Mu lemnag rogon ba matam ni be non ngak ba pagel ni fak ni medlip e duw yangaren. I yog ni gaar, “Kakrom e sunmiy Got e fayleng nge gubin ban’en ni bay riy, nib muun ngay e yal’, pul, nge pi t’uf.” Ma aram me par fachi pagel nga i fal’eg i lemnag e re n’em, miki fith e chitamangin ni gaar, “Ere papa’, mini’ e ke sunmiy Got?”

Me fulweg fare matam ni gaar: “Dariy be’ ni sunmiy Got. Ya gubin ngiyal’ ni immoy.” Chingiyal’ nem e ke fel’ u wan’ fare tir fare fulweg ni ke pi’ e chitamangin ngak. Machane, nap’an ni be ilal fare tir i yan ma ku be lemnag fare deer. Ke pirieg nib mo’maw’ rok ni nge nang fan e re n’em ni Got e de sum. Ya mus ko palpalth’ib nni sunmiy. Ere, i lemnag ko ‘Uw e yib Got riy?’

Uw rogon ni ke pi’ e Bible e fulweg ko re deer ney? Taareb rogon e fulweg ni ke pi’ e Bible nga rogon e fulweg ni ke pi’ fare matam. I yoloy Moses ni gaar: “Somol, . . . u m’on ndawor mu sunumeg e pi burey, u m’on ndawor mu sunumeg e fayleng, ma ga ba’ ni gur e Got ndabi math biid, nda mu sum ma dariy e rofen ni ga ra mus.” (Psalm 90:1, 2) Ki yog Isaiah ni profet ni gaar: “Da mu nang? Dawor mu rung’ag? I Somol e ir fare Got ni bay i par ndariy n’umngin nap’an; ir e sunumiy e fayleng ni ga’ngin”! (Isaiah 40:28) Maku fare babyor rok Jude e ku be weliy ni Got e be par “ndariy n’umngin nap’an.”​—Jude 25.

Fa gal thin nu Bible e be tamilangnag ngodad ni Got e ir e “Pilung ni bay i par ndariy n’umngin nap’an,” ni bod ni weliy apostal Paul murung’agen. (1 Timothy 1:17) Re n’ey e be yip’ fan ni Got e de sum, ma ra par ndariy n’umngin nap’an. (Revelation 1:8) Ere, Got ni Gubin Ma Rayog Rok e bay fel’ngin ni dabi math biid.

Mang fan nib mo’maw’ ni nge mich e re n’ey u wan’dad? Bochan nib ngoch nap’an e yafas rodad mab thil rogon ni gad ma lemnag e tayim nga rogon ni ma lemnag Jehovah. Bochan ni Got e dariy rofen nra mus, ma aram fan nreb e biyu’ e duw e gowa taareb e rran u wan’. (2 Peter 3:8) Am lemnag e re n’ey: Gur, rayog ko asmen’ing ni ma par nib fas ni 50 e rran ni nge nang fan rogon e yafas ko girdi’ u lan 70 ara 80 e duw? Dabiyog! Machane, be tamilangnag e Bible ni faanra ngan taareb rogonnagdad ngak e En Tasunmiy ma taareb rogodad ko asmen’ing. Maku rogon ni gad ma lemnag boch ban’en e ba thil nga rogon ni ma lemnag. (Isaiah 40:22; 55:8, 9) Ere, dab da gingad ngay ni bay boch ban’en u rarogon Jehovah nib mo’maw’ ni ngad nanged fan.

Yugu aram rogon ni sana ba mo’maw’ ni nge mich u wan’dad ni bay ba Got nde sum, machane gad ra nang nib puluw e re n’em. Faanra bay be’ ni ke sunmiy Got, ma aram e cha’nem e ra yan i aw ni ir e En Tasunmiy. Machane, be weliy e Bible ni Jehovah e ir e en ni “sunumiy urngin ban’en.” (Revelation 4:11) Maku gadad manang ni immoy ba ngiyal’ nda immoy e palpalth’ib. (Genesis 1:1, 2) Ere, uw rogon ni sum? Dabisiy ni En ni Sunmiy e immoy ko som’on. Maku immoy u m’on ndawor ni sunumeg Fak Got ni kari maagirag rok nge pi engel. (Job 38:4, 7; Kolose 1:15) Ere, ba tamilang ni kemus ni yigoo ir e immoy ko tabolngin. Dariy be’ ni sunmiy; maku dariy ban’en ni immoy e ngiyal’ nem nrayog ni nge sunmiy Got.

Bochan ni gadad ba’ nge bochan ni bay e palpalth’ib ma be micheg nriyul’ ni bay Got ni manemus. Ba mudugil ni fa En ni ir e ke sunmiy gubin ban’en ke tay nga tagil’ e de sum. Ere, aram fan ni kemus ni ir e rayog rok ni nge pi’ e yafos ngak e tin ni ka bay ban’en u fayleng.​—Job 33:4.