KENGGIN E RE KE BABYOR NEY
Mini’ e Pi Mich Rok Jehovah?
“Ke yoor e duw ni gu manang Mike. Ir bagayad e Pi Mich Rok Jehovah. Machane, ma balyangan’ug ko teliw rok. Mini’ Jehovah? Mang fan nder ma un e Pi Mich i madnomnag e pi madnom ni ma madnomnag e girdi’ nu fayleng? Gur, be un Mike nga reb e ulung ni ke sum u barba’ e teliw ni yugu ba thil rogon ko tin ni ka bay e teliw?”—Becky, California, Meriken.
“Nap’an ni un boch e buguli yoror rog ngak e Pi Mich Rok Jehovah ko fol Bible, ma aram mu ug lemnag ko: ‘Mang fan e re ngachal nem ni ka nog e Pi Mich Rok Jehovah ngay? Yugu ba mit rogon e binem e ngachal!’”—Zenon, Ontario, Canada.
“Gamow ma lemnag e ppin rog ni ma yib e Pi Mich Rok Jehovah nga tabinaw romow ni ngar k’aringed gamow ni nggu lemnagew ni gamow ba kireb ni bochan e da gur unew nga galesiya. Gu lemnagew ni faanra mus ko tin baaray e teliw ni boor e girdi’ ni ma un ngay ma dabiyog ni nge ayuwegmow ko n’en nib t’uf romow, me ere biney e ulung ni yugu ba mit rogon ni yima yog e Pi Mich Rok Jehovah ngay e dabiyog ni ngar ayuweged gamow.”—Kent, Washington, Meriken.
“Bin riyul’ riy e dag nang ko yad mini’ nge n’en ni ke mich u wan’rad.”—Cecilie, Esbjerg, Denmark.
Sana ga ma guyrad ni yad ma machib u mit e tabinaw i yan, nge yungi n’en ni ma muulung e girdi’ ni yoor ngay, maku ga ma guyrad ni yad ma wereg boch e babyor ni bay e thin nu Bible riy, maku yad ma ognag e fol Bible ko girdi’ ndariy puluwon. Maku reb e, sana bay bagayad ni ke pi’ ba ken e re babyor ney ngom. Yugu aram rogon, ma sana ga ma lemnag ko mini’ e Pi Mich Rok Jehovah. Maku dabisiy ni taareb rogon e n’en ni ga ma lemnag ko n’en ni ke yog bagayad fapi girdi’ ni bay e thin rorad aray u lang.
Faanra bay boch ban’en u murung’agen e Pi Mich Rok Jehovah ndawori tamilang u wan’um, me ere uw e rayog ni ngam gay e fulweg ko deer rom riy? Uw rogon nrayog ni ngam nang e n’en ni ke mich u wan’ e Pi Mich Rok Jehovah, nge gin ni yad ma fek e salpiy riy ni nge ayuwegrad ko machib ni yad ma tay nge pi naun ni yad ma fanay ni nge mang tagil’ e liyor rorad, nge fan ni yad ma yib nga tabinaw rom, nge fan ni yad ma non ngom u nap’an ni yad ra mada’nagem ko yungi n’en ni ma yan e girdi’ ni yoor ngay?
Cecilie ni faan kan weliy murung’agen e yog ni gaar: “Boor ban’en u murung’agen e Pi Mich Rok Jehovah ni gu ma beeg ko Internet. Boor ban’en ni gu ma rung’ag u murung’agrad ni ma weliy e girdi’, maku gu ma motoyil nga boch e welthin ni yima pi’ u murung’agrad nib kireb. Bochan e re n’ey, ma aram mu rug dabuy daken e Pi Mich Rok Jehovah.” Machane, boch nga tomuren, ma aram me non Cecilie ngak e Pi Mich Rok Jehovah me yag ni ngan pi’ e fulweg ko pi deer rok u murung’agrad.
Ga baadag ni ngam nang e bin riyul’ e fulweg ko pi deer rom u murung’agen e Pi Mich Rok Jehovah? Gamad be pi’ e athamgil nga lanin’um ni ngam non ngak e piin ni kar ngongliyed e re ke babyor ney, ni aram e Pi Mich Rok Jehovah, ya aram e piin nrayog ni ngar pied e fulweg ko deer rom nib puluw. (Proverbs 14:15) Gamad be athapeg nra ayuwegem e tin ni ka bay e article nga tomuren e biney ni ngam nang e tin riyul’ u murung’agmad nge n’en ni ke mich u wan’mad, nge rogon e maruwel ni gamad ma rin’.
