1. Mang e be dag ni ke war e t’ufeg u lan boor e tabinaw e ngiyal’ ney?

KE YIIYNAG e Bible u m’on riy nnap’an nra taw ko tin tomuren e rran, ma girdi’ e “bay dab kur runguyed [“t’ufeged,”NW]” yad. (2 Tim. 3:1, 3) Gad be guy ni be lebug e re yiiy ney e ngiyal’ ney. Bod ni, bokum milyon e tabinaw e be dar e gallabthir riy, ma ke par fa gallabthir ni yow ba damumuw ngorow, ere fapi bitir ni fakrow e yad be lemnag nda kur t’ufgad ko gallabthir rorad. Mus ko tabinaw ni yad ma par u taabang e ku rayog nde chugur e tha’ u thilrad. Bay be’ ni maruwel rok e ma ayuweg e tabinaw ma be pi’ boch e fonow ngorad ni ke gaar: “Matin, nge matam, nge bitir e dakurur nonad ngorad, ma yooren e tayim rorad e yad ma par u mit e computer, ara tablet, ara cellphone rorad, ara ngaur fafelgad ko pi video game. Yugu aram rogon ni yad be par u taab naun, machane gathi ri yad mananged yad nib fel’ rogon.”

2-3. (a) Mini’ e susun ni ngari t’uf rodad nrogon ni bay ko Roma 12:10? (b) Mang e gad ra weliy ko re article ney?

² Dubdad ni ngad boded e girdi’ nu fayleng ndarur t’ufeged be’. (Rom. 12:2) Ya ba t’uf ni ngad filed rogon ni ngari t’uf rodad chon e tabinaw rodad nge pi walagdad u lan e ulung. (Mu beeg e Roma 12:10.) Ere ba miti mang t’ufeg eray ni gad be weliy murung’agen? Mit ney e t’ufeg e ma k’aring chon e tabinaw ni ngari chugur thilrad ni bod e pi fager. Ireray e re miti t’ufeg nsusun e ngaud daged ngak pi walagdad u lan e ulung. Faanra gel e t’ufeg u thildad, ma aram e gad ra ayuweg gubin e girdi’ nge yag nra pigpiggad ngak Jehovah u taabang ni yad ba felfelan’.​—Mik. 2:12.

 ³ Chiney e ngad weliyed boch ban’en nrayog ni ngad filed rok boch e girdi’ ni bay murung’agrad u Bible nra ayuwegdad ni ngaud daged e mit ney e t’ufeg.

4. Mang e be yog e James 5:11 u murung’agen e t’ufeg rok Jehovah ngodad?

⁴ Be weliy e Bible murung’agen boch i fel’ngin Jehovah nrib manigil. Bod ni be yog ni “Got e t’ufeg.” (1 John 4:16) Nap’an ni gad ra fil e re n’ey u murung’agen Jehovah, ma ra k’aringdad ni ngad adaged ni ngad manged fager rok. Machane ku be yog e Bible ni Jehovah e “ri ma runguy ma ma taganan’ ngak e girdi’.” (Mu beeg e James 5:11.) Rib manigil rogon ni kan weliy u roy murung’agen gelngin e t’ufeg rok Jehovah ngodad!

5. Uw rogon ni ma dag Jehovah e runguy? Uw rogon nrayog ni ngad folwokgad rok?

⁵ Mu tay fanam i yan riy ni be yog e James 5:11 nrogon ni ma taganan’ Jehovah ko girdi’ e ba peth nga reb e fel’ngin ni ku bay rok, ni aram e runguy. (Ex. 34:6) Reb e kanawo’ ni ma dag Jehovah e runguy riy ngodad e aram e ma n’ag fan e kireb rodad u nap’an ni kad olobochgad. (Ps. 51:1) Machane, re n’ey ni ngan runguy be’ nrogon ni kan weliy u Bible e gathi kemus ni be yip’ fan ni ngan n’ag fan e kireb rok be’ ni ke rin’ ban’en ndubdad. Runguy e ban’en ni ma sum u gum’irchaen be’ u nap’an nra guy be’ ni ke gafgow, maku aram e n’en ma k’aring ni nge ayuweg facha’. Ke weliy Jehovah nrogon nri baadag ni nge ayuwegdad e kab gel nga rogon e runguy rok ba matin ngak bochi tir ni fak. (Isa. 49:15) Nap’an ni gad ra gafgow, ma runguy rok Jehovah ngodad e aram e n’en ma k’aring ni nge ayuwegdad. (Ps. 37:39; 1 Kor. 10:13) Rayog ni ngad daged ni gad be runguy pi walagdad ni aram e ngaud n’aged fan e kireb rorad, ma nap’an ni yad ra rin’ ban’en ndubdad ma dab pared ni gad ba damumuw ngorad. (Efe. 4:32) Machane reb e kanawo’ nib ga’ fan nrayog ni ngad daged ni gad be runguy pi walagdad e aram e ngad ayuweged yad u nap’an ni keb e magawon ngorad. Nap’an nra k’aringdad e t’ufeg ni ngad runguyed  pi walagdad, ma aram e gad be folwok rok Jehovah ni ir e en th’abi gel e t’ufeg ni ma dag.​—Efe. 5:1.

6. Uw rogon ni dag Jonathan nge David nrib gel e t’ufeg u thilrow?

⁶ Be weliy e Bible murung’agen boch e girdi’ ndar flontgad ni ur daged e re miti t’ufeg ney. Am lemnag Jonathan nge David. Be gaar e Bible: “Me ri adag Jonathan ni fak Saul daken David nge yan i par ni kari t’uf rok ni bod rogon ir nib t’uf rok.” (1 Sam. 18:1) Kan dugliy David ni nge yan nga lon Saul ni nge mang pilung. Tomuren e re n’ey, ma aram mi ri damumuw Saul ngak David me guy rogon ni nge li’ nge yim’. Machane Jonathan ni fak Saul e de un ko chitamangin u nap’an ni be guy rogon ni nge li’ David nge yim’. I micheg Jonathan nge David ngorow ni yow ra par ni yow ba fager ma gubin ngiyal’ nra ur ayuwegew yow.​—1 Sam. 20:42.

7. Mang reb e ban’en nrayog ni nge taleg Jonathan nge David ndab ra mangew fager?

⁷ Riyul’ ni gad ra ngat nga rogon nri fel’ e tha’ u thilin Jonathan nge David ni bochan e boor ban’en u rarogorow nrayog ni nge talegrow ndab ra mangew fager. Reb riy e, Jonathan e sogonap’an 30 e duw nib ilal ngak David. Ere rayog ni nge lemnag ndabiyog ni ngari pach e thin rorow be’ nrib bitir ngak, ma gathi ri boor ban’en ni manang ni bod ir. Yugu aram rogon, ma de lem Jonathan ni aram rogon, ya ri i tayfan David.

8. Ga be lemnag, ma mang fan ni Jonathan e ir reb e fager rok David nrib manigil?

⁸ Ku rayog ni nge awan’ Jonathan ngak David. Bochan ni ir fak Saul ni Pilung, ma rayog ni nge lemnag ni ir e bay mat’awun ni nge mang e bin migid e pilung. (1 Sam. 20:31) Machane Jonathan e ir be’ nib sobut’an’, mab yul’yul’ ngak Jehovah. Ere i ayuweg David ni ir e en ke mel’eg Jehovah ni nge mang e bin migid e pilung. Ku i par nib yul’yul’ ngak David ni yugu aram rogon nri damumuw Saul ni bochan e re n’ey.​—1 Sam. 20:32-34.

9. Uw rogon ni kad nanged nda i awan’ Jonathan ngak David?

⁹ Rib t’uf David rok Jonathan, ere da i awan’ ngak. Jonathan e ir be’ nib salap ko mun gat’ing ma ir reb e salthaw nib m’uthan’. Goo yimanang rarogorow Saul ni chitamangin ni “yow ba machreg ko arche’ ni eagle, ma yow ba gel ko layon.” (2 Sam. 1:22, 23) Ere rayog ni nga i uf Jonathan nga rogon e tin ke yag rok ni nge rin’. Machane de guy rogon ni nge cheg ngak David, maku de awan’ ko tin nib fel’ ban’en ni i rin’ David. Ya ri baadag daken David nga rogon ni i par nder rus ma be taga’ ngak Jehovah. Bin riyul’ riy e, tomuren ni li’ David Goliath nge yim’, ma aram e ngiyal’ nri par ni kari t’uf rok Jonathan ni bod rogon ir nib t’uf rok. Ere uw rogon ni ngad daged nrib t’uf pi walagdad rodad ni bod rogon feni t’uf David rok Jonathan?

10. Mang e be yip’ fan ni nge ‘bagadad ma ngari t’uf rok bagadad u polo’ i laniyan’’?

¹⁰ Be yog e Bible ni nge ‘bagadad ma ngari t’uf rok bagadad u polo’ i laniyan’.’ (1 Pet. 1:22) Ke dag Jehovah e kanawo’ nrayog ni ngad folwokgad riy. Bochan nri gad ba t’uf rok, ma aram fan ni faan gad ra par ni gad ba yul’yul’ ngak, ma gubin ngiyal’ nra i t’ufegdad. (Rom. 8:38, 39) Fare bugithin ni Greek ni kan pilyeg ni “ngari,” e be weliy rarogon be’ nri be athamgil ni nga i dag e t’ufeg. Bay yu ngiyal’ nde mom ni ngad t’ufeged pi walagdad. Bod nnap’an nra rin’ be’ ban’en ndubdad, mab t’uf ni ‘nge bagadad me ayuweg bagadad ko meewar rok u fithik’ e runguy. Ngad athamgiliyed nguud pired ni gad taab girdi’ ni fare Kan ni Thothup  [“gelngin Got nib thothup,” NW] e ke pi’ ngodad u daken fare gapas ni ir e ke m’agdad nga taabang.’ (Efe. 4:1-3) Ere faan gad ra maruwel u taabang ni ngad guyed rogon ni ngad ayuweged fare ‘gapas ni ir e ke m’agdad nga taabang,’ ma aram e dab ud pared ni gad be yaliy e oloboch ni ke rin’ pi walagdad ngodad. Ya gad ra athamgil u rogon nrayog rodad ni ngad lemnaged yad ni bod rogon ni ma lemnagrad Jehovah.​—1 Sam. 16:7; Ps. 130:3.

11. Mang fan ni bay yu ngiyal’ nde mom ni ngari t’uf pi walagdad rodad?

¹¹ Gathi gubin ngiyal’ nib mom ni ngari t’uf pi walagdad rodad, nib ga’ ni faanra gad manang e pi meewar rorad. Ba tamilang ni ireray e magawon rok boch e Kristiano u nap’an e bin som’on e chibog. Bod ni Euodia nge Sintike e da ur mada’nagew e magawon u nap’an ni ur unew ngak Paul ‘nguur wereged e Thin Nib Fel’ ni yib rok Got.’ Machane da i yag ni nge m’ag e puruy’ rorow. Ere tay Paul ir ngorow ni ngar ‘guyew rogon nge taareban’row ni bod rogon e walag ni ppin ni ma par u fithik’ Somol.’​—Fil. 4:2, 3. 

12. Uw rogon ni ngari t’uf pi walagdad rodad?

¹² Uw rogon ni ngari t’uf pi walagdad rodad e ngiyal’ ney? Faan gad ra guy rogon ni ngad nanged pi walagdad nib fel’ rogon, ma rayog ni nge mom ni ngad nanged rogon lanin’rad me gel e t’ufeg rodad ngorad. Rayog ni ngad manged fager rorad ni yugu aram rogon ni yad ba ilal ara yad bbitir ngodad, ara ba thil e yalen rodad. Dab mu pagtalin ni Jonathan e sogonap’an 30 e duw nib ilal ngak David; machane mar mangew l’agruw e fager nrib chugur thilrow. Ere gur, bay be’ u lan e ulung rom nib ilal ngom ara bbitir ngom nrayog ni nge mang fager rom, fa? Faan ga ra rin’ e re n’ey, ma aram e rayog ni ngam dag nib ‘t’uf rom e pi cha’ ni gimed ni ke mich Got u wun’rad.’​—1 Pet. 2:17.

13. Mang fan ni gathi gubin e girdi’ u lan e ulung nrayog ni ngar manged fager rodad nrib chugur thildad?

¹³ Ere gur, ra ngari t’uf pi walagdad rodad ma aram e be yip’ fan ni gubin e walag u lan e ulung nrayog ni ngar manged fager rodad nrib chugur thildad? Danga’, ya gad manang ndabiyog e re n’ey. Ka ban’en ni arrogon ni bay boch  e girdi’ nrib chugur thildad ni bochan e taareb rogon e n’en ni gad baadag ni gad ma rin’, ma boch e danga’. I yog Jesus ni gubin e pi apostal rok e yad e “tafager” rok, machane John u fithik’rad e rib chugur thilrow. (John 13:23; 15:15; 20:2) Machane, da i ngongol Jesus ngak John nib thil rogon ko tin ka bay e apostal rok. Bod nnap’an ni yog John nge James ni walagen ngak Jesus ni nge pi’ reb e tagil’ ngorow u Gil’ilungun Got nib ga’ fan, me gaar Jesus ngorow: “Dariy mat’awug ni nggu dugliy e en ni nge par nga ba’ ni mat’aw rog nge en ni nge par nga ba’ ni gilay’ rog.” (Mark 10:35-40) Ere ngad boded Jesus ndab da guyed rogon ni nge thil rogon e ngongol rodad ngak e pi fager rodad nrib chugur thildad, nga rogon e ngongol rodad ko tin ka bay i walagdad. (Jas. 2:3, 4) Ya faan gad ra rin’ ban’en ni aray rogon, ma aram e darud pied e ayuw ko ulung rodad ni nge par ni bay e gapas riy.​—Jude 17-19.

14. Uw rogon nrayog ni nge ayuwegdad e Filippi 2:3 ni nge dab ud guyed rogon ni ngaud tagenginggad ngak pi walagdad?

¹⁴ Faanra bagadad mi ri t’uf bagadad rok, ma aram e rayog ni ngad ayuweged e ulung ndabi sum e tagenging riy. Dab mu pagtalin faram nde guy Jonathan rogon ni nge tagenging ngak David, maku de guy rogon ni nge mang ir e nge pilung ma gathi David. Ere gad gubin nrayog ni ngad folwokgad rok Jonathan. Dabi awan’um ngak pi walagem ni bochan boch ban’en nrayog rorad, ya ‘nge bagadad me sobut’nagan’, ma dabi finey bagadad ni ir e ba sorok ngak e tin ni ka bay e girdi’.’ (Mu beeg e Filippi 2:3.) Dab mu pagtalin ni gad gubin u lan e ulung nrayog ni ngad rin’ed ban’en ni nge ayuweg e ulung rodad. Ere faan gad ra par nib sobut’an’dad, ma aram e rayog ni ngad guyed fel’ngin pi walagdad me yib angin ngodad e pi n’en yad ma rin’ u fithik’ e yul’yul’.​—1 Kor. 12:21-25.

15. Mang e kam fil ko n’en ni buch rok Tanya nge chon e tabinaw rok?

 ¹⁵ Nap’an nra buch ban’en nib kireb rodad, ma ma fal’eg Jehovah lanin’dad u daken e t’ufeg nge ayuw ni ma pi’ pi walagdad ngodad. Am lemnag e n’en ni buch rok reb e tabinaw u tomuren ni kar sulod ko muulung nni tay ko Sabado u nap’an reb fapi International Convention nni tay u Meriken ko duw ni 2019 ni kenggin e “T’ufeg e Ra ‘Par Ndariy N’umngin Nap’an!’” Tanya ni dalip e bitir ni fak e yog ni gaar: “Nap’an ni gamad be sul i yan ko hotel romad, me yib i chafin reb e karrow ngomad u kanawo’. Dariy bagamad ni ke maad’ad, machane gu oggad u karrow romad nga but’ nggu sak’iygad u tooben e kanawo’ ni ka rug gingad ko n’en ke buch. Machane faan gu sapgad, ma gamad guy be’ ni be rupoy pa’ ngomad ni nggu warod ko gin bay e karrow rok riy. Cha’nem e ir reb i walagdad ni pumoon ni ka fini yib ko re convention nem. Ma gathi yigoo ir e ke tal ngomad. Ya ku bay lal e walag nu Sweden ni kar bad ni ngar uned ko re convention nem ni kur bad ra talgad ngomad. Fapi walag nib pin ni yad bay ko re karrow nem e ra gamuchmuchgad ngomow bochi pin ni fakag, me fel’ boch lanin’mow! Machane mu gog ngorad nrayog ni ngan digeymad, machane dar chuwgad. Ra pared nge taw ko ngiyal’ ni ke yib girdien e aspital, ma kan ayuwegmad ko tin nib t’uf romad. Gu thamiyed gelngin e t’ufeg rok Jehovah ngomad u nap’an ni buch e re n’ey romad. Re n’ey e ri gelnag feni t’uf pi walagmad romad, nge t’ufeg romad ngak Jehovah mu kug pininged e magar ngak.” Ka be yib ngan’um ba ngiyal’ ni ke t’uf e ayuw rom me yib reb e walag i pi’ e ayuw ngom, fa?

16. Mang boch i fan ni ngari gel e t’ufeg u thildad?

¹⁶ Am lemnag angin nra yib riy ni faanra bagadad mi ri t’uf bagadad rok. Gad ra ayuweg pi walagdad u nap’an ni ke t’uf e ayuw rorad. Ku gad ra ayuweg pi walagdad ni ngar pigpiggad ngak Jehovah u taabang ni yad ba felfelan’. Gad ra micheg ni gadad pi gachalpen Jesus, ma re n’ey e ra k’aring e piin nriyul’ ni yad baadag ni ngar nanged e tin riyul’ ni ngar pigpiggad ngak Jehovah. Ma bin th’abi ga’ fan riy e, gad ra pining e sorok ngak e en “Chitamangiy nrib tarunguy e girdi’, ni ir faanem i Got” ni ma fal’eg lanin’uy, ni aram Jehovah. (2 Kor. 1:3) Gad gubin ni gad baadag ni ngad ululgad ngaud daged e t’ufeg maku be gel e t’ufeg u thildad i yan!