YAJIKUSASALA BAIBULO: “Jikwisa ndaŵi jele ŵandu ŵali m’malembe gacikumbucilo cacipikana maloŵe [ga Yesu] ni cacijimuka.”—Yohane 5:28, 29.

Yesu ŵasasile mkanipaŵe kuti msogolo, Ucimwene wakwe pawucitanda kulamulila, cacajimusya wosope ŵali m’malembe. Fernando, jwatumkolasile mungani jipite jila ŵatite, “Nasimonjile mnope panaŵalasile lilemba lya Yohane 5:28, 29 kandanda. Lyambele cembeceyo cisyesyene, soni natandite kuganicisya ya yindu yambone yayicitendekwa msogolo.”

Munyumamo, mundu jwakulupicika Yobu ŵajembeceyaga kuti pacaciwa, Mlungu cacimjimusya msogolo. Yobu ŵawusisye kuti, “Ali awile mundu, ana cacitamasoni ni umi?” Kaneko ŵajanjile mwakusimicisya kuti, “Cinjijembeceya masiku gosope ga masengo gangu gakunganganicisya [ndaŵi jali m’Malembe] mpaka ndaŵi jangu jakupumula cijiyice. Ŵalakwe caciŵilanga, nipo une cinjajanga.”—Yobu 14:14, 15.

Malita, mlumbugwe Lasalo, ŵamanyililaga cenene ya kwimuka kwa ŵawe. Lasalo ali awile, Yesu ŵamsalile Malita kuti, “Mlumbugwenu cacijimuka.” Malita ŵajanjile kuti, “Ngumanyilila kuti cacijimuka pakwimuka kwa ŵawe palisiku lyakumalisya.” Kaneko Yesu ŵatite, “Une ndili kwimuka soni umi. Jwalijose jwakungulupilila une, atamose awe, cacikolasoni umi.” (Yohane 11:23-25) Ndaŵi jijojo, Yesu ŵamjimwisye Lasalo. Yayatendekweyi yikwamba kulosya yindu yekulungwa yayicitendekwa msogolo. Agambe ganisya mwayiciŵela yakusangalasya ŵandu pacilambo cosope ali mkwimuka kuŵawe!

YAJIKUSASALA BAIBULO: Maloŵe ga Mlungu gakusalosya kuti kwimuka kwa Yesu kwaliji kwakulekangana ni kwimuka kwa ŵandu 8 ŵakusakolanjikwa m’Baibulo. Ŵanduwo ŵajimwice ni kuŵasoni cijumi pacilambo capasi panopano. Nambo pakwamba ya kwimuka kwa Yesu, tukusaŵalanga kuti: “Yesu Klistu . . . ali ku mkono wamlyo wa Mlungu, pakuŵa ŵapite kwinani.” (1 Petulo 3:21, 22) Ana pangalisoni ŵane ŵacacijimuka ni kwawula kwinani mpela muŵatendele Yesu? Yesu ŵaliji ali ŵasalile ŵandumetume ŵakwe kuti, “Patinjawule kukwalinganyila malo, cinjiyikasoni kukwajigalila kumangwetu, kuti kucingatame une jemanjasoni akatame kweleko.”—Yohane 14:3.

Yesu ŵapite kwinani ni ŵatandite kosecela kwika kwa ŵane mwa ŵakulijiganya ŵakwe. Ŵandu ŵacacijimuka ni kwawula kwinani caciŵa ŵakwana 144,000. (Ciunukuko 14:1, 3) Nambo ana ŵakumkuya ŵa Yesuŵa cacitendaga cici kwinaniko?

 Jemanjaji cacikamulaga masengo gamakulungwa. Malemba gakusatusalila kuti: “Ŵakusangalala soni ŵaswela ali ŵandu ŵacacijimuka nawo pakwimuka kwandanda. Pa jemanjaji, ciwa caŵili nganicikola macili. Nambo caciŵa ŵambopesi ŵa Mlungu ni Klistu, soni cacilamulila mpela mayimwene pampepe najo kwa yaka 1,000.” (Ciunukuko 20:6) Ŵandu ŵacacijimuka ni kwawula kwinani cacilamulila cilambo capasi mpela mayimwene soni ŵambopesi pampepe ni Klistu.

YAJIKUSASALA BAIBULO: M’Malemba tukusasimanamo maloŵe gaŵaŵecete ndumetume Paulo kuti: “Ngwete cembeceyo mwa Mlungu, cakwetesoni ŵanduŵa, kuti kuciŵa kwimuka kwa ŵakulungama ni ŵangalungama ŵakwe.”—Masengo 24:15.

Ana ŵani ŵacaciŵa m’likuga lya ŵandu ŵele Paulo ŵakolasile kuti “ŵakulungama”? Jumo mwa ŵanduwo caciŵa mundu jwakulupicika Daniyele. Cakumbesi kwa umi wakwe Mlungu ŵamsalile kuti, “Cimcipumula, nambo cimcijimuka kuti mpocele mbote jenu pambesi pa masikugo.” (Danieli 12:13) Ana Daniyele cacijimucila kwapi? Baibulo jikusati, “Ŵakulungama cacipocela cilambo capasi. Ni cacitama mwelemo kwandaŵi josope.” (Salimo 37:29) Yesu ŵasasilesoni mkanipaŵe kuti, “Ŵakusangalala ali ŵandu ŵakulinandiya, pakuŵa cacipocela cilambo capasi.” (Matayo 5:5) Daniyele pampepe ni acalume soni acakongwe ŵane ŵakulupicika cacijimuka ni kutamasoni ni umi pacilambo capasi kwangamala.

Ana ŵani ŵacaciŵa m’likuga lya ŵandu ŵele Paulo ŵakolasile kuti “ŵangalungama”? Ali ŵandu ŵajinji ŵaŵawile, ŵanganakola upile wakulijiganya soni kuya usyesyene wa m’Baibulo. Pacacijimuka, jemanjaji cacilijiganya yakwamba Yehofa * soni Yesu. (Yohane 17:3) Wosope ŵacacisagula kutumicila Mlungu cacikola upile wakutama ni umi kwangamala mpela Yehofa.

YAJIKUSASALA BAIBULO: Mlungu “cacipukuta misosi josope m’meso mwawo, nipo ciwa ngasicipagwasoni. Ngasipapagwasoni kulila, kuwuwula kapena kupikana kupweteka.” (Ciunukuko 21:4) “Jemanjajo cacitaŵa nyumba ni kutamaga; nipo cacilima migunda ja mipeleya, ni kulyaga yisogosi yakwe.”—Yesaya 65:21.

Agambe kuliwanicisya ali mkutama mundaŵi jeleji pampepe ni ŵakunonyelwa ŵawo ŵajimwice kuŵawe! Nambo, Ana mpaka asimicisye catuli kuti ŵandu cacijimuka kuŵawe?