Ŵa Mboni sya Yehofa akusakulupilila kuti ‘Malemba gosope gasaliligwe ni Mlungu soni gali gakamucisya.’ (2 Timoteo 3:16) Baibulo jikusatukamucisya kulijiganya ya Mkupanganya jwetu soni kuti tutameje ni umi wambone.

Baibulo jikusati, “Ŵandu amanyilile kuti wawo, ŵele lina lyawo ni Yehofa, Ŵalakwe jika ali Ŵamwinani Mnope ŵakulamulila cilambo cosope capasi.” (Salimo 83:18) M’yoyo, tukusalambila Yehofa Mlungu jika, soni ligongo lyakuti tuli mboni syakwe, tukusasalila ŵane ya lina lyakwe.—Yesaya 43:10-12.

Mpela Aklistu, tukusakulupilila kuti Yesu, “Mwanace jwa Mlungu,” * ŵayice pacilambo capasi ni kuŵa Mesiya. (Yohane 1:34, 41; 4:25, 26) Paŵawile, Yesu ŵajimwice ku ŵawe ni kwawula kwinani. (1 Akolinto 15:3, 4) Kaneko ŵaŵele Mwenye jwa Ucimwene wa Mlungu. (Ciunukuko 11:15) Ucimwene wa Mlunguwu uli boma jisyesyene jajiciwucisya cilamboci kuŵa Paladaiso. (Danieli 2:44) Baibulo jikusati, “Ŵakulinondiya cacapa cilambo capasi. Nipo cacisangalala ni mtendele wejinji.”—Salimo 37:11, 29.

Ŵa Mboni sya Yehofa akusakulupililasoni kuti Malamusi gakutulongola ga m’Baibulo mpaka gakamucisyeje ŵandu lisiku lililyose. (Yesaya 48:17, 18) M’yoyo, ndaŵi syosope tukusatenda yindu mwakamulana ni Malamusigo. Mwambone, ligongo lyakuti Baibulo jikusatukalamusya kuti tuŵambaleje yitendo yayikusajonanga nganisyo soni cilu cetu, ngatukusakwemba sona kapena kumwa mtela wakusokonasya mtwe. (2 Akolinto 7:1) Tukusaŵambalasoni yitendo yele Baibulo jikusatulekasya, mpela kolelwa, yamsese, soni wiyi.—1 Akolinto 6:9-11.