Mu Fil Ban’en Ko Thin Rok Got

Mang Fan ni Thingar Da Fanayed Fithingan Got?

Re article ney e bay boch e deer riy ni sana kaam fith kafram. Be weliy e re article ney e fulweg riy ni kan fek u Bible. Pi Mich Rok Jehovah e yad baadag ni ngar weliyed e fulweg riy ngom.

1. Mang fan ni ke mel’eg Got reb e ngachal ni fan ngak?

Dariy e maruwar riy ni ga baadag ni ngan pining fithingam ma gathi liw rom, ni bod rogon e “pumoon,” ara “ppin.” Ngachal rom e be tamilangnag ko gur mini’. Got e bay e liw rok ni aram e “Somol Nth’abi Tolang,” nge “Got ni Gubin ma Rayog Rok,” nge “En Tasunmiy.” (Genesis 15:2; 17:1; Eklesiastes 12:1) Machane, ir e ke tunguy reb e ngachal ngak ni bochan nge yog ni nge fel’ e tha’ u thildad. Got e bay fithingan ni aram e Jehovah.​—Mu beeg e Isaiah 42:8. *

2. Mang nib ga’ fan ni ngan nang fithingan Got?

Ra ngan nang fithingan Got, ma gathi kemus ni ngan nang rogon ni nga nog e re ngachal nem. Ma ra ngan nang fithingan Got ma rayog ni ngan chugur ngak. Fan e re ngachal nem ni Jehovah e aram e “Ra K’aring ni nge Buch.” Re n’ey e be micheg ni Got e rayog ni nge lebguy e tin nib m’agan’ ngay. Ere ra ngan nang fithingan Got ma be yip’ fan nib mich u wan’dad nra lebguy gubin ban’en ni ke micheg. (Psalm 9:10) Bochan e michan’ rok e piin ni yad manang Got, ma yad ma fanay e ngachal rok ni Jehovah, ma ra n’ey e ra k’aringrad ni nge pagan’rad ngak, mar ted nib m’on u lan e yafas rorad. Ra ayuweg Got e pi girdi’ ney.​—Mu beeg e Psalm 91:14.

 3. Mang fan ni baadag Got ni ngan nang fithingan?

Baadag Got ni nga nang e girdi’ fithingan ya ra yib angin ngorad. Re n’ey e ra ayuwegrad ni ngar manged e fager rok Got, ma bay e athap rorad ko yafas ndariy n’umngin nap’an. Aram fan ni baadag Jehovah ni ngad nanged fithingan.​—Mu beeg e John 17:3; Roma 10:13, 14.

Ke tamilangnag Jesus fithingan Got ko girdi’ kan nang u daken e pi n’en ni i fil ngorad u murung’agen, nge Motochiyel Rok, nge pi n’en ni Ke Micheg. Ngiyal’ ney e be ulul pi gachalpen Jesus ni ngar weliyed fithingan Got ngan nang u ga’ngin yang e fayleng. Yad be maruwel u taabang ni “ngar manged girdien” Got.​—Mu beeg e Acts 15:14; John 17:26.

4. Uw rogon nra n’uf Got fithingan?

Bochan ni kan gathibthibnag fithingan Jehovah Got ma aram fan ni baadag ni ngan n’uf e ngachal rok. Bod ni ma yog boch e girdi’ ni gathi Got e sunmiy e yafas, maku de t’uf ni ngad folgad rok. Maku bay e piin ni yad ma yog ni Got e der ma lemnagdad, ma ir e ma k’aring e gafgow. Pi girdi’ ney e yad be darifannag fithingan Got. Machane, bay ba ngiyal’ nra mus e re n’ey. Ya Got e ra thang e piin ni yad be darifannag e ngachal rok.​—Mu beeg e Psalm 83:17, 18.

Nap’an nra chuweg Gil’ilungun Jehovah gubin e am ni be gagiyeg u fayleng, me sulweg e gapas ngak gubin e girdi’, ma aram e ra n’uf fare ngachal rok. (Daniel 2:44) Dabki n’uw nap’an ma ra nang e girdi’ ni gubin ni kemus ni Jehovah e ir e bin riyul’ e Got.​—Mu beeg e Ezekiel 36:23; Matthew 6:9.

Mang e thingar mu rin’? Mu chugur ngak Got u nap’an ni ga be fil e Thin rok ma ga chag ngak e girdi’ nib t’uf Got rorad. Dabi pag Jehovah talin e pi tapigpig rok ni yad ba yul’yul’ u nap’an nra n’uf e ngachal rok.​—Malaki 3:16.

[Footnote]

Ra ga baadag ni ngkum nang boch, mag guy e guruy ni 1 ko fare ke babyor ni ke fal’eg e Pi Mich rok Jehovah.

[Picture on page 10]

Fithingan Got u reb e babyor ni Hebrew kakrom