Jehovah e Kab Ga’ Nga Lanin’dad

I YOLOY fare psalmist ni gaar: “Ma felan’ [Jehovah] ngak e piin yad ma liyor ngak.” Riyul’ ni ma felfelan’ e en Tasunmiy ni ma guy e pi tapigpig rok ni yad be athamgil ni ngar folgad ko pi motochiyel rok nib mat’aw. Ma tow’athnag Got e piin ni yad ba yul’yul’ ngak, ma ma pi’ e athamgil nga lanin’rad, maku ma fal’eg lanin’rad u nap’an ni keb e gafgow ngorad. Manang ni pi tapigpig rok e dawor ra flontgad, ere der ma lemnag ni ngar rin’ed e tin dabiyog rorad.​—Psalm 147:11.

Sana de mo’maw’ ni nge mich u wan’dad ni ma t’ufeg Jehovah e pi tapigpig rok. Machane, bay boch i gadad ni ke par ni goo meewar rok e ma lemnag, ma be lemnag ndaki t’uf rok Jehovah. Sana ra lungurad, “Kaygi gel e kireb rog, ere da kug t’uf rok Jehovah.” Riyul’ ni yu ngiyal’ e gad ma lem ni aram rogon. Machane, bay boch e girdi’ ni kar pared ni aram rogon e lem rorad.

Kireban’ nib Gel

Kakrom e immoy boch e tapigpig rok Got ni i kireban’rad nib gel. Job e chuwan’ ko yafas rok ya lemnag ni ke digey Got. Me Hannah ni chitiningin Samuel e rib gel e kireban’ ni tay ni bochan e i par nib n’uw nap’an nde fakay e bitir, ma aram ma i yor nib gel. Me David e “bugbug nga but’” ko kireban’, me Epafroditus e ke kireban’ ngak pi walagen ni kar nanged ni ke m’ar.​—Psalm 38:6; 1 Samuel 1:7, 10; Job 29:2, 4, 5; Filippi 2:25, 26.

Ma uw rogon e pi Kristiano e ngiyal’ ney? Sana bay boch i yad ndakir yog ni nge pigpig ni bod kafram ni bochan e m’ar, nge pilibthir, nge ku boch e magawon. Re n’ey e rayog ni nge k’aringrad ni ngar lemnaged nda kur fel’gad u wan’ Jehovah nge pi walagrad. Ma boch e girdi’ e kar dabuyed yad ni bochan e kireb ni ur rin’ed kafram, ya yad be lemnag ndawori n’ag Jehovah fan. Ma boch e girdi’ nra bad u boch e tabinaw nib kireb e yad ma lemnag ndariy rogon ni ngan t’ufegrad. Uw rogon nrayog ni nge buch e re n’ey?

Boch e girdi’ e kar ilalgad ko tabinaw ndariy e t’ufeg riy, ma ra be’ ma ir e be lemnag ir, ma yima moning riy, ma yima par u fithik’ e marus. Dar nanged e matam ni ma t’ufegey, ara ma pining e magar, ara ma pi’ e athamgil nga lanin’uy, ma der ma aw nga laniyan’ e n’en ni ke yog ara ke rin’ be’ ni dabun, ma ma n’ag fan e kireb ni ki mada’ ko tin nib mo’maw’ ni ngan n’ag fan, ma t’ufeg rok e ma pi’ e pagan’ ngak chon e tabinaw rok. Bochan nder ma t’ufegrad e chitamangirad, ma aram fan nib mo’maw’ ni nge fel’ e tha’ u thilrad e Chitamangidad nu tharmiy ni ma t’ufegey.

I yoloy Fritz ni gaar: “Nap’an ni ku gub bitir nge yan i fel’ yangareg ma der ma t’ufegeg e chitamag. * Gu ra rin’ ban’en nib fel’ ma dariy ban’en ni ma yog, ma de fel’ thilmow. Ba ga’ ni gu ma par ni gub marus.” Bochan e re n’ey, ma ke gaman 50 e duw rok ma ka bay ban’en ni ma thamiy ndariy rok. Me Margarette e gaar: “Gallabthir rog e dariy ban’en ni yow ma yog ngog nib fel’ ma darur t’ufegew gag. Ere nap’an ni gu tabab i fil e Bible, ma da gu nang ko uw rogon e matam ni ma t’ufegey.”

Faanra bay e lem rodad ni aray rogon, ma rayog ni gad be pigpig ngak Got ni gathi bochan e ba t’uf rodad, ya bochan e gad be lemnag ni bay ban’en nib kireb ni kad rin’ed ara gad be rus. Tin rayog rodad e der ma gaman u wan’dad. Ere rayog ni ngad lemnaged ni kaygi  mo’maw’ ngodad ni ngad felfelan’naged Jehovah nge pi walagdad. N’en nra buch e rayog ni nge dab kud nameged e n’en ni gad be nameg, ma gad yon’ e kireb riy nga dakendad, me kireban’dad.

Ere mang e rayog ni ngad rin’ed? Sana ba t’uf ni ngad pugeduran ngan’dad ni Jehovah e rib gol ma ma runguydad. Apostal John e ir be’ nri manang e re n’ey.

“Got e Ka Ba Ga’ nga Lanin’dad”

U tungun e bin som’on e chibog C.E. me yol John ngak e piin taareb e michan’ rorad ni gaar: “Ereray rogon ma gadad nang ni gadad mmuun ko tin riyul’. Ereray rogon me pagan’dad u p’eowchen Got. Ya faanra yog lanin’dad ngodad ni gadad ba kireb, ma kad nanged ni Got e ka ba ga’ nga lanin’dad, ni gubin ban’en ma manang.” Mang fan ni yoloy John e pi thin ney?​—1 John 3:19, 20.

Manang John nrayog rok be’ ni ma pigpig ngak Jehovah ni nge lemnag ni bay ban’en nib kireb ni ke rin’. Sana mus ngak miki thamiy ban’en ni aram rogon. Boor yay ni i yal’uweg Jesus Kristus John u nap’an ni kab pagel ni bochan e ba papey e damumuw ngak ma yugu ba gel e thin ni ma yog ko girdi’. Bin riyul’ riy e tunguy Jesus “Boanerges” ngak John nge James ni walagen, “ni fan e re bugithin ney e Yow bod e Dirra’.”​—Mark 3:17; Luke 9:49-56.

U lan 60 e duw nga tomuren, me thil John nge mang be’ nib sumunguy ni ma t’ufegey, ma ma runguyey. I yoloy e gin som’on e babyor rok nni thagthagnag nga laniyan’ u nap’an ni goo ir ko fapi apostal e ke magey, me nang ni Jehovah e gathi yugu ma gathibthibnag urngin e oloboch ni ma rin’ e pi tapigpig rok. Ya ir reb e matam ni ma t’ufegey, mab gol, ma ma runguyey, ma ma t’ufeg e piin nib t’uf rorad ma yad ma pigpig ngak u fithik’ e yul’yul’. I yoloy John ni gaar: “I Got e t’ufeg.”​—1 John 4:16.

Ma Felfelan’ Jehovah ko Pigpig ni Gad Ma Tay Ngak

Got e manang e pi meewar rodad ma ma lemnag. I yoloy David ni gaar: “Manang e n’en nni ngongliydad ngay; ma manang ni gadad e fiyath.” Manang Jehovah ni rarogodad kafram e bay rogon ngodad e chiney. Bin riyul’ riy e boor ban’en ni manang u rarogodad ngodad.​—Psalm 103:14.

Manang ni boor i gadad e baadag ni nge thil ma dabiyog ni bochan e dawor da flontgad. Taareb rogodad ko n’en ni yog apostal Paul ni gaar: “Da gur rin’ e tin nib fel’ ni ir e gub adag ni nggu rin’; machane gu be rin’ e tin nib kireb ni ir e dabug ni nggu rin’.” Gad gubin ni taareb rogon e magawon rodad. Yu ngiyal’ e rayog ni nge k’aringdad e re n’ey ni ngad pufthinnaged gadad u lanin’dad.​—Roma 7:19.

Baaray ban’en ndab da paged talin: N’en nib ga’ fan e rogon ni ma lemnagdad Jehovah. Nap’an nra guy ni gad be athamgil ni ngad rin’ed e tin nib m’agan’ ngay ma ri ma felfelan’. (Proverbs 27:11) Yugu aram rogon ni n’en ni gad ma rin’ e der gaman u wan’dad, machane ma felfelan’ ni faanra guy ni gad be rin’ e pi n’em nib m’agan’dad ngay. Gathi kemus ni tin ni be yog ni ngad rin’ed e ir e ma yaliy, ya ku manang e n’en ni gad baadag ni ngad rin’ed. Jehovah e ma guy gum’irchaen e girdi’.​—Jeremiah 12:3; 17:10.

Bod ni boor e Pi Mich Rok Jehovah ni yad ba tatamra’. Ere ba mo’maw’ ngorad ni ngar machibgad u mit e tabinaw. Machane, bochan ni yad baadag ni ngar pigpiggad ngak Got mar ayuweged e girdi’ ma aram fan ni kar filed rogon ni ngar weliyed e thin nu Bible ngak e girdi’. Sana yad be lemnag ni buchuuw ban’en ni yad be rin’, ma re lem ney e rayog ni nge chuweg e felfelan’ rorad. Maku rayog ni ngar lemnaged ndariy angin e machib ni yad be tay. Machane bin riyul’ riy e ri ma felfelan’ Jehovah ko athamgil ni yad ma tay. Maku reb e dar nanged e ngiyal’ nge gin nra tugul awochngin e tin riyul’ riy, nge ga’ me yib wom’engin.​—Eklesiastes 11:6; Mark 12:41-44; 2 Korinth 8:12.

Ku boch e Pi Mich e ke n’uw nap’an ni yad ba m’ar ara kar pilibthirgad. Ere yad ra lemnag ni ngar uned ko muulung ni gubin ngiyal’ ma be pi’ magaran ngorad. Machane yad ra rung’ag e  welthin ni murung’agen e machib ma ma yib ngan’rad e pi n’en ni ur rin’ed nge n’en ni ka yad baadag ni ngar rin’ed ni yugu aram rogon ni yad ba m’ar. Boch i yad e ma lemnag nib kireb e rok ni bochan e dar folgad ko fonow nge yan i taw nga rogon ni ur lemnaged. Machane, rib ga’ fan u wan’ Jehovah e yul’yul’ nge k’adan’ ni yad ma tay. N’umngin nap’an ni yad ra par ni yad ba yul’yul’, ma dabi pagtalin.​—Psalm 18:25; 37:28.

“Ereray Rogon me Pagan’dad”

Nap’an ni kari pilibthir John, mab mudugil ni boor ban’en ni ke nang u rogon feni gol Jehovah ma ma runguyey. Dab mu pagtalin ni yoloy ni gaar: “Got e ka ba ga’ nga lanin’dad, ni gubin ban’en ma manang.” Maku reb e ki pi’ John e athamgil nga lanin’dad ni nge “pagan’dad.” Mang fan e pi n’em ni yog John?

Rogon ni yog reb e dictionary e fare bugithin ni Greek ni kan piliyeg ni “pagan’dad” e be yip’ fan “ni ngan pi’ e athamgil nga laniyan’ be’.” Ere rogon me pagan’dad e ba t’uf ni ngad ted ngan’dad ni gad ba t’uf rok Jehovah. Ni uw rogon?

Fritz ni faan kan weliy murung’agen e ke pag 25 e duw ni ke mang reb e piilal u reb e ulung ko Pi Mich Rok Jehovah, ma ke pirieg ni fol Bible e ir e ke ayuweg ni nge nang nib t’uf rok Jehovah. “Gu ma fil e Bible nge pi babyor rodad ni gubin e rran nib fel’ rogon. Re n’ey e ma ayuwegeg ni nge dab kug lemnag e tin kakrom ban’en, ya nggu lemnag e tin nib fel’ ni bay nga m’on. Yu ngiyal’ e kug ma sul ngaug lemnag e tin kakrom ban’en, mu gu lemnag nda kug t’uf rok Got. Machane kug pirieg ni faanra ug fil e Bible ni gubin ngiyal’ ma ma pi’ e athamgil nga lanin’ug, ma ma gelnag e michan’ rog, mu gu par ni kug felfelan’.”

Sana dabi chuw e magawon rodad ni yugu aram rogon ni gad ma beeg e Bible rodad ma gad ma fal’eg i lemnag. Machane rayog ni nge thil rogon ni gad ma lemnag e magawon rodad. Ra taw e Thin Rok Got nga gum’ircha’dad ma ra ayuwegdad ni ngad lemgad ni bod ni ma lem. Maku reb e fol Bible e ra ayuwegdad ni ngad nanged gelngin feni gol Jehovah ma ma runguydad. Ra munmun ma gad ra nang ni Jehovah e der ma yin’ e kireb nga dakendad ni bochan rogon nni chuguliydad, ara bochan e m’ar rodad, ya manang ni magawon ni bay rodad e gathi gadad tapgin, ma ma lemnag e re n’ey.

Ma uw rogon Margarette ni kan weliy murung’agen faram? Nap’an ni nang Jehovah me yib angin e fol Bible ngak. Ku thingari thilyeg e lem rok u rarogon e matam ni ma t’ufegey. Meybil e ayuweg Margarette ni nge gelnag e michan’ rok ko tin ni ke fil. “Som’on e kug tay Jehovah ni ir reb e fager nrib chugur ngog, ni bochan e aram e n’en ni gu manang. Ma faani munmun mu gu fil rogon ni nggu weliy lanin’ug nge pi magawon rog ngak. Gu ma non ngak u fithik’ e meybil ni gubin ngiyal’, ma kug puthuy nga taabang gubin ban’en ni kug fil u murung’agen. I gaar, “Faani n’uw boch nap’an mu gu thamiy ni kari chugur e tha’ u thilmow Jehovah nrayog ni nggu tay ni ir e Chitamag nri gub t’uf rok.”

Ra Chuw e Magafan’

N’umngin nap’an ni gad be par ko re m’ag nib kireb ney, ma dariy ba ngiyal’ ni gad ra chuw u fithik’ e magafan’. Bay boch e Kristiano nra i magafan’rad nib gel ara i maruwaran’rad me k’aring e kireban’ ngorad. Machane rayog ni nge pagan’dad ni manang Jehovah e lem rodad nib fel’ nge maruwel nib gel ni gad ma tay ni fan ngak. Dabi pagtalin e t’ufeg ni kad daged nga fithingan.​—Hebrews 6:10.

Gubin e piin ni yad ba yul’yul’ e yad manang nnap’an ni yad ra par u tan Gil’ilungun fare Messiah ma aram e yad ra chuw u fithik’ e pi magawon ko re m’ag rok Satan ney. Rra felfelan’ e girdi’ e ngiyal’ nem! Ma aram e gad ra guy e mich riy ni Jehovah e th’abi gol ma ma runguyey. Ere nap’an ni gad be sonnag e re ngiyal’ i n’em ma dab da paged talin ni “Got e ka ba ga’ nga lanin’dad, ni gubin ban’en ma manang.”​—1 John 3:20.

[Footnote]