Urngin e Girdi’ nib Fel’ e Yad Ra Yan nga Tharmiy, Fa?

FARE nep’ u m’on ni ngan li’ Jesus, u tomuren fare abich rorad fapi apostal, me micheg nra pi’ tagil’rad u tharmiy nib tow’ath. Me gaar: “Pire’ e singgil ni bay u lan e naun rok e Chitamag, me ere nggu wan gu ngongliy tagil’med.” (John 14:2) Mang fan ni nge pi’ Jesus tagil’rad u tharmiy? Mang e ngar rin’ed u rom?

Ke lemnag Jesus ni nge pi’ reb e maruwel ngorad ni yugu ba thil. Re nep’ nem e yog ngorad ni gaar: “Urngin e gafgow ni yib ngog ma mpired rog nda mpaged gag, ere rogon ni ke pi’ e Chitamag mat’awug ngog ni ngug gagiyeg, e eram e n’en ni bay gu rin’ ngomed.” (Luke 22:28, 29) Ke micheg Got ngak Jesus ni ir e ra mang pilung ma ra pi’ e tin ba t’uf ko girdi’ ni aram e bin th’abi fel’ e am. Ma ra ayuweg e piin ni kan gafgownagrad me chuweg e piin nib sasalap. Yugu aram rogon ni ma par Jesus u tagil’ u tharmiy ma gagiyeg rok e ra yan ni “taw nga tungun e fayleng.”​—Psalm 72:4, 8; Daniel 7:13, 14.

Machane, gathi kemus ni goo Jesus e ra gagiyeg. Arfan ni ke micheg ngak fapi apostal ni bay tagil’rad u tharmiy. Yad e tin som’on ni kan mel’egrad ni ngar “gagiyegnaged e fayleng.”​—Revelation 5:10, NW.

In e girdi’ nra yan nga tharmiy? Piin ni yad ra mang pilung ko Gil’ilungun Got u tharmiy e yad buchuuw nra ngan taarebnag urngirad ngak e piin ni yad ra par u tan pa’rad. I gaar Jesus ngak e piin ni yad ra un ngak ko gagiyeg: “Gimed e chi ulung ney e dab mu tamdaggad! Ya Chitamangimed e ba adag ni nge pi’ e gin nsuwon ngomed.” (Luke 12:32) Oren e “chi ulung” nem e yad 144,000 u gubin. (Revelation 14:1) Yad buchuuw ni faanra ngan taarebnag nga bokum milyon e piin nra par u fayleng ni yad ba felfelan’ u tan Gil’ilungun.​—Revelation 21:4.

Ere gathi urngin e girdi’ nib fel’ e ra yan nga tharmiy. I yog apostal Peter murung’agen David ni Pilung ni gaar: “Yi David e ir ma de yan nga lan e tharmiy.” (Acts 2:34) John ni Tataufe e reb e girdi’ nib fel’. Machane i yog Jesus ni gathi ir bagayad e piin nra un ko gagiyeg u tharmiy. I yog Jesus ni gaar: “Dab mpaged talin e re bugithin ney. John ni i taufe e ba ga’ ngak urngin e girdi’ ni kar pired u roy u fayleng. Machane en ni ir e th’abi sobut’ u fithik’ e gagiyeg nu tharmiy e ka ba ga’ ngak.”​—Matthew 11:11.

Rayog Fare Tow’ath ni Fan ko Girdi’ nib Fel’ Ngom, Fa?

Ra nge yog e tow’ath ngak be’ ni aram e nge par u fayleng ni manemus, ma mang e thingari rin’? I gaar Jesus: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Bochan nrib t’uf e girdi’ rok Jehovah, ma aram fan ni ke bing e kanawo’ ngak e girdi’ ni nge yog e yafos ndariy n’umngin nap’an ngorad. Machane kemus ni “piin nra michan’rad” e ra yog e re tow’ath nem ngorad.

Ba t’uf ni nge puluw e michan’ ko tamilangan’ nu Bible. (John 17:3) Rayog ni nge m’ug ni gur be’ ni gab fel’ ni faanra ga be fil murung’agen Jehovah nge tin nib m’agan’ ngay ni fan ko girdi’. Michan’ rom ko tin kam fil e ra m’ug ko ngongol rom. Ma rayog ni nge mich u wan’um ni fare yafos ni manemus e ra yog ngom.

 [Picture on page 7]

Mang e Be Yog e Bible?

Deer:

Mang e ma buch ko piin nib fel’ u nap’an ni kar m’ad?

Fulweg:

“Piin nib yam’ e dariy ban’en ni yad manang.”​—EKLESIASTES 9:5, BT.

Deer:

Mang e athap ko girdi’ nib fel’ boch nga m’on?

Fulweg:

“Ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman [Jesus] mi yad yib u lan e low rorad nga wuru’.”​—JOHN 5:28, 29.

Deer:

Uw e ra par yooren e girdi’ nib fel’ riy?

Fulweg:

“Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.”​—PSALM 37:29.