Rogon Me Fel’ Thiliy Nge “En Ni Ma Motoyil Ko Meybil”

“Bochan e ga be fulweg taban e meybil. Urngin e girdi’ e ngar bad ngom.”​—PSALM 65:2.

1. Mang e ba thil u thilin e girdi’ nge tin ni ka bay e yafos u fayleng, ma mang kanawo’ e ke mab ni bochan e re n’en ney?

 U FITHIK’ urngin e pi n’en nib fos u daken e fayleng, ma ke mus ni goo girdi’ e rayog rorad ni ngar meybilgad ngak e En ni Tasunmiy. Goo girdi’ e manang nib t’uf e tirok Got rorad ma yad ba adag ni nge fel’ rogorad riy. Re n’ey e ke bing e kanawo’ ngodad nrayog nib e tha’ u thildad e Chitamangidad nu tharmiy.

2. Mang e kirebnag e denen ko fare tha’ u thilin e girdi’ nge En ni Sunmiy?

² I sunmiy Got e girdi’ ni ba’ gelngin nrayog ni ngeb e tha’ u thilrow En ni Sunmiy. Sum Adam nge Efa ni dariy e denen rorow. Ere rayog ni ngar nonad Got nib puf rogon ni bod ni ma non e bitir ngak e chitamangin. Machane re tow’ath nem e mul u pa’row nbochan e denen. De fol Adam nge Efa rok Got me kireb thilrad. (Genesis 3:8-13, 17-24) Ere be yip’ fan ni dabkiyog rok pi fak Adam ni dar flontgad ni ngar nonad Got, fa? Danga’, ka ma pagrad Jehovah ni ngar nonad ngak ni faan yad ra fol u boch ban’en. Mang e pi n’en nem ni ngan fol riy?

Pi N’en nib T’uf ni Ngan Rin’ Meb e Tha’ Ngak Got

3. Uw rarogon e girdi’ ni tadenen ni ngar chugurgad ngak Got, ma mang e n’en ke dag rogon e re ney?

³ N’en ni buch rok l’agruw i pagal ni fak Adam e ma tamilangnag ngodad e n’en nib t’uf rok e girdi’ ni tadenen meb e tha’ rorad ngak Got. Kain nge Abel e yow l’agruw ni ur guyew rogon ni ngar chugurgow ngak Got ni ur piew e maligach ngak. Ba fel’ e maligach rok Abel u wan’ Got ma de fel’ e maligach rok Kain u wan’. (Genesis 4:3-5) Mang e ba thil riy? Be gaar e Hebrews 11:4: “Michan’ rok Abel ngak Got e ir e pow’iy Abel nge pi’ ngak Got e maligach ni kab fel’ ko maligach ni pi’ Kain. Michan’ rok Abel ngak Got e ir e fal’eg Abel u wan’ Got me matheeg Got ngak Abel ni ke mang be’ nib mat’aw, yi m’agan’ Got ko maligach ni i pi’ ngak Got.” Rib tamilang ni michan’ reb e n’en nib t’uf ni nge yog ni ngan chugur ngak Got. Ku ban’en nib t’uf e be m’ug ko thin rok Jehovah ngak Kain ni gaar: “Faan mang e mu ngongliy e tin nib fel’, ma be m’ug u owchem ni gab felfelan’.” Arrogon, rayog ni nge chugur Kain ngak Got ni faanra chel Kain nge fal’eg e tin nib fel’. Machane de fol Kain ko fonow rok Got me li’ Abel ma daki yog ni ngki par u fithik’ e girdi’. (Genesis 4:7-12) Arfan ni ka som’on u chepin e girdi’ min tamilangnag nib ga’ fan e michan’ nge ngongol nib fel’ rok e piin ngar chugurgad ngak Got.

4. Mang e thingar da nanged u murung’agen kanawo’dad ngak Got?

⁴ Baga’ fan ni ngada nanged fadad tadenen ni faanra gad ba adag ni ngada chugurgad ngak Got. Urngin e girdi’ e ba tadenen ma denen e ma magawonnag e kanawo’ ni ngan yan ngak Got. I weliy Jeremiah ni profet murung’agen piyu Israel ni gaar: “Gamad e kug denengad . . . Kam tay e manileng ni nge ning e kanawo’ nyib ngom, ni nge dabi taw e meybil romad ngom.” (Lamentations 3:42, 44, NW) Yugu aram rogon ni girdi’ e ba tadenen, machane ka nap’an chepin e girdi’ ma ke dag Got ni baadag ni nge motoyil ko pi meybil rok e piin nib mich u wun’rad mab puluw rogon gum’ircharad ma yad ma fol ko pi motochiyel rok.  (Psalms 119:145) Mini’ boch e pi girdi’ ney, ma mang e rayog ni ngada filed ko pi meybil rorad?

5, 6. Mang e rayog ni ngada filed u rogon ni i meybil Abraham ngak Got?

⁵ Bagayad e pi girdi’ nem e Abraham. Mm’agan’ Got ngay ni nge non Abraham ngak ya i pining ni ‘fager rok’. (Isaiah 41:8) Mang e rayog ni ngada filed u rogon ni i meybil Abraham ngak Got? I fith Abraham ni patriach Jehovah ni gaar: “Somol rog ni Got, dariy e bitir ni fakag; ere uw rogon ni ngam fal’eg rogog?” (Genesis 15:2, 3; 17:18) Ba’ bayay ni i lemnag Abraham ko mini’ e ra magey nib fas u nap’an nra gechignag Got e piin nib kireb u Sodom ngu Gomorrah. (Genesis 18:23-33) Ki i yibilay Abraham yugu boch e girdi’. (Genesis 20:7, 17) Ma yu ngiyal’ e i pi’ Abraham e maligach ngak Jehovah u nap’an ni ra chugur ngak, ni bod rogon ni rin’ Abel.​—Genesis 22:9-14.

⁶ Gubin e yu ngiyal’ i n’ey, ma i non Abraham ngak Jehovah nib puf rogon. Machane, thin rok nib puf rogon e kub muun ngay e sobut’an’ ni manang nib sobut’ ko En ni ke Sunmiy. Mu guy rogon e thin rok ni be tay fan Got u Genesis 18:27 ni gaar: “Somol, wenig ngom, mu n’ag fan rog ni gu be welthin ngom ni ara’ rogon. I gag e ke mus ni gub girdi’, dariy mat’awug ni nggog ban’en.” Ffel’ ni ngada folgad u rogon laniyan’ Abraham!

7. Mang boch ban’en ni i yibilay e pi matam ni kakrom ngak Jehovah?

⁷ Pi matam ni yad ba yul’yul’ kakrom e boor ban’en ni ur yibilayed me motoyil Jehovah ko meybil rorad. I meybil Jakob ni be micheg ban’en. Tomren ni i meybil ni be ning e ayuw rok Got me micheg ni gaar: ‘Gu ra pi’ ngom taab guruy u ragag guruy ko urngin e pi n’en ni ga be yognag ngog.’ (Genesis 28:20-22) Boch nga tomren ni ke chugur ni nge mada’nag Jakob walagen, me wenig ngak Jehovah ni nge yoror rok ni gaar, “Wenig ngom, mu ayuwegneg rok Esau ni walageg. Kug rus ngak.” (Genesis 32:9-12) Fare matam ni Job e i yibilay chon e tabinaw rok ngak Jehovah, me pi’ boch e maligach ni fan ngorad. Nap’an ni denen fa dalip i fager rok Job ni de puluw e thin rorad, me yibilayrad Job, “me fulweg Somol taban e meybil rok Job.” (Job 1:5; 42:7-9) Pi thin ney u lan e Bible e ma ayuwegdad ni nge tamilang u wan’dad e pi n’en ni rayog ni ngad yibilayed ngak Jehovah. Kub tamilang ni m’agan’ Jehovah ngay ni nge motoyil ko pi meybil rok e piin ni yad be chuchugur ngak nib puluw rogon.

N’en ni Rin’ fare M’ag ko Motochiyel

8. Uw rogon ni kan yibilay e pi magawon rok e girdi’ ngak Jehovah u tan e m’ag ko Motochiyel?

⁸ Tomren ni i ayuweg Jehovah e nam nu Israel ni chuwegrad u Egypt, me micheg fare m’ag ko Motochiyel ngorad. U tan e Motochiyel e  ngan chugur ngak Got u daken e pi prist. Kan dugliy boch piyu Levi ni ngar manged prist ni fan ngak e girdi’. Ma nap’an ni ra buch ban’en ni ba ga’ fan ni fan ko nam, ma be’ ni owchen e girdi’​—ni reb e pilung ara reb e profet—​e ra yibilay fare magawon ngak Got. (1 Samuel 8:21, 22; 14:36-41; Jeremiah 42:1-3) Ni bod rogon, u nap’an nni madenomnag fare tempel, me meybil Solomon ngak Jehovah. Me dag Jehovah nib fel’ e meybil rok Solomon ya ke sug lan e tempel nga ramaen Jehovah me gaar: “Gu [ra] motoyil ko meybil ni yira tay ko re gin’en ney.”​—2 Kronicles 6:12–7:3, 15, NW.

9. Mang e ba t’uf ni nge fel’ rogon ni ngan chugur ngak Jehovah u lan e tempel?

⁹ Lan e Motochiyel ni pi’ Jehovah ngak piyu Israel, me uneg Jehovah reb e motochiyel ngay ni fan ni nge chugur e girdi’ ngak u lan e tempel. Mang e re motochiyel nem? Gubin e kadbul ma gubin e blayal’ ni thingari urfiy e en ni tolang ko prist e incense ni ban’en nib fel’ bon u owchen Jehovah ma ra rin’ u gubin e rran ni bod ni yima pi’ e maligach u gubin e rran. Boch nga tomren miki i urfiy yugu boch e prist fare n’en nib fel’ bon, ma ke mus ni Rorran ni Biyul e ra urfiy e en ni tolang ko prist e n’en nib fel’ bon. Faan manga de urfiy e prist e n’en nib fel’ bon ma dabi fel’ e pigpig ni yad be tay u wan’ Jehovah.​—Exodus 30:7, 8; 2 Kronicles 13:11.

10, 11. Mang e mich riy nib m’agan’ Jehovah ngay ni nge meybil be’ nge be’ ngak?

¹⁰ Ke mus ni piin ni kan dugliyrad e rayog ni ngar chugurgad ngak Jehovah u Israel kakrom, fa? Danga’, ya ke tamilang u lan e Bible nib felan’ Jehovah ngay ni nge motoyil ko pi meybil rok be’ nge be’. Nap’an ni meybil Solomon ko madenom ko fare tempel, me wenig ngak Jehovah ni gaar: “Yugu demtrug e meybil, ara yugu demtrug e wenig ni ra tay be’ ara ra tay piyu Israel ni girdi’ rom, . . . ma thingar mu motoyil ko meybil rorad ni ga be par u tharmiy.” (2 Kronicles 6:29, 30, NW) Babyor rok Luke e be weliy rogon ni i urfiy Zekariah ni chitamangin John ni Tataufe e n’en nib fel’ bon u lan e tempel ma bay bokum e girdi’ ni gathi yad e prist “u wen ni yad be meybil ngak Got.” Be m’ug riy ni ke mang ba yalen ko girdi’ ni ngar muulunggad nga wuru’ e tempel u nap’an ni yibe urfiy e n’en nib fel’ bon ngak Jehovah u daken e altar ni gol.​—Luke 1:8-10.

¹¹ Ere nap’an ni ra chugur e girdi’ ngak Jehovah nrogon mab m’agan’ ngay ni nge motoyil ko meybil rorad, ni piin ni owchen e nam nge yug girdi’ ni yad be gay ni nga ra chugurgad ngak. Ngiyal’ ney e gathi ka gadad be par u tan e m’ag ko Motochiyel. Machane, rayog ni ngada filed boch ban’en nib ga’ fan u murung’agen e meybil u rogon ni i meybil piyu Israel kakrom ngak Got.

Rogon e Meybil u Lan e Ulung ni Kristiano

12. Mang yaram ni bay e chiney ni fan e nge chugur e pi Kristiano ngak Jehovah?

¹² Chiney e gad bay u tan e yaram ni tay Kristus. Dakuriy e tempel nge pi prist ni yad owchen urngin e girdi’ rok Got ni gad ra sap ngay u nap’an ni gad ra meybil ngak Got. Arrogon, machane bay e kanawo’ ni tay Jehovah ni ngada chugurgad ngak riy. Mang e re kanawo’ nem? Nap’an fare duw ni 29 C.E., me sum reb e tempel nib fanathin ni tabab ko maruwel u nap’an ni kan dugliy Kristus ni nge mang e  En ni Tolang ko Prist. a Re tempel nib fanathin nem e aram kanawoen ni ngan chugur ngak Jehovah u daken e maligach rok Jesus Kristus ni biyul.​—Hebrews 9:11, 12.

13. Mang boch ban’en nib taareb rogon ko fare tempel u Jerusalem nge fare tempel nib fanathin?

¹³ Boor ban’en ni un rin’ u lan e tempel u Jerusalem ni be yip’ fan boch ban’en u lan fare tempel nib fanathin nib muun e meybil ngay. (Hebrews 9:1-10) Susun, mang e be yip’ fan fare n’en nib fel’ bon ni un urfiy ni kadbul nge blayal’ u daken e altar u lan e bin Thothup e singgil u lan e tempel? Rogon e thin u Revelation e be yog ni “bogi ban’en nib fel’ bon ni yima urfiy, e ereram e meybil rok girdien Got.” (Revelation 5:8; 8:3, 4) I yol David ni gaar: “Manga yigi fel’ e meybil rog u wan’um nge bod e n’en nib fel’ bon ni yima urfiy.” (Psalms 141:2, NW) Ere lan e yaram ko Kristiano e fare n’en nib fel’ bon ni yima urfiy e be yip’ fan e meybil nge sorok ni yibe pining ngak Jehovah nib m’agan’ ngay.​—1 Thessalonika 3:10.

14, 15. Mang e be yog e Bible u murung’agen e meybil rok e (a) pi Kristiano ni kan dugliyrad ko kan ni thothup? (b) nge piin ni yad “yugu boch e saf”?

¹⁴ Chon mini’ e rayog ni nge meybil ngak Got u lan e re tempel ney nib fanathin? U lan fare tempel u Jerusalem ma ke mus ni piin ni prist nge piyu Levi e rayog ni ngar pigpiggad u lan e yoror ko tempel, ma ke mus ni piin ni prist e rayog ni nga ranod nga lan e gin nib Thothup. Pi Kristiano ni kan dugliyrad ko kan ni thothup ni yad be athapeg e yan nga tharmiy e gowa yad bay u lan e n’en ni be yip’ fan lan e yoror ko tempel nge gin nib Thothup, ma rayog ni ngar meybilgad ngak Got ma ngar pininged e sorok ngak.

¹⁵ Ma uw rogon e piin ni yad “yugu boch e saf” ni yad be athapeg e par u fayleng? (John 10:16) I tamilangnag Isaiah ni profet ni girdi’ ko nam ni boor e bay ra bad ngar liyorgad ngak Jehovah ko “tin ni bay yib e rran nga m’on.” (Isaiah 2:2, 3) Ki yog Isaiah ni ra yib e “girdi’ u yugu boch e nam” ngar liyorgad ngak Jehovah. Ke tamilangnag Jehovah nib m’agan’ ngay ni ngar bad ngak ni gaar: “Gu ra . . . felan’nagrad u lan tafen e meybil rog.” (Isaiah 56:6, 7, NW) Ke tamilangnag e Revelation 7:9-15 murung’agen fare “ulung ni ba ga’” ni ra bad “u gubin e nam” ni yad be liyor ma yad be meybil ngak Got ni “rran nge nep’” ni yad ba sak’iy u langan e garog ko fare tempel nib fanathin. Gad ba felfelan’ ngay ni rayog rok urngin e pi tapigpig rok Got e ngiyal’ ney ni ngar meybilgad ngak Got nib puf rogorad mab pagan’rad ngay ni ra motoyil ko meybil rorad!

Mang Meybil e Ra Fel’ u Wan’ Got?

16. Mang e gad ra fil u murung’agen e meybil rok e tin som’on e Kristiano?

¹⁶ Tin som’on e Kristiano e yad e girdi’ ni yad ma meybil. Mang boch ban’en ni ur yibilayed? Piin ni piilal ni Kristiano e ur ninged e ayuw ni ngar dugliyed e pumoon ni ngar ted murung’agen e ulung. (Acts 1:24, 25; 6:5, 6) I meybil Epafras ni fan ko piin nib michan’rad. (Kolose 4:12) Girdien e ulung nu Jerusalem e ur yibilayed Peter u nap’an ni immoy u kalbus. (Acts 12:5) I meybil e tin som’on e Kristiano ngak Got ya nge ayuwegrad ni nge dab ra rusgad ko  togopluw ni yib ngorad ni lungurad: “Somol, mu changar ko tin ni ka rogned ni yad ra rin’ ngomad, ma ga ayuwegmad e pi tapigpig rom nggu weliyed e thin rom ndab kug rusgad.” (Acts 4:23-30) I yog James ni gachalpen Jesus ngak e pi Kristiano ni ngar meybilgad ngak Got ni nge yog e gonop ngorad u nap’an nra yib skeng ngorad. (James 1:5) Ga ma uneg e pi n’ey ko meybil rom ngak Jehovah, fa?

17. Meybil rok chon mini’ e ma motoyil Jehovah ngay?

¹⁷ Gathi urngin e meybil nib fel’ u wan’ Got. Ere susun uw rogon e meybil rodad ya nge mich u wan’dad ni ra motoyil Got ngay? Piin nib yul’yul’ kakrom ni i motoyil Got ko meybil rorad e ur meybilgad ngak u fithik’ e yul’yul’ mab puluw rogon gum’ircharad. Bay e michan’ rorad ma bay e ngongol nib fel’ nib muun ko michan’ rorad. Rayog ni nge mich u wan’dad ni ku ra motoyil Jehovah ko meybil rok e girdi’ ni ku aram rogorad e ngiyal’ ney.

18. Susun uw rogon e meybil rok e Kristiano me motoyil Got ngay?

¹⁸ Bay ban’en ni kub t’uf. I weliy apostal Paul murung’agen e re n’en ney ni gaar: “U daken Kristus e nge ayuwegdad fare Kan ni Thothup riy nga darod nga p’eowchen e en ni Chitamangiy.” Be weliy Paul murung’agen mini’? Be weliy murung’agen Jesus Kristus. (Efesus 2:13, 18) Arrogon, ke mus ni Jesus e ir e kanawo’ ni ngada meybilgad riy ngak e en ni Chitamangiy.​—John 14:6; 15:16; 16:23, 24.

19. (a) Ra diin me kireb bon e n’en ni ma urfiy piyu Israel u wan’ Jehovah? (b) Mange gad ra rin’ ya nge mich ni nge fel’ bon e pi meybil rodad ngak Jehovah?

¹⁹ Kada weliyed ni fare n’en nib fel’ bon ni urfiy e pi prist nu Israel e be yip’ fan e tin nib fel’ e meybil rok e pi tapigpig rok Got ni yad ba yul’yul’. Machane, yu ngiyal’ ma i dabuy Jehovah fare n’en nib fel’ bon ni i urfiy piyu Israel. De fel’ u wan’ Jehovah e n’en nib fel’ bon ni i urfiy piyu Israel u lan e tempel ya ku yad be siro’ ko pi liyos ni yad be meybil ngay. (Ezekiel 8:10, 11) Ku arrogon e ngiyal’ ney ni dabun e meybil rok e piin ni ma yog ni yad ma pigpig ku Jehovah machane ku yad be un ko ngongol nib togopluw ko pi motochiyel rok. (Proverbs 15:8) Ere nguuda athamgilgad ni nge fel’ urngin e ngongol rodad ya nge fel’ bon e pi meybil rodad u wan’ Got. Ma felan’ Jehovah ko meybil rok e piin ni yad ma fol ko kanawo’ rok nib mat’aw. (John 9:31) Machane ka bay boch e deer ni yira fith. Susun uw rogon e meybil rodad? Mang boch ban’en ni rayog ni ngada yibilayed? Uw rogon ni ma fulweg Got taban e meybil rodad? Gad ra weliy e fulweg ko pi deer ney nge yugu boch e deer u lan e bin ni migid e thin.

[Footnote]

Rayog ni Ngam Weliy, Fa?

• Uw rogon nrayog ni nge meybil e girdi’ nib tadenen ngak Got me felan’ ngay?

• Uw rogon nrayog ni ngada folwokgad rok e pi matam ni kakrom u nap’an ni gad ra meybil?

• Mang e gad ra fil ko pi meybil rok e tin som’on e Kristiano?

• Ra diin me fel’ bon e meybil rodad u wan’ Got?

[Study Questions]

[Picture on page 15]

Mang fan nib fel’ e maligach rok Abel u wan’ Got ma de fel’ birok Kain u wan’?

[Picture on page 16]

“I gag e ke mus ni gub girdi’”

[Picture on page 17]

“Mu gu pi’ ngom taab guruy u ragag guruy urngin e pi n’en ni ga be yognag ngog”

[Picture on page 18]

Meybil rom e bod e n’en nib fel’ bon u wan’ Jehovah, fa?