Kwa mawiki gamnono kusogoloku, myilambo yine ŵandu chaŵeje ali mkufota. Ŵanduŵa akuganichisya yakwamba ŵakulamulila ŵakusaka kwasagula.

 Ana Baibulo Jikusasalaga Yamtuli Panganiji?

 Baibulo jikusasala kuti ulamusi wa ŵandu wosope uli wakulepela.

•   “Mkasimwakulupilila ayimwene, kapena ŵandu ŵane ŵangakupakombola kukamuchisya. Palikutyoka lipuje lyosope mchilu mwa mundu, mundujo akusawujila kwitaka, ni yindu yiŵasakaga kuyitenda, yikusamala lisiku lilyolyo.”—Salimo 146:3, 4.

 Atamose ŵandu ŵakusalamulila chenene, pambesi pakwe akusawaga. Nambo jemanjaji, nganaŵa aŵechete mwakusimichisya kuti ulamusi wawo wambonewo ŵane mpaka awupitilisye.—Jwakulalichila 2:18, 19.

 Yisyesyene yakwe yili yakuti, Baibulo jikusasala kuti yili yangakomboleka kuti ŵandu alilamulileje achimsyene.

•   “Mundu ngaŵa mkomboleka kulilongolela jikape.”—Yelemiya 10:23.

 Ana masiku agano pana jwalijose jwampaka ŵalamulile chenene ŵandu?

 Baibulo jikusasala kuti Mlungu jwasagwile jwakulamulila jwambone mnope soni jwakudalilichika jwali Yesu Klistu. (Salimo 2:6) Yesu ali Mwenye jwa Uchimwene wa Mlungu, mwamti akulamulila ali kwinani.—Mateyu 6:10.

 Ana chachisagula Yesu kuŵa jwakwalongolela? Mfundo sya m’Baibulo syakuyichisyasi sikusala magongo gambone ga chiwusyochi:

•   “Mwajinamile pa sajo syawo [ŵali Yesu Klistu soni Mlungu], mwakutetemela, kogopela kuti atakumtumbilila, myoyo m’mwejo komboleka kuwa mwakusisimuchisya, ligongo ukali wawo ukusajanguya kolela. Ŵana upile ŵandu wosope ŵakutilila kwa AMBUJE.”—Salimo 2:12.

 Ajino jili ndaŵi jambone jakuti asagule mundu jwakwalamulila. Yakulochesya ya m’Baibulo yikusalosya kuti Yesu jwatandite kulamulila m’chaka cha 1914 soni pamkaŵapa Uchimwene wa Mlungu uchimasya maulamusi gosope ga ŵandu.—Daniele 2:44.

 Kuti amanyilile yampaka atende pakuwukamuchisya ulamusi wa Yesu aŵalanje ngani jakuti, “Akusosekwa Akamuchisyeje pa Masengo ga Uchimwene wa Mlungu.”