1. Mang e ke m’ug u rarogon e pi maruwel ni ma rin’ Got ni ka aram ko tabolngin?

 KA ARAM ko tabolngin u nap’an ni tabab Got ni nge sunmiy urngin ban’en, mab tamilang nib taareban’ ko n’en nib m’agan’ ngay ni nge rin’. En th’abi som’on ni sunmiy Got u fithik’ urngin ban’en e aram e en ni ke m’ug e gonop rok Got rok nrib fel’ rogon. I yog ni gaar: “Ug moy u tooben [Jehovah] ni bod be’ nib salap i muruwliy ban’en, i par ni gubin e rran ni be felfelan’ ngog.” (Prov. 8:30) I maruwel e en Chitamangiy nge Fak u taabang ni ngar sunmiyew gubin mit e yafos ni gad be guy e ngiyal’ ney. Gubin ban’en ni i maruweliy Got nib fel’ rogon. Ke m’ug e re fel’ngin ney u rogon nni toy fare arke u nap’an Noah; nge rogon ni un ayliy yu yang ko tabernacle nga taabang, nge rogon ni un wereg min fek nga bang nge bang u nap’an ni be milekag e girdi’ rok Got u daken e ted kakrom, nge rogon ni un chubeg e pi tatalin e musik ma yibe tang ni yibe pining e sorok ngak Jehovah u tempel. Gubin e pi maruwel ney ni un rin’ kakrom e thingar ni rin’ u fithik’ e taareban’.​—Gen. 6:14-16, 22; Num. 4:4-32; 1 Kron. 25:1-8.

2. (a) Mang reb e ban’en ni ke tamilang u rarogon e ulung ko pi Kristiano ko bin som’on e chibog? (b) Mang boch e deer ni gad ra weliy e fulweg riy?

² Aray rogon e maruwel ni i tay girdien e ulung ni Kristiano ko bin som’on  e chibog ni Jesus Kristus e ir e llug riy. I weliy apostal Paul ni yugu aram rogon nib thilthil e “salap” ko pi Kristiano ni kan dugliyrad, maku ‘boor kanawoen ni ur pigpiggad’ riy, ma kub ‘thilthil rogon e tin nrayog rok bagayad nge bagayad ko pigpig’ ni ur ted, machane yad gubin ni yad bang u “taab dowef.” (Mu beeg e 1 Korinth 12:4-6, 12.) Ere, uw rogon e ngiyal’ ney? Uw rogon nrayog ni ngad machibnaged fare thin nib fel’ nib taareban’dad? Ma uw rogon nrayog ni ngaud maruwelgad u taabang u lan e ulung ngu lan e tabinaw nib fel’ rogon?

3. Mang e guy apostal John u nap’an nni pilyeg e changar rok?

³ Nap’an ni chugur nga tungun e bin som’on e chibog C.E., min pilyeg e changar rok apostal John nge guy medlip i engel nra bagayad ma be thoy e rappa rok. Nap’an ni thoy fa bin lal e engel e rappa rok, me guy John ba “t’uf” ni ke mul u lang nga daken e fayleng. Re “t’uf” nem e bay ba kiy u pa’ ma aram me bing fare low nib toar. Me yib e ath u lan fare low nib toar nga lang ni bod e ath ni yib u lan ba tafen e nifiy nib ga’, me yib e asmen’ing u fithik’ fare ath nga but’. De li’ fapi asmen’ing e pan, ara gek’iy, ara yugu ba mit e woldug, ya kemus nranod ni ngar gafgownaged e “piin ndariy fare pow ku Got u daken peri’rad.” (Rev. 9:1-4) Dariy e maruwar riy ni manang John e n’en nrayog ni nge rin’ ba ulung i asmen’ing. Ya aram e re miti chachangeg ni gafgownag fare nam nu Egypt u nap’an Moses. (Ex. 10:12-15) Ere, fapi asmen’ing ni guy John u nap’an nni pilyeg e changar rok e be dag yaan e pi Kristiano ni kan dugliyrad ni yad be weliy murung’agen e pufthin ni bayi tay Jehovah ko girdi’. Ngiyal’ ney e be un bokum milyon e piin ni yad be athapeg e par u fayleng ngorad yad be rin’ e re maruwel ney u taabang. Dariy e maruwar riy nre maruwel ni machib ney ni gad be rin’ u fithik’ e taareban’ e be magawonnag rogon e ban ni be tay Satan ko pi yurba’ i teliw ni googsur ni bay u fayleng!

4. Mang maruwel e bay ni nge rin’ e girdi’ rok Got, ma uw rogon nrayog ni ngar rin’ed e re n’ey?

⁴ Bay reb e maruwel nrib ga’ ni be rin’ e girdi’ rok Jehovah ni aram e yad be machibnag fare ‘Thin Nib Fel’’ u ga’ngin yang e fayleng u m’on ni nge yib tomuren e re m’ag ney. (Matt. 24:14; 28:19, 20) Re n’ey e ba muun ngay ni ngan pining “e en ni ke yib e belel” ngak ni nge unum fare “ran ko yafos nib tow’ath.” (Rev. 22:17) Ere, uw rogon ni ngad rin’ed e re n’ey ni gadad boch e Kristiano? Thingar da ‘pethgad nga taabang’ ngad maruwelgad nib taareban’dad.​—Efe. 4:16.

5, 6. Uw rogon ni ma m’ug nib taareban’dad u rogon ni gad ma machibnag fare thin nib fel’?

⁵ Ra ngad wereged fare thin nib fel’ u murung’agen Gil’ilungun Got ngak urngin e girdi’ nrayog, mab t’uf ni ngad rin’ed fare maruwel ni machib u rogon nib yaram. Ere, aram fan ni yima dugliy boch ban’en ni ngad folgad riy. Pi fonow ni yima pi’ ngodad u daken e pi ulung rok Got u ga’ngin yang e fayleng e ma ayuwegdad ni ngad maruwelgad u taabang nib taareban’dad. Tomuren ni kan yarmiy e machib, ma darod ni ngad weliyed murung’agen Gil’ilungun Got ko girdi’. Gad ma weliy boch e thin ko girdi’ maku gad ma wereg bokum milyon ken e babyor ni kan ngongliy nib puluw e thin riy ko Bible. Ku bay yu ngiyal’ ni yima ngongliy boch e babyor ni ngad wereged ngak urngin e girdi’ ko yungi n’en ni gad ma machib riy ni fan nga reb e muulung nib ga’ fan ara ku boch ban’en. Ere, ga ma fol ko pi yaram ney, fa? Faanra ga ma fol riy, ma aram e ga be un ngak bokum milyon e girdi’ gimed be maruwel u taabang ni gimed be weliy e thin ni be weliy fare “engel ni be changeg nib tolang u fithik’ e nifeng” ni bay murung’agen ko Revelation 14:6.

⁶ Ri gad ba felfelan’ ni gad ma beeg murung’agen rogon angin e machib ni gad be tay u lan e pi Yearbook rodad! A kum lemnag rogon e taareban’ ni ma m’ug u thildad u rogon ni gad ma peth nga taabang ngaud wereged boch e babyor ni gad be pining e girdi’ nga boch e muulung nib ga’ ni bod rogon e pi regional, nge special, nge international convention ni gad ma tay. Ma nap’an ni gad ra un ko pi muulung ney ma gad ma motoyil nga boch e welthin nib puluw ko Bible nge boch ban’en ni yima yan u yaan ni ma pi’ e athamgil nga lanin’dad ni ngad pied e tin th’abi fel’ rodad ngak Jehovah. Ma fare puguran ko yam’ ni tay Jesus ni gad ma madnomnag e ku ma  taarebnag lanin’dad. Ra yan i taw ko rofen ni Nisan 14 u gubin e duw, ma gad ma muulung nga taabang u tomuren ni ke aw e yal’ ni fan e ngad pininged e magar ko runguy ni ke dag Got ngodad mu kud daged ni gad be fol ko n’en ni ke tay Jesus chilen ni ngan rin’. (1 Kor. 11:23-26) Gathi kemus ni yigoo piin ni kar taufegad e rayog ni ngar uned ko re madnom ney. Ere, aram fan ni in e wik u m’on ni ngan tay fare Puguran, ma gad ma guy rogon ni ngad pininged e girdi’ u gubin e binaw ni gad ma machib riy ni ngar bad ko re madnom nem.

7. Faan gad ra peth nga taabang ngad maruwelgad, ma mang e rayog ni ngad rin’ed?

⁷ Taareb e asmen’ing e dabiyog ni nge kirebnag boor ban’en. Re n’ey e ku taareb rogon ko maruwel ni gad ma tay ni faanra kemus ni nge bagadad me rin’ ni yigoo ir, ma dabi yib angin. Machane, faan gad ra peth nga taabang ngad rin’ed e re maruwel ney, ma rayog ni ngad weliyed murung’agen Jehovah ngak bokum milyon e girdi’ ma gad ayuweg boch i yad ni ngar ted fan mi yad pining e sorok ngak! Machane, gathi kemus rogon ni ma ayuwegdad e maruwel ni gad ma tay u taabang ni ngaud pared nib taareban’dad ni gadad girdien Got.

8, 9. (a) Mang fanathin e fanay Paul ni nge tamilangnag fan nthingari par e piin Kristiano nib taareban’rad? (b) Uw rogon ni ngaud maruwelgad u taabang u lan e ulung?

⁸ U lan fagi babyor ni yoloy Paul nge yan ngak piyu Efesus, me tamilangnag riy rogon ni kan yarmiy e ulung nge fan nib t’uf ni ngar ‘ilalgad u gubin e kanawo’.’ (Mu beeg e Efesus 4:15, 16.) Mang e ra ayuwegdad ni ngad rin’ed e re n’ey? I weliy Paul murung’agen e dowef ya nge yag ni tamilangnag rogon ni nge taareban’dad u tan pa’ Jesus Kristus ni ir lolugen e ulung rodad. I weliy apostal Paul murung’agen rogon ni ngad maruwelgad u taabang ni bod e ‘dowef ni be par nib chayem ni urngin e ul’ul ni kan ta’ ngay e ir e be kol.’ Ere, demtrug ko ka gad bbitir fa kad pilibthirgad, ara kab fel’ fithik’ i dowdad ara kad m’argad, ma ra bagadad ma mang e ba milfan ngak ni nge rin’?

⁹ Reb e ban’en nib ga’ fan nrayog ni nge ayuwegdad e aram e ngaud folgad ma gad be tayfan e piin piilal u lan e ulung, ya aram e piin ni ke tayrad Jesus ni ngaur yarmiyed boch ban’en u lan e ulung. (Heb. 13:7, 17) Gathi gubin ngiyal’ nib mom ngodad ni ngad rin’ed e re n’ey. Machane, rayog ni nge pagan’dad ngak Got ma gad ning e ayuw rok. Ya rayog ni nge ayuwegdad gelngin nib thothup ni ngad adaged ni ngad folgad ko pi yaram ni yibe ngongliy u lan e ulung rok. Ere, faanra bay yu ngiyal’ ni dubdad ni ngad folgad u boch e yaram ni kan ngongliy, ma susun e ngad sobut’naged lanin’dad ngad fal’eged i lemnag rogon angin nra yib ko ulung rodad ni faanra ud maruwelgad u taabang nib taareban’dad. Maku reb e aram kanawoen nrayog ni nge gel e t’ufeg u thildad.

10. Uw rogon ni ma ayuweg e pi ministerial servant e ulung rodad ni nge par nib taareb? (Mu guy e sasing ni bay u tabolngin e re article ney.)

¹⁰ Pi ministerial servant e ku yad ma ayuweg e ulung rodad ni nge par nib taareb. Pi walag ni pumoon ney e yad ma rin’ boch e maruwel ni ma yib angin ngodad ni yugu aram rogon nib thilthil yangarrad. Bod ni, yad e yad ma ayuweg e piin piilal ni ngar guyed rogon ni nga i par nib gaman e pi babyor ni gad ma wereg u nap’an e machib. Maku reb e, ku yad e yad ma rin’ boch e maruwel ni fan ko klin ni yima tay ko Tagil’ e Liyor rodad, maku yad ma ngongliy e yungi n’en ni ke kireb riy. Maku nap’an nra yib boch e girdi’ ni ka yad bbeech ni ngar uned ko muulung rodad, ma yad ma yan ngorad ngar ayuweged yad. Ere, faanra ud ted fan e maruwel ni ma rin’ e pi walag ney, ma aram e ku gad be ayuweg e ulung rodad ni nga i par gubin ban’en riy nib fel’ rogon mab yaram.​—Mu taarebrogonnag ko Acts 6:3-6.

11. Mang e rayog ni nge rin’ boch e walag ni pumoon ni ka yad ba pagel ni ngar ayuweged e ulung rorad ni nge par nib taareb?

¹¹ Boor e piilal e ke yoor e duw ni yad ma rin’ boch e maruwel ni fan ko ulung rodad. Machane, rayog ni sana kar pilibthirgad, ere dabkiyog ni ngar rin’ed e maruwel ni bod rogon ni ur rin’ed kafram. Faanra aray rogon, ma tin baaray e walag ni pumoon ni ka yad ba pagel e rayog ni ngar pied e ayuw.  Yugu aram rogon ni bay boch ban’en ndar nanged, machane faan yira skulnagrad ma rayog ni ngar rin’ed e pi maruwel ney. Ere, aram fan nrib manigil ni ma athamgil boch e ministerial servant ni ngar manged boch e piilal u lan e ulung! (1 Tim. 3:1, 10) Bay boch e piilal ni ka yad ba pagel ni kar mon’oggad nrayog ni ngan fanayrad ni ngaur lekaged e pi ulung i yan ni ngar ayuweged e pi walag ni pumoon nge ppin u lan e ulung. Ma ri gad ba felfelan’ ko pi walag ney nge urngin e ayuw ni yad ma pi’ ko ulung rodad.​—Mu beeg e Psalm 110:3; Eklesiastes 12:1.

12, 13. Mang e rayog ni nge ayuweg girdien e tabinaw ni ngar maruwelgad u taabang nib taareban’rad?

¹² Chiney e ngad weliyed rogon nrayog ni ngaud maruwelgad u taabang u lan e tabinaw nib taareban’dad. Boor e walag ni kar guyed ni Fol Bible ni Tabinaw ni yad ma tay chon e tabinaw rorad u gubin e wik e aram e n’en ni ke ayuwegrad ni nge fel’ e tha’ u thilrad. Re n’ey e ma ayuwegdad ni ngad tedan’dad ko tirok Got ban’en me yag ni nge par e tabinaw rodad nib taareb. Rayog ni nge fal’eg chon e tabinaw rogorad ni fan ko machib ya nge yag ni yib angin e machib ni yad ma tay. Maku nap’an ni yad ra weliy murung’agen e Thin rok Got u taabang ma ri ma gel e chugur ko tha’ u thilrad ni bochan e rayog ni ngar guyed ni yad gubin ni yad be t’ufeg taab Got ma yad baadag ni ngar rin’ed e n’en nib m’agan’ ngay.

¹³ Ma uw rogon e piin mabgol, uw rogon nrayog ni ngar maruwelgad u taabang ya nge yag nra pininged e sorok ngak Jehovah? Faanra fa wu’ i mabgol e yow l’agruw ni yow be pigpig ngak Jehovah u fithik’ e yul’yul’, ma aram e rayog ni ngar parew ni yow ba felfelan’ mab taareban’row. Abraham nge Sarah, nge Isak nge Rebekah, nge Elkanah nge Hannah e yad gubin ni ur t’ufeged e en mabgol rorad. Ere ku arrogodad nthingar da folwokgad rorad. (Gen. 26:8; 1 Sam. 1:5, 8; 1 Pet. 3:5, 6) Faan gad ra rin’ ni aray rogon ma aram e rayog ni ngad pared e en mabgol rodad nib taareban’dad mab chugur thildad e Chitamangidad ni bay u tharmiy.​—Mu beeg e Eklesiastes 4:12.

14. Faanra der pigpig e en mabgol rom ngak Jehovah, ma mang e rayog ni ngam rin’ ya nge yag ni par e tha’ ko mabgol romew nib gel?

 ¹⁴ Be yog e Bible ni piin Kristiano e thingar dab ra pacheged yad ngak e piin nde taareb e michan’ rorad. (2 Kor. 6:14) Ere, uw rogon ni faanra be par reb e Kristiano u reb e tabinaw nde taareb e michan’ ko girdi’ riy? Bay boch e tapigpig rok Got nnap’an nra filed e tin riyul’ ma en mabgol rorad e gathi ir reb e Pi Mich. Yugu aram rogon, ma faan yad ra fol ko pi kenggin e motochiyel u Bible ma rayog ni nge par e tabinaw rorad nib taareban’ e girdi’ riy. Re n’ey e ba muun ngay ni ngar pethgad chon e tabinaw rorad nga taabang ngaur rin’ed boch ban’en u taabang. Kemus ni ngar guyed rogon ndab ra rin’ed boch ban’en nib togopuluw ko michan’ rorad. Gathi gubin ngiyal’ nib mom e re n’ey. Rayog ni nge mo’maw’ ni ngan fol ko pi kenggin e motochiyel u Bible u nap’an nra malog e en mabgol rok reb e walag ko ulung. Ireray e n’en ni buch rok reb e walag ni Kristiano ni ka nog Mary ngak. Sogonap’an 25 e duw ni ke yan me tal David ni pumoon rok ndaki un ko muulung. Yugu aram rogon miki ulul Mary ni nge un ko muulung nge pi convention ni yima tay, ma kki athamgil ni nge fol ko pi kenggin e motochiyel u Bible u lan e tabinaw rok, miki guy rogon ni nge ayuweg nel’ e bitir ni fakrow. Nap’an ni ilal fapi bitir ngar chuwgad u tabinaw, mi ri kireban’ Mary. Machane, me tabab David i beeg bayay e pi magazine ni ma tay Mary ni fan ngak. Munmun ma aram me sul David nge un ko muulung bayay. Ma nap’an nra yan ko muulung ma bay bochi pagel ni tungin ni nel’ e duw rok ni ma tay reb e chiya ni nge par ngay. Ma faanra bay reb e rran nde un David ko muulung, ma ma gaar ngak, “Tutuw, dag guyem ko muulung e daba’.” Chiney e ke sul David bayay be pigpig ngak Jehovah u fithik’ e felfelan’ ni yow Mary ni ppin rok.

15. Uw rogon nrayog ni nge ayuweg e piin mabgol ni kar piilalgad yu wu’ e mabgol ni ka yad bbitir ngorad?

¹⁵ Ngiyal’ ney e ri be guy Satan rogon ni nge kirebnag e pi tabinaw. Ere, rib ga’ fan ni nge athamgil e pi tapigpig rok Got ni ngar pared nib taareban’rad e en mabgol rorad. Demtrug n’umngin nap’an ni kam un ko mabgol, ma thingar mu lemnag boch ban’en nrayog ni nga mog ara mu rin’ nrayog ni nge ayuweg e mabgol rom. Rayog ni nge ayuweg e piin mabgol ni kar piilalgad e piin mabgol ni ka yad bbitir ngorad ya nge yag nra rin’ed e re n’ey. Bod ni, faanra gur nge en mabgol rom e gimew l’agruw e walag u lan e ulung ni gimew ba piilal, ma rayog ni nge ba ngiyal’ mi gimew pining yu wu’ e mabgol ni yad bbitir ngomew ko fol Bible ni gimew ma tay u tabinaw romew. Ya re n’ey e rayog ni nge ayuwegrad ni ngar guyed ni mus ni faanra ke n’uw nap’an ni ke mabgol l’agruw ni’ ma rib ga’ fan ni ngaur dagew e t’ufeg ngorow mu ur maruwelgow u taabang nib taareban’row.​—Titus 2:3-7.

16, 17. Mang e be sonnag e pi tapigpig rok Got?

¹⁶ Mu susunnag yaan piyu Israel kakrom ni yad be pining e sorok ngak Jehovah u nap’an reb e madnom nra ted ko tempel rok u Jerusalem. Ra fal’eged rogon e pi n’en nib t’uf ni ngar feked ko milekag ni ngar ted e ngaram, ngemu’ mi yad milekag u taabang nra bagayad ma be ayuweg bagayad. Ma nap’an nranod ko tempel rok Got mar liyorgad ngak u taabang nib taareban’rad. (Luke 2:41-44) Ngiyal’ ney e gowa gad be milekag u taabang ni gad be sor i yan nga lan e bin nib beech e fayleng. Ere, ba t’uf ni ngad pethgad nga taabang ngad maruwelgad nib taareban’dad. Re n’ey e be dag nib t’uf ni ngad athamgilgad ni gubin ngiyal’. Ere gur, ga be lemnag ma bay boch ban’en nib t’uf ni ngam rin’ ya nge yag nim mon’og u rogon ni ga be rin’ e re n’ey, fa?

¹⁷ Am lemnag e pi tow’ath ni gad be sonnag! Kad digeyed rarogon e par ko re fayleng ney ni ke wagey gubin ban’en riy ma dariy e taareban’ riy. Chiney e gad be guy ni be lebug fa gal thin ni yiiynag Isaiah nge Mikah. Ke taareban’ e pi tapigpig rok Jehovah ya yad be sor i yan ko “fare burey rok.” (Isa. 2:2-4; mu beeg e Mikah 4:2-4.) Riyul’ nrib fel’ rogon e liyor ni gad be tay e ngiyal’ ney ko tin tomuren e “rran.” Machane, rib gel e felfelan’ ni gad ra tay boch nga m’on u nap’an nra peth gubin e girdi’ u fayleng nga taabang ngar maruwelgad nib taareban’rad!