Rib gel e felfelan’ ni ma tay e piin kan dugliyrad u nap’an ni yad ra lemnag e athap rorad. (Titus 2:13) Ma uw rogon “yugu boch e saf”? (John 10:16) Mang boch i fan ni yad ma un ko fare Puguran?

6. Mang fan ni ma un yugu boch e saf ko Puguran u gubin e duw?

⁶ Yugu boch e saf ni yad ma un ko Puguran e darur ked e flowa mar unumed e wain, machane yad ba felfelan’ ni kar uned ko re madnom ney. Nap’an e duw ni 1938, ma aram e yay nth’abi som’on nni pining e piin yad be athapeg e par u fayleng ni ngar uned ko fare Puguran. Be gaar e The Watchtower ko March 1, 1938: “Rib puluw ni nge un [yugu boch e saf] ko re muulung ney mar guyed e n’en yibe rin’ riy. . . . Susun ni ku ireray e ngiyal’ ni ngar uned ko felfelan’.” Ba felfelan’ yugu boch e saf ni ngar uned ko fare Puguran mar guyed e n’en yibe rin’ riy, ni bod e girdi’ ni kar bad ni ngar uned nga reb e madnom ko m’agpa’.

7. Mang fan ni baadag yugu boch e saf ni ngar rung’aged fare welthin ni yira pi’ u nap’an e Puguran?

⁷ Yugu boch e saf e ku yad ma fal’eg i lemnag e athap rorad. Yad baadag ni ngar rung’aged fare welthin ni yira pi’ u nap’an e Puguran ni bochan e yooren ban’en ni yira weliy riy e bay rogon ko n’en nra rin’ Kristus nge fare 144,000 ni fan ko girdi’ ni yad ba yul’yul’ u nap’an fare Biyu’ i Duw ni Yad Ra Gagiyeg riy. Pi cha’ney ni yad ra gagiyeg u tharmiy e yad ra un ngak Jesus Kristus ni Pilung rorad ngar ngongliyed e re fayleng ney nge mang paradis mi yad ayuweg e girdi’ ni ngar flontgad. Ba gel  e felfelan’ ni ma tay bokum milyon e girdi’ ni yad ma un ko fare Puguran u nap’an ni yad ra lemnag rogon nra lebug e pi yiiy u Bible ni bod e tin bay ko Isaiah 35:5, 6; 65:21-23; nge Revelation 21:3, 4. Nap’an ni yad ra susunnaged yad ni yad bay e piin nib t’uf rorad u lan e bin nib beech e fayleng, ma ri ma riyul’ u wan’rad e athap rorad ni fan ko pi n’en bay nga m’on me ayuwegrad ni ngar dugliyed u wan’rad ndab ra talgad ko pigpig rorad ngak Jehovah.​—Matt. 24:13; Gal. 6:9.

8. Ku mang reb i fan ni ma un yugu boch e saf ko fare Puguran?

⁸ Kum lemnag reb i fan ni ma un yugu boch e saf ko fare Puguran. Yad baadag ni ngar daged nib t’uf e piin kan dugliyrad rorad ma yad be ayuwegrad. Ke yog e Thin rok Got u m’on riy ni piin kan dugliyrad nge piin yad be athapeg e par u fayleng e yad ra maruwel u taabang. Ni uw rogon? Ngad weliyed in e kanawo’ ni yad ra rin’ e re n’ey riy.

9. Uw rogon ni be tamilangnag fare yiiy ko Zekariah 8:23 rogon e piin kan dugliyrad u wan’ yugu boch e saf?

⁹ Mu beeg e Zekariah 8:23, NW. * Rib manigil rogon ni be weliy e re yiiy ney rogon u wan’ yugu boch e saf e pi walagrad ni kan dugliyrad. Fapi thin ni “reb e pumoon nib Jew” nge “romed” e be yip’ fan e piin kan dugliyrad ni ka yad bay u fayleng. (Rom. 2:28, 29) Ma fapi thin ni “ragag e pumoon u urngin mit e thin ko pi nam” e be yip’ fan yugu boch e saf. Gowa bod ni kar ‘koled’ e piin kan dugliyrad ndarur paged yad ni be yip’ fan ni yad be un ngorad ko bin riyul’ e liyor. Ere nap’an fare nep’ ni yira tay e Puguran, ma ma dag yugu boch e saf ndarur paged e piin kan dugliyrad ni aram e yad ma un ngorad ko re madnom ney.

10. Uw rogon ni ke lebguy Jehovah fare yiiy ni bay ko Ezekiel 37:15-19, 24, 25?

¹⁰ Mu beeg e Ezekiel 37:15-19, 24, 25. Ke lebguy Jehovah e re yiiy ney ni aram e ke kunuy e piin kan dugliyrad nge yugu boch e saf nga taabang yad be maruwel nib taareban’rad. Re yiiy ney e be weliy murung’agen l’agruw ley i gek’iy. Piin yad be athapeg e yan nga tharmiy e yad bod fare ley i gek’iy ni fan ko “nam nu Judah” (ni aram e re ganong ni un mel’eg e girdi’ riy ni ngar manged pilung u Israel), ma piin yad be athapeg e par u fayleng e yad bod fare ley i gek’iy ni fan ko “nam nu Israel.” * Ra chagiy Jehovah e gal ulung ney nga taabang ngar pared ni kar boded “taab ley i gek’iy.” Re n’ey e be yip’ fan ni yad be pigpig u tan pa’ Kristus Jesus ni Pilung rorad nib taareban’rad. Gubin e duw ni ma un e piin kan dugliyrad nge yugu boch e saf ko fare Puguran ni yad “taab ran’ i saf” ni “taabe’ e be gafaliyrad,” ma gathi yad ba ki’ u but’.​—John 10:16.

11. Mang e ba ga’ ni ma rin’ fapi “saf” ni kan weliy murung’agrad ko Matthew 25:31-36, 40 ni ngar daged ni yad be ayuweg pi walagen Kristus?

¹¹ Mu beeg e Matthew 25:31-36, 40. Fapi “saf” ni weliy Jesus murung’agen ko re fanathin ney e be yip’ fan e piin yad ba mat’aw u nap’an e tin tomuren e rran ni yad be athapeg e par u fayleng ni yad ba muun nga yugu boch e saf. Yad ma ayuweg e tin ka bay i walagen Kristus u fayleng ni kan dugliyrad. Ba ga’ ni yad ma ayuweged yad ni ngar rin’ed ba maruwel nrib ga’ fan ni aram e ngan machib u ga’ngin yang e fayleng min ayuweg e girdi’  ngar manged boch i gachalpen Jesus.​—Matt. 24:14; 28:19, 20.

12-13. Ku mang boch e kanawo’ ni ma dag yugu boch e saf riy ni yad be ayuweg pi walagen Kristus?

¹² Gubin e duw ni ma dag yugu boch e saf ni yad be ayuweg pi walagen Kristus ni aram e yad ma pining e girdi’ u ga’ngin yang e fayleng ni ngar uned ko fare Puguran u nap’an e pi wik u m’on ni ngan tay e re madnom ney. (Mu guy fare kahol ni “ Ga Be Lemnag e N’en ni Ngam Rin’ u M’on Ngu Tomuren e Puguran, Fa?”) Yad ma guy rogon ni nge yan i taw ko rofen ni Puguran, ma gubin ban’en ni kan fal’eg rogon ni fan ko re madnom ney ni mus ni faanra dariy be’ ko ulung rorad ni kan dugliy. Ireray boch e kanawo’ nib felfelan’ yugu boch e saf ni ngar ayuweged pi walagen Kristus riy. Manang e pi saf ney ni n’en yad be rin’ ni fan ngak pi walagen Jesus ni kan dugliyrad e rogon u wan’ e ir e yad be rin’ ni fan ngak.​—Matt. 25:37-40.

¹³ Ku mang boch i fan ni gad gubin ni gad ma un ko fare Puguran ni yugu demtrug ko athap rodad e nga darod nga tharmiy ara ngad pared u fayleng?

14. Uw rogon ni ke dag Jehovah nge Jesus nri gad ba t’uf rorow?

¹⁴Gad be pining e magar ni bochan e t’ufeg ni ke dag Jehovah nge Jesus ngodad. Boor e kanawo’ ni ke dag Jehovah riy ni gad ba t’uf rok. Machane bin nth’abi fel’ e kanawo’ ni ke dag riy ni gad ba t’uf rok e aram e ke pi’ Fak nrib t’uf rok ni nge gafgow me yim’ ni fan ngodad. (John 3:16) Ma mus ngak Jesus miki dag nri gad ba t’uf ni aram e m’agan’ ngay ni nge pi’ e yafos rok ni fan ngodad. (John 15:13) Dabiyog ni ngad sulweged puluwon e t’ufeg ni ke dag Jehovah nge Jesus ni fan ngodad. Machane rayog ni ngad daged ni gad be pining e magar ngorow u daken e pi n’en gad ma rin’ u reb e rran ngu reb. (Kol. 3:15) Ma fan ni gad ma un ko Puguran e bochan ni gad baadag ni ngad lemnaged rogon e t’ufeg ni kar dagew ngodad mu kud daged ni yow ba t’uf rodad.

15. Mang nrib ga’ fan fare biyul u wan’ e piin kan dugliyrad nge yugu boch e saf?

¹⁵Rib ga’ fan fare biyul u wan’dad. (Matt. 20:28) Rib ga’ fan fare biyul u wan’ e piin kan dugliyrad ni bochan e aram e n’en ke bing e kanawo’ ni nge yag ngorad e athap rorad. Bochan ni ke mich fare biyul rok Kristus u wan’rad, ma aram fan ni ke mat’awnagrad Jehovah ngak ma ke fekrad ni ngar manged pi fak. (Rom. 5:1; 8:15-17, 23) Ku arrogon yugu boch e saf ni kub ga’ fan fare biyul u wan’rad. Bochan ni ke mich fare biyul rok Kristus u wan’rad, ma ke yag ni ngar beechgad u p’eowchen Got, mar pigpiggad ngak, miki yag e athap ngorad ni ngar mageygad ni yad ba fos u nap’an “fare gafgow ni ba ga’.” (Rev. 7:13-15) Reb e kanawo’ ni ma dag e piin kan dugliyrad nge yugu boch e saf riy nib ga’ fan fare biyul u wan’rad e aram e yad ma un ko fare Puguran ni yima tay u gubin e duw.

16. Ku mang reb i fan ni gad ma un ko fare Puguran?

¹⁶ Ku reb i fan ni gad ma un ko fare Puguran e bochan ni gad baadag ni ngad folgad rok Jesus. Demtrug e athap rodad boch nga m’on, ma gad gubin ni gad baadag ni ngad folgad ko n’en ni tay Jesus chilen u nap’an fare nep’ ni tababnag fare Puguran ni gaar: “Um rin’ed ni aray rogon ngi i pugurag ngomed.”​—1 Kor. 11:23, 24.

17. Uw rogon ni ma ayuwegdad fare Puguran ni nge chugur thildad Jehovah?

¹⁷Ra chugur thildad Jehovah. (Jas. 4:8) Kad filed ni fare Puguran ni gad ma tay e aram reb  e kanawo’ nrayog ni ngad lemnaged riy rogon e athap ni ke pi’ Jehovah ngodad ma gad fal’eg i lemnag gelngin e t’ufeg ni ke dag ngodad. (Jer. 29:11; 1 John 4:8-10) Nap’an ni gad ra lemnag e athap rodad boch nga m’on nge gelngin e t’ufeg rok Jehovah ngodad, ma ra gel feni t’uf rodad miki chugur e tha’ u thildad.​—Rom. 8:38, 39.

18. Nap’an ni gad ra fal’eg i lemnag e n’en ni rin’ Jesus, ma mang e ma k’aringdad ni ngad rin’ed?

¹⁸Ma k’aringdad ni ngad folwokgad rok Jesus. (1 Pet. 2:21) Ra taw ko pi rran u m’on ko Puguran, ma gad ma beeg boch e thin nu Bible ni murung’agen e bin tomur e wik ko yafos rok Jesus u fayleng, nge yam’, nge fos ko yam’ ni tay ma gad fal’eg i lemnag. Ma ra yan i taw ko fare nep’ ni yira tay e Puguran, ma fare welthin ni yima pi’ riy e ma puguran ngodad rogon ni gad ba t’uf rok Jesus. (Efe. 5:2; 1 John 3:16) Nap’an ni gad ra beeg murung’agen rogon ni pag fan Jesus ir ma gad fal’eg i lemnag, ma ma k’aringdad ni ngad guyed rogon ni ‘ngi i par e wok rodad ni bod rogon ni i rin’ Jesus Kristus.’​—1 John 2:6.

19. Uw rogon ni ngad pared ni gad ba t’uf rok Got?

¹⁹Ma k’aringdad ni ngad dugliyed u wan’dad ni ngad pared ni gad ba t’uf rok Got. (Jude 20, 21) Faan gad ra rin’ e tin rayog rodad ni ngad folgad rok Got, ma gad thothupnag fithingan, ma gad felfelan’nag, ma aram e rayog ni ngad pared ni gad ba t’uf rok. (Prov. 27:11; Matt. 6:9; 1 John 5:3) Puguran ni gad ma un ngay e ma k’aringdad ni ngad dugliyed u wan’dad ni nge m’ug u rogon e par rodad u reb e rran ngu reb ni gowa be lungudad ngak Jehovah, ‘Gu baadag ni nggu par ni gub t’uf rom ndariy n’umngin nap’an!’

20. Mang boch i fan nib fel’ ni ngad uned ko fare Puguran?

²⁰ Demtrug ko gad be athapeg e yafos ni manemus u tharmiy ara fayleng, ma boor fan nib fel’ ni ngad uned ko fare Puguran. Gubin e duw ni gad ra muulung nga taabang ko rofen nem, ma gad ma puguran ngan’dad e yam’ ni tay be’ nib t’uf rodad ni aram Jesus Kristus. Ma bin nth’abi ga’ fan riy e gad ma puguran ngan’dad e bin nth’abi fel’ kanawoen e t’ufeg ni kan dag ngodad. Re n’ey e aram e t’ufeg ni ke dag Jehovah ngodad u nap’an ni pi’ Fak ni nge biyuliydad. Biney e duw e yira tay e Puguran u tomuren ni ke aw e yal’ ko Biyernes ko April 15, 2022. Ba t’uf Jehovah nge Fak rodad, ere n’en nth’abi ga’ fan ni ngad rin’ed u nap’an fare Puguran ko yam’ ni tay Jesus e aram e ngad uned ko re madnom ney.