1-2. (a) Uw rogon ni yib angin fapi thin nni yoloy ko Isaiah 41:10 ngak fare walag nib pin ni ka nog Yoshiko ngak? (b) Mini’ e rayog ni nge yib angin ngak e pi thin nem nni yoloy ko Isaiah 41:10?

BAY reb e walag nib pin ni Kristiano nib yul’yul’ ni ka nog Yoshiko ngak ni rung’ag ban’en ni kireban’ ngay. Ke yog e togta rok ngak ni ka in e pul e ka bay ma nge yim’. Ere mang e rin’? Ke yib ngan’ Yoshiko reb e thin nu Bible nrib adag ni bay ko Isaiah 41:10. * (Mu beeg.) Ma aram me weliy ngak e togta rok u fithik’ e gapas fan nder rus ni bochan e bay Jehovah rok ni be ayuweg. * Re thin nu Bible ney e ayuweg e re walag ney ni ngari pagan’ ngak Jehovah. Ere ku rayog ni nge ayuwegdad e re thin nu Bible ney ni ngad pared ni gad ba gapas u nap’an ni kad mada’naged e skeng nrib mo’maw’. Ra nge tamilang u wan’dad rogon nra ayuwegdad e re n’ey, ma som’on e ngad weliyed ko mang fan ni pi’ Got e re thin nem ngak Isaiah ni nge yoloy nga but’.

² Som’on e yog Jehovah ngak Isaiah ni nge yoloy e pi thin ney nga but’ ya nge fal’eg laniyan’ e pi Jew nra munmun min fekrad ni kalbus nga Babylon. Machane ke ayuweg Jehovah e re thin ney ni nge par nib n’uw nap’an, ya gathi kemus ni nge ayuweg e pi Jew ni kan kalbusnagrad, ya ngki ayuweg e girdi’ rok e ngiyal’ nem nge mada’ ko ngiyal’ ney. (Isa. 40:8; Rom. 15:4) Ngiyal’ ney e ke “mo’maw’” e par rodad, ere rayog ni nge fel’ lanin’dad ko fapi thin ni bay ko babyor rok Isaiah.​—2 Tim. 3:1.

3. (a) Mang e kan micheg ko Isaiah 41:10 ni aram e thin nu Bible ni fan ko duw ni 2019? (b) Mang fan nib t’uf rodad e pi n’ey ni kan micheg?

³ U lan e re article ney e gad ra weliy dalip ban’en ni ke micheg Jehovah  ngodad nra gelnag e michan’ rodad ni kan yoloy ko Isaiah 41:10 ni aram e: (1) Bay Jehovah rodad, (2) ir e Got rodad, ma (3) ra ayuwegdad. Ba t’uf rodad e pi n’ey ni kan micheg * ni bochan e boor e skeng ni gad ma mada’nag u lan e yafos ni bod Yoshiko. Maku be mo’maw’ e par rodad ni bochan e pi n’en nib kireb ni be buch u lan e re fayleng ney. Ma bay boch i gadad ni be athamgil u fithik’ e gafgow ni be tay e pi am nib gel gelngirad ngorad. Ere ngad weliyed dalip ban’en nrayog ni nge pi’ e pagan’ nga lanin’dad.

4. (a) Mang e bin som’on ni kan micheg ni ngad weliyed murung’agen? (Kum guy e footnote.) (b) Mang boch e kanawo’ ni ma dag Jehovah ni ma lemnagdad riy? (c) Uw rogon u wan’um e thin rok?

⁴ Ke fal’eg Jehovah lanin’dad ko fapi thin ni yog nsom’on ni gaar: “Dab mu tamdag, ya gu ba’ rom.” * Ke dag Jehovah ni bay rodad ni aram e ma tiyan’ ngodad maku ma t’ufegdad. Mu tay fanam i yan u rogon ni ma dag nib sumunguy nge rogon nri gad ba t’uf rok. Be gaar Jehovah: “Nggu ayuweg e pogofan rom, ya ri gab fel’ u wun’ug.” Miki ulul ngay nge gaar, “Ri gab t’uf rog ma aram e gu be gagiyegnagem nguun tayfam.” (Isa. 43:4, BT) Dariy ban’en u lan e palpalth’ib nrayog ni nge taleg Jehovah ndab ki t’ufeg e piin ni yad ma pigpig ngak. Ma dariy ban’en nrayog ni nge kirebnag rogon nib yul’yul’ ngodad. (Isa. 54:10) T’ufeg rok nge tha’ u thildad e ma ayuwegdad ni nge dab da rusgad. Ya ra ayuwegdad e ngiyal’ ney ni bod rogon ni ayuweg Abram (Abraham) ni fager rok. Ke yog Jehovah ngak ni gaar: “Abram, dab mu tamdag; i gag ba yoror ni nggu yoror rom.”​—Gen. 15:1.

5-6. (a) Uw rogon ni kad nanged ni baadag Jehovah ni nge ayuwegdad ko pi skeng ni gad ma yan u fithik’? (b) Mang e rayog ni ngad filed ko n’en ni ke rin’ Yoshiko?

⁵ Gad manang ni baadag Jehovah ni nge ayuwegdad ko skeng ni ma yib ngodad ni bochan e ke micheg ngak e girdi’ rok ni gaar: “Ga ra yan u fithik’ e ran nib toar ma gu bay rom; gafgow ni bay i yib ngom e dabiyog ni nge gel ngom. Ga ra yan u fithik’ e nifiy ma dab mu gak’; ma pi n’en nib mo’maw’ ni bay i yib ngom e dariy ban’en nra rin’ ngom.” (Isa. 43:2) Mang e be yip’ fan e pi thin ney?

⁶ Der micheg Jehovah ni nge chuweg e pi magawon ni be mo’maw’nag e par rodad, machane dabi  pag e “gafgow” ni gad be tay ni bochan e magawon rodad ni nge aw parowdad riy, ara talegdad ndab kud pigpiggad ngak. Ku dabi pag e “nifiy” ara skeng nib mo’maw’ ni nge gafgownagdad ndariy n’umngin nap’an. Ya ke micheg nra ayuwegdad ni nga ‘darod’ u fithik’ e pi magawon nem. Mang e ra rin’ Jehovah? Ra ayuwegdad ni ngad pared ni gad ba gapas u nap’an ni kad rusgad, ya nge yag ni ngad pared ni gad ba yul’yul’ ngak ngki mada’ ko ngiyal’ ni ngan thang e fan rodad. (Isa. 41:13) Yoshiko ni kad weliyed murung’agen boch kafram e ke riyul’ u wan’ e re n’ey. Ke yog ba rugod ni fak ni gaar: “Kug gingad nga rogon ni ke par e chitiningmad nrib gapas. Kug guyed nriyul’ ni ke gapaseg Jehovah laniyan’. Ma weliy e chitiningmad ngak e pi kangof nge ku boch e girdi’ nib m’ar murung’agen Jehovah nge tin ni ke micheg nge mada’ ko rofen ni yim’.” Ere mang e gad be fil ko n’en ni ke rin’ Yoshiko? Nap’an nra pagan’dad ko fapi thin ni yog Jehovah ni gaar, “gu ba’ rom,” ma rayog ni ngad pared ndab da rusgad, ma gad ba gel u nap’an ni gad be athamgil u fithik’ e skeng ni gad be mada’nag.

7-8. (a) Mang e bin migid ni micheg Jehovah ni ngad weliyed murung’agen, ma mang e be yip’ fan? (b) Mang fan ni gaar Jehovah ngak piyu Israel: ‘Dabi magafan’med’? (c) Mang thin e bay ko Isaiah 46:3, 4 nib mudugil ni gapasnag laniyan’ e girdi’ rok Got?

⁷ Mu tay fanam i yan ko n’en ni micheg Jehovah ni migid ni yoloy Isaiah. Be gaar: “I gag e Got rom, dabi magafan’um.” Mang e be yip’ fan e re thin ney u murung’agen e magafan’? Re thin ney nni yoloy ko Bible nsom’on e fare bugithin ni “magafan’um” e be yip’ fan ni “ga be sap nga keruum ni bochan e ga be rus ni bay be’ ara ban’en nrayog ni nge gafgownagem” ara “kam rus ni bod be’ ni bay e yafos rok u thatharen e riya’.”

⁸ Mang fan ni yog Jehovah ngak e pi Jew nni fekrad nga Babylon ni kalbus ndabi ‘magafan’rad’? Ya bochan ni piin ni yad ma par ko re binaw ney e ra taw nga ba ngiyal’ ma yad ra rus. Mang e ra k’aring e marus ngorad? Ra chugur nga tomuren 70 e duw ni ke par piyu Jew ni yad ba kalbus ma ra yib e salthaw nu Medo-Persia nib gel gelngirad ngar chamgad ko fare binaw nu Babylon. Ra fanay Jehovah e pi salthaw ney ni ngar chuweged e girdi’ rok u kalbus u Babylon. (Isa. 41:2-4) Ere nap’an nra nang e girdi’ nu Babylon nge girdi’ u yugu boch e nam ni ke yib e toogor rorad ni ngar chamgad ngorad, ma bay ra gayed rogon ndab rrusgad ni aram e ra bagayad ma be gaar ngak bagayad: “Mu gelnagem.” Ku yad ma ngongliy boch e liyos ni yad be athapeg nra ayuwegrad e pi n’ey. (Isa. 41:5-7, NW) Machane ke gapasnag Jehovah laniyan’ e pi Jew ni yad ba kalbus ni be gaar ngorad: “I gur Israel ni tapigpig rog [ni gab thil ko en buguliyoror rom] . . . I gag e Got rom, dabi magafan’um.” (Isa. 41:8-10, NW) Mu tay fanam i yan ko n’en ni yog Jehovah ni gaar: “I gag e Got rom.” Ere fanay Jehovah e pi thin ney ni nge micheg ngak e pi tapigpig rok ni yad ba yul’yul’ ndawori pagtilrad, maku ir e Got rorad maku yad e girdi’ rok. Ke yog ngorad ni gaar: “Bay ug fekmed ngam mada’gad ko gin ndab ki buch ban’en romed riy.” Ere ba mudugil ni pi thin ney e fal’eg laniyan’ miki pi’ gelngin e pi Jew ni yad ba kalbus.​—Mu beeg e Isaiah 46:3, 4. 

9-10. Mang ndariy fan ni ngad rusgad? Mu susunnag.

⁹ Ngiyal’ ney e kari gel e magafan’ ko girdi’ ni bochan e be gel e kireb ko re fayleng ney i yan. Riyul’ ni ka gad be yan u fithik’ e pi magawon ney machane dariy rogon ni ngad rusgad. Be gaar Jehovah ngodad: “I gag e Got rom.” Mang fan nib gel gelngin e re thin ney nrayog ni nge ayuwegdad ni ngad pared ni gad ba gapas?

¹⁰ Baaray rogon nrayog ni ngan susunnag: Bay l’agruw ni’ ni ka nog Jim nge Ben ngorow ni yow be yan u sikoki u nap’an nib gel e nifeng. Ma nap’an nra aw e nifeng ko fare sikoki mi i yan nga lang nge sul nga but’, ma aram me gaar e en ni be kol e yap’ ko fare sikoki ngak gubin e girdi’: “Mu chichiiyed e seat belt romed. Ya gad be yan u fithik’ bangi lang ere ra i mithmith e re sikoki ney, machane dabi n’uw nap’an ni nge buch e re n’ey.” Ere ke magafan’ Jim. Machane miki gaar e en ni  be kol e yap’ ko fare sikoki: “Dabi magafan’med. Ya gag e en ni gu be kol e yap’ ko re sikoki ney.” Ngiyal’ nem ma aram me chichingeg Jim lolugen me gaar, “Uw rogon nra pagan’dad ko binir e thin?” Machane ke guy Ben ni be par nib gapas. Ere fith Jim ngak ni gaar: “Mang fan ni kam par ni gab gapas?” Ma aram me siminmin Ben me gaar: “Bochan e ri gu manang e cha’ney ni be kol e yap’ ko re sikoki ney, ya ir e chitamag!” Ma aram miki ulul nge gaar: “Mu son nggu weliy murung’agen e chitamag ngom. Yab pagan’ug ngay ni nap’an ni ga ra nang ko ir mini’ nge rogon nib salap ni ma kol e yap’ ko sikoki, maku ra ayuwegem ni ngam par ni gab gapas.”

11. Mang e rayog ni ngad filed ko fa gal pumoon ni kan susunnag ni yow bay u sikoki?

¹¹ Mang e rayog ni ngad filed ko fare n’en ni kan susunnag? Taareb rogodad ngak Ben, ya gad ba gapas ni bochan e rib fel’ rogon ni gad manang Jehovah ni ir e Chitamangidad ni bay u tharmiy. Gad manang nra ayuwegdad ni ngad athamgilgad u fithik’ e magawon ni gad be mada’nag ngki mada’ ko tin nib mo’maw’ e magawon ko ngiyal’ ney ko tin tomuren e rran. (Isa. 35:4) Ba pagan’dad ngak Jehovah ere rayog ni ngad pared ni gad ba gapas ni yugu aram rogon ni be rus e tin ka bay girdi’ ko re fayleng ney. (Isa. 30:15) Ku rayog ni ngad rin’ed e n’en ni ke rin’ Ben ni aram e ngad weliyed ngak e girdi’ fan ni nge pagan’rad ngak Got. Ma aram e ku rayog ni nge pagan’rad ndemtrug ko mang magawon e yad ra yan u fithik’ ma ra ayuwegrad Jehovah.

12. (a) Mang e bin dalip ni kan micheg ni gad ra weliy murung’agen? (b) Mang e be puguran fare thin ngodad nra gagiyeg Jehovah “nga gelngin”?

¹² Am lemnag e bin dalip ni micheg Jehovah ni yoloy Isaiah ni gaar: “Bay gu gelnigem mug ayuwegem.” Ere ke mu’ Isaiah i weliy rogon nra gelnag Jehovah e girdi’ rok. Ke yog ni gaar: “Somol e be yib ni nge gagiyeg nga gelngin.” (Isa. 40:10) Ere re thin ney ni Jehovah e ra “gagiyeg nga gelngin” e be puguran ngodad ni ir e Pilung nib gel gelngin. I fanay gelngin ndariy be’ nrayog  ni nge gel ngay ni nge ayuweg e pi tapigpig rok kakrom, maku be ulul ni nge pi’ gelngin me ayuweg e piin nib pagan’rad ngak e ngiyal’ ney.​—Deut. 1:30, 31; Isa. 43:10.

13. (a) Mingiyal’ e ri ma tay Jehovah u gil’ e n’en ni ke micheg ni nge pi’ gelngidad? (b) Mang ban’en ni ke micheg nrib be pi’ gelngidad nge pagan’ ngodad?

¹³ Nap’an nra gafgownagdad e toogor rodad ma ba ga’ ni aram e ngiyal’ nri ma tay Jehovah e n’en ni ke micheg u gil’ ni gaar: “Bay gu gelnigem.” Bay boch e nam u fayleng e ngiyal’ ney ni ma gay rogon e pi toogor rodad ni ngar taleged fare maruwel rodad ni machib ara reb e kan taleg e ulung rodad. Yugu aram rogon ma der magafan’dad ko pi n’ey nib gel. Ya bay ban’en ni ke micheg Jehovah nra pi’ gelngidad nge pagan’ ngodad. Ke micheg ni gaar: “Dariy ba talin e cham nni ngongliy nra maad’ad ngom.” (Isa. 54:17) Re thin ney e bay dalip ban’en riy nib ga’ fan ni be puguran ngodad.

14. Mang fan ndab da gingad ngay ni pi toogor rok Got e yad ra cham ngodad?

¹⁴ Bin som’on, bochan ni gadad pi gachalpen Kristus ma aram fan ni gad manang ni yira fanenikaydad. (Matt. 10:22) Ke yiiynag Jesus ni yira gafgownag pi gachalpen u nap’an e tin tomuren e rran. (Matt. 24:9; John 15:20) Ma bin l’agruw, be ginangdad e yiiy rok Isaiah ni pi toogor rodad e gathi kemus ni ngar fanenikayed gadad, ya ku yad ra fanay boch e talin e cham rorad ni ngar chamgad ngodad. Pi talin e cham ney e ba muun ngay e pi ban ni ma yog e pi toogor rodad ni yad ma gay rogon ni nge m’ug ni bogi ban’en nib riyul’, maku yad ma weliy boch ban’en nde riyul’ u murung’agdad, ara ra gafgownaged gadad nib gel. (Matt. 5:11) Dabi taleg Jehovah e pi toogor rodad ni yad be fanay e pi talin e cham ney ni ngar chamgad ngodad. (Rev. 12:17) Machane de t’uf ni ngad rusgad ngorad. Mang fan?

15-16. (a) Mang e bin dalip nib t’uf ndab da paged talin, ma uw rogon ni be tamilangnag e Isaiah 25:4, 5 e re n’ey? (b) Mang e ke weliy e Isaiah 41:11, 12 nra buch rok e piin ni yad be cham ngodad?

¹⁵ Am lemnag e bin dalip e ban’en nib t’uf ndab da paged talin. Ke yog Jehovah ni “dariy ba talin e cham” ni yira fanay “nra maad’ad” ngodad. Ma ayuwegdad Jehovah ko togopuluw ni ma yib rok e  pi “toogor” rodad ni bod rogon bangi rungrung ni ma ayuwegdad u nap’an e yoko’. (Mu beeg e Isaiah 25:4, 5, BT.) Ma pi toogor rodad e dabiyog ni ngar gafgownaged gadad ndariy n’umngin nap’an.​—Isa. 65:17.

¹⁶ Ku ma gelnag Jehovah e pagan’ rodad ngak ni aram e ma tamilangnag e n’en nra buch rok e “piin ni yad be damumuw” ngodad. (Mu beeg e Isaiah 41:11, 12.) Demtrug gelngin nra cham e toogor rodad ngodad, ara rogon gelngin e mahl, machane taab n’en e ra buch rorad. Gubin e pi toogor ko girdi’ rok Got e “yad ra yim’.”

17-18. (a) Uw rogon nra gelnag e Bible e pagan’ rodad ngak Got? Mu weliy rogon ni kan susunnag. (b) Uw rogon nra ayuwegdad fare thin nu Bible ni fan ko duw ni 2019 ni faanra da fal’eged i lemnag?

¹⁷ Gad ma gelnag e pagan’ rodad ngak Jehovah ni aram e gad ma yoornag e tin ni ngad filed u murung’agen. Kemus ntaareb e kanawo’ nrayog ni ngad nanged Got riy nib fel’ rogon ni aram e ngan beeg e Bible nib fel’ rogon min fal’eg i lemnag e n’en ni gad be beeg. Bay ban’en ni bay murung’agen u Bible ni be weliy rogon nrayog ni nge pagan’dad nga rogon ni ma ayuweg Jehovah e girdi’ rok kakrom. Re n’ey ni bay murung’agen u Bible e be pi’ e pagan’ ngodad nra ayuwegdad e ngiyal’ ney.

¹⁸ Am lemnag e thin ni fanay Isaiah ni nge susunnag nga rogon ni ma ayuwegdad Jehovah. Ke taarebnag Jehovah ngak be’ ni ma gafaliy e saf ma pi tapigpig rok e ke taarebnag ngak e pi saf. Ke weliy Isaiah murung’agen Jehovah ni gaar: “Bayi kunuy fapi pifak e saf nga taabang, mi i fekrad ni ke uchuchumiyrad.” (Isa. 40:11) Nap’an ni gad ra thamiy gelngin Jehovah nib gel ni gowa ke longobiy pa’ ngodad, ma aram e ra pagan’dad me gapas lanin’dad. Ere aram fan ni ke mel’eg fare tapigpig nib yul’yul’ mab gonop fare thin nu Bible ko Isaiah 41:10 (NW) ni nge mang thin nu Bible ni fan ko duw ni 2019 ni be gaar, “I gag e Got rom, dabi magafan’um” ni nge ayuwegdad ni ngad pared ni gad ba gapas ndemtrug ko mang e gad ra mada’nag. Ere mu fal’eg i lemnag e pi thin ney ni kan micheg ya ra gelnigem u nap’an ni ga ra mada’nag e skeng nra yib boch nga m’on.