Baibulo jasasile kuti milili jakulekanganalekangana jichipagwa m’masiku gambesi. (Luka 21:11) Milili jajikutendekwaji nganichiŵa chilango chakutyochela kwa Mlungu. Pachangakaŵapa Mlungu kupitila mu Uchimwene wakwe, chachityosya yakusawusya yosope yatukusimana nayo kupwatikapo mililiji.

•  Ana Baibulo jasasile kala kuti kuchiŵa milili?

•  Ana Mlungu pakwete paŵapele ŵandu chilango cha yilwele?

•  Ana milili jajikutendekwa masiku aganoji, chili chilango chakutyochela kwa Mlungu?

•  Ana mililiji jichimala?

•  Mavesi ga m’Baibulo gakusala ya yilwele

 Baibulo nganijisala mena gasyesyene ga milili kapena yilwele mpela COVID-19, Ezi kapena liwundika lya ku Spain. Nambope jasasile kuti kuchiŵa “yilwele” soni ‘milili.’(Luka 21:11; Chiwunukuko 6:8, Malangano ga Sambano 1992 Edition) Yakutendekwa yeleyi yili yimanyisyo yakulosya kuti tuli ‘m’masiku gambesi’ kapena kuti “mbesi ja chilambo chapasi.”—2 Timoteo 3:1; Mateyu 24:3.

 M’Baibulo mwana malo gakuŵalanjika gagakusasala kuti Mlungu ŵapele ŵandu ŵane chilango cha yilwele. Jwalakwe jwatendekasisye kuti ŵanduwo alwale matana. (Numeli 12:1-16; 2 Ayimwene 5:20-27; 2 Mbili 26:16-21) Mlungu ŵatesile yeleyi ligongo lyakuti ŵanduwo ŵamjimuchile jwalakwe. Nambo ngaŵa kuti ulwelewo wajambuchilesoni ŵandu ŵangalemwa.

 Iyayi. Nambope ŵandu ŵane akusasala kuti milili jatukusimana najo apano, chili chilango chakutyochela kwa Mlungu. Baibulo jangajitichisya nganisyo syelesi. Ligongo chichi?

 Baibulo jikusasala kuti atamose ŵakutumichila ŵa Mlungu ŵakala soni ŵamasiku agano, aŵele ali mkulaga ni yilwele. Mwachisyasyo jwakutumichila jwakulupichika Timoteyo, ‘jwalwalagalwalaga.’ (1 Timoteo 5:23) Atamose yaliji myoyo nambope Baibulo jangasalaga kuti chelechi chaliji chimanyisyo chakulosya kuti Mlungu ngakusangalala ni jwalakwe. Masiku aganosoni ŵakutumichila ŵa Mlungu ŵakulupichika, akusalwala kapena kujigala yilwele. Ndaŵi syejinji ŵanduŵa akusajigala yilweleyi ligongo lyakuti ali pa malo gakulemwecheka soni pandaŵi jakulemwecheka.—Jwakulalichila 9:11 [NWT].

 Konjechesya pelepa Baibulo jikusasala kuti ndaŵi jakuti Mlungu ŵape chilango ŵandu ŵakusatenda yakusakala nganijikwane. Apano tukutama ‘m’lisiku lya chikulupusyo.’ Yeleyi yikugopolela kuti ndaŵi jeleji, Mlungu akwaŵilanga ŵandu wosope kuti aŵe paunasi ni jwalakwe ni chakulinga chakuti akapate umi wangamala. (2 Akolinto 6:2) Mlungu akukamulichisya masengo “ngani syambone syakwamba ya Uchimwene” wakwe pakwaŵilanga ŵandu pachilambo chosope chapasi.​—Mateyu 24:14.

 Elo. Baibulo jasasile kala kuti pachangakaŵapa ŵandu ngasalwalasoni. Mlungu chachimasya yilwele yosope mu Uchimwene wakwe. (Yesaya 33:24; 35:5, 6) Konjechesya pelepa jwalakwe tachityosya yakusawusya yosope kupwatikaposoni chiwa. (Chiwunukuko 21:4) Jwalakwe chachajimusya wosope ŵaŵawile. Jemanjaji chachikola chilu chambone soni chachitamaga pachilambo chapasi pano mwakusangalala.—Salimo 37:29; Masengo 24:15)

 Chiwunukuko 6:8, “Pinalolite, najiweni hachi jakubiliŵita. Juŵakwesilepo lina lyakwe lyaliji chiwa, soni malo ga ŵandu ŵawe gamkuyaga panyuma. Ŵaŵiliwo ŵapegwile ulamusi . . .kuti awulaje ŵandu.”

 Ngopolelo jakwe: Chakulochesya chakusala ya ŵandu mcheche ŵakwesile pa mahachi, chikulosya kuti milili jichitendekwa mu ndaŵi jetu jino.