Pi Yiiy—ni Gubin Ma Ke Lebug
Pi Yiiy—ni Gubin Ma Ke Lebug
“Somol ni Got romed e ke pi’ urngin e tin ni ba manigil ngomed ni micheg ni ra pi’. Urngin e tin ni micheg e goo ke rin’ ni rogon; dariy reb ni pag.”—JOSHUA 23:14.
UW ROGON NIB THIL E BIBLE? Dabiyog ni ngan pagan’uy ngak boch e girdi’ ni yad ma yiiynag e pi n’en nra buch boch nga m’on ma ku dabiyog ni ngan pagan’uy ko horoscope. Ku yima fanay boch ban’en ni be buch e ngiyal’ ney ya nge yog ni ngan nang e pi n’en ni bayi buch boch nga m’on. Ba thil e Bible, ya yiiy ni bay riy e ba tamilang ma be weliy e tin ni bay ko tabolngin nge yan i mada’ ko tungun, ma “kab kakrom mu gog e tin ni bay yib” ma ra tomur riy ma ra lebug.—Isaiah 46:10.
BOD ROGON NI: Nap’an e bin nel’ e chibog B.C.E., min piliyeg e changar rok Daniel ni profet ni nge guy fare gagiyeg rok yu Medo-Persia ni kar wargad nga pa’ yu Greece. Me yiiynag nnap’an ni “yan i taw nga gelngin” me “ming” e gagey rok. Mini’ e ra yan nga lon? I yoloy Daniel ni gaar: “Aningeg guruy ni ra reb e pilung ma be gagiyegnag bayang, machane dabiyog ni nge taareb gelngirad ko fa bin som’on e pilung ni i gagiyegnag fare nam ni polo’ ko som’on.”—Daniel 8:5-8, 20-22.
N’EN NI MA YOG E PIIN NI MA FIL CHEPIN E GIRDI’: Ke pag 200 e duw nga tomuren ni immoy Daniel, me Alexander e mang pilung nu Greece. U lan 10 e duw, me gel Alexander ko fare gagiyeg nu Medo-Persia me ga’nag e gin ni be gagiyegnag nge yan i mada’ ko fare Lul’ nu Indus. Machane nap’an ni ke gaman 32 e duw rok, me yim’ nib tomgin. Me tomuren reb e mahl ntay nib chugur nga Ipsus u Asia Minor me war e gagiyeg rok. Ma aningeg i ga’ ko salthaw rok e ra foth’ed e pi binaw nu Greece ni aningeg guruy nra bagayad me gagiyegnag bang. Machane, dariy bagayad ni taareb gelngin ko bin som’on e pilung ni aram e Alexander.
MANG E GA BE LEMNAG? Gur, bay reb e babyor ni ke lebug urngin e yiiy ni bay riy? Ara ba thil e Bible nga yugu boch e babyor?
[Blurb on page 4]
Ke yog reb e babyor ni gaar: “Boor e yiiy u Bible ni dabiyog ni nge yigi par me lebug.”—A LAWYER EXAMINES THE BIBLE, BY IRWIN H LINTON
[Picture Credit Line on page 4]
© Robert Harding Picture Library/SuperStock
