Ana Uchimwene wa Mlungu Uli Mumtima Mwawo?
Kwanga kwakutyochela m’Baibulo
Iyayi. Uchimwene wa Mlungu ngawukusatama mumtima mwa Aklistu. a Baibulo jikusasala kwawukusatama uchimwene. Jikusasala kuti uli “uchimwene wa kwinani.” (Mateyu 4:17, Buku Jeswela) Kwende tulole yajikusasala Baibulo yayikusalosya kuti jili boma jisyesyene jajikusalamulila kutyochela kwinani.
Uchimwene wa Mlungu ukwete ŵakulamulila, ŵandu ŵakwalamulila, malamusi soni chakulinga chakuti atamilikasye yakusasaka Mlungu kwinani soni pachilambo chapasi.—Mateyu 6:10; Chiwunukuko 5:10.
Boma ja Mlungu kapena kuti Uchimwene, uchilamulila “ŵandu ŵa mitundu josope, ngosyo syosope ni ŵa yiŵecheto yakulekanganalekangana” ŵa pachilambo chapasi. (Daniele 7:13, 14) Machili ga ulamusiwu gakusatyochela kwa Mlungu msyene ngaŵaga kwa ŵandu.—Salimo 2:4-6; Yesaya 9:7.
Yesu jwasalile ŵandumetume ŵakwe ŵakulupichika kuti chachiŵa ni jwalakwe mu Uchimwene wa kwinani ni kulamulilaga “mpela mwenye.”—Luka 22:28, 30.
Uchimwenewu ukwete achimmagongo soni wuchijonanga achimmagongoŵa.—Salimo 2:1, 2, 8, 9; 110:1, 2; 1 Akolinto 15:25, 26.
Baibulo jangajiganya kuti Uchimwene wa kwinani uli mumtima mwawo mulitala lyakuti ukusalamulila mumtima mwa mundu. Nambo jikusalosya kuti “maloŵe gagakusasala ya Uchimwene” kapena “Ngani Syambone syakwamba ya Uchimwene,” mpaka sichenje umi wetu soni siŵele mkuchenga umi wa ŵandu.—Mateyu 13:19; 24:14.
Ana maloŵe gakuti “Uchimwene wa Mlungu uli mwa jemanja m’mitima mwenu” gakusagopolela chichi?
Yaŵatite pakugopolela mu Mabaibulo gane lilemba lya Luka 17:21 yikusiyatendekasya ŵandu kuti akamanyilila chenene kwawuli Uchimwene. Mwachisyasyo Baibulo ja Buku Jeswela, jikusasala kuti “Uchimwene wa Mlungu uli mwa jemanja m’mitima mwenu.” Nambo kuti tulipikanichisye chenene lilembali, kwende tulole ngani josope.
Uchimwene wa Mlungu nganiwuŵa mmitima mwa ŵandu ŵaŵamsisyaga Yesu soni ŵaŵaliji ŵakuwulaga.
Yesu jwaŵechetaga ni Afalisi, likuga lya achimlongola wa dini ŵaŵamsisyaga soni ŵatesile chiwembu chakusaka kumwulaga Yesu. (Mateyu 12:14; Luka 17:20) Ana mpaka yiŵe yakupikanika kuganisya kuti Uchimwene waliji mmitima mwa ŵandu ŵakusisyaŵa? Yesu jwasalile jemanjaji kuti, “Mkati mwenu mugumbele ni unami ni yakusakala yine.”—Mateyu 23:27, 28.
Nambo ma Baibulo gane gagopolele chenene maloŵe ga Yesu ga pa Luka 17:21. Mwachisyasyo, Baibulo jine jagopolele kuti, ‘Uchimwene wa Mlungu uli apano ni jemanja.’ (Contemporary English Version) Baibulo jine jagopolele kuti “Uchimwene wa Mlungu uli pasikati penu.” (Baibulo la Dziko Latsopano) Uchimwene wa kwinani waliji “ni” kapena kuti waliji “pasikati” pa Afalisi. Yaliji myoyo ligongo lyakuti Mundu jwaŵamsagwile Mlungu kuti chaŵe Mwenye, jwaliji pasikati pawo.—Luka 1:32, 33.
a Dini syejinji sya Chiklistu sikusajiganya kuti Uchimwene wa Mlungu uli mumtima mwa mundu. Mwachisyasyo, ku United States, achakulungwakulungwa wa dini ja Southern Baptist Convention ŵasasile kuti Uchimwene wa Mlungu jili mbali ja “ulamusi wa Mlungu mumtima soni mu umi wa mundu.” Yeleyi yikulandanasoni ni yajaŵechete buku jine. M’bukuji, Papa jwa nambala 16 jwalembile kuti “Uchimwene wa Mlungu ukusayika mwa mundu, naga mundujo akwete mtima wakupikanila.”—Jesus of Nazareth.
You May Also Like
ESSENTIAL BIBLE TEACHINGS
Ana Uchimwene wa Mlungu Uli Chichi?
Pa utumiki wakwe wosope, Yesu ŵajiganyisye mnope ngani jakwamba Uchimwene wa Mlungu kupunda ngani sine. Kwa yaka yejinji ŵandu aŵele ali mkuwupolela Uchimwenewu kuti uyiche.
SANJA JA MLONDA
Ana Mwenye jwa Uchimwene wa Mlungu Ali Ŵani?
Ŵajinji mwa ŵaŵalembile Baibulo ŵasasile yindu yakumanyikasya juchachiŵa Mwenye jwa Uchimwene wa Mlungu. Mu mbili josope ja ŵandu, Yesu Klistu ni juŵakwanilisye yakulochesyayi.
YAJIKUSAJIGANYA BAIBULO
Atande Kulijiganya Baibulo
Atande kulijiganya Baibulo mwakambilana soni mwalulele ni mundu jwine.