Yaŵasasile Samuel, Teresa, ni Magdalene yikulosya kuti ŵandu akusapopela pamagongo gakulekanganalekangana, gane gakupikanika ni gangapikanika gakwe. Mapopelo ga ŵandu ŵane gakusaŵa gakutyocela pasi pa mtima nambo ga ŵane iyayi. Cinga ŵandu akusapopela kuti akombole mayeso kusukulu, kuti likuga lyawo lyakutenda mang’asi lipunde, kuti Mlungu ŵalongoleleje mwiŵasa mwawo, kapena pamagongo gane, yosopeyi yikwamba kulosya kuti ŵandu ŵajinji akusakuwona kupopela kuŵa kwakusosekwa mnope. Mwambone, yakuwungunya yine yalosisye kuti atamose ŵandu ŵanganaŵa mu dini jilijose akusapopela ndaŵi syosope.

Ana wawojo akusapopela? Naga yili m’yoyo, Ana akusapopelela cici? Cinga akwete cisyoŵe cakupopela kapena iyayi, mwine mpaka aliwusyeje kuti, ‘Ana kupopela kuli kwakamucisya yisyesyene? Ana pana jwakusapikanila mapopelo?’ Jwakulemba jwine ŵasasile kuti lipopelo ligambile kuŵa mpela “mtela wakamucisya kutamilikasya pasi nganisyo.  . . Likusaŵasoni mpela ukwamba kucisalila cilango cakwe yakusawusya pakwamba pakusaka kuti mtima utame pasi.” Ŵacipatala ŵane akusaliwonasoni lipopelo mwalitala lyeleli, ligongo akusati lili “mtundu wine wa mtela.” Ana ŵandu ŵakusapopela akusagamba kutenda cindu cangali mate kapena akusatenda cindu cakamucisya mnope?

Mwakulekangana ni yeleyi, Baibulo jikusasala kuti lipopelo nganiligamba kuŵa mpela mtela. Jikusasala kuti pana jwine jwakwe jwakusapikanila mapopelo gatukusagapeleka m’litala lyakuŵajilwa soni pa yindu yakuŵajilwa. Ana yeleyi yili yisyene? Kwende tulole maumboni gakwe