Bin Taareb e Deer: Bay Fan e Yafas Rog, Fa?

BAY be’ nib ppin ni Rosalind fithingan ni ilal u England, ni be’ nri baadag ni ma fil boch ban’en. Maku baadag ni nge ayuweg e girdi’. Ere, tomuren ni mu’ ko skul, me un nga reb e maruwel nib fel’, mab tolang puluwon riy. Re maruwel rok nem e ba muun ngay ni nge ayuweg e piin ndariy e gin ni ngar pared riy, ma ngki ayuweg e piin ni yad ba marwoth, maku dabiyog ni ngar nonad. Yugu aram rogon nrib fel’ e maruwel rok mab gaman e tin nib t’uf ko par rok, machane yog ni gaar, “Boor e duw ni ke yan, ma gu ma lemnag ko mang fan ni gad bay nge mang fan e yafas rodad?”

Mang nib puluw ni ngan fith e re deer ney? Girdi’ e ba thil ko gamanman ni bochan nrayog rodad ni ngad fal’eged i lemnag rarogon boch ban’en. Maku rayog rodad ni ngad filed boch ban’en ko n’en i buch rodad kafram, ma ngad tanomniged murung’agen e gabul nge langlath, ma ngad gayed fan e yafas rodad.

Mang e ma yog boch e girdi’ u murung’agen e re n’ey? Ba ga’ ni ma lemnag e girdi’ ni fan e yafas e kemus ni nge yag e chugum nge salpiy ma nge gilbugudad, ma aram me yag e felfelan’ ngodad.

Mang e be tamilangnag e pi thin ney? Gadad e gad ma lemnag ko mang e ri ba ga’ fan ko yafas rodad. Maku ba ga’ fan e n’en ni gad ma lemnag ko n’en nib m’agan’ Got ngay.

Mang e be fil e Bible? Solomon ni Pilung e yognag boor ban’en ni fan ko par rok, me nameg boch ban’en ni nge felfelan’ ngay, me yan i tamilang u wan’ ndariy rogon e pi n’ey ko yafas rok. Ma aram me tamilangnag e n’en ni susun e nge ga’ fan u lan e yafas rodad u nap’an ni yoloy ni gaar: “Nguum par ni ba’ madgun Got u wan’um  ma ga be fol ko thin rok, ya kari mus fan ni sunmiy Got e girdi’.” (Eklesiastes 12:13) Ere, mang e ba muun ngay ni ngan fol ko pi motochiyel rok Got?

Baadag Got ni ngad felfelan’gad ko yafas rodad. I yog Solomon ni gaar: “Bin th’abi fel’ ngak be’ ni nge rin’ e nge abich me garbod me felfelan’ ko tin ke thognag. Maku gu nang fan e chiney, ni mus ko biney ni yib rok Got.”—Eklesiastes 2:24, BT.

Baadag Got ni ngad ayuweged ma gad t’ufeg girdien e tabinaw rodad. Mu lemnag e pi fonow ni fan ngak gubin girdien e tabinaw.

“Pumoon e thingari t’uf rorad e piin nleengirad ni bod rogon nib t’uf dowrad rorad.”—Efesus 5:28.

“Urngin e ppin ni thingari ta’ fan figirngin.”—Efesus 5:33.

“Piin ni bitir, thingar mu folgad rok e gallibthir romed.”—Efesus 6:1.

Faan gad ra fol ko pi kenggin e motochiyel nu Bible, ma ra yib e felfelan’ ngodad, ma ra fel’ u wan’dad e pi n’en ni bay rodad. Machane, n’en ni nge ga’ fan u wan’dad e aram e ngad filed murung’agen e en ni Sunmiydad, ma gad chugur ngak ni bod reb e fager. Ya be pi’ e Bible e athamgil nga lanin’dad ni ngad “chugurgad ngak Got.” Me micheg ngodad ni gaar: “Me chugur ngomed.” (James 4:8) Faan ga ra fol ko re thin ney, ma ga ra pirieg e bin nriyul’ i fan e yafas.

Faanra ga baadag ni ngam nang ko uw rogon me yag nim felfelan’nag Got, mag guy e guruy ni 12 ko fare ke babyor ni Mang e Ri Be Fil e Bible? Ma rayog ni ngam downloadnag ko www.jw.org

[Kahol ko page 5]

Uw Rogon ni Tamilangnag Jesus Fan e Yafas?

De maruwar u wan’ Jesus fan e yafos rok. Ya i yog ni gaar: “Ni gargelnigeg ngaray nga fayleng ni bochan e nggu weliy murung’agen e tin riyul’. En ni girdien e tin riyul’ e ra rung’ag e thin ni gu be yog.” (John 18:37) I fanay Jesus e yafas rok ni nge fil e tin riyul’ u murung’agen Got nge pi n’en nib m’agan’ ngay.

Nap’an ni gad ra folwok rok Jesus, ma gad ra pirieg e bin riyul’ i fan e yafas rodad, ma aram fan ni be pi’ e athamgil ngodad ni ngad rin’ed e re n’ey. (Matthew 11:29) Mu lemnag l’agruw e kanawo’ nrayog ni ngad rin’ed e re n’ey riy.

I fil Jesus rogon ni nge yag e bin riyul’ e felfelan’ ngodad, ni aram e ngad ‘pirieged u lanin’dad ni kad gafgowgad ndabisiy ni nge yog Got ngodad.’ (Matthew 5:3) Rayog ni nge fel’ e tha’ u thildad Got ni faan gad ra fil murung’agen ma ‘gad nang ko mini’ Jesus Kristus, ni ir e ke l’og ke yib.’—John 17:3.

Ke yog Jesus ngak pi gachalpen ni ngar filed ngak e girdi’ e pi n’en ni kar nanged. Ya yog ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup [“Gelngin Got nib Thothup,” NW] mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.”—Matthew 28:19, 20.

Piin ni yad ma gay rogon ni ngar m’onoggad ko tirok Got ban’en u daken e fol Bible ni yad ma tay, mar folgad ko pi n’en ni yad be fil e yad ma pirieg ni ke fel’ boch rogon e yafas rorad. Ma nap’an ni yad ra ayuweg boch e girdi’ ni ngar nanged Got, ma re n’ey e ra gelnag e pagan’ rorad nriyul’ ni bay fan e yafas rorad.