1, 2. (a) Mang ban’en nib ga’ fan nib t’uf ni ngad maruweliyed, ma mang fan? (b) Mang e gad ra weliy ko re article ney?

 GADAD e tin riyul’ e Kristiano e ba t’uf ni ngad filed rogon ni ngaud fal’eged i lemnag e pi n’en ni gad ma guy ara pi n’en ni gad ma rung’ag u murung’agen be’ ara boch ban’en, ya nge yag ni puluw rogon e lem rodad u murung’agen e pi n’em. (Prov. 3:21-23; 8:4, 5) Faanra dab da rin’ed e re n’ey, ma rib mom rok Satan nge re fayleng rok ney ni nge kirebnag rogon ni gad ma lemnag boch ban’en. (Efe. 5:6; Kol. 2:8) Faanra ba riyul’ e pi n’en ni kad guyed ara kad rung’aged u murung’agen be’ ara ban’en, ma aram e rayog ni nge puluw rogon e lem rodad u murung’agen e pi n’em. Be gaar e Proverbs 18:13 (NW): “Ra un be’ i weliy murung’agen ban’en ndawori nang ko ba riyul’ fa danga’, ma ir be’ nib balyang ma rayog ni nge tamra’.”

² U lan e re article ney e gad ra weliy riy boch ban’en ni ma mo’maw’nag rogon ni ngad nanged e tin riyul’ u murung’agen e pi n’en ni kad guyed ara kad rung’aged u murung’agen be’ ara ban’en, nge rogon ni nge puluw rogon e lem rodad u murung’agen e pi n’em. Ku gad ra weliy boch i kenggin e motochiyel u Bible nge boch ban’en ni buch kakrom ni bay murung’agen u lan e Bible nra ayuwegdad ni ngad nanged rogon ni ngad fal’eged i lemnag e pi n’en ni gad ma guy ara pi n’en ni gad ma rung’ag u murung’agen be’ ara boch ban’en, ya nge yag ni puluw rogon e lem rodad u murung’agen e pi n’em.

3. Mang fan nib t’uf ni ngad folgad ko fare kenggin e motochiyel u Bible ni bay ko Proverbs 14:15? (Mu guy e sasing ni bay u tabolngin e re article ney.)

³ Ngiyal’ ney e boor ban’en ni yima guy ara yima rung’ag u murung’agen boch e girdi’ ara boch ban’en. Yima guy ara yima rung’ag e pi n’em u daken e pi website ni bay ko Internet, nge TV, nge ku boch ban’en. Boor e girdi’ e ku ma yib e pi n’em ngorad u daken e e-mail, ara text, ara boch ban’en ni ke yog reb e fager rorad ara be’ ni yad manang. Bay boch e girdi’ nni lem rorad ni ngar wereged boch ban’en nde puluw u murung’agen be’ ara ban’en, maku boch e girdi’ e yad ma chuweg ara yad ma puthuy boch ban’en nga murung’agen be’ ara ban’en ni yad be weliy. Ere aram fan ni ngar da kol ayuwgad ma gad fal’eg i lemnag rogon e pi n’en ni gad ma rung’ag. Mang reb i kenggin e motochiyel u Bible nrayog ni nge ayuwegdad? Be gaar e Proverbs 14:15, BT: “Be’ nib balyang e yug demtrug ban’en ma ra mich u wan’; ma girdi’ nib tamilangan’ e ri ma fal’eg i yaliy ban’en.”

4. Uw rogon ni be ayuwegdad e Filippi 4:8, 9 u rogon ni ngad mel’eged e pi n’en ni gad ma beeg? Mang nib ga’ fan ni nge puluw e pi n’en ni gad ma beeg murung’agen? (Kum guy fare kahol ni kenggin e “ Boch Ban’en ni Kan Ngongliy Nra Ayuwegdad ni Ngad Nanged e Tin Riyul’ u Murung’agen Boch Ban’en.”)

⁴ Ra ngad dugliyed ban’en nib fel’ rogon mab t’uf ni nge puluw e pi n’en ni ngad nanged u murung’agen boch ban’en. Aram fan nib t’uf ni ngar da fal’eged i mel’eg e pi n’en ni gad ma beeg. (Mu beeg e Filippi 4:8, 9.) Susun e dab ud adbeyed e tayim rodad ni ngad yaliyed boch ban’en ni bay ko Internet ndabiyog ni nge pagan’uy ngay, ara ud beeged boch e e-mail u murung’agen boch ban’en ndariy e mich riy. Bin th’abi ga’ fan riy e ngad siyeged boch e website ni bay boch ban’en riy ni ke tay e piin ni kar digeyed e bin riyul’ e liyor ma kar chelgad yad be togopuluw ngay. Pi girdi’ ney e yad be nameg ni ngar warnaged e michan’ rok e girdi’ rok Got ma kur chuweged ara ra puthuyed boch ban’en nde puluw ko tin riyul’. Ra de puluw e pi n’en ni kad nanged u murung’agen boch ban’en ma aram e dabiyog ni ngad dugliyed boch ban’en nib fel’ rogon. Dab mu lemnag ni pi n’en ni ga ma beeg nde riyul’ e dariy ban’en nra rin’ ko lem rom ara gum’irchaem.​—1 Tim. 6:20, 21.

5. Mang boch ban’en nde riyul’ ni rung’ag piyu Israel murung’agen? Mang wenegan ni yib ngorad?

⁵ Bay e riya’ riy ni faanra mich u wan’dad boch ban’en ni kad rung’aged nde riyul’. Am lemnag e n’en ni buch u nap’an Moses u tomuren ni l’og fa 12 i damit ni nga ranod nga lan fare Nam ni Kan Micheg ni ngar damitnaged e re nam nem. Ragag ko pi damit nem e ra sulod ma rogned boch ban’en nib kireb ni kar guyed u rom. (Num. 13:25-33) Bochan ni yugu ba thum’ nga wuru’ rogon nra weliyed murung’agen e pi n’en nra guyed, ma aram fan ni rus e girdi’ rok Jehovah miki mulan’rad. (Num. 14:1-4) Mang fan? Sana rayog nra lemnaged ni bochan ni taab n’en e yog e pi damit nem, ma ere dabisiy nsana ba riyul’ e pi n’em. Ere ra siyeged ni ngar motoyilgad ko pi n’en nib fel’ ni weliy Joshua nge Kaleb u murung’agen fare Nam ni Kan Micheg. (Num. 14:6-10) Pi girdi’ nem e dar guyed rogon ni ngar nanged e tin riyul’ u murung’agen e pi n’en ni kan weliy maku de pagan’rad ngak Jehovah, ya mich u wan’rad e pi  n’en nib kireb ni un weliy u murung’agen fare nam. Ere ri yad bbalyang!

6. Mang fan nsusun e dab da gingad u nap’an ni gad ra rung’ag boch ban’en nde riyul’ u murung’agen e girdi’ rok Jehovah?

⁶ Ba t’uf ni ngad kol ayuwgad u nap’an ni kad rung’aged boch ban’en ni kan weliy u murung’agen e girdi’ rok Jehovah. Dab mu pagtalin ni Satan e ir e en ni ma t’ar e thin nga daken e pi tapigpig rok Got ni yad ba yul’yul’. (Rev. 12:10) Aram fan ni yog Jesus ni bay boch e toogor rodad nra ur ‘tunguyed urngin mit e thin nib kireb’ ngaur weliyed u murung’agdad. (Matt. 5:11) Ere faanra ba ga’ fan e re ginang ney u wan’dad, ma aram e dab da gingad u nap’an ni gad ra rung’ag boch ban’en nde riyul’ ni kan weliy u murung’agen e girdi’ rok Jehovah.

7. U m’on ni ngad pied reb e e-mail ara text ngak be’, ma mang e ba t’uf ni ngad fithed gadad riy?

⁷ Ga baadag ni ga ma pi’ boch e e-mail nge text ngak e pi fager rom nge girdi’ ni ga manang, fa? Faanra gur be’ ni aray rogon, ma nap’an ni ga ra beeg murung’agen ban’en ni kab beech ni kan weliy ko news ara kam rung’ag murung’agen ban’en ni ke buch, ma sana ga baadag ni gur e som’on ni ngam weliy murung’agen fare n’em ni bod rogon e n’en ni ma rin’ e piin ni yad ma weliy e news. Machane, u m’on ni ngam pi’ fare text ara e-mail ngak be’, ma thingar mu fithem ni nge lungum: ‘Rib mich u wan’ug nre n’ey ni gu be n’en ni nggu wereg murung’agen e ba riyul’, fa? Gur, ba puluw e n’en ni kug beeg ara kug rung’ag murung’agen?’ Faanra dam nang ko ba riyul’ fapi n’em fa danga’, ma ngam kol ayuw ya rayog ni ngam wereg boch ban’en nde riyul’. Ere faanra be maruwar u wan’um mab fel’ ndab mu pi’ nge yan ngak be’.

8. Mang e ke rin’ e girdi’ ni yad ma togopuluw ngodad u boch e nam? Uw rogon nrayog ni ngad pied e ayuw ngak e piin ni yad ma togopuluw ngodad ndarud lemnaged?

⁸ Ku bay reb i fan nde fel’ ni ngad pied boch e e-mail nge text nge yan nga yugu boch e girdi’ ndad fal’eged i lemnag u m’on riy. U boch e nam e bay boch ban’en ko maruwel rodad nrayog ni ngad rin’ed ma boch e dabiyog, ma boch e nam e kar ni taleg e machib rodad riy. Ere piin ni yad ma togopuluw ngodad ko pi nam nem e rayog ni ngar wereged boch ban’en u murung’agdad ni bochan e ngar  k’aringed e marus ko pi walag ara ra k’aringed e pi walag ni nge dabki pagan’rad ngorad. Am lemnag e n’en ni buch u Soviet Union kafram. Immoy reb e ulung ko polis nib mith ni ka nog e KGB ngorad ni ur wereged i yan ni bay boch e walag ni boor e girdi’ ni manangrad ni kar bannaged e girdi’ rok Jehovah. Boor e walag ni mich e pi n’ey nde riyul’ u wan’rad, ma aram mar chuwgad ko ulung rok Jehovah. Rib gel e kireban’ riy! Machane boch nga tomuren, ma boor i yad e ki sul ko ulung, ma boch e daki sul, ya ra paged e pi n’em nde riyul’ ni nge warnag e michan’ rorad. (1 Tim. 1:19) Uw rogon ni ngad siyeged ndabi buch ban’en rodad ni aray rogon? Dab mu un i wereg boch ban’en nde fel’ u murung’agen be’ ara ban’en, maku dab mu un i wereg murung’agen boch ban’en ni kan weliy ndariy e mich riy. Yugu dabi mich u wan’um urngin ban’en ni kam rung’ag, ya ngam fal’eg i yaliy ko ba riyul’ e n’en ni kam rung’ag fa danga’.

9. Mang yugu reb e ban’en ni ma mo’maw’nag ngodad ni ngad nanged e tin riyul’ u murung’agen boch ban’en?

⁹ Pi n’en ni yima weliy ni boch riy e ba riyul’ ma boch e danga’ e ku rayog ni nge mo’maw’nag rogon ni nge puluw e lem rodad u murung’agen boch ban’en. Dabiyog ni nge pagan’uy nga ban’en ni kan weliy ni bang riy e ba riyul’ ma bang e danga’. Ere mang e rayog ni ngad rin’ed ya nge dab ni bannagdad u boch ban’en ni yima weliy ni aray rogon?​—Efe. 4:14.

10. Mang e rin’ me chugur ni nge m’ag piyu Israel e mahl ngak boch i walagrad, ma uw rogon ni yag ni ngar siyeged e re n’ey?

¹⁰ Am lemnag e n’en ni buch rok piyu Israel ni ur pared u ba’ ni ngal ko fare Lul’ nu Jordan u nap’an Joshua. (Josh. 22:9-34) Kar rung’aged ni piyu Israel ni yad be par u ba’ ni ngek ko re Lul’ nu Jordan nem (ni aram e ganong rok Reuben, nge Gad, nge ba’ ni ngek e ganong rok Manasseh) e kar toyed ba altar nrib ga’ u rom u charen e re lul’ nem. Riyul’ e re n’ey, machane gathi gubin ban’en riy ni yad manang. Ere re n’ey e k’aring piyu Israel ni yad be par ko ba’ ni ngal e re lul’ nem ni ngar lemnaged ni ke togopuluw pi walagrad ngak Jehovah. Ere ra mokungad nga taabang ni nga ranod ra m’aged e mahl ko fapi ganong ni bay u ba’ ni ngek e re lul’ nem. (Mu beeg e Joshua 22:9-12.) Machane, ba manigil ya u m’on nranod ko cham, ma aram mar l’oged boch e pumoon nib pagan’rad ngorad ni nga ranod e ngaram ni ngar nanged ko ri mang e ke buch. Ere mang e ra nanged u murung’agen e re n’em? Ra nanged ni fapi ganong rok Reuben, nge Gad, nge ba’ ni ngek e ganong rok Manasseh e kar toyed e re altar nem ni nge mang ba puguran ngak e tin ni bay yib e mfen nriyul’ ni ur liyorgad ngak Jehovah, ma gathi kar ngongliyed ni ngar pied e maligach riy nga boch e got ni googsur. Dabisiy nri felfelan’ e pi girdi’ nu Israel nem ni ranod ra fithfithed murung’agen e n’en ni ke buch ma aram e n’en ni ayuwegrad ni nge dab ra m’aged e mahl ngak pi walagrad!

11. (a) Uw rogon ni kan rin’ ban’en nde mat’aw ngak Mefiboseth? (b) Mang e faan gomanga rin’ David ma aram e rayog ni nge siyeg e binem e oloboch ni rin’?

¹¹ Ku arrogodad ni bay yu ngiyal’ nrayog ni nge kireban’dad ni bochan e be wereg e girdi’ boch ban’en u murung’agdad ni boch riy e ba riyul’ ma boch e danga’. Am lemnag e n’en ni buch rok David ni Pilung nge Mefiboseth. I gol David ngak Mefiboseth me sulweg ngak urngin e binaw ntafen Saul ni tutuw rok. (2 Sam. 9:6, 7) Machane faani boch nga tomuren, ma aram min weliy boch ban’en nib kireb u murung’agen Mefiboseth ngak David. Ere dugliy David ni nge sulweg urngin fapi binaw ni ke pi’ ngak Mefiboseth nde guy rogon ni nge nang ko ba riyul’ e pi n’em ni kan weliy ngak fa danga’. (2 Sam. 16:1-4) Boch nga tomuren u nap’an ni non David ngak Mefiboseth, ma aram mfini nang David e oloboch ni ke rin’ ma aram me sulweg ngak Mefiboseth boch ko fapi binaw rok Saul. (2 Sam. 19:24-29) Faan gomanga guy David rogon ni nge nang e tin riyul’ u murung’agen e pi thin nem ni ka nog ngak, ma de gur nge rin’ ban’en, ma aram e rayog ni nge siyeg e n’en ni ke rin’ nde mat’aw.

12, 13. (a) Mang e rin’ Jesus u nap’an ni t’ar e girdi’ e thin nga daken? (b) Mang e rayog ni ngad rin’ed ni faanra ke wereg be’ boch e thin nde riyul’ u murung’agdad?

¹² Ere uw rogon ni faanra kan t’ar e thin nga dakenam?  Ireray e n’en ni buch rok Jesus nge John ni Tataufe. (Mu beeg e Matthew 11:18, 19.) Mang e rin’ Jesus ko pi n’en nde riyul’ ni un weliy u murung’agen? De adbey e tayim rok ara gelngin ni nge guy rogon ni nge micheg ko girdi’ nde riyul’ e pi n’em. Ya n’en ni rin’ e pi’ e athamgil nga laniyan’ e girdi’ ni ngar lemnaged e tin riyul’ u murung’agen. Baadag ni nge tiyan’ e girdi’ ko tin ni i rin’ nge tin ni i fil ngorad. I yog Jesus ni “gonop rok Got e ke m’ug nib riyul’ ko tin kan guy ni ke yib riy.”​—Matt. 11:19.

¹³ Bay ban’en nib ga’ fan nrayog ni ngad filed ko re n’ey. Bay yu ngiyal’ nrayog ni nge yog e girdi’ boch ban’en nde puluw u murung’agdad ara ur gathibthibnaged gadad. Faanra buch ban’en rodad ni aram rogon, ma rayog ni nge kirebnag thidad. Ere gur, bay ban’en nrayog ni ngad rin’ed ngay? Faanra be wereg be’ boch ban’en nde riyul’ u murung’agdad ma aram e rayog ni ngad micheged e bin riyul’ i rarogodad ko girdi’ u daken e ngongol rodad. Arrogon, kad filed ko n’en ni rin’ Jesus ni ngongol rodad e rayog ni nge micheg nde riyul’ e pi n’en nde puluw ni kan weliy u murung’agdad.

14, 15. Faanra ud torgad ko tin ni gad be finey ni gad manang, ma uw rogon nrayog ni nge bannagdad e re n’ey?

¹⁴ Ere kad guyed nib mo’maw’ ni ngad nanged e tin nib puluw u murung’agen boch ban’en. Ku reb e magawon ni bay e aram rarogodad ndawor da flontgad. Uw rogon ni faanra ke yoor e duw ni kad pigpiggad ngak Jehovah u fithik’ e yul’yul’? Sana rayog ni ke ga’ e tamilangan’ nge gonop rodad. Ku rayog ni ma tay e pi walag fadad ni bochan e ba fel’ rogon ni gad ma dugliy boch ban’en. Machane gur, rayog ni ngki magawonnagdad e re n’ey, fa?

¹⁵ Arrogon, faanra pag rogon nda taga’gad ko pi n’en ni gad be finey ni gad manang ma rayog ni nge magawonnagdad. Faan gad ra rin’ ni aray rogon, ma aram e rayog ni ngad tababgad ni ngad paged e pi n’en ni gad be thamiy nge pi n’en ni bay u lanin’dad ni nge gagiyegnag rogon e lem ni gad be tay. Ku rayog ni ngad tababgad ni ngad lemnaged nrayog ni ngad nanged rarogon ban’en ni yugu aram rogon ni gathi urngin ban’en u murung’agen fare n’em ni gad manang. Rib gel e riya’ ko re n’ey! Be tamilangnag e Bible ngodad ndab da torgad ko tin ni gad be finey ni gad manang.​—Prov. 3:5, 6; Jer. 17:9.

16. Mang e buch u reb e tagil’ e abich nrogon ni kan weliy ko fare n’em ni kan susunnag? Mang e yigi pos Tom me lemnag?

¹⁶ Baaray ban’en ni be tamilangnag rogon nrayog ni nge buch e re n’ey. Mu susunnag ni yan i reb e blayal’ ma bay reb e piilal ni ka nog Tom ngak ni boor ban’en ni manang ko tirok Got ban’en ni yan nga reb e tagil’ e abich me guy yugu reb e piilal ni ka nog John ngak ni bay u reb e tebel ni yow be’ nib pin ni  gathi ppin rok. I guy Tom ni John nge re ppin nem e yow be sabethin, ma yow be minmin, ma yow be felfelan’ u taabang, ma faani tomur riy me guy ni kar gumuchmuchgow. Kari magawon laniyan’ Tom, ma aram me tabab ni nge lemnag ko: ‘Gur, bayi dar John nge ppin rok? Mang e ra buch ko ppin rok John? Ma uw rogon pi fak John?’ Ke yoor e girdi’ ni ke guy Tom ni ke buch e re n’ey rorad. Ere faan gomanga gur Tom, ma mang e ga ra lemnag?

17. Mang e fini nang Tom nga tomuren nrogon ni kan weliy ko fare n’em ni kan susunnag? Mang e gad be fil ko re n’ey?

¹⁷ Machane am son. Yugu aram rogon ni yigi pos Tom me lemnag ndaki yul’yul’ John ko ppin rok, machane gur, ri manang gubin ban’en u murung’agen e n’en ni ke guy, fa? Boch nga tomuren ko re nep’ i n’em, ma aram me callnag Tom John ma aram fini yan i nang ni fare pin ni ke guyrow u taabang e walagen ni ke yib u bang. Ke yoor e duw ndawori mada’ John nge re ppin nem ni walagen. Ma ka yigi yib i tal e ngaram ndabi n’uw nap’an me yan. Ere aram fan ni kar mada’gow ko re tagil’ e abich nem. De yag ni nge un e ppin rok John ngorow. Ri felfelan’ Tom ndawori yog ngak be’ e n’en ni be lemnag. Mang e rayog ni ngad filed ko re n’ey? Ere, demtrug urngin e duw ni kad pigpiggad ngak Jehovah, mab t’uf ni ngad nanged e tin riyul’ u murung’agen ban’en u m’on ni ngad dugliyed rogon fare n’em u wan’dad.

18. Mang e rayog ni nge k’aringdad ni nge mich u wan’dad ban’en nib kireb ni kan weliy u murung’agen reb i walagdad?

¹⁸ Rayog ni nge mo’maw’ ngodad ni ngad nanged e tin nib puluw u murung’agen boch ban’en ni faanra re magawon nem e bay rogon ngak reb e walag ni bay e magawon u thildad. Faanra yugu da pared ni gad be lemnag fare magawon ni ke sum u thildad reb e walag, ma aram e rayog ni nge dabki pagan’dad ngak. Ere faanra kad rung’aged ban’en nib kireb ni kan weliy u murung’agen e re walag nem, ma aram e ba mom ni nge mich u wan’dad. Mang e gad be fil ko re n’ey? Faanra ud lemnaged boch ban’en nib kireb u murung’agen pi walagdad ma aram e rayog ni nge k’aringdad ni ngad dugliyed boch ban’en u murung’agrad nde puluw. (1 Tim. 6:4, 5) Rayog ni ngad siyeged e re n’ey ni faan gad ra chuweg e awan’ u gum’ircha’dad. Dab da paged talin ni baadag Jehovah ni ngad t’ufeged pi walagdad ma gad n’ag fan u wan’dad e kireb ni kar rin’ed ngodad.​—Mu beeg e Kolose 3:12-14.

19, 20. (a) Mang boch i kenggin e motochiyel u Bible nra ayuwegdad ni ngad nanged e tin nib puluw u murung’agen boch ban’en? (b) Mang e gad ra weliy ko bin migid e article?

¹⁹ Ngiyal’ ney e rib mo’maw’ ni ngad nanged e tin nib puluw u murung’agen boch ban’en mu kud dugliyed boch ban’en nib puluw u murung’agen e pi n’em. Mang fan? Bochan ni yooren e pi n’en ni yima weliy e gathi gubin ban’en riy ni kan tamilangnag, fa reb e bang riy e ba riyul’ ma bang riy e danga’, nge ku bochan ndawor da flontgad. Mang e ra ayuwegdad ko re magawon ney? Thingar da nanged e pi kenggin e motochiyel u Bible ma gad fol riy. Reb e pi kenggin e motochiyel nem e be yog ni gad bbalyang ni faan gad ra un i weliy ban’en ndawor da nanged e tin riyul’ u murung’agen. (Prov. 18:13) Ku reb i kenggin e motochiyel u Bible e be puguran ngodad ndabi mich u wan’dad urngin ban’en ni kad rung’aged ndab da guyed rogon ni ngad nanged ko riyul’ fare n’em fa danga’. (Prov. 14:15) Ma bin tomur e, demtrug n’umngin nap’an ni kad pigpiggad ngak Jehovah, ma dabiyog ni ngad torgad ko tin ni gad be finey ni gad manang. (Prov. 3:5, 6) Rayog ni nge ayuwegdad e pi kenggin e motochiyel u Bible ni faan gad ra fanay e tin riyul’ ni kad nanged u murung’agen ban’en ya nge yag ni puluw e lem rodad u murung’agen fare n’em ma gad dugliy boch ban’en u fithik’ e gonop.

²⁰ Machane ka bay ban’en ni ma mo’maw’nag ngodad ni ngad nanged e tin riyul’ u murung’agen ban’en. Re n’em e aram rarogodad e girdi’ nib mom ni ngad dugliyed rarogon ban’en u wan’dad nrogon nib puluw ko n’en ni kad guyed. Bin migid e article e gad ra weliy riy boch e kanawo’ nrayog ni ngad rin’ed e re oloboch ney riy nge rogon nrayog ni ngad siyeged e pi n’ey.