Nge Puluw e Ngongol Rom ko fare Kenggin e Meybil ni Fil Jesus​—Guruy ni 2

“Chitamangimed e manang e n’en nthingari yog ngomed.”​—MATT. 6:8.

KA GA MANANG?

Mang e ba muun ko ggan ni ngad ked ni gad ma yibilay ngak Got ni nge pi’ ngodad u reb e rran ngu reb?

Faanra nge n’ag Got fan e denen rodad, ma mang e thingar da rin’ed?

Uw rogon ni ma fulweg Jehovah taban e n’en ni gad ma yibilay ngak ni aram e nge dabi fekdad i yan ko skeng nib mo’maw’?

1-3. Uw rogon ni ke tamilang u wan’ reb e walag nib pin ni manang Jehovah e tin nib t’uf rodad?

 BAY reb e walag nib pin ni Lana fithingan ni weliy rogon ni fulweg Jehovah taban e meybil rok u nap’an ni yan nga Chiyamen ko duw ni 2012. L’agruw ban’en ni yibilay Lana ngak Jehovah me fulweg taban. Reb ko gal meybil nem e tay u nap’an ni be yan u train nga sikojio. I meybil ngak Jehovah ni nge ayuweg ya nge yag ni nge machibnag be’. Ma bin l’agruw e meybil ni tay e yog ngak Jehovah ni nge ayuweg, ya nap’an ni taw nga sikojio mi nog ngak ni ke thil e rofen nra chuw fare sikoki nsusun e nge un riy, kan tay ko bin migid e rran. Ere, meybil Lana ngak Jehovah ni nge ayuweg ya ke chuway’ nga gubin e salpiy ni immoy rok dakuriy, ma dariy bang nrayog ni nge par riy.

² Nap’an ni yigi mu’ Lana ko meybil, me rung’ag laman be’ ni ke gaar, “Lana, mang e ga be rin’ u roy?” Re pumoon nem ni be non ngak e be’ ni yow nga skul kafram. Kar bad e chitiningin nge titaw rok ni nga nib ni tay nga sikojio ni nge yan nga South Africa. Tomuren ni weliy Lana salpen ngorad, ma aram me yog Elke ni chitiningin fare pumoon ngak Lana nrayog ni nge par u tabinaw rorad. Rib fel’ rogon nra ayuwegew Lana mu kur fith fithew boch e deer ngak u murung’agen e michan’ rok nge machib ni ma tay u polo’ e tayim rok.

 ³ Bin migid e rran riy u tomuren ni kar mu’gad ko abich ni kakadbul, miki fith e chitiningin fare pumoon nge titaw rok boch e deer ngak Lana u murung’agen e Bible. Ere, yoloy Lana e address rorow nga but’ ya nge yag ni ki sul be’ nga i guyrow. Tomuren e re n’ey, ma aram me sul Lana ko binaw rok, miki ulul ko machib ni ma tay u polo’ e tayim rok. Bochan e n’en ni buch rok, ma aram miri mich u wan’ ni ke fulweg Jehovah “taban e meybil” rok, ma kki ayuweg ko tin nib t’uf rok.​—Ps. 65:2.

4. Mang boch ban’en nib t’uf rodad ni gad ra weliy murung’agen?

⁴ Nap’an ni gad ra mada’nag reb e magawon nib tomgin, mab ga’ ni gad ma ning e ayuw ngak Jehovah, ma ma felfelan’ ngay ni nge fulweg taban e meybil rodad. (Ps. 34:15; Prov. 15:8) Machane, faan gad ra fal’eg i lemnag fare kenggin e meybil ni fil Jesus ngak pi gachalpen, ma gad ra nang ni ka bay boch ban’en ni kub t’uf ni ngaud yibilayed. Am lemnag dalip ban’en ni bay rogon ko n’en nib t’uf rodad ko tirok Got ban’en ni kan weliy murung’agen u lan e re meybil nem. Ma gur, bay ban’en nrayog ni ngad rin’ed ya nge yag ni puluw e ngongol rodad ko n’en ni gad ma yibilay ngak Got ni aram e nge pi’ e tin nib t’uf rodad u reb e rran ngu reb?​—Mu beeg e Matthew 6:11-13.

“MPI’ NGOMAD E DABA’ E GGAN NI NGE YOG NGOMAD”

5, 6. Mang nib ga’ fan ni ngaud yibilayed ni nge yag e ggan ngodad u reb e rran ngu reb ni yugu aram rogon ni gad ba gaman ko tin nib t’uf rodad?

⁵ Mu tay fanam i yan riy ni yog Jesus ni nge lungudad, “ggan ni nge yog ngomad,” ma gathi nge lungudad, “ggan ni nge yog ngog.” I yog Victor ni ir be’ ni ma lekag e ulung u Africa ni gaar: “Ri gu ma pining e magar ngak Jehovah ni bochan e der ma magafan’mow e ppin rog ko gin ni nge yib e ggan riy ni nggu wew, ara en ni nge thang puluwon e naun ni gamow be par riy. Ya gubin e rran ni ma ayuwegmow e pi walag u lan e ulung. Machane, gu ma yibilay ni nge ayuweg Jehovah e pi walag ni yad ma ayuwegmow ko pi magawon ni yad ma mada’nag nib l’ag rogon ko salpiy nge par rorad.”

⁶ Dabisiy nib gaman e ggan ni ngad ked u reb e rran ngu reb. Machane, ba t’uf ni ngad lemnaged e pi walag ni yad be gafgow ni bochan e yoko’ nge durru’ nge ku boch ban’en. Gathi kemus ni ngaud pied e meybil ni ferad, ya kub t’uf ni nge puluw e ngongol rodad ko n’en ni gad be yibilay. Bod nrayog ni ngad pied e tin ni bay rodad ban’en ni fan e ngad ayuweged e pi walagdad ni ke t’uf e ayuw rorad. Ku rayog ni ngaud pied e salpiy ni ayuw ni fan ko fare maruwel ni yibe rin’ u ga’ngin yang e fayleng, ya aram e re salpiy ni ku yima fanay ni ngan ayuweg e pi walag ni ke t’uf e ayuw rorad u ga’ngin yang e fayleng.​—1 John 3:17.

7. Uw rogon ni tamilangnag Jesus nsusun e ‘dabi magafan’dad nga rogodad gabul’?

⁷ Fapi thin ni yog Jesus u lan e meybil rok u murung’agen e ggan ni nge yag ngodad u reb e rran ngu reb e be yip’ fan e tin nib t’uf ko par rodad. I yog ni faanra be ayuweg Jehovah e pi floras nu ma’pan, me ‘ere gathi mmudugil nra pi’ Got e mad ngodad?’ Ki ulul ngay ni gaar: “Rib achig e pagan’ romed ngak Got! Ere dabi magafan’ be’ nge gaar: ‘U uw e bay yib [riy] e . . . mad ni nggon’?’” I museg e welthin rok ko pi thin ni baaray ni gaar: “Ere dabi magafan’med nga rogomed gabul.” (Matt. 6:30-34) Be dag e re n’ey nde t’uf ni nge magafan’dad ko tin nib t’uf ko par rodad nge pag rogon, ya susun ni nge fel’ u wan’dad e tin ni be yag ngodad ni fan ko par rodad u reb e rran ngu reb. Pi n’ey e ba muun ngay e gin ni ngad pared riy, nge maruwel ni ngad uned ngay ni nge ayuwegdad ni ngad pied e tin nib t’uf ko tabinaw rodad, nge rogon ni ngad gonopiyed e n’en ni ngad rin’ed u nap’an ni kad m’argad. Machane, dabiyog ni ngad pared ni kemus ni yigoo tin nib t’uf ko par rodad e ir e ngaud yibilayed, ya kub t’uf ni ngaud yibilayed boch ban’en ni kab ga’ fan ni bod rogon e tin nib t’uf rodad ni fan ko tirok Got ban’en.

8. Mang e be puguran ngodad fapi thin ni weliy Jesus u murung’agen e ggan ni nge yag ngodad u reb e rran ngu reb? (Mu guy e sasing ni bay u tabolngin e re article ney.)

⁸ Pi n’en ni weliy Jesus u murung’agen e ggan ni nge yag ngodad u reb e rran ngu reb ara tin nib t’uf ko par rodad u reb e rran ngu reb e ku be puguran ngodad ban’en nib t’uf ni nge yag ngodad ni aram e tin nib t’uf rodad ko tirok Got ban’en. Aram fan ni  yog ni gaar: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.” (Matt. 4:4) Ere, susun ni ngaud meybilgad ni nge ulul Jehovah i pi’ e tin nib t’uf rodad ni fan ko tirok ban’en ko ngiyal’ ni nge pi’ riy.

MU “N’AG FAN U WUN’UM E MALFITH ROMAD”

9. Uw rogon ni denen rodad e aram e “malfith” rodad u p’eowchen Got?

⁹ I yog Jesus ni gaar: “[Mu] n’ag fan u wun’um e malfith romad.” (Matt. 6:12, NW) Boch nga tomuren miki yog ni gaar: “[Mu] n’ag fan u wun’um e denen romad.” (Luke 11:4) I yog e re n’ey ni bochan ni denen rodad e taareb rogon ko malfith rodad. Sogonap’an 60 e duw ni ke yan me yog e re ke babyor ney ni gaar: “Nap’an ni gad ra denen nib togopuluw ngak Got, ma aram e malfith rodad ngak. . . . Rayog ni nge thangdad Got ni bochan e denen rodad. . . . Ku rayog ni nge chuweg e gapas rok rodad, me kireb e tha’ u thildad. . . . Ba milfan ngodad ni ngad t’ufeged Got ma gad fol rok. Ere, nap’an ni gad ra denen ma aram e bod ndaki yag ni ngad thanged e malfith rodad, ya kad rin’ed ban’en ni be m’ug riy nde t’uf Got rodad.”​—1 John 5:3.

10. Uw rogon nrayog ni nge n’ag Jehovah fan e denen rodad? Susun ni nge uw rogon e re n’ey u wan’dad?

¹⁰ Fare biyul ni pi’ Jesus e aram kanawoen nrayog ni nge n’ag Got fan e denen rodad. Yugu aram rogon ni ke chugur ni nge gaman 2,000 e duw nap’an ni kan pi’ e re biyul ney, ma susun ni nga i par ni ban’en nib ga’ fan u wan’dad. “Puluwon e pogofan” rodad ni kan pi’ e “yugub pag feni tolang.” Ere, aram fan ndariy be’ nrayog rok ni nge pi’ e re biyul ney. (Mu beeg e Psalm 49:7-9; 1 Peter 1:18, 19.) Ere, susun ni ngaud pared ma gad be pining e magar ngak Jehovah ko re tow’ath ney. Maku reb e, fare thin ni be gaar, “denen romad” e be puguran ngodad ni gad gubin nib t’uf e re tow’ath ney rodad. Ere, baadag Jehovah ni gathi kemus ni yigoo gadad e ngaud lemnaged rarogodad ko tirok Got ban’en, ya ngkud lemnaged rarogon boch e girdi’ ko tirok Got ban’en, ni kub muun ngay e piin ni kar rin’ed boch ban’en ni dubdad. Ba ga’ ni pi oloboch ney e nochi oloboch nib achig, ere rayog ni nge ayuwegdad ni ngad daged nriyul’ nib t’uf pi walagdad rodad mab m’agan’dad ngay ni ngad n’aged fan e kireb rorad ni bod rogon ni ke n’ag Got fan e kireb rodad.​—Kol. 3:13.

11. Mang nib ga’ fan ni ngaud n’aged fan e kireb ni ke rin’ be’ ngodad?

¹¹ Bochan ni gad bogi tadenen ma bay yu ngiyal’ nib mo’maw’ ni ngad n’aged fan e kireb ni ke rin’ be’ ngodad. (Lev. 19:18) Faan gad ra weliy e pi n’ey ngak boch e girdi’, ma rayog ni ngar folgad ngodad, ma aram me yurba’ e girdi’ u lan e ulung. Ma faan gad ra ulul i rin’ e re n’ey, ma aram e be m’ug riy ni gad be darifannag e runguy rok Got nge fare biyul ni maligach  ni ke pi’ ni fan ngodad. Dabiyog ni nge yib angin e re biyul ney ngodad ni faanra dab da n’aged fan e kireb ni ke rin’ be’ ngodad. (Matt. 18:35) Ireray e n’en ni tamilangnag Jesus u tomuren ni weliy murung’agen e re kenggin e meybil ney. (Mu beeg e Matthew 6:14, 15.) Maku reb e, faanra nge n’ag Got fan e denen rodad, ma thingar da guyed rogon ndab da rin’ed reb e denen nib ubchiya’, ma ireray e n’en ni migid nni weliy u lan fare kenggin e meybil ni fil Jesus.​—1 John 3:4, 6.

“DAB MFEKMAD I YAN KO SKENG NIB MO’MAW’”

12, 13. (a) Mang e buch rok Jesus u tomuren ni un ko taufe? (b) Nap’an ni gad ra rin’ ban’en nib kireb u nap’an ni kan waliydad, ma mang fan ndab don’ed e kireb riy nga daken boch e girdi’? (c) Bochan ni par Jesus nib yul’yul’ ngak Got nge mada’ ko yam’, ma mang e micheg?

¹² Faan gad ra lemnag e n’en ni buch rok Jesus u tomuren ni un ko taufe, ma ra ayuwegdad ni nge tamilang u wan’dad fan nib t’uf ni ngad meybilgad ni nge lungudad: “Dab mfekmad i yan ko skeng nib mo’maw’.” I pow’iy gelngin Got nib thothup Jesus i yan nga daken e ted. Ni mang fan? “Fan e nge yib e moonyan’ i guy rogon e n’en nra rin’ me denen Jesus.” (Matt. 4:1; 6:13) Gur, gad ra gin ko re n’ey, fa? Faanra rib tamilang u wan’dad fan ni l’og Got Fak nga fayleng, ma susun e dab da gingad ngay. Fan ni pag Got e re n’ey ni nge buch rok Jesus e bochan ni nge pi’ e fulweg ko fare deer ni sum u nap’an ni togopuluw Adam nge Efa nga mat’awun Got ko gagiyeg. Ma bay boch e deer nib t’uf e tayim ni ngan tamilangnag e fulweg riy. Bod rogon fare deer ni be gaar, Gur, ba kireb rogon ni sunmiy Got e girdi’? Rayog rok be’ nib flont ni nge par nib yul’yul’ ngak Got me gagiyelnag ni bay mat’awun Got ni nge gagiyeg ni yugu aram rogon nra guy “Faanem nib Kireb” rogon ni nge waliy ko kireb, fa? Ma gur, rayog ni nge fel’ rogon e par ko girdi’ ni faan yad ra par rorad ni bod rogon ni yog Satan? (Gen. 3:4, 5) Ba t’uf ba ngiyal’ ni nge yan mfini yag ni nge tamilang e fulweg ko pi deer ney. Machane, re n’ey e ra ayuweg e girdi’ ni gubin ni nge tamilang u wan’rad nib fel’ rogon e gagiyeg ni be tay Jehovah ma ra yib angin ngodad.

¹³ Bochan nib thothup Jehovah ma aram fan ndariy ba ngiyal’ nra waliy be’ ko kireb. Satan e ir e “En Ma Waliyey.” (Matt. 4:3, NW) Boor e kanawo’ nrayog ni nge waliydad Satan riy. Machane, ra be’ ma ir rok e ra mel’eg ko nge pag Satan ni nge waliy ko denen fa danga’. (Mu beeg e James 1:13-15.) Nap’an ni guy Satan rogon ni nge waliy Jesus ko kireb, me fanay Jesus e Thin rok Got ni nge siyeg e pi skeng nem ni fek Satan i yib ngak. Aram rogon ni dag Jesus nib yul’yul’ ngak Got. Machane de tal Satan. Ya pag Jesus nib “ngoch nap’an,” me yan ni ka be sonnag e ngiyal’ nib fel’ ni ngki waliy Jesus riy bayay. (Luke 4:13) Yugu aram rogon me togopuluw Jesus ko pi skeng ni fek Satan i yib ngak. Ere, ke yag ni nge par Kristus nib yul’yul’ ngak Jehovah me micheg ndemtrug feni mo’maw’ e skeng nra mada’nag be’ nib flont ma rayog ni nge par u fithik’ nib yul’yul’ ngak Got. Machane, ma guy Satan rogon ni nge bannag pi gachalpen Jesus ni ka gab muun ngay.

14. Mang e gad ra rin’ me yag ni ngad pared ni gad ba yul’yul’ u nap’an ni ke yib e skeng ngodad?

¹⁴ Bochan fare deer ni ke sum u murung’agen mat’awun Got ko gagiyeg, ma aram fan ni ma pag Jehovah faen ni Ma Waliyey ni nge fanay boch ban’en u roy u fayleng ni nge waliydad ko kireb. Gathi Got e ma waliydad ko kireb. Ya bin riyul’ riy e manang nrayog ni ngad pared ni gad ba yul’yul’, maku baadag ni nge ayuwegdad. Bochan ni ke pi’ e puf rogon ngodad, ma aram fan nder ma towasariydad ni ngad folgad rok. L’agruw ban’en nthingar da rin’ed. Bin som’on e ba t’uf ni ngad pared nib fel’ e tha’ u thildad Jehovah, ma bin l’agruw e thingar ud meybilgad ni gubin ngiyal’. Uw rogon ni ma fulweg Jehovah taban e meybil rodad?

15, 16. (a) Mang boch e skeng nthingar da gelgad ngay? (b) Faanra kad denengad, ma mini’ e kireb rok?

¹⁵ Ma pi’ Jehovah gelngin nib thothup ngodad, ma re gelngin ney e rayog ni nge ayuwegdad ni ngad siyeged e pi n’en ni yibe waliydad ngay. Ku ma fanay Got e Thin rok nge ulung rok ni nge puguran boch ban’en ngodad nthingar da siyeged, ni bod rogon urngin e tayim, nge salpiy, nge gelngidad ni gad ma fanay ni fan e ngad yognaged boch e chugum nde ga’ fan ngodad. Bay ba wu’ e mabgol ni ka nog Espen nge Janne ngorow ni yow ma par u reb e nam  u Europe nib fel’ rogon e par ko girdi’ riy. Boor e duw ni ur pigpiggow ni yow l’agruw e pioneer u reb e ulung ko nam rorow nib t’uf e ayuw riy. Munmun mar fakayew l’agruw e bitir ma aram mar talgow ko pioneer. I yog Espen ni gaar: “Chiney ndakir yag ni nge yoor e tayim ni gamow ma fanay ni fan ko machib e gamow ma meybil ngak Jehovah ni nge ayuwegmow ndab gu awgow nga boch e wup ni ma fek Satan i yib ngomow. Ma gamow ma ning e ayuw ngak Jehovah ni nge ayuwegmow ni nge par e tha’ u thilmad nib fel’ ma gamow par ni gamow ba pasig ko machib ni gamow ma tay.”

¹⁶ Ku reb e ban’en ni ku yima waliydad ngay e aram e ngaun yaliy yaan e ngongol ni puwlag. Faanra kad uned ko re ngongol nib kireb ney, ma dabiyog ni nga don’ed e kireb riy nga daken Satan. Ni mang fan? Ya dabiyog rok Satan nge re fayleng ney ni nge towasariydad ni ngad rin’ed ban’en ni dubdad ni ngad rin’ed. Bay boch e girdi’ ni kar awgad ko biney e wup ni bochan e yug yad ma par ni yad ma lemnag boch ban’en nib kireb. Machane, faanra ke yag rok boch e walag ni ngar siyeged e re n’ey, me ere ku rayog rodad.​—1 Kor. 10:12, 13.

“NGAM AYUWEGMAD ROK FAANEM NIB KIREB”

17. (a) Faanra nge puluw e ngongol rodad ko n’en ni gad ma yibilay ni aram e nge ayuwegdad Got rok faanem nib kireb, ma mang e thingar da rin’ed? (b) Mang e ke chugur ni nge buch?

¹⁷ Faanra nge puluw e ngongol rodad ko n’en ni gad ma yibilay ni aram e nge ‘ayuwegdad Got rok Faanem nib Kireb,’ ma thingar da guyed rogon ni ngad pared ni gad ba thil ko “girdi’ nu fayleng.” Thingari dabi t’uf rodad e “tin ni ba’ u roy u fayleng ara n’en nib mil fan nga fayleng.” (John 15:19; 1 John 2:15-17) Gad manang nib mo’maw’ e re n’ey. Machane, rib gel e felfelan’ ni gad ra tay u nap’an nra rin’ Jehovah e n’en ni gad ma ning u lan e meybil rodad ni aram e nge chuweg Satan nge re m’ag nib kireb ney! Machane, dab da paged talin nnap’an nin’ Satan nga wuru’ e tharmiy me nang ndaki n’uw nap’an ni nge par. Ere, aram fan ni kari damumuw ma be gay rogon ni nge k’aringdad ni nge dab kud pared ni gad ba yul’yul’ ngak Got. Ere, thingar ud meybilgad ni nge ayuwegdad Got rok faanem nib kireb.​—Rev. 12:12, 17.

18. Faanra ngad mageygad ni gad ba fos u nap’an ni yira thang e re m’ag rok Satan ney, ma mang e thingar ud rin’ed?

¹⁸ Ga baadag ni ngam par u bang ndaki moy Satan riy, fa? Faanra ga baadag, ma aram e ngaum yibilay Gil’ilungun Got ni nge gagiyelnag feni thothup fithingan Got, me rin’ e tin nib m’agan’ Got ngay u roy u fayleng. Um par ma ga be meybil ngak Jehovah ni nge pi’ e tin nib t’uf ko par rom nge tirok Got ban’en. Arrogon, mu dugliy u wan’um ni ngaum par nib puluw e ngongol rom ko fare kenggin e meybil ni fil Jesus.

[Deer ni ngan pi’ e fulweg riy]