1. Wuin e ra yan gubin e piin kan dugliyrad nga tharmiy?

 BOCH e duw kafram ma i gaar e girdi’ rok Jehovah u wan’rad, ‘Wuin e yira fek e tin tomur e Kristiano ni kan dugliyrad nga tharmiy?’ Bay ba ngiyal’ ni ud lemnaged nsana ra magey boch e piin kan dugliyrad u Paradis u fayleng u lan ba ngiyal’ u tomuren fare mahl ni Armageddon. Machane kad filed u lan Fare Wulyang ko Damit ko July 1, 2013 ni gubin e piin kan dugliyrad ni ka yad bay u fayleng e yad ra yan nga tharmiy u m’on ni nge tabab fare mahl ni Armageddon.​—Matt. 24:31.

2. Mang reb e deer nrayog ni nge sum, ma mang e gad ra weliy ko re article ney?

² Machane bay boch i gadad nrayog ni nge fith ni gaar: Mang e ra buch rok “yugu boch e saf” rok Kristus ni ka yad be pigpig ngak Jehovah u fithik’ e yul’yul’ u fayleng u nap’an nra yib fare “gafgow” nib ga’? (John 10:16; Matt. 24:21) Sana bay boch i gadad nrayog ni nge magafan’ nri yan i taw ko ngiyal’ nem ma dar nanged e n’en ngar rin’ed ya ke yan gubin e pi walagrad ni kan dugliyrad nga tharmiy. Ere ngad weliyed l’agruw ban’en ni bay u Bible nrayog ni nge yib ngan’dad. Ngemu’ ma gad weliy boch i fan ndariy rogon ni nge magafan’dad.

MANG E DABI BUCH?

3-4. Mang e rayog ni nge magafan’ boch e girdi’ ngay, ma mang fan?

³ Sana rayog ni nge magafan’ boch e girdi’ nri yan i taw ko ngiyal’ ndaki moy fapi walag ni yad girdien fare Ulung ni Ma Pow’iyey ni ngar pow’iyed yugu boch e saf, ma aram me tal yugu boch e saf ndab kur pigpiggad ngak Jehovah. Sana yad be lem ni aray rogon ni bochan boch ban’en ni bay murung’agen u Bible. Ngad weliyed l’agruw ko pi n’em. Bin som’on e murung’agen Jehoiada ni ir e Th’abi Tolang ko Prist. Ir reb e tapigpig rok Got nib yul’yul’. Ere ra ayuwegew Jehoshabeath ni leengin bochi tir nib pagel ni ka nog Jehoash ngak, mu kur ayuwegew ni nge mang reb e pilung nib manigil ma kub yul’yul’. N’umngin nap’an nib fos Jehoiada, ma i par Jehoash ni be rin’ e tin nib fel’. Machane tomuren  ni yim’ Jehoiada, ma aram me tabab ni nga i rin’ boch ban’en nib kireb. I motoyil ko pi tayugang’ nib kireb e ngongol rorad, ma aram me digey Jehovah.​—2 Kron. 24:​2, 15-19.

⁴ Bin l’agruw e murung’agen e pi Kristiano ni ur moyed u nap’an e bin l’agruw e chibog. Apostal John ni ir e bin tomur e apostal ni immoy e boor e Kristiano ni ayuwegrad ni ngar athamgilgad ko pigpig ni yad be tay ngak Jehovah. (3 John 4) Ke n’uw nap’an ni be guy John rogon ni nge ayuweg e ulung rok e piin yad be wereg boch e machib nde riyul’ nge ngongol nib kireb, ni bod e n’en ni i rin’ e tin ka bay e apostal rok Jesus ni yad ba yul’yul’. (1 John 2:18; mu guy e study note ko 2 Thess. 2:7.) Machane tomuren ni yim’ John, ma machib rok e piin kar digeyed e tin riyul’ ma kar chelgad kar togopuluwgad ngay e garer ni bod e nifiy. In e duw nga tomuren mi ri garer e machib nde riyul’ nge ngongol nib kireb u lan e ulung ni Kristiano.

5. Mang e susun ndab da lemnaged ko gali n’ey ni bay murung’agen u Bible?

⁵ Ere gur, gali n’ey ni bay murung’agen u Bible e be dag ni ku ra buch ban’en ni aray rogon rok yugu boch e saf rok Kristus u nap’an nra yan e piin kan dugliyrad nga tharmiy, fa? Ra taw ko ngiyal’ nem ma ra tal e pi Kristiano ni yad ba yul’yul’ ndab kur folgad ko pi n’en kan fil ngorad ni bod e n’en ni rin’ Jehoash, ara ra tababgad i wereg boch e machib nde riyul’ ni bod e n’en ni rin’ boor e Kristiano ko bin l’agruw e chibog C.E., fa? Fulweg riy e danga’! Rayog ni nge pagan’dad ngay nnap’an nra yan e piin kan dugliyrad nga tharmiy, ma ka ra ulul yugu boch e saf ni ngar liyorgad ngak Jehovah u rogon nib m’agan’ ngay miki ulul ni nge ayuwegrad. Mang fan nrayog ni nge pagan’dad ko re n’ey?

DABKI KIREB E BIN RIYUL’ E LIYOR BAYAY

6. Mang dalip ban’en ni gad ra weliy murung’agen?

⁶ Mang fan nrayog ni nge pagan’dad nra par e bin riyul’ e liyor ni ka rogon ngki mada’ ko ngiyal’ nra mo’maw’ e par boch nga m’on? Rayog ni nge pagan’dad ni bochan e n’en kad filed u Bible ni murung’agen e ngiyal’ ney ni gad bay riy. Rib thil e ngiyal’ ney ni gad bay riy ko ngiyal’ ni immoy piyu Israel riy nge pi Kristiano ko bin l’agruw e chibog. Ere chiney e ngad weliyed murung’agen dalip ban’en: (1) Nap’an piyu Israel kakrom, (2) tomuren ni yim’ e pi apostal, nge (3) ngiyal’ ney ni gad bay riy ni aram e “ngiyal’ ni nge thiliyeg Got urngin ban’en riy nge beechnag.”​—Acts 3:21.

7. Mang fan nde mulan’ e tin baaram e girdi’ nu Israel ni yad ba yul’yul’ u nap’an ni mel’eg e pi pilung nge yugu boch e girdi’ ni ngar rin’ed boch e ngongol nib kireb?

⁷ Nap’an piyu Israel kakrom. De n’uw nap’an u m’on ni nge yim’ Moses, me gaar ngak piyu Israel: “Gu manang ni bay gum’ ma bay mu kirebgad ngam n’iged e pi n’en ni kug fil ngomed.” (Deut. 31:29) Ki yog Moses ngorad ni faan yad ra togopuluw, ma yira fekrad nga bang ni kalbus. (Deut. 28:​35, 36) Gur, i riyul’ e pi thin ney? Arrogon. Nap’an e pi chibog nga tomuren, ma boor e pilung ni ur rin’ed boch e ngongol nib kireb mu kur k’aringed e girdi’ rok Got ni ngar uned i rin’ e pi ngongol nem. Bochan e re n’ey ma aram me n’ag Jehovah e pi girdi’ rok nem nib kireb e ngongol rorad me mus fare tha’ ko pilung ni immoy u roy u fayleng. (Ezek. 21:​25-27) Machane nap’an ni guy e tin baaram e girdi’ nu Israel ni yad ba yul’yul’ ni ke riyul’ e thin rok Got, ma aram me k’aringrad ni nge dab kur rusgad ni ngar ululgad ko pigpig ni yad be tay ngak u fithik’ e yul’yul’.​—Isa. 55:​10, 11.

8. Gur, susun e ngad gingad ngay ni yib boch e machib nde riyul’ nge ngongol nib kireb nga lan e ulung ni Kristiano ko bin l’agruw e chibog, fa? Mu tamilangnag.

⁸ Tomuren ni yim’ e pi apostal. Gur, susun e ngad gingad ngay ni yib boch e machib nde riyul’ nge ngongol nib kireb nga lan e ulung ni Kristiano ko bin l’agruw e chibog, fa? Danga’, ya yiiynag Jesus u m’on riy ni bay boch e girdi’ ni yad ra tabab ni ngar wereged boch e machib nde riyul’. (Matt. 7:​21-23; 13:​24-30, 36-43) Nap’an  ni taw ko bin som’on e chibog C.E., me yog apostal Paul, nge Peter, nge John ni ke tabab ni nge lebug e yiiy rok Jesus. (2 Thess. 2:​3, 7; 2 Pet. 2:1; 1 John 2:18) Ma nap’an e bin l’agruw e chibog C.E., ma ke garer e machib nde riyul’ nge ngongol nib kireb u lan e ulung ni Kristiano. De n’uw nap’an nga tomuren ni yim’ e bin tomur e apostal, ma pi Kristiano ni kar chelgad kar togopuluwgad ko bin riyul’ e liyor e ra manged bang ko fare Babylon nib Gilbuguwan ni aram e pi yurba’ i teliw ni googsur u fayleng. Aram e ngiyal’ ni ki riyul’ bayay e n’en ni yiiynag Jesus.

9. Uw rogon nib thil e ngiyal’ ney ni gad bay riy ko ngiyal’ ni immoy piyu Israel riy nge nap’an ni immoy e ulung ni Kristiano ko bin l’agruw e chibog?

⁹ “Ngiyal’ ni nge thiliyeg Got urngin ban’en riy nge beechnag.” Ba thil e ngiyal’ ney ni gad bay riy ko ngiyal’ ni immoy piyu Israel riy nge ngiyal’ ni tabab ni nge garer boch e machib nde riyul’ u nap’an e bin l’agruw e chibog C.E. Mang e yima yog ko ngiyal’ ney ni gad bay riy? Som’on e sana gad ra yog ni gad be par ko “tin tomren e rran” ko re m’ag nib kireb ney. (2 Tim. 3:1) Machane ku be tamilangnag e Bible ni bay ban’en ni ki tabab ko ngiyal’ ney ni gad bay riy nra ulul i yan ngaram. Ra ulul nge mada’ ko ngiyal’ ni ke ayuweg Gil’ilungun fare Messiah e girdi’ ni ngkur flontgad bayay me pingeg e re fayleng ney nge mang paradis. Re ngiyal’ i n’em e aram e “ngiyal’ ni nge thiliyeg Got urngin ban’en riy nge beechnag.” (Acts 3:21) I tabab e re ngiyal’ i n’em ko duw ni 1914. Mang e ni thilyeg ngan beechnag e ngiyal’ nem? Aram e ngiyal’ ni Pilung Jesus u tharmiy. Ere aram e ngiyal’ ni yib be’ ni nge mang pilung ni owchen Jehovah ni ir be’ ko tabinaw rok David ni Pilung. Machane gathi kemus e n’en ni sulweg Jehovah nga rogon. Ya de n’uw nap’an nga tomuren miki tabab ni nge sul e bin riyul’ e liyor nga rogon! (Isa. 2:​2-4; Ezek. 11:​17-20) Ere gur, bay ban’en nra kirebnag e bin riyul’ e liyor bayay, fa?

10. (a) Mang e be yiiynag e Bible u murung’agen e bin riyul’ e liyor ko ngiyal’ ney ni gad bay riy? (Isaiah 54:17) (b) Mang fan ni be pi’ e pi thin ney e athamgil nga lanin’dad?

¹⁰ Mu beeg e Isaiah 54:17. Am lemnag e re yiiy ney ni be gaar: “Dariy ba talin e cham nni ngongliy nra maad’ad ngom”! Be lebug e pi thin ney e ngiyal’ ney. Ku baaray boch e thin nra fal’eg lanin’uy ni ku bay rogon ngodad e ngiyal’ ney ni be gaar: “I gag e bay gu machibnag e girdi’ rom, mu gu pi’ e fel’ rogon nge gapas ngorad. Ngongol nib yal’uw ma mmat’aw e bayi gelnigem; ma dakuriy e . . . marus ni nge yib ngom.” (Isa. 54:​13, 14) Mus ngak Satan ni ir “fare kan nib kireb” ni be gagiyegnag e re m’ag ney ndabiyog rok ni nge taleg e girdi’ rok Jehovah ndab kur filed murung’agen ko girdi’. (2 Kor. 4:4)  Kan sulweg e bin riyul’ e liyor nga rogon ndakuriy ba ngiyal’ nra kireb bayay. Ra par ni aray rogon ndariy n’umngin nap’an. Dariy ba talin e cham nni ngongliy nra maad’ad ngodad!

MANG E RA BUCH?

11. Mang e be micheg nga lanin’dad ndabin digey fare ulung nib ga’ u nap’an nra yan e piin kan dugliyrad nga tharmiy?

¹¹ Mang e ra buch u nap’an nra yan e piin kan dugliyrad nga tharmiy? Dab mu pagtalin ni Jesus e Ir e Be Gafaliydad. Ir lolugen e ulung ni Kristiano. Ba tamilang e n’en ni yog ni gaar: “Taabe’ e ba’ ni ir e be yog e thin romed, ni aram fare Messiah.” (Matt. 23:10) Pilung rodad ni ir e be gagiyeg e chiney e gubin ngiyal’ nra rin’ e maruwel rok nib fel’ rogon. Ere dariy rogon ni nge rus pi gachalpen Kristus u roy u fayleng ni bochan e ir e be yog e thin rorad. Riyul’ ndad nanged gubin ban’en u rogon nra pow’iy Kristus e girdi’ rok e ngiyal’ nem. Ere ngad weliyed murung’agen l’agruw ni’ u Bible nrayog ni nge pi’ e athamgil nga lanin’dad.

12. Uw rogon ni ayuweg Jehovah e girdi’ rok (a) u tomuren ni yim’ Moses? (b) u tomuren nni pi’ yugu reb e maruwel ngak Elijah ni nge rin’? (Kum guy e sasing.)

¹² U m’on ni nge yan piyu Israel nga lan fare Nam ni Kan Micheg, ma aram me yim’ Moses. Ere mang e buch rorad? Gur, aram e dakuriy be’ ni nge ayuwegrad? Danga’, ya n’umngin nap’an ni yad ra par ni yad ba yul’yul’ ngak Jehovah ma ra ayuwegrad. U m’on ni nge yim’ Moses, me yog Jehovah ngak ni nge dugliy Joshua ni nge pow’iy e girdi’ rok. Ke yoor e duw ni ke skulnag Moses Joshua riy. (Ex. 33:11; Deut. 34:9) Maku reb e ku immoy boch e pumoon e ngiyal’ nem ni u rogned e thin ko girdi’ rok Got ni boch i yad e be gafaliy yu biyu’ i girdi’, ma boch i yad e yu raay, ma boch i yad e yu wugem, ma boch i yad e yu ragag. (Deut. 1:15) Rib fel’ rogon ni un ayuweg e girdi’ rok Got. Ku aram e n’en ni buch u nap’an Elijah. Boor e duw ni i ayuweg piyu Israel ni ngar liyorgad ngak Jehovah. Machane yan i taw nga ba ngiyal’ me fek Jehovah nga Judah ni nge rin’ reb e maruwel nib thil. (2 Ki. 2:1; 2 Kron. 21:12) Ere gur, dakuriy be’ ni nge ayuweg e piin yad ba yul’yul’ ni yad be par ko fa ragag i ganong u Israel, fa? Danga’, ya ke yoor e duw ni ka i skulnag Elijah Elisha riy. Ku bay ba ulung i “profet” u rom ni kan skulnagrad. (2 Ki. 2:7) Ere boor e pumoon ni yad ba yul’yul’ nrayog ni ngar pow’iyed e girdi’ rok Got. I ulul Jehovah ni nge lebguy e n’en nib m’agan’ ngay ma be ayuweg e pi tapigpig rok ni yad ba yul’yul’.

13. Mang e be yog e Hebrews 13:5b nra pi’ e athamgil nga lanin’dad? (Kum guy e sasing.)

¹³ Ere mang e ga be lemnag nra buch u nap’an ni yira fek e tin tomur e piin kan dugliyrad nga tharmiy? De t’uf ni nge magafan’dad ko n’en nra  buch. Baaray ban’en nib riyul’ ni be yog e Bible nra pi’ e athamgil nga lanin’dad, ni aram e: Dariy ba ngiyal’ nra pag Jehovah e girdi’ rok u fayleng. (Mu beeg e Hebrews 13:5b.) Fachi ulung i Kristiano ni kan dugliyrad ni yad ma yog e thin rodad e ngiyal’ ney e yad manang feni ga’ fan ni ngan skulnag yugu boch e girdi’ ni bod Moses nge Elijah. Ke yoor e duw ni be skulnag e pi walag ni pumoon ni yad bang ko fare Ulung ni Ma Pow’iyey boch e pumoon ni yad ba muun nga yugu boch e saf ni nga rogned e thin rodad. Bod ni boor e skul ni kar ngongliyed ni ngan skulnag e piin piilal riy, nge pi walag ni pumoon ni yad ma lekag e ulung, nge pi Branch Committee, nge pi walag ni pumoon ni yad ma yarmiy boch e maruwel u Bethel, nge yugu boch e walag. Ku be skulnag fare Ulung ni Ma Pow’iyey boch e walag ni pumoon ni yad ma pi’ e ayuw nga boch e ulung ni bay u tan pa’ fare Ulung ni Ma Pow’iyey. Pi walag ney e boor e maruwel ni yad be rin’ ni fan ko ulung rodad e ngiyal’ ney u fithik’ e yul’yul’. Ere rayog rorad ni ngar ululgad i ayuweg e pi saf rok Kristus.

14. Mang e ba ga’ fan ko n’en gad be weliy?

¹⁴ Baaray e n’en nib ga’ fan ko n’en gad be weliy, ni aram e: Nap’an ni yira fek e tin tomur ko piin kan dugliyrad nga tharmiy u nap’an ni ke chugur nga tungun fare gafgow nib ga’, ma ka ra ulul e bin riyul’ e liyor u roy u fayleng. Ke magar Jesus Kristus ni ir e be yog e thin rodad, ya ra taw ko ngiyal’ nem ma ka ra ulul e girdi’ rok Jehovah ni ngar liyorgad ngak u fithik’ e yul’yul’. Riyul’ nra taw ko ngiyal’ nem ma ra cham Gog nu Magog ara fare ulung i nam ngodad. (Ezek. 38:​18-20) Machane dab ra gelgad ya dabi tal e girdi’ rok Got ko liyor ni yad be tay ngak Jehovah. Ra ayuweg e yafos rorad! Nap’an nni pilyeg e changar rok apostal John me guy fapi “girdi’ ni ke muulung ni pire’ ni pire’” ni yad yugu boch e saf rok Kristus. Nog ngak John ni pi girdi’ nem ni “ke muulung ni pire’ ni pire’” e kar thapgad nga barba’ “fare gafgow ni ba ga’.” (Rev. 7:​9, 14) Arrogon, yira ayuwegrad ndabi buch ban’en rorad!

15-16. Mang e ra rin’ e piin ke dugliyrad Kristus u nap’an fare mahl ni Armageddon nrogon ni be yog e Revelation 17:​14, ma mang fan nra pi’ e re n’ey e athamgil nga lanin’dad?

¹⁵ Machane ku rayog ni nge gaar boch e girdi’ u wan’rad: ‘Ere uw rogon e piin kan dugliyrad? Mang e yad ra rin’ u tomuren ni yad ra yan nga  tharmiy?’ Ba tamilang e fulweg riy ni be pi’ e Bible. Be yog ni pi am ko re fayleng ney e yad ra ‘cham ngak fare Fak e Saf.’ Machane yad ra war, ya be gaar e Bible: “Fare Fak e Saf . . . e [bayi gel] ngorad.” Ma mini’ e piin yad ra ayuweg? Be pi’ e re verse ney e fulweg riy. Be yog ni yad e piin kan “piningrad,” nge piin kan “mel’egrad,” nge piin yad ba “yul’yul’.” (Mu beeg e Revelation 17:14.) Mini’ e pi cha’ ney? Aram e piin kan dugliyrad ni kan fasegrad ka ranod nga tharmiy! Ere nap’an ni yira fek e tin tomur ko piin kan dugliyrad ni ka yad bay u fayleng nga tharmiy u nap’an nra chugur nga tungun fare gafgow nib ga’, ma reb e maruwel ni yira pi’ ngorad ko som’on e aram e ngar chamgad. Rib manigil e biney e maruwel ni yira pi’ ngorad! Bay boch e Kristiano ni kan dugliyrad ni ur uned ko cham u m’on ni ngar manged boch e Pi Mich Rok Jehovah. Ku bay boch i yad ni i un ko salthaw. Machane boch nga tomuren mar manged boch e tin riyul’ e Kristiano mar filed rogon ni ngar awnaged e gapas u thilrad yugu boch e girdi’. (Gal. 5:22; 2 Thess. 3:16) Kar talgad ndakurur uned ko mahl. Machane tomuren ni yira fekrad nga tharmiy, ma aram e yad ra un ngak Kristus nge pi engel rok ngar chamgad ko pi toogor rok Got u nap’an e bin tomur e mahl ni yira tay.

¹⁶ Am lemnag e re n’ey! Bay boch e Kristiano ni kan dugliyrad u fayleng ni kar pilibthirgad ma kur meewargad. Machane nap’an ni yira fasegrad nga ranod nga tharmiy, ma aram e yad ra mang boch e kan nib gel gelngirad ndab kur m’ad biid mi yad un ngak Jesus Kristus ko cham ni ir e Pilung rorad nib Falu’. Tomuren fare mahl ni Armageddon, ma aram e yad ra un i ayuweg e girdi’ ni ngar flontgad. Dariy e maruwar riy nra taw ko ngiyal’ nem ni yad bay u tharmiy ma boor ban’en nrayog ni ngar rin’ed ni fan ko pi walagrad u fayleng ko tin nrayog ni ngar rin’ed ni faanra ka yad boch e girdi’ ndawor ra flontgad!

17. Uw rogon ni kad nanged ni gubin e tapigpig rok Got ndariy ban’en nra buch rorad u nap’an fare mahl ni Armageddon?

¹⁷ Gur bagayad yugu boch e saf, fa? Faanra gur bagayad, ma mang e ba t’uf ni ngam rin’ u nap’an nra tabab fare mahl ni Armageddon? Aram e ngam pagan’um ngak Jehovah mag fol ko n’en be yog ni ngan rin’. Mang e rayog nib muun ko re n’ey? Be gaar e Bible: “Marod nga lan e naun romed ngam man’niged e mab nga fiti keru’med. Mi gimed mith boch ngiyal’ nge taw ngilan’ ni ke m’ay e damumuw rok Got.” (Isa. 26:​20, BT) Gubin e tapigpig rok Got ni yad ba yul’yul’ u tharmiy ngu fayleng ndariy ban’en nra buch rorad e ngiyal’ nem. Gad bod apostal Paul nib pagan’dad nrogon ni gadad ba t’uf rok Got e ‘dariy ban’en nrayog ni nge daregdad riy’ ndemtrug ko pi am ara tin bay e chiney ara tin bay yib. (Rom. 8:​38, 39) Dab mu pagtalin ni gab t’uf rok Jehovah ma dariy ba ngiyal’ nra digeyem!