1. Mang fan nrayog ni nga dogned ni urngin ban’en mab milfan ngak Jehovah? (Mu guy e sasing ni bay u tabolngin e re article ney.)

 URNGIN ban’en mab milfan ngak Jehovah! ‘Lan e lang nib th’abi orel e mmil suwon ngak. Fayleng nge urngin ban’en ni ba’ riy e ku ir e mmil suwon ngak.’ (Deut. 10:14; Rev. 4:11) Bochan ni ir e ke sunmiy e girdi’, ma aram fan nib milfan e girdi’ ngak. (Ps. 100:3) Machane, ka nap’an chepin e girdi’ keb i mada’ ko ngiyal’ ney ni bay yu ulung e girdi’ ni ke mel’egrad Got ni nge mil farad ngak u reb e kanawo’ ni yugu ba thil.

2. Mini’ e piin ni be yog e Bible nib mil farad ngak Jehovah u reb e kanawo’ ni yugu ba thil?

² Bod ni, Psalm 135 e be yog ni pi tapigpig rok Jehovah u Israel kakrom ni yad ba yul’yul’ ngak e ba ‘mil farad ngak.’ (Ps. 135:4) Maku reb e, ki yiiynag fare babyor rok Hosea ni bay boch e girdi’ ni gathi yad piyu Israel ni yad ra mang boch e girdi’ rok Jehovah. (Hos. 2:23) Re yiiy rok Hosea nem e lebug u nap’an ni tabab Jehovah ni nge mel’eg e piin ni gathi yad e Jew ni ngar uned ngak Kristus ko gagiyeg. (Acts 10:45; Rom. 9:23-26) Re ‘nam nem nib thothup’ e ke mang “girdien Got” u reb e kanawo’ nib ga’ fan, ya girdi’ riy e kan dugliyrad nga gelngin Got  nib thothup ma kan mel’egrad ni ngar uned ko yan nga tharmiy. (1 Pet. 2:9, 10) Ere uw rogon e tin ni ka bay e Kristiano e ngiyal’ ney ni yad ba yul’yul’ ni yad be athapeg e par u fayleng? Ki yog Jehovah ni yad boch e ‘girdi’ rok.’​—Isa. 65:22.

3. (a) Mini’ e piin ni ke yag ni nge fel’ e tha’ u thilrad Jehovah e ngiyal’ ney u reb e kanawo’ ni yugu ba thil? (b) Mang e gad ra weliy ko re article ney?

³ Ngiyal’ ney e ‘fa chi ulung’ ni yad be athapeg e yan nga tharmiy nge “yugu boch e saf” ni yad be athapeg e par u fayleng, e yad “taab ran’ i saf” ni ma tayrad Jehovah ni yad e girdi’ rok. (Luke 12:32; John 10:16) Ere gad baadag ni ngad daged ngak Jehovah nrib ga’ fan u wan’dad e re n’ey ni ke yag ni nge fel’ e tha’ u thildad u reb e kanawo’ ni yugu ba thil. Re article ney e yira weliy riy boch e kanawo’ nrayog ni ngad daged riy ngak Jehovah ni gad be pining e magar ngak ni ke pi’ e biney e tow’ath ngodad ni yugu ba thil.

4. Mang reb e kanawo’ nrayog ni ngad pininged e magar riy ngak Jehovah ni ke bing e kanawo’ ngodad nrayog ni nge fel’ e tha’ u thildad? Uw rogon ni rin’ Jesus ban’en ni bod e re n’ey?

⁴ Gad ma dag ni gad be pining e magar ngak Jehovah u nap’an ni gad ra ognag e yafos rodad ngak. Nap’an ni gad ra un ko taufe ma aram e ngiyal’ ni gad ma tamilangnag ko girdi’ ni ke mil fadad ngak Jehovah mab m’agan’dad ngay ni ngad paged fadad nga tan pa’. (Heb. 12:9) I rin’ Jesus ban’en ni bod e re n’ey ko ngiyal’ ni un riy ko taufe. Re n’em ni rin’ e bod ni be gaar ngak Jehovah: “Got rog, ri gub adag ni nggu rin’ e tin nib m’agan’um ngay!” (Ps. 40:7, 8) I ognag Jesus ir ngak Jehovah ni nge rin’ e tin nib m’agan’ ngay ni yugu aram rogon ni kan gargeleg ngab nam ni kan mu’ i ognag ngak Got.

5, 6. (a) Uw rogon e lem rok Jehovah u nap’an ni un Jesus ko taufe? (b) Mang fanathin e rayog ni nge ayuwegdad ni ngad nanged rogon e lem rok Jehovah u nap’an ni gad ra ognag e yafos rodad ngak?

⁵ Uw rogon e lem rok Jehovah u nap’an ni un Jesus ko taufe? Be gaar e Bible: “Nap’an ni yugu ntaufenag Jesus, me yib u fithik’ e ran nga talang. Me mab e tharmiy ngak, me guy fare Kan ni Thothup rok Got [“gelngin Got nib thothup,” NW] ni be yib u lang i yib nga but’ ni bod ba bulogol me yib i par nga daken. Me non ba lam u tharmiy ni gaar, ‘Ereray Fakag nib t’uf rog ni kari felan’ug ngak.’” (Matt. 3:16, 17) Yugu aram rogon nu m’on ni un Jesus ko taufe ma kab milfan ngak Jehovah ni Chitamangin ni bay u tharmiy, machane ki felfelan’ Jehovah u nap’an ni guy ni ke m’agan’ Fak ngay ni nge par ni yigoo ir e nge pigpig ngak. Ere ku arrogodad ni ma felfelan’ Jehovah u nap’an ni gad ra ognag e yafos rodad ngak, maku ra tow’athnagdad riy.​—Ps. 149:4.

⁶ Mu susunnag ni bay be’ nib pumoon ni ke yung boor e floras nrib fel’ yaan nga milay’ rok. Ere yan i reb e rran me yan bochi buliyel ni fak i t’ar reb fapi floras ngeb i pi’ ngak nib tow’ath. Yugu aram rogon ni ir e fiin fare floras, machane kari felfelan’ ko re tow’ath nem ni kan pi’ ngak ni bochan e ba t’uf fak rok, maku be dag ngak nib t’uf rok fak. Dariy e maruwar riy nra par fare taare floras nrib ga’ fan u wan’ ko tin ni ka bay e floras u milay’ rok. Ere ku arrogon Jehovah nri ma felfelan’ u nap’an nra m’agan’dad ngay ni ngad ognaged e yafos rodad ngak.​—Ex. 34:14.

7. Uw rogon ni ke tamilangnag Malaki rogon ni ma lemnag Jehovah e piin ni yad ma pigpig ngak nib m’agan’rad ngay?

⁷ Mu beeg e Malaki 3:16 a. Faanra dawor mu ognag e yafos rom ngak Jehovah ngam un ko taufe, ma aram e ngam lemnag feni ga’ fan ni ngam rin’ e re n’ey. Riyul’ nnap’an nim sum mab milfam ngak Jehovah ni bod rogon e tin ni ka bay e girdi’. Machane, am lemnag gelngin e felfelan’ nra tay u nap’an nra m’agan’um ngay ni nge par ni ir  e Pilung rom mag ognag e yafos rom ngak. (Prov. 23:15) Manang Jehovah e piin nib m’agan’rad ngay ni ngar pigpiggad ngak, ma ra yoloy fithingrad nga lan fare “ke babyor rok ni kan yoloy ngay fithingan e piin ni bay madgun u wan’rad.”

8, 9. Mang e ba m’agan’ Jehovah ngay ni nge rin’ e piin ni kan yoloy fithingrad nga lan fare “ke babyor rok ni kan yoloy ngay fithingan e piin ni bay madgun u wan’rad”?

⁸ Faanra gad baadag ni ngad manged reb i girdien Jehovah min yoloy fithingdad nga lan fare “ke babyor rok ni kan yoloy ngay fithingan e piin ni bay madgun u wan’rad,” ma aram e bay ban’en nthingar da rin’ed. Ri tamilangnag Malaki nthingari yib ‘madgun Jehovah u wan’dad mu ud fal’eged i lemnag fithingan.’ Ere faan gad ra liyor ngak yugu be’ ara yugu reb e ban’en, ma aram e ra chuweg Jehovah fithingdad u lan fare ke babyor rok ko yafos.​—Ex. 32:33; Ps. 69:28.

⁹ Ere de gaman ni kemus ni ngad micheged ngak Jehovah ni ngad rin’ed e tin nib m’agan’ ngay ma gad un ko taufe. Gali n’ey e kemus ni taab yay ni ngad rin’ed, machane liyor rodad ngak Jehovah e ban’en nthingar da rin’ed u n’umngin nap’an e yafos rodad. Ere gubin e rran nthingar da micheged ko ngongol rodad ni gad be fol rok Jehovah.​—1 Pet. 4:1, 2.

10. Mang reb e ban’en nthingari gagiyel nib thil u thilin e piin ni yad be pigpig ngak Jehovah nge piin ndarur pigpiggad ngak?

¹⁰ Fa binem e article e kad weliyed riy boch e thin nu Bible ni murung’agen Kain, nge Solomon, nge piyu Israel. Yad gubin ni u rogned ni yad be liyor ngak Jehovah, machane bin riyul’ riy e dar pared ni yad ba yul’yul’ ngak. Pi n’ey e be tamilangnag ngodad ni piin nriyul’ nib mil farad ngak Jehovah e thingar ra pared ni yad ba mudugil mar rin’ed e tin nib mat’aw mar togopuluwgad ko kireb. (Rom. 12:9) Aram fan nu tomuren ni weliy Malaki murung’agen fare ke ‘babyor ni kan yoloy ngay fithingan’ e piin ni bay madgun Jehovah u wan’rad, ma aram me yog Jehovah e ‘n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngak nge en nder pigpig ngak.’​—Mal. 3:18.

11. Mang fan nsusun e nge mom ko girdi’ ni ngar nanged ni kemus ni yigoo Jehovah e ir e gad be par ni gad ba yul’yul’ ngak?

¹¹ Ku baaray reb e kanawo’ nrayog ni ngad daged riy ni gad be pining e magar ngak Jehovah ni ke mel’egdad ni ngad manged girdien. Thingari mom rok e girdi’ ni ngar nanged ni gad ba muun ko ba’ rok Jehovah. (1 Tim. 4:15; Matt. 5:16) Ere mu fithem ni nge lungum: ‘Rayog ni nge guy e girdi’ ni kemus ni yigoo Jehovah e ir e gu be par ni gub yul’yul’ ngak, fa? Gub felfelan’ ngay ni nga u gog ko girdi’ ni gag bagayad e Pi Mich Rok Jehovah, fa?’ Rib gel e kireban’ nra tay Jehovah ni faanra tomuren ni ke mel’egdad ni ngad manged girdien, me guy ni gad be tamra’ ni nga u dogned ko girdi’ nib mil fadad ngak.​—Ps. 119:46; mu beeg e Mark 8:38.

12, 13. Uw rogon ni ma mo’maw’nag boch e walag ni ngan nang ni yad boch e Pi Mich Rok Jehovah?

¹² Machane rib gel e kireban’ riy ni bochan e bay boch e Pi Mich ni kar mo’maw’naged ko girdi’ ni ngar nanged ko yad ‘be pigpig ngak Got’ fa danga’ ni bochan e ka yad be folwok ko “lem nu roy u fayleng.” (1 Kor. 2:12) Ireray ba mit e lem ni ma k’aring e girdi’ ni nge m’on u wan’rad e ‘tin ni yad be ar’arnag.’ (Efe. 2:3) Bod ni, yugu aram rogon urngin e fonow ni yibe pi’ u murung’agen rogon e munmad nsusun e ngaud ted nge rogon  ni ngaud fal’eged yaadad, machane ka bay boch e walag ni ka yad be chuw nga boch e mad nde yalen ara ur fal’eged yaarad u boch e kanawo’ nde yalen. Bayi n’en mu ur chuwgad nga boch e mad nib k’ad nga dowrad ara be m’ug yu yang u dowrad riy nsusun e dabi m’ug, ni kub muun ngay e ngiyal’ ni kar bad ko muulung ara yugu boch ban’en ni ma rin’ e piin Kristiano u taabang. Fa reb e kar th’abed ara ra fal’eged piyan lolugrad ni yad be folwok u boch e yaan ni yugu ba pag rogon. (1 Tim. 2:9, 10) Ere bochan e re n’ey, ma aram fan nra yad bay u fithik’ e girdi’ mab mo’maw’ ni ngan nang ko yad boch e Pi Mich Rok Jehovah fa yad e ‘fager ko fayleng.’​—Jas. 4:4.

¹³ Ku bay boch e kanawo’ ndawori siyeg boch e Pi Mich e lem nu fayleng riy. Rogon e churu’ nge ngongol rorad u nap’an boch e abich ni yima tay e de puluw nga rogon nsusun e nga i rin’ e piin Kristiano. Ku bay boch i yad ni yad ma tay boch e sasing ni yaarad ara u rogned boch e thin u yu yang ko Internet nrayog ni ngaun non riy ngak boch e girdi’ nde m’ag ngak e piin nib ga’ fan e tirok Got ban’en u wan’rad. Pi walag ney e sana dawori yal’uwegrad e piin piilal ni bochan reb e denen ni kar rin’ed nib ubchiya’, machane rayog ni nge af pangirad ngak e pi walag u lan e ulung ni yad be guy rogon ni ngar pared ni yad ba thil ko girdi’ ko re fayleng ney.​—Mu beeg e 1 Peter 2:11, 12.

14. Faanra ngad ayuweged e tha’ u thildad Jehovah, ma mang e rib ga’ fan ni ngad rin’ed?

¹⁴ Gubin ban’en ni bay ko re fayleng ney e kan n’igin ni nge k’aringdad ni ngad pared ni yigoo “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay” e ir e gad be lemnag. (1 John 2:16) Yugu aram rogon, ma bochan nib mil fadad ngak Jehovah, ma aram fan ni kan fonownagdad ni ngad “paged pangidad nge ngongol rodad nde m’agan’ Got ngay nge chogowen urngin ban’en u fayleng nde mat’aw u owchen Got, ma gadad par ni gadad be t’ar lanin’dad ko tin nde fel’, ma gadad ba yal’uw, ma gadad be rin’ e tin nib m’agan’  Got ngay u roy u fayleng.” (Titus 2:12) Rogon e numon ni gad ma tay, nge rogon e abich nge garbod ni gad ma tay, nge rogon e munmad rodad nge rogon ni gad ma fal’eg yaadad, nge rogodad ko maruwel, nge urngin ban’en ni gad ma rin’ e thingari guy e girdi’ mi yad nang ni yigoo Jehovah e ir e gad be par ni gad ba yul’yul’ ngak.​—Mu beeg e 1 Korinth 10:31, 32.

15. Mang fan nsusun e ngaud ngongolgad ngak pi walagdad u fithik’ e gol nge t’ufeg?

¹⁵ Ma m’ug nrib ga’ fan u wan’dad e tha’ u thildad Jehovah u rogon e ngongol ni gad ma dag ngak pi walagdad. Pi walagdad e kub mil farad ngak Jehovah. Faanra ud pared ni gad be lemnag e re n’ey, ma aram e gubin ngiyal’ nra ud ngongolgad ngak pi walagdad u fithik’ e gol nge t’ufeg. (1 Thess. 5:15) I gaar Jesus ngak pi gachalpen: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”​—John 13:35.

16. Mang reb e ban’en ni bay u lan fare Motochiyel rok Moses ni be dag ngodad rogon ni ma lemnag Jehovah e girdi’ rok?

¹⁶ Bay murung’agen ban’en u lan fare Motochiyel rok Moses nrayog ni nge ayuwegdad ni ngad nanged rogon ni ngaud ngongolgad ngodad u lan e ulung. Pi mam’en e tempel rok Jehovah e kan fal nga bang ni fan ko bin riyul’ e liyor. Be tamilangnag fare Motochiyel rok Moses rogon ni ngan ayuweg e pi mam’en e tempel nem, ma en ndabi fol ko motochiyel e yira li’ nge yim’. (Num. 1:50, 51) Ere faanra rib ga’ fan u wan’ Jehovah e pi mam’en e tempel nem ni bogi ban’en ndariy e yafos riy, me ere ba mudugil ni piin ni ke mel’egrad ni ngar manged girdien ma kar ognaged yad ngak yad be liyor ngak u fithik’ e yul’yul’ e ri kab ga’ farad u wan’. Immoy bayay ni be non ko girdi’ rok, me yog ni gaar: “En nra math ngomed e ke math nga tiren marwag.”​—Zek. 2:8, NW.

17. Mang e n’en ni be “motoyil” Jehovah ngay maku be “rung’ag”?

¹⁷ I yog Malaki ni Jehovah e ma “motoyil”  maku be “rung’ag” e thin ni ma yog reb e girdi’ rok nga reb, maku manang rogon e ngongol ni ma dag bagayad ngak bagayad. (Mal. 3:16) Manang Jehovah e “piin ni yad girdien.” (2 Tim. 2:19) Urngin ban’en ni gad ma rin’ ma gad ma yog e yigoo manang. (Heb. 4:13) Faanra darud golgad ngak pi walagdad maku manang e re n’ey. Machane faanra ud golgad ngorad, ma gad be n’ag fan e kireb rorad, ma gad be dag e sumunguy ngorad, ma aram e rayog ni nge pagan’dad ni ku manang Jehovah e re n’ey.​—Heb. 13:16; 1 Pet. 4:8, 9.

18. Uw rogon ni ngad daged ni gad be pining e magar ngak Jehovah ni ke pagdad ni ngad manged girdien?

¹⁸ Dariy e maruwar riy ni gad baadag ni ngad daged ngak Jehovah ni gad be pining e magar ngak ni ke pagdad ni ngad manged girdien. Gad manang nnap’an nda ognaged e yafos rodad ngak ma aram e n’en nth’abi fel’ ni kad rin’ed. Yugu aram rogon ni gad be par u fithik’ bogi “girdi’ ndar yal’uwgad ma yad ba kireb,” machane gad baadag ni nge guy e girdi’ ni gad be ‘par ndariy thibngidad ma gad mmachalbog’ ma be ‘gal ramaedad u fithik’rad.’ (Fil. 2:15) Maku reb e, kad dugliyed u wan’dad ni ngad siyeged e pi n’en ni ma fanenikan Jehovah. (Jas. 4:7) Ku gad ma t’ufeg pi walagdad ma gad be tay farad ya gad manang ni kub mil farad ngak Jehovah.​—Rom. 12:10.

19. Uw rogon nra tow’athnag Jehovah e piin nib mil farad ngak?

¹⁹ Be micheg e Bible ni gaar: “I Somol e dabi n’ag e girdi’ rok.” (Ps. 94:14, BT) Ireray reb e ban’en ni ke micheg ngodad ndabi thil. Demtrug e n’en nra buch, ma gubin ngiyal’ ni bay Jehovah rodad. Mus ni faan gad ra yim’ ma dabi pagtildad. (Rom. 8:38, 39) “Faanra ud pired ni gadad ba fos ma fan ngak Somol, ma gadad ra yim’ ma ngad m’ad ni fan ngak Somol. Demturug ko gadad ba fos ara gadad ba yam’ machane mmil fadad ngak Somol.” (Rom. 14:8) Ri gad be athapeg ni nge taw ko rofen nra faseg Jehovah e pi fager rok ni yad ba yul’yul’ ngak ni kar m’ad. (Matt. 22:32) Mus ko chiney ni gad be felfelan’ ni bochan e boor e tow’ath ni be yag ngodad, ya be yog e Bible nib “felan’ e re nam ni Somol e Got rorad; ba felan’ e girdi’ ni ke mel’egrad ni ngar manged girdien!”​—Ps. 33:12.