Mpela mwatwapikanile mu lipoti lya ngani syasitendekwe kwene sya pa jw.org, mabomba gane gawuliche pa malo ga msongano wa chigawo wawatendekwe ku Kerala, ku India, Lyamlungu, pa 29 Okotoba, 2023. Yakutesya chanasa yili yakuti, kupwatika pa alongo ŵaŵili ŵaŵawile ŵala, kamsikana kane ka yaka 12 kawilesoni ligongo lyakuwulala mnope. Abale ni alongo ŵane ŵakwana 55 ŵawulele. Ŵane mwa jemanjaji awulele mnope.

Apanopano, alongo ŵatatu soni abale ŵaŵili ali ku chipatala ligongo lyakuti ŵawulele mnope. Achakulungwakulungwa ŵa boma asimichisye kuti mabomba gatatu ŵagawulisye cha mma 9:40 kundaŵi. Pandaŵiji lipopelo lyandanda lyaliji lili mkupelechedwa. Mundu jwakumganichisya kuti jwatesile chipongwechi amtawile soni akumsunga ku polisi. Mwamti ŵapolisi akupitilisya kuwungunya yanganiji.

Tukwayamichila mnope ŵandu ŵakusakamuchisya mwachitema yindu payisawisye ŵaŵayiche kukukamuchisya pamsonganowu soni ŵachipatala ŵaŵakamuchisyaga ŵandu ŵaŵawulele.

Ŵandu ŵaŵaliji pamsonganowu akuyamichila mnope ligongo lyakuti abale ni alongo ŵalimbikasisye mwakwalosya chinonyelo soni kwakamuchisya. Mlongo jwine jwaŵaliji pa msonganowo pandaŵi pagawulikaga mabombaga jwatite: “Ndaŵi jijojo natandite kupopela kwa Yehofa. Ŵandu ŵaŵaliji pamsonganowu, yalumo ni abale ni alongo, ŵatusamalile soni ŵatesile yindu mwachitema pakulolechesya kuti umi wetu wuli chenene. Pelepa yawonechele chenene kuti Yehofa akutukamuchisya soni ŵamsamalilaga jwine jwalijose.”

Ŵakwimila ofesi ja nyambi ja ku India, ŵakulolela madela, soni achakulungwa ŵa mumpingo akupitilisya kwakamuchisya mwausimu soni mwakuchilu ŵandu ŵakwayidwe ni yindu yakogoyayi. Jwamkulungwa jwine jwa mumpingo jwakutyochela ku ofesi ja nyambi, paŵapite ku Kerala kuti akalimbikasye abale ni alongo ŵaŵakwayidwe ni yakogoyayi ŵatite: “Yalimbikasisye mnope kwawona abale ni alongo ŵaŵawulele ali mkulosya ndamo syambone, mwangasamala kandu kuti ŵaliji payipwetesiyi. Mwamti naŵechetene ni ŵane mwajemanjaji. Kelekatu kaliji kandanda kwawona ŵandu ŵali pa yipwetesi nambo ni kumdalilaga Yehofa. Mwamti yeleyi yilimbikasisye chikulupi changu.”

Mpela liŵasa lya pachilambo chosope, tukwapopelela ŵandu wosope soni maŵasa gosope gagakwayidwe ni yindu yakogoya yayitendekwe ku India. Tukusalimbikasidwa soni kola mtendele wa mu mtima patukuganichisya yajasasile Baibulo yakwamba chilambo chasambano mwele ngasimupagwa yachiwawa, yipwetesi soni chiwa. Tuli ŵakusimichisya kuti tupitilisyepe kumdalila soni kumkulupilila mnope Yehofa.—Salimo 56:3.