1. Mang e rayog ni nge ayuwegdad ni ngad adaged ni ngad filed e pi yiiy u Bible?

 I YOG reb e walag ni kab pagel ni ka nog Ben ngak ni gaar, “Gu baadag nug ma fil murung’agen e pi yiiy u Bible.” Ba puluw u wan’um e n’en ke yog? Fa ga be lemnag ni kaygi mo’maw’ ni ngan nang fan e pi yiiy u Bible? Sana ku rayog ni ngam lemnag ni faan ga ra fil murung’agen e pi yiiy ma ra chalbam ngay. Machane nap’an ni ga ra fil fan ni ke uneg Jehovah e pi yiiy ney nga lan e Thin rok, ma sana ga ra thilyeg e lem rom.

2. Mang e gad ra weliy ko re article ney?

² U lan e re article ney e gathi kemus ni gad ra weliy riy fan nsusun e ngad filed murung’agen e pi yiiy u Bible, ya ku gad ra weliy rogon nrayog ni ngad filed e pi yiiy nem. Ku gad ra weliy l’agruw e yiiy u lan fare babyor rok Daniel ya nge yag nda nanged rogon nra ayuwegdad e chiney ni faanra tamilang u wan’dad.

3. Faanra ngad nanged fan e pi yiiy u Bible, ma mang e ba t’uf ni ngad rin’ed?

³ Faanra ngad nanged fan e pi yiiy u Bible, mab t’uf ni ngad ninged e ayuw. Am lemnag e re fanathin ney. Mu susunnag ni kam man nga bangi ban’en ndawor mu un ngay bayay, machane bay reb e fager rom ni gimew be milekag ni manang fan e re gin’em. Manang e gin gimew bay riy nge gin ni sor ba pa’ e kanawo’ ngay nge ba pa’. Dariy e maruwar riy ni ga ra felfelan’ ni ke m’agan’ e re fager rom nem ngay ni nge un ngom! Ku arrogon Jehovah ni manang e ngiyal’ ni gad bay riy nge n’en nra buch boch nga m’on. Ere faanra ngad nanged fan e pi yiiy u Bible, mab t’uf ni ngad sobut’naged lanin’dad ngad ninged e ayuw ngak.​—Dan. 2:28; 2 Pet. 1:19, 20.

4. Mang fan ni ke n’igin Jehovah ni ngan yoloy boch e yiiy nga lan e Thin rok? (Jeremiah 29:11) (Kum guy e sasing.)

⁴ Baadag Jehovah ni nge fel’ e par rok pi fak boch nga m’on ni bod reb e gallabthir nib manigil. (Mu beeg e Jeremiah 29:11.) Machane Jehovah e ba thil nga reb e gallabthir nib girdi’ ni bochan e rayog ni nge yog e n’en nra buch boch nga m’on, ma gubin  ngiyal’ nib puluw e n’en ma yog. Ke n’igin ni ngan yoloy boch e yiiy nga lan e Thin rok ya nge yag nda nanged boch ban’en nib ga’ fan u m’on ni nge buch. (Isa. 46:10) Ere pi yiiy u Bible e aram boch e tow’ath ni ke pi’ e Chitamangidad ni bay u tharmiy ni bochan e gad ba t’uf rok. Machane uw rogon nrayog ni ngari mich u wan’um nra lebug e n’en be yiiynag e Bible?

5. Mang e rayog ni nge fil reb e fel’ yangaren ko n’en ni buch rok Max?

⁵ Pi fel’ yangaren u lan e ulung rodad e ba ga’ ni yad ra yan nga skul mab liyegrad e girdi’ ni gathi ri yad ma tayfan e Bible fa reb e dariy fan e Bible u wan’rad. Thin nge ngongol rorad e rayog ni nge k’aring reb e Pi Mich ni kab fel’ yangaren ni nge maruwar boch ban’en u wan’. Mu tay fanam i yan ko n’en ni buch rok reb e walag ni pumoon ni ka nog Max ngak. I yog ni gaar: “Nap’an ni kab fel’ yangareg, ma aram me tabab ni nge maruwar u wan’ug ko rriyul’ e pi n’en be fil e gallabthir rog ngog fa danga’. Ki maruwar u wan’ug ko rriyul’ ni Bible e ke yib rok Got fa danga’.” Ere mang e rin’ e gallabthir rok? I yog ni gaar, “Yugu aram rogon ni gu manang ni magafan’row, machane dar damumuwgow ngog.” Ra fanayew e Bible ni ngar piew e fulweg ko pi deer rok Max. Ku bay ban’en ni rin’ Max. I yog ni gaar, “Ug fil e pi yiiy u Bible ni yigoo gag, mu kug weliy e n’en kug fil ngak yugu boch e fel’ yangaren.” Ere mang angin ni yib riy? I yog ni gaar, “Tomuren me mich u wan’ug ni Bible e ke yib rok Got!”

6. Mang e ba t’uf ni ngam rin’ ni faanra be maruwar boch ban’en u wan’um, ma mang fan?

⁶ Faanra ke tabab ni nge maruwar u wan’um ni Bible e aram e gin bay e tin riyul’ riy ni bod e n’en ni buch rok Max, ma dab mu lemnag ni kam rin’ ban’en nib kireb. Machane bay ban’en nib t’uf ni ngam rin’ ko re n’ey. Pi n’en ma maruwar u wan’uy e bod e t’ay. Faanra dabin rin’ ban’en ngay ma ra munmun me kirebnag ban’en nib tolang puluwon. Ra nge dabki maruwar boch ban’en u wan’um nrayog ni nge warnag e michan’ rom, ma aram e ba t’uf ni ngam fithem ni nge lungum, ‘Ba mich u wan’ug e n’en be yog e Bible u murung’agen e n’en bay nga m’on, fa?’ Faanra gathi rib mudugil e re n’ey u wan’um, ma aram e ba t’uf ni ngam fil murung’agen boch e yiiy u Bible ni ke lebug. Uw rogon nrayog ni ngam rin’ e re n’ey?

7. Uw rogon ni dag Daniel e kanawo’ nib fel’ nrayog ni ngad folwokgad riy u rogon ni ngan fil murung’agen e pi yiiy u Bible? (Daniel 12:10) (Kum guy e sasing.)

⁷ Ke dag Daniel e kanawo’ nib fel’ nrayog ni ngad folwokgad riy u rogon ni ngan fil murung’agen e pi yiiy u Bible. Ba puluw fan ni i fil e pi yiiy. Baadag ni nge nang e tin riyul’. Daniel e ku ir be’ nib sobut’an’, ya manang nra pi’ Jehovah e tamilangan’ ngak e piin yad manang ma yad ma fol ko pi motochiyel rok. (Dan. 2:27, 28; mu beeg e Daniel 12:10.) I micheg ni ir be’ nib sobut’an’ ni aram e i taga’ ngak Jehovah ni nge ayuweg. (Dan. 2:18) Ku ir be’ ni ma fal’eg i fil e thin rok Got. I fal’eg i gay murung’agen boch ban’en u lan e pi Babyor nib Thothup ni immoy rok e ngiyal’ nem. (Jer. 25:11, 12; Dan. 9:2) Ere uw rogon nrayog ni ngam folwok rok Daniel?

8. Mang fan ni bay boch e girdi’ ndubrad ni nge mich u wan’rad nra riyul’ e pi yiiy u Bible, machane mang e susun ni ngad rin’ed?

⁸ Mu lemnag fan ni ga be rin’ e re n’ey. Ga ma fil e pi yiiy u Bible ni bochan e ri ga baadag ni ngam  nang e tin riyul’ u Bible, fa? Faanra arrogon, ma ra ayuwegem Jehovah. (John 4:23, 24; 14:16, 17) Ku mang reb i fan nrayog ni nge fil be’ murung’agen e yiiy u Bible? Bay boch e girdi’ nrayog ni ngar rin’ed e re n’ey ni bochan e yad be athapeg ni ngar pirieged ban’en nra micheg ni gathi Got e ke yib e Bible rok. Yad ma lemnag ni faanra gathi Got e ke yib e Bible rok, ma aram e rayog ni ngar dugliyed rorad ko mang e ba fel’ ma mang e ba kireb. Machane ba t’uf ni nge puluw fan ni ngad filed e pi yiiy u Bible. Ku bay reb e fel’ngin nib t’uf ni nge yag ngodad ni faanra ngad nanged fan e pi yiiy u Bible.

9. Mang fel’ngin e ba t’uf ni nge yag ngodad ni faanra ngad nanged fan e pi yiiy u Bible? Mu tamilangnag.

⁹ Mu sobut’nag lanin’um. Ke micheg Jehovah nra ayuweg e piin yad ba sobut’an’. (Jas. 4:6) Ere ba t’uf ni ngad meybilgad ngak ni nge ayuwegdad ni ngad nanged fan e pi yiiy u Bible. Thingar ki m’agan’dad ngay nib t’uf ni nge ayuwegdad fare tapigpig nib yul’yul’ ni ir e ma fanay Jehovah ni nge pi’ e ggan ni fan ko tirok ban’en ko ngiyal’ ni nge pi’ riy. (Luke 12:42) Jehovah e ir reb e Got nib yaram, ere ba puluw ni kemus ni taareb e kanawo’ ni nge fanay ni nge ayuwegdad ni ngad nanged e tin riyul’ ni bay ko Thin rok.​—1 Kor. 14:33; Efe. 4:4-6.

10. Mang e kam fil ko n’en ni rin’ Esther?

¹⁰ Mu fal’eg i fil. Mmel’eg reb e yiiy ni ga baadag ni ngam nang murung’agen, mag gay boch ban’en u murung’agen. Aram e n’en ni rin’ reb e walag nib pin ni ka nog Esther ngak. Baadag ni nge fil boch ban’en u murung’agen e pi yiiy ni be weliy murung’agen e wub nra tay fare Messiah. I yog ni gaar, “Nap’an ni gaman 15 e duw rog, mug tabab ni nggu gay e mich riy nni yoloy e pi yiiy ney u m’on ko ngiyal’ ni immoy Jesus riy.” N’en ni fil u nap’an ni beeg murung’agen fa yungi babyor ni ka nog e Dead Sea Scroll ngay e micheg boch ban’en nga laniyan’. I yog ni gaar, “Bay yu yang ko pi babyor nem nni yoloy u m’on ko ngiyal’ ni immoy Kristus riy, ere ba mudugil ni pi yiiy ni bay riy e Got e ke yib rok.” Ki yog ni gaar, “Ba t’uf ni nggu sul nggu beeg e pi n’em in yay ya nge yag ni nggu nang fan.” Machane ba felfelan’ ngay ni ke rin’ e re n’ey. Tomuren ni fal’eg i fil boor e yiiy u Bible, me yog ni gaar, “Rayog ni ngguy nriyul’ e n’en be yog e Bible!”

11. Mang angin nra yib ngodad ni faan gad ra micheg nga lanin’dad nib riyul’ e n’en be yog e Bible?

¹¹ Nap’an ni gad ra guy rogon ni ke lebug boch e yiiy ni bay ko Thin rok Got, ma aram e rra pagan’dad ngak Jehovah nge rogon ni be pow’iydad. Maku reb e, pi yiiy u Bible e ra ayuwegdad ni ngaud lemnaged e athap rodad boch nga m’on ni yugu demtrug e re miti magawon ni gad be mada’nag e chiney. Ere chiney e ngad weliyed murung’agen l’agruw e yiiy ni yog Daniel ni be lebug e chiney. Gad ra nang fan e gal yiiy ney, ma aram e rayog ni ngad dugliyed boch ban’en u fithik’ e gonop.

12. Mang e be yip’ fan rifrifen ay fare liyos ni kan ngongliy ko “wasey ni kan athkuy ko but’”? (Daniel 2:41-43)

¹² Mu beeg e Daniel 2:41-43. Rifrifen ay fare liyos ni guy Nebukadnezzar ni Pilung u lan fare lik’ay rok ni weliy Daniel fan e kan ngongliy ko “wasey ni kan athkuy ko but’.” Gad ra taarebrogonnag e re yiiy ney nga yugu boch e yiiy ni bay ko fare babyor rok Daniel nge Revelation, ma rayog  ni ngad guyed riy ni rifrifen ay fare liyos e be yip’ fan e Am nu Ngalis nge Meriken, ni aram e re am nib gel lungun u fayleng e chiney. I yog Daniel nre am ney e “bayi par nib gel bang riy, ma ba war bang.” Mang fan nib war bang riy? Ya girdi’ riy ni kan taareb rogonnagrad ko but’ e yad be mo’maw’nag ko re am ney ni nge par nib gel gelngin ni bod e wasey. b

13. Mang l’agruw ban’en nib ga’ fan nrayog ni ngad filed ko re yiiy ney?

¹³ Bay in ban’en nib ga’ fan ni gad ra fil ko n’en ni weliy Daniel u murung’agen fare liyos nni guy u malik’ay, nib ga’ ni rifrifen ay e boor ban’en ni gad ra fil riy. Bin som’on e bay boch e kanawo’ ni ke dag e Am nu Ngalis nge Meriken riy nib gel gelngin. Bod ni yu Ngalis nge yu Meriken e yow ba muun ko pi nam nra gelgad ko Bin Som’on nge Bin L’agruw e Mahl ko Fayleng. Machane ke war gelngin e re am ney, maku be ulul ni nge war i yan ni bochan e girdi’ riy e yad be cham ngorad maku yad be chel ngaur chamgad ko re am ney. Ma bin migid e ireray e bin tomur e am nra gel lungun u fayleng u m’on ni nge thang Gil’ilungun Got urngin e am ko girdi’. Yugu aram rogon ni yu ngiyal’ e rayog ni nge togopuluw boch e nam ko fare Am nu Ngalis nge Meriken, machane dab ranod nga lon. Gad manang e re n’ey ni bochan e “fare malang” ni be yip’ fan Gil’ilungun Got e ra t’et’ar rifrifen ay fare liyos ni aram e gin be yip’ fan e Am nu Ngalis nge Meriken.​—Dan. 2:34, 35, 44, 45.

14. Faan gad ra nang fan fare yiiy ni murung’agen rifrifen ay fare liyos ni kan ngongliy ko wasey ni kan athukuy ko but’, ma uw rogon nra ayuwegdad ni ngad dugliyed boch ban’en u fithik’ e gonop?

¹⁴ Ba mich u wan’um nriyul’ fare yiiy rok Daniel ni murung’agen rifrifen ay fare liyos ni kan ngongliy ko wasey ni kan athukuy ko but’, fa? Faanra arrogon, ma ra rin’ ban’en ko n’en ga ma rin’ u lan e yafos rom. Ra ayuwegem ndab um guy rogon ni nge yoor e salpiy nge chugum rom ni bochan e ga manang ndab ki n’uw nap’an ma bay ni thang e re fayleng ney. (Luke 12:16-21; 1 John 2:15-17) Ga ra nang fan e re yiiy ney maku ra ayuwegem ni ngam nang feni ga’ fan fare maruwel ni machib nge ngan fil ban’en ko girdi’. (Matt. 6:33; 28:18-20) Tomuren ni kam fil murung’agen e re yiiy ney, ma mang ndab mu fithem ni nge lungum, ‘Ma m’ug ko n’en nug ma dugliy nib mich u wan’ug ndab ki n’uw nap’an ma bayi thang Gil’ilungun Got urngin e am ko girdi’, fa?’

15. Mini’ “fare pilung ko lel’uch” nge “fare pilung ko yimuch” e ngiyal’ ney? (Daniel 11:40)

¹⁵ Mu beeg e Daniel 11:40, NW. c Be weliy e Daniel ko guruy ni 11 murung’agen l’agruw e pilung ara am nra ur chamgow ngorow ni bochan e ra bagayow ma baadag ni nge par ni ir e ba gel lungun u fayleng. Gad ra taarebrogonnag e re yiiy ney nga yugu boch e yiiy u Bible ma rayog ni ngad guyed riy ni yu Russia nge pi nam ni yad ba mang ngak e aram “fare pilung ko lel’uch,” ma Am nu Ngalis nge Meriken e aram “fare pilung ko yimuch.” d

16. Mang boch e magawon ni be mada’nag e piin yad be par u tan e gagiyeg ko “fare pilung ko lel’uch”?

¹⁶ Be gafgownag “fare pilung ko lel’uch” e girdi’ rok Got ni yad be par u tan e gagiyeg rok. Bay boch e Pi Mich ni kan toyrad ma ka non’rad nga kalbus ni bochan e michan’ rorad. N’en be rin’ “fare pilung ko lel’uch” ko pi walagdad e der k’aring e marus ngorad, ya be gelnag e michan’  rorad. Mang fan? Bochan ni yad manang ni gafgow ni yibe tay ngorad e be lebguy e pi yiiy ni bay ko fare babyor rok Daniel. e (Dan. 11:41) Gad ra nang e re n’ey, ma ra ayuwegdad ni ngaud pared nib mudugil e athap rodad ma gad ba yul’yul’.

17. Mang boch e magawon ni ke mada’nag e girdi’ rok Got ni yad be par u tan e gagiyeg ko “fare pilung ko yimuch”?

¹⁷ “Fare pilung ko yimuch” e ka i gafgownag e girdi’ rok Jehovah kakrom. I buch e re n’ey u nap’an e Bin Som’on nge Bin L’agruw e Mahl ko Fayleng u nap’an nni kalbusnag boor e walag ni bochan e ra siyeged ni ngar uned ko mahl mu kun taleg boch e bitir ko skul ni bochan e da ur siro’gad ko flak. Machane ku bay boch e kanawo’ ni kan skengnag e yul’yul’ ko girdi’ rok Jehovah ni yad be par u tan e gagiyeg ko re pilung ney u boch e duw ngaray riy. Bod nra taw nga nap’an e towal, ma rayog ni nge adag reb e Kristiano ni nge tay langin reb e ulung ara be’ ni yibe towaliy. Sana dabi un ko towal, machane lem rok e der par u mathilin. Ere aram fan nrib  ga’ fan ni gathi kemus ni ngaud daged ko ngongol rodad ni gad be par u mathilin ngongolen e am, ya thingar ki un lanin’dad ngay!​—John 15:18, 19; 18:36.

18. Uw rogon u wan’dad e cham ni be tay “fare pilung ko lel’uch” nge “fare pilung ko yimuch”? (Kum guy e sasing.)

¹⁸ Piin nde mich e pi yiiy u Bible u wan’rad e rayog ni ngari magafan’rad u nap’an ni yad ra guy ni be “cham” “fare pilung ko yimuch” nge “fare pilung ko lel’uch.” (Dan. 11:40) Gal pilung ney e ba gaman urngin talin e cham rorow ni bay e nuclear riy nrayog ni nge thang urngin e yafos u fayleng. Machane gad manang ndabi pag Jehovah ni nge buch e re n’ey. (Isa. 45:18) Aram fan nder magafan’dad ko cham ni be tay “fare pilung ko lel’uch” nge “fare pilung ko yimuch,” ya bin riyul’ riy e be gelnag e michan’ rodad. Be micheg ni ke chugur tungun e re m’ag ney.

19. Mang e susun ni ngad nanged u murung’agen e pi yiiy u Bible?

¹⁹ Dad nanged rogon nra lebug boch e yiiy u Bible. Mus ngak Daniel ni profet ma gathi gubin ban’en ni yoloy nga but’ ni manang fan. (Dan. 12:8, 9) Machane faanra gathi ri gad manang rogon nra lebug reb e yiiy, ma aram e gathi be yip’ fan ndabi riyul’. Dariy e maruwar riy nrayog ni nge pagan’dad nra dag Jehovah ngodad e n’en nib t’uf ni ngad nanged ko ngiyal’ nib puluw ni nge rin’ riy ni bod ni i rin’ kakrom.​—Amos 3:7.

20. Mang boch e yiiy ndab ki n’uw nap’an ma gad guy ni ke lebug, ma mang e susun ni ngad ululgad ni ngad rin’ed?

²⁰ Yira yog ni “ke gapas ndariy ban’en nra buch.” (1 Thess. 5:3) Ngemu’ me chel e pi am nu fayleng ngar thanged e pi yurba’ i teliw ni googsur. (Rev. 17:16, 17) Ku yad ra cham ko girdi’ rok Got. (Ezek. 38:18, 19) Tomuren, ma aram me tabab fare mahl ni Armageddon. (Rev. 16:14, 16) Rayog ni nge pagan’dad ngay ndab ki n’uw nap’an ma ra buch e pi n’ey. Machane nap’an ni gad be sonnag e re ngiyal’ i n’em, ma ngad ululgad i pining e magar ngak e Chitamangidad ni bay u tharmiy ni aram e ngad tedan’dad ko pi yiiy u Bible ma gad be ayuweg yugu boch e girdi’ ni ngkur rin’ed e re n’ey.