Mang Fan ni Nge M’on u Wan’um e Pigpig ni Ga Be Tay Ngak Jehovah?

“Bay gu weliy fel’ngim; polo’ e rran ni bay u gog rogon ni ga ma mat’awnigey.”​—PS. 71:15, BT.

UW ROGON NI GA RA FULWEG?

Mang fan ni m’oneg Noah, nge Moses, nge Jeremiah, nge Paul Jehovah u wan’rad?

Mang e ra ayuwegem ni ngam dugliy e n’en ni ngam rin’ ko yafas rom?

Mang fan ni kam dugliy ni nge m’on u wan’um e pigpig ni ga be tay ngak Jehovah?

1, 2. (a) Ra ognag be’ e yafas rok ngak Jehovah, ma mang e be m’ug riy? (b) Uw rogon nra ayuwegdad e n’en ni rin’ Noah, nge Moses, nge Jeremiah, nge Paul?

 NAP’AN ni ga ra ognag e yafas rom ngak Got ngam mang reb i gachalpen Jesus, ma kam rin’ ban’en nrib ga’ fan. Ga ra ognag e yafas rom ngak Got, ma aram e n’en nth’abi ga’ fan nrayog ni ngam dugliy, ya gowa be lungum: ‘Jehovah, gu baadag ni ngam mang Masta rog. Gag e tapigpig rom, ma gu baadag ni gur e ngam dugliy rogon ni nggu fanay e tayim rog, nge pi n’en ni nggu m’oneg, nge rogon ni nggu maruwel ko salap rog nge pi n’en ni bay rog.’

² Faanra kam un ko taufe, ma ireray e n’en ni kam micheg ngak Jehovah. Rib fel’ e n’en ni kam rin’ ma gab gonop ko n’en ni kam dugliy. Machane, uw rogon ni ngam fanay e tayim rom e chiney ni kam dugliy ni nge mang Jehovah e Masta rom? Gad ra nang e fulweg ko re deer ney ni faan gad ra lemnag e n’en ni rin’ Noah, nge Moses, nge Jeremiah, nge apostal Paul. Pi cha’ ney e yad gubin ni ur pigpiggad ngak Jehovah u polo’ i gum’ircha’rad. Ku er rogodad e ngiyal’ ney. Pi n’en nra dugliyed ni nge m’on u wan’rad e rayog ni nge pi’ e athamgil nga lanin’dad ni ngad fal’eged i yaliy rogon ni gad ma fanay e tayim rodad.​—Matt. 28:19, 20; 2 Tim. 3:1.

U M’ON NI THAREY E RAN E FAYLENG

3. Uw rogon ni taareb rogon e ngiyal’ ni gad be par riy ko fa ngiyal’ nem u nap’an Noah?

³ I taareb rogonnag Jesus e ngiyal’ ni gad be par riy ko fa ngiyal’ nem u nap’an Noah. I yog ni gaar: “Wub nra tay e en ni Fak e Girdi’ e ra bod e n’en nrin’ ko fa ngiyal’ i n’em nnap’an Noah.” Un “abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah riy nga lan fare ark; machane da ur nanged e n’en  ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin.” (Matt. 24:37-39) Yooren e girdi’ e ngiyal’ ney e darur nanged rarogon e ngiyal’ ni gad be par riy. Darur motoyilgad ko n’en ni be machibnag e pi tapigpig rok Got. Maku yooren e girdi’ e der mich u wan’rad ni bayi thang Got e piin ni yad ba kireb ni bod ni rin’ u nap’an Noah. (2 Pet. 3:3-7) Machane, uw rogon ni fanay Noah e tayim rok ni yugu aram rogon nda i motoyil e girdi’ ngak?

4. Uw rogon ni fanay Noah e tayim rok u tomuren ni yog Jehovah e n’en ni nge rin’, ma mang fan?

⁴ Tomuren ni yog Got ngak Noah ni bayi thang e girdi’ ni kireb e ngiyal’ nem nge n’en nthingari rin’, ma aram me toy Noah ba arke nrayog ni nge par e girdi’ nge gamanman riy ndab ra m’ad. (Gen. 6:13, 14, 22) Ki machibnag Noah murung’agen e pufthin ni bayi tay Got ko girdi’. I yog apostal Peter ni Noah e ir be’ ni i “machibnag e tin nib mat’aw.” Re n’ey e be dag nib gel e maruwel ni i tay ni fan e nge ayuweg e girdi’ ngar nanged feni ga’ fan ni ngar motoyilgad. (Mu beeg e 2 Peter 2:5.) Ga be lemnag mab gonop Noah nge chon e tabinaw rok ni faan gomanga ra ngongliyed e siyobay rorad, ara ra guyed rogon ni nge fel’ rogorad ko tin ni ka bay e girdi’, ara nge fel’ e par rorad? Ba mudugil ni danga’! Bochan ni yad manang e n’en ni bayi buch, ma aram fan ndar paged boch ban’en ni nge magawonnagrad.

N’EN NI DUGLIY TUNGIN E PILUNG NU EGYPT

5, 6. (a) Mang fan nni ‘fil ngak Moses urngin e llowan’ rok yu Egypt’? (b) Mang fan ni siyeg Moses e pi flaab u Egypt?

⁵ Bin migid e ngad weliyed e n’en ni rin’ Moses. Moses e pof be’ nib pin ni fak Farao min chuguliy u tafen e pilung u Egypt. Nap’an ni kab pagel “min fil ngak urngin e llowan’ rok yu Egypt.” (Acts 7:22; Ex. 2:9, 10) Dabisiy ni un fil e pi n’em ngak ni bochan e nge yog reb e maruwel ngak u tafen Farao. Rayog ni nge mang reb e tayugang’ ko am nu Egypt, me yoor ban’en rok, mu un tayfan. Machane, aram e pi n’en nib ga’ fan u wan’ Moses, fa?

⁶ Dabisiy ni manang Moses e n’en ni ke micheg Jehovah ngak Abraham, nge Isak, nge Jakob mab mich u wan’ ni bochan e n’en ni i fil e gallabthir rok ngak u nap’an ni kab achig. Dabisiy ni i fal’eg i lemnag e pi n’en nra rin’ boch nga m’on nge rogon ni nge par nib yul’yul’ ngak Jehovah. Ere, nap’an ni taw nga nap’an ni nge dugliy ko nge par ni ir tungin e pilung nu Egypt ara nge mang reb e sib, ma mang e dugliy ni nge rin’? I mel’eg ni “nge un ngak girdien Got ko gafgow ko bin ni nge felfelan’ nib ngoch nap’an ni be ngongliy e denen.” (Mu beeg e Hebrews 11:24-26.) Boch nga tomuren me fol ko n’en ni yog Jehovah ngak ni nge rin’ ko yafas rok. (Ex. 3:2, 6-10) Mang fan ni rin’ Moses e re n’em? Bochan e ba mich u wan’ e pi n’en ni ke micheg Got. Manang ni pi n’en nra fel’ rogon riy u Egypt e dabi n’uw nap’an me m’ay. Mab puluw e n’en ni lemnag ni bochan e de n’uw nap’an nga tomuren, me pi’ Got fa ragag i gafgow nga Egypt. Bay ban’en nrayog ni nge fil e pi tapigpig rok Jehovah ko re n’ey e ngiyal’ ney. Thingari m’on Jehovah u wan’dad ma gad tedan’dad ko pigpig  ni gad be tay ngak ko bin ni nge yog reb e maruwel nib fel’ ngodad ara boch e chugum nib fel’.

MANANG JEREMIAH E N’EN NI BAYI BUCH

7. Mang e taareb rogon ko ngiyal’ ni immoy Jeremiah riy ko ngiyal’ ni gad bay riy?

⁷ Jeremiah ni profet e ki m’oneg u wan’ e pigpig ni i tay ngak Jehovah. I yog Jehovah ngak ni nge weliy murung’agen e pufthin ni bayi tay ngak e piin ni kar chelgad kar togopuluwgad ko bin riyul’ e liyor u Jerusalem nge Judah. Ere, immoy u ba ngiyal’ ni “ke chugur ni ngan thang” e girdi’ ni kireb riy. (Jer. 23:19, 20, NW) Manang ni pi n’en ni immoy e ngiyal’ nem e gathi yugu bay i par ni aram rogon.

8, 9. (a) Mang fan nib t’uf ni nge yal’uweg Baruk e lem rok? (b) Mang e thingari m’on u wan’dad u nap’an ni gad be lemnag boch ban’en ni fan ngodad boch nga m’on?

⁸ Mang e de rin’ Jeremiah ni bochan e pi n’en ni ke mich u wan’? De guy rogon ni nge rin’ boch ban’en nra fel’ rogon riy ko ngiyal’ nem ni immoy riy. De gonop ni faan gomanga rin’ ban’en ni aram rogon. Machane, Baruk ni ir e tayol rok Jeremiah e ba thil rogon ni i lem. Ere, thagthagnag Got e pi thin ni baaray nga laniyan’ Jeremiah ni nge yog ngak Baruk ni gaar: “Nggu buthug nga but’ e n’en ni kug toy mug pug nga lang e n’en ni kug yung. Arrogon ni bay gu rin’ nga ga’ngin e fayleng. Mog ga be guy rogon ni gur e ngan rin’ ban’en ngom ni yu gub thil ko girdi’? Dab mu rin’ ni arrogon. Ya nggu fek e riya’ nga daken gubin e girdi’, ma gur e gu ra ayuwegem ko yam’ u gubin yang ni ga ra yan riy.” ​—Jer. 45:4, 5, BT.

⁹ Dad nanged ko mang e pi n’en nib “thil” ni i nameg Baruk. * Machane, gad manang ni i nameg boch ban’en ni yan i aw nib m’ay fan u nap’an ni cham piyu Babylon nga Jerusalem ko duw ni 607 B.C.E. Kam guy e n’en ni gad ra fil ko re n’ey, fa? Faanra nge yog boch ban’en ngodad nra fel’ rogodad riy ma thingar da lemnaged boch ban’en ni fan ngodad boch nga m’on. (Prov. 6:6-11) Machane, gad ba gonop ni ngad n’aged e tayim rodad nge gelngidad ni ngad yognaged boch ban’en ndabi n’uw nap’an me m’ay, fa? Ka be ulul e ulung rok Jehovah i lemnag rogon ni ngkun toy boch e Kingdom Hall, nge branch ofis, nge ku boch e naun ni fan ko maruwel rodad. Machane, tiney e maruwel e ra fel’ rogodad riy boch nga m’on ni bochan e yibe rin’ ni fan nga Gil’ilungun Got. Ere, nap’an ni be nameg e pi tapigpig rok Jehovah boch ban’en ni fan ngorad boch nga m’on, ma thingari m’on Gil’ilungun Got u wan’rad. Ga be ‘m’oneg u wan’um e gagiyeg rok [Jehovah] nge tin nib m’agan’ ngay ni ngam rin’,’ fa?​—Matt. 6:33.

“KUG FINEY NI GOO CHUBUNG”

10, 11. (a) Mang e immoy nib ga’ fan u wan’ Paul u m’on ni mang reb e Kristiano? (b) Mang fan ni thilyeg Paul e pi n’en nib ga’ fan u wan’?

¹⁰ Chiney e ngad weliyed murung’agen Paul. U m’on ni mang reb e Kristiano ma gubin e girdi’ nra lemnaged ni boor ban’en nra rin’ boch nga m’on nra fel’ rogon riy. Reb e sensey ni boor e girdi’ ni ma yog nib salap i skulnag e girdi’ e ir e fil e motochiyel rok piyu Jew ngak. I pagan’ e en th’abi tolang ko prist ngak ni ir reb e Jew, ma aram me pi’ reb e maruwel ngak nib ga’ fan. Maku boor ban’en ni i rin’ ko tin ni ka bay e girdi’ ni yad taab yangar ni ur uned ko teliw rok piyu Jew. (Acts 9:1, 2; 22:3; 26:10; Gal. 1:13, 14) Yugu aram rogon me thilyeg Paul e yafas rok u nap’an ni tamilang u wan’ ni ke n’ag Jehovah piyu Jew ma gathi ka yad girdien.

¹¹ Ke nang Paul ni mus ni faanra yog reb e maruwel nib fel’ ngak u nap’an e m’ag rok piyu Jew ma ra yan i aw nib m’ay fan u wan’ Jehovah; ya dabi yib angin ngak boch nga m’on. (Matt. 24:2) Manang e n’en nib m’agan’ Jehovah ngay maku manang nrib tow’ath ni nge un i rin’ fare maruwel ni machib. Pi n’en ni i lemnag kafram  ni bogi ban’en nib ga’ fan e ke finey ni “goo chubung.” I digey Paul e teliw rok piyu Jew ni i un ngay me fanay e gin ni ka bay ko yafas rok ni nge machibnag fare thin nib fel’.​—Mu beeg e Filippi 3:4-8, 15; Acts 9:15.

MU FAL’EG I LEMNAG E PI N’EN NI GA BE M’ONEG

12. Mang maruwel e tiyan’ Jesus ngay u tomuren ni kan taufenag?

¹² Noah, nge Moses, nge Jeremiah, nge Paul, nge ku boch e girdi’ e ur fanayed e tayim rorad nge gelngirad ni fan ko tirok Got ban’en. Ere, ba fel’ ni ngad folwokgad rorad. Jesus e ir e ke dag e bin th’abi fel’ e kanawo’ ni ngad folwokgad riy u fithik’ e pi tapigpig rok Jehovah ni yad ba yul’yul’. (1 Pet. 2:21) Tomuren nni taufenag, me fanay e yafas rok ni nga i machibnag fare thin nib fel’ ma be pining e sorok ngak Jehovah. Ere, gubin e Kristiano ni yad be folwok rok Jesus ma kar ted Jehovah ni ir e Masta rorad e thingari m’on u wan’rad e pigpig ni yad be tay ngak Jehovah. Ireray e n’en nib m’on u wan’um, fa? Ma uw rogon ni ngad rin’ed boor ban’en ni fan ngak Jehovah ma ka gad be rin’ boch ban’en nib milfan ngodad?​—Mu beeg e Psalm 71:15; 145:2.

13, 14. (a) Mang e yibe pi’ e athamgil nga laniyan’ e piin ni kar uned ko taufe ni ngar lemnaged? (b) Mang e rayog ni nge felfelan’ e pi tapigpig rok Got ngay?

¹³ Kab kafram i yib ni ma pi’ e ulung rok Jehovah e athamgil nga laniyan’ e piin Kristiano ni ngar fal’eged i lemnag ko rayog ni ngar uned ko pioneer fa dabiyog. Boor e tapigpig rok Jehovah ni yad ba yul’yul’ ndabiyog ni ngar uned ko machib u lan 70 e awa u gubin e pul ni bochan boch e magawon. Susun ndabi kireban’rad ko re n’ey. (1 Tim. 5:8) Ma uw rogom, rayog ni ngam un ko pioneer, fa?

¹⁴ Am lemnag e felfelan’ ni ke tay boor e tapigpig rok Got u nap’an ni ke chugur ko puguran ngu tomuren e puguran ko re duw ney. Nap’an e pul ni March, ma kan yarmiy nrayog ni nge mel’eg e piin ni kar uned ko pioneer ni ayuw ko ngar thognaged 30 ara 50 e awa ni fan ko machib. (Ps. 110:3) Bokum milyon e girdi’ nra uned ko pioneer ni ayuw. Riyul’ nrayog ni ngan guy gelngin e felfelan’ ni ke tay e girdi’ ko pi ulung i yan ni bochan e re n’ey. Ere, gur rayog ni ngam yarmiy e pi n’en ni ga ma rin’ ya nge yog nim un ko pioneer ni ayuw? Nap’an nra un reb e walag ko pioneer, ma ra yan i m’ay reb e rran ma rayog ni nge non ngak Jehovah u fithik’ e felfelan’ ni gaar, “Jehovah, kug rin’ e tin nrayog rog ni fan ko pigpig ni gu be tay ngom.”

15. Mang boch ban’en nsusun e nge nameg reb e Kristiano ni kab fel’ yangaren u nap’an ni ka bay u skul?

¹⁵ Faanra ke chugur ni ngam chuw u skul, ma dabisiy ni ga be thamiy ni kab fel’ fithik’ i dowam ma de yoor ban’en nib milfan ngom. Ere, ga be lemnag ni ngam un ko pioneer, fa? Dariy e maruwar riy ni be lemnag e piin ni yad ma fonownag e piin bitir u skul nib fel’ ni ngam un ko skul nib tolang mag nameg reb e maruwel nib fel’. Machane, pi n’en ni be pagan’rad ngay e bayi chuw. Machane, faan ga ra nameg boch ban’en ni fan ko tirok Got ban’en, ma aram e ga be fanay e tayim rom ni fan ko tin nib ga’ fan ma ga be rin’ ban’en nra yib angin ngom boch nga m’on. Maku reb e faan ga ra rin’ ni aram rogon, ma aram e ga be folwok ko n’en ni rin’ Jesus. Re n’ey e ra k’aring e felfelan’ ngom, me ayuwegem. Maku ra m’ug riy ni kam dugliy u wan’um ni ngam rin’ e n’en ni kam micheg ngak Jehovah.​—Matt. 6:19-21; 1 Tim. 6:9-12.

16, 17. Mang boch e deer u murung’agen e pigpig ni gad be tay ngak Jehovah nrayog ni nge reb e Kristiano me fith ir riy?

¹⁶ Boor e tapigpig rok Got e ngiyal’ ney ni boor e awa ni yad ma maruwel riy ni fan e ngar yognaged e tin nib t’uf ko tabinaw rorad. Machane, sana bay boch i yad ni ma maruwel nge pag urngin e awa nsusun e nge maruwel riy. (1 Tim. 6:8) Re fayleng ney e be guy rogon ni nge mich u wan’dad nthingar da chuw’iyed urngin e chugum ni kab beech ni bochan e dabiyog ni ngad pared ndariy. Machane, tin riyul’ e Kristiano  e dubrad ni nge dugliy Satan nge re fayleng ney e pi n’en ni nge m’on u wan’rad. (1 John 2:15-17) Ma uw rogon e piin ni kar talgad ko maruwel ya ke gaman urngin e duw ni ngar maruwelgad riy? N’en nth’abi fel’ nrayog ni ngar rin’ed e aram e ngar fanayed e tayim rorad ni fan ko machib u polo’ e tayim rorad mar m’oneged e pigpig ni yad be tay ngak Jehovah.

¹⁷ Gubin e pi tapigpig rok Jehovah e rayog ni ngar fithed yad ni nge lungurad: Mang e th’abi ga’ fan u lan e yafas rog? Gu be m’oneg e pigpig ni gu be tay ngak Jehovah, fa? Gu ma folwok u rogon ni i pag Jesus fan u boch ban’en, fa? Gu be fol ko n’en ni yog Jesus ni aram e ngaud leked luwan ay, fa? Rayog ni nggu yarmiy e pi n’en ni gu ma rin’ ya nge yog ni yoor e tayim rog ni fan ko machib ara yugu boch e maruwel ni fan ngak Jehovah, fa? Yugu aram rogon ndabiyog ni nggu yoornag e tayim rog ni fan ko pigpig ni gu be tay ngak Jehovah ni bochan rarogog, ma gu be gay boch e kanawo’ ni nggu fanay e tayim rog nge gelngig riy ni fan ngak Jehovah nrogon nrayog rog, fa?

“NGE M’AGAN’MED NGAY NI NGAM FOLGAD KO TIN NI BE FINEY”

18, 19. Mang e rayog ni ngad yibilayed? Mang fan nra felfelan’ Jehovah ko re n’ey?

¹⁸ Rib fel’ ni ngan guy feni pasig e pi tapigpig rok Got. Machane, bay boch e walag nrayog ni ngar uned ko pioneer ndarur lemnaged ni ngar uned ngay ara yad be lemnag ndabiyog rorad. (Ex. 4:10; Jer. 1:6) Ere, mang e ngam rin’ ni faanra aray rogon e lem rom? Gathi ireray ban’en nib fel’ ni ngam uneg ko meybil rom? Arrogon. I yog Paul ngak e piin taareb e michan’ rorad ni Jehovah e ‘gubin ngiyal’ ni be maruwel u fithik’ i lanin’rad ni be pingeg lanin’rad ni nge m’agan’rad ngay ni ngar folgad ko tin ni be finey.’ (Fil. 2:13) Ere, faanra damur lemnag ni ngam yoornag e tayim rom ni fan ko machib, ma ga meybil ngak Jehovah nge ayuwegem ngam adag ni ngam rin’ e re n’ey miki yog e salap ngom ni fan ko re maruwel ney.​—2 Pet. 3:9, 11.

¹⁹ Noah, nge Moses, nge Jeremiah, nge Paul, nge Jesus e yad boch e tapigpig rok Got ni yad ba yul’yul’. Kar fanayed e tayim rorad nge gelngirad ni ngar machibnaged e thin rok Jehovah. Dar paged boch ban’en ni nge magawonnagrad. Kari chugur ni nge mus e re m’ag ney; ere, gad gubin e piin ni kad ognaged e yafas rodad ngak Got e ba t’uf ni ngad guyed rogon ni ngad folwokgad ko pi girdi’ ney. (Matt. 24:42; 2 Tim. 2:15) Faan gad ra rin’ ni aray rogon ma aram e rayog ni ngad fel’gad u wan’ Jehovah me tow’athnagdad.​—Mu beeg e Malaki 3:10.

[Footnote]

[Study Questions]

[Picture on page 22]

Nap’an ni i ginang Noah e girdi’ ma da ur motoyilgad

[Picture on page 25]

Kam lemnag ni ngam un ko pioneer, fa?