1, 2. (a)  Ana wawojo akwembeceya mwalung’wanu yindu yambone yapi m’Paladaiso? (Alole ciwulili cacili penanici.) (b) Ana yindu yausimu yapi yatucisangalala nayo m’cilambo casambano?

ŴAJINJIWE, patupikene maloŵe gakuti “umi usyesyenewo,” tukusaganicisya ya umi wangamala wa m’Paladaiso pacilambo capasi. Ndumetume Paulo ŵalandenye “umi wangamala” ni “umi usyesyenewo.” (Aŵalanje 1 Timoteo 6:12, 19.) Tukwembeceya umi wangasiwumala soni wawucitutendekasya kuŵa ŵakusangalala. Lisiku lililyose tucijimukaga tuli tukwete cilu cambone soni tuli ŵakusangalala. (Yes. 35:5, 6) Agambe ganicisya mwatucisangalalilaga tuli mkunguluka ni ŵakunonyelwa ŵetu soni acimjetu, kupwatikapo ŵacacijimuka kuŵawe! (Yoh. 5:28, 29; Mase. 24:15) Ndaŵi jelejo tucilijiganya yejinji pakwamba ya sayansi, nyimbo, yakwambula soni yine yejinji.

² Atamose kuti tukwembeceya yindu yamboneyi, nambo tucisangalala mnope ni yindu yausimu. Tucisangalala mnope ligongo pandaŵiji Yehofa caciliswejesya lina lyakwe, soni wosope tucijiticisya kuti jwalakwe ni jwakuŵajilwa kutulamulila. (Mat. 6:9, 10) Tucisangalalasoni kulola lisosa lyaŵakwete Yehofa pandanda  lyakwamba ŵandu soni cilambo capasi lili mkukwanilicikwa. Wosopewe tuciŵaga ŵamlama mwapanandipanandi. Pandaŵiji, yiciŵa yangasawusya kusya unasi wetu ni Yehofa.—Sal. 73:28; Yak. 4:8.

3. Ana apanopano tukusosekwa kosecelaga cici?

³ Tukulupilileje kuti Mlungu cacitupa majali gosopega, pakuŵa Yesu ŵasasile kuti “yindu yosope yili yakomboleka ni Mlungu.” (Mat. 19:25, 26) Nambo naga tukusaka kuti citutame m’cilambo casambano kwangamala, ajino jili ndaŵi jakutenda yindu yakutukamucisya ‘kuwukamula mwamacili’ umi wangamalawo. Tujembeceyeje kuti mbesi ja cilambo cakusakalaci cijiyice pacangakaŵapa, soni tukusosekwa kutanda kosecela apanopano kuti citutame m’cilambo casambano. Nambo ana mpaka tutende catuli yeleyi pakuŵa tukutamape m’cilambo cakusakala?

4. Ana mpaka tutande catuli kosecela kutama m’cilambo casambano? Asale cisyasyo.

⁴ Ana mpaka tukoseceleje catuli kuti citutame m’cilambo casambano? Tuŵanicisye kuti tukulinganya yakusamila m’cilambo cine. Ana mpaka tukosecele kusamaku catuli? Mwine mpaka tutande kulijiganya ciŵeceto soni ndamo sya ŵandu ŵcatuli? . Mpaka tulinjejesoni kulya yakulya ya m’cilamboco. Tugambe kuti mpaka tutande kutenda yindu mpela kuti tuli kala m’cilamboco. Mwakulandana ni yeleyi, apanopano tukusosekwa kutanda kosecela kutama m’cilambo casambano, mwakutenda yindu mpela kuti tujinjile kala m’cilambo casambanoco. Kwende tulole yine mwa yindu yampaka tutendeje patukukosecela.

5, 6. Ana kupikanila yalikusatusalila likuga lya Yehofa apanopano kucitukosecelesya catuli kutama m’cilambo casambano?

⁵ M’cilambo casambano, ŵandu wosope caciŵa pasi pa ulamusi wa Mlungu. Ndaŵiji jiciŵa jambone kwabasi kulekangana ni ndaŵi jatuŵele pasi pa ulamusi wa Satana. Satana ŵalimbikasisye ŵandu kuti atendeje yiliyose yakuyiwona kuŵa yakuŵajilwa kwa jemanjajo. Yeleyi yitendekasisye kuti ŵandu alajeje mnope soni akasangalalaga. (Yer. 10:23) Kusala yisyene, tukwembeceya mwalung’wanu ndaŵi jele ŵandu wosope cacipikanilaga ulamusi wacinonyelo wa Yehofa.

⁶ M’cilambo casambano, tucisangalalaga kupikanila malamusi ga Yehofa patucikamulaga masengo gakusalalisya cilambo capasici, kwiganya ŵacacijimuka kuŵawe, soni kutenda lisosa lyakwe. Nambo wuli naga ali atupele masengo gangatukuganonyela? Ana tucikunda ni kukamula masengogo mwakusangalala? Ŵajinjiwe mpaka tujanje kuti elo. Kuti tukosecele cenene kutama m’cilambo casambano tukusosekwa kutanda apanopano kupikanila yiliyose yalikusatusalila likuga lya Yehofa.

7, 8. (a) Ligongo cici tukusosekwa kusya mtima wakamulana? (b) Ana undumetume wa abale ni alongo ŵane ucenjile catuli? (c) Ana tucitamaga wuli m’cilambo casambano?

⁷ Konjecesya pa kupikanila likuga lya Yehofa, mpaka tukosecelesoni kutama m’cilambo casambano mwakutanda kusya mtima wakwikutila soni kuŵa ŵakamulana ni ŵane. Kamulana ni ŵakusatulongolela moŵa agano, soni kuŵa ŵakusangalala ni undumetume wasambano watupocele, kucitukamucisya kola mtima uwowo m’cilambo casambano. (Aŵalanje Ahebeli 13:17.) M’Cilambo Celagucisye, Ayisalayeli ŵagaŵilaga malo gakuti atameje. (Num. 26:52-56; Yos. 14:1, 2) M’weji ngatukumanyilila malo gacacitupa kuti tutameje m’cilambo casambano. Nambo naga tukusalingalinga kuŵa ŵakamulana apanopano, yicitukamucisya kuŵa ŵakwikutila soni ŵakusangalala patucimtumicilaga Yehofa kulikose kwatucitamaga.

 ⁸ Kuti citutame m’cilambo casambano cakulamuligwa ni Mlungu, tukusosekwa tukamulaneje ni likuga lya Yehofa soni tutendeje undumetume uliwose watupele. Nambo ndaŵi sine, mpaka tucenje undumetume watwatendaga. Mwambone, abale ni alongo ŵane ŵaŵatumicilaga pa Beteli ku United States ŵatumisye kuti akatendeje undumetume wa ndaŵi syosope ku mikuli. Soni ligongo lya ucekulu kapena yakusawusya yine, ŵane ŵaŵatumicilaga mpela ŵakulolela mikuli, ŵacenjile kuti atumicileje mpela apayiniya ŵapajika. Wosopeŵa akusangalala ni maundumetume gawo gasambano, soni Yehofa akwapa majali. Naga tukum’ŵenda Yehofa kuti atukamucisyeje, tukutenda undumetume watupele ni mtima wosope, soni naga tukulingalinga kuŵa ŵakwikutila, tuciŵa ŵakusangalala soni Yehofa catujaliweje atamose mundaŵi jakusawusyaji. (Aŵalanje Miyambo 10:22.) Nambi wuli pakwamba ya yatukwembeceya msogolo? Mwine apanopano mpaka tusacilileje kuti citutame malo ganegakwe m’cilambo casambano, nambo pandaŵijo komboleka kutusalila kuti tukatame malo gane. Cinga tucitamaga kwapi soni kutenda undumetume watuli, tucisangalalagape soni kum’yamicila Yehofa ligongo lyakuti tujinjile m’cilambo casambano.—Neh. 8:10.

9, 10. (a) Ana m’cilambo casambano tucisosekwa kuŵa ŵakuwusimana mtima pa yindu yapi? (b) Ana apanopano mpaka tulosye catuli kuti tuli ŵakuwusimana mtima?

⁹ Ndaŵi sine, m’cilambo casambano tucisosekwaga kuŵa ŵakuwusimana mtima. Mwambone, mwine tucipikana acimjetu ali mkusangalala ligongo lyakuti ŵacinasi ŵawo soni acimjawo ajimwice kuŵawe. Nambope, m’weji tucisosekwaga kulindilila ndaŵi jakuti ŵakunonyelwa ŵetu ajimuce kuŵawe. Naga yeleyi yili yitendekwe, ana tuciwusimana mtima kwineku tuli mkusangalala ni acimjetuwo? (Alo. 12:15) Naga apano tukwembeceya mwakuwusimana mtima kwanilicikwa kwa yilanga ya Mlungu, yicitukamucisya kuti cituŵesoni ŵakuwusimana mtima pandaŵijo.—Mlal. 7:8.

¹⁰ Mpaka tukosecelesoni kutama m’cilambo casambano mwakuŵa ŵakuwusimana mtima naga kapikanicisye ka usyesyene wa m’Baibulo kacenjile. Ana tukusakola lung’wanu lwakuŵalanga ngani jajikusala ya kucengako ni kuŵa ŵakuwusimana mtima naga ngatukupikanicisya? Naga yili m’yoyo nikuti m’cilambo casambano ngasitulaga kuŵa ŵakuwusimana mtima pandaŵi jele Yehofa cacitusalilaga yindu yasambano yakuti tutendeje.—Miy. 4:18; Yoh. 16:12.

11. Ligongo cici tukusosekwa kusya ndamo ja kululucilana, soni ana kutenda yeleyi kucitukamucisya wuli m’cilambo casambano?

¹¹ Ndamo jine jajicitukamucisya kutama cenene m’cilambo casambano jili kululucilana. Mu ulamusi wa Yesu wa yaka 1,000, ulemwa wa ŵandu wosope ucimalaga panandipanandi. (Mase. 24:15) Ana tucitendelanaga yindu mwacinonyelo soni kululucilana? Naga apanopano tukola mtima wakululucilana soni wakamulana ni acimjetu, yiciŵa yangasawusya kwendelecela kutenda yeleyi m’cilambo casambano.—Aŵalanje Akolose 3:12-14.

12. Ligongo cici tukusosekwa kosecela kutama m’cilambo casambano apanopano?

¹² Tukajembeceyaga kuti m’cilambo casambano tucipataga yindu yosope pandaŵi jatukuyisaka. Mmalo mwakwe, tucisosekwa kuŵa ŵakuyamicila soni ŵakwikutila ni mwayiciŵela yindu pandaŵijo, kwineku tuli mkupikanila ulamusi wa Mlungu mwakusangalala. Tucisosekwasoni kulosya ndamo syakutujiganya Yehofa apanopano. M’yoyo naga tukulingalinga kulosya ndamo syelesi apanopano, nikuti tukosecela kutama m’cilambo casambano mwatucilosya ndamo syelesi mpaka  kalakala. Tukusaŵasoni tuli mkulimbisya cikulupi cetu pa yindu yambone yatukwembeceya “m’cilambo cakutama ŵandu cacikwisa.” (Ahe. 2:5; 11:1) Konjecesya pelepa, tukusalosya kuti tukwembeceya mwalung’wanu yindu yacilungamo yayicitendekwa pacilambo capasi. Kusala yisyene, tukosecela kuti citutame kwangamala m’cilambo casambano ca Mlungu.

13. Ana tucisangalalaga mnope kutenda cici m’cilambo casambano?

¹³ Panasoni cindu cine catukusosekwa kutenda patukukosecela kutama m’cilambo casambano. Yili yisyene kuti m’cilambo casambano tucikola yakulya yejinji soni yindu yine yakutukamucisya kuti tusangalaleje, nambo tucisangalalaga mnope ligongo lyakuŵa pa unasi wambone ni Yehofa. (Mat. 5:3) Tucisangalalaga kumtumicila Yehofa mwamtawu. (Sal. 37:4) M’yoyo naga tukusamtumicila Yehofa mwamtawu apanopano, nikuti tukukosecela cenene kutama m’cilambo casambano.—Aŵalanje Matayo 6:19-21.

14. Ana ŵacinyamata mpaka akole yakulinga yatuli pakumtumicila Yehofa?

¹⁴ Ana cici campaka citukamucisye kuti tusangalaleje mnope patukumtumicila Yehofa? Cindu cimo cili kola yakulinga yausimu. Naga wawojo ali jwacinyamata, uli ngaganicisya yakuti akamulicisye masengo umi wawo pakumtumicila Yehofa? Mpaka atende cenene kuwungunya m’mabuku getu yakwamba maundumetume gakulekanganalekangana gagapali m’likuga lya Yehofa ni kusagula umo wakusacilila kuti catende. * Mpaka aŵecetanesoni ni ŵandu ŵaŵele ali mkutenda undumetume wa ndaŵi syosope kwa yaka yejinji. Naga akukamulicisya masengo umi wawo pakutumicila Yehofa apano, calijiganye yindu yejinji yayicakamucisya kumtumicila Yehofa kwangamala m’cilambo casambano.

15. Ana pana yakulinga yausimu yine yapi yampaka tukole?

¹⁵ Pana yakulinga yausimu yejinji yampaka tukole patukumtumicila Yehofa. Mwambone, mpaka tuganicisye ya kongolela mbali sine sya undumetume wetu. Kapena mpaka tulinjelinje kuti tupikanicisye cenene malamusi gakutulongola ga m’Baibulo soni kulijiganya mwampaka tugakamulicisye masengo. Mpaka tulinjelinjesoni kuti tuŵalanjeje cenene, tuŵeceteje cenene ngani soni tujanjeje mwakamula mtima pamisongano. Mwangakayicila, mpaka aganicisyesoni ya yindu yine yejinji yampaka atende.  Kusala yisyene, kola yakulinga yausimu mpaka kutukamucisye konjecesya mtawu wetu mu undumetume wa Mlungu. Kutenda yeleyi kucitukamucisya kuti tukosecele cenene kutama m’cilambo casambano.

16. Ligongo cici kutumicila Yehofa kuli cindu cakusangalasya mnope?

¹⁶ Ana patukamulicisya masengo ndaŵi jetu pakosecela kutama m’cilambo casambano nikuti tukulijima kutama ni umi wambone apanopano? Ngaŵa m’yoyo. Kutumicila Yehofa kuli litala lyambone lyakutukamucisya kuŵa ŵakusangalala. Ngatukusatumicila Yehofa ligongo lyakuti mundu jwine akutukanganicisya kapena pakwamba kusaka kuti citukulupuce pa yisawusyo yakogoya. Nambo Mlungu ŵatupanganyisye m’litala lyakuti tusangalaleje patukumtumicila. Pangali cindu cine cambone mnope kupunda cinonyelo ca Yehofa soni kulongolelegwa ni jwalakwe. (Aŵalanje Salimo 63:1-3.) Apanopano mpaka tutande kusangalala ni majali gausimu gagakusayika ligongo lyakutumicila Yehofa ni mtima wosope. Kusala yisyene, ŵane mwa m’weji aŵele ali mkusangalala ni majaliga kwa ndaŵi jelewu soni mpaka ajiticisye kuti kutumicila Yehofa kuli cindu cakusangalasya mnope.—Sal. 1:1-3; Yes. 58:13, 14.

17. Ana m’cilambo casambano tucisosekwaga kuyiwona catuli yakusangalasya?

¹⁷ M’cilambo casambano tucikolaga ndaŵi jakutenda yindu yakusangalasya soni yine yatukusaka. Yehofa ŵatupanganyisye m’litala lyakuti tusangalaleje. (Mlal. 2:24) Jwalakwe ‘cacikwanilisya cakumbila ca caumi cilicose’ m’matala gejinji. (Sal. 145:16) Yisyene kuti tukusasosekwa kusangalala soni kupumula, nambo tukusasangalala mnope ni yeleyi naga tukulingalinga kuŵika unasi wetu ni Yehofa pamalo gandanda. Yindu yiciŵasoni m’yiyi m’cilambo casambano. M’yoyo, mpaka luŵe lunda kuti tujendelecele kusosasosa candanda Ucimwene soni kuganicisya ya majali gausimu gatukupocela patukutumicila Yehofa.—Mat. 6:33.

18. Ana mpaka tulosye catuli kuti tukukosecela kutama m’cilambo casambano?

¹⁸ M’Paladaiso, umi uciŵa wambone mnope kupunda ni kala kose. Mpaka tulosye kuti tukusacilalila kupata umi usyesyenewo mwakutanda kuwukosecela apanopano. Kwende tulosyeje ndamo syambone syakutujiganya Mlungu soni tukamuleje masengo gakulalicila ya Ucimwene mwamtawu. Tusangalalejesoni pakuŵika yindu yausimu pamalo gandanda paumi wetu. Tukukulupilila kuti Yehofa cacikwanilisya yindu yosope yaŵatulajisye. M’yoyo, kwende tujembeceyeje kuti citutame m’cilambo casambanoco.