Amkulupilileje Yehofa Ndaŵi Syosope
‘Amkulupilileje Mlungu ndaŵi syosope.’—SAL. 62:8.
1-3. Ana cikulupi ca Paulo kwa Yehofa calimbile catuli? (Alole ciwulili cacili kundanda kwa nganiji.)
AKLISTU ŵa ku Loma ŵajimbaga magambo gakuti ŵajocile msindawo mu 64 CE, soni kuti ŵaŵengaga ŵandu ŵane. Ndaŵi jeleji jaliji jakogoya mnope kwa Aklistuwo. Yikaŵe kuti wawojo ŵaliji Mklistu mu ndaŵi jelejo, lisiku lililyose akajogopaga kuti mwine ciŵataŵe kapena kwalagasya. Kombolekasoni kuti Aklistu ŵane ŵapelekaga ku yinyama kuti yalye kapena kwakomela pacitela, soni ŵajocaga moto kuti aŵe yakumulicila cilo.
2 Ndaŵi jakusawusya jeleji ni jaŵamtaŵile kaŵili ndumetume Paulo ku Loma. Ana Aklistu ŵane akamkamucisye Paulo? Komboleka kuti jwalakwe ŵaganisyaga yayamtendecele pa ulendo wandanda, paŵamlembele Timoteyo kuti, “Pinaliji mkulicenjela pamagambo gangu pandanda pala, paliji pangali mundu atamose jumo jwele juŵayice kukungamucisya, wosope ŵagambile kundeka jikape, Mlungu ŵakululucile.” Nambope, Paulo ŵamanyililaga kuti pana jwine jwampaka amkamucisye. Jwalakwe ŵalembile kuti, “Nambo Ambuje ŵaliji pampepe ni une, ni ŵalimbisye mtima.” Yesu ŵampele jwalakwe macili gaŵasosecelaga. Ana maciligo gamkamucisye catuli Paulo? Alole yaŵaŵecete panyuma pakwe, “Nakulupwice mkamwa mwa Lisimba.”
3 Kumbucila kuti Yehofa ŵamkamucisye, kwampele Paulo macili, soni kwamkamucisye kulupilila mnope kuti Yehofa mpaka amkamucisye kupilila yakulingwa yaŵasimene nayo pandaŵijo, soni yine yayaliji mkwisa. Ni ligongo lyakwe jwalakwe ŵaŵecete kuti, “Ambuje tacingulupusyasoni ku cilicose cakusaka [acimmagongo] kundendela cangalumbana.” (2 Tim. 4:18) Paulo ŵamanyililaga kuti atamose ŵandu ali alepele kumkamucisya, nambope Yehofa soni Yesu mpaka amkamucisye.
MAPESA GAKULOSYA KUTI ‘TUKUSAKULUPILILA YEHOFA’
4, 5. (a) Ana ŵani ŵampaka ŵakamucisye ndaŵi syosope? (b) Ana mpaka alimbisye catuli unasi wawo ni Yehofa?
4 Ana pandaŵi jine paŵasimene ni yakusawusya ŵaliweni kuti pangali jwampaka ŵakamucisye? Cinga yaliji kusoŵa kwa masengo, yakusimana nayo ku sukulu, ulwele, kapena yiliyose yakwalagasya nganisyo. Komboleka kuti ŵaŵendile ŵane kuti ŵakamucisye nambo pangali jwaŵakamucisye. Yili yisyene kuti ŵandu ngaŵa mkumasya yakusawusya yine. Pandaŵi mpela syelesi, ana nikuti yajikusasala Baibulo yakuti ‘tumkulupilileje Yehofa’ yikusaŵa yangakamucisya? (Miy. 3:5, 6) Iyayi. Ngani syejinji sya m’Baibulo sikusalosya kuti Mlungu akusakamucisya kwene.
5 Akatenguka naga ŵandu ngakwakamucisya. Nambo mpela muyaŵelele ni Paulo, akusosekwa kuwona kuti lili lipesa lyawo lyakumkulupilila mnope Yehofa ni mtima wosope, soni kuwona mwampaka jwalakwejo ŵakamucisye wawojo. Yeleyi yicilimbisya cikulupi cawo pa Yehofa, soni yicatendekasya kuŵa mjawo jusyesyene.
CIKULUPI CILI CAKUSOSEKWA KUTI TUJENDELECELE KUŴA PAUNASI NI MLUNGU
6. Ligongo cici mpaka yiŵe yakusawusya kumkulupilila Yehofa patusimene ni yakusawusya?
6 Ana pamsalile Yehofa yakusawusya yawo mpaka alipikane kuti ali pamtendele ligongo lyakumanyilila kuti atesile mbali jawo ni kumlecela jwalakwe kuti atendesoni mbali jakwe? Elo, mpaka alipikane m’yoyo. (Aŵalanje Salimo 62:8; 1 Petulo 5:7.) Kumkulupilila mnope Yehofa kuli kwakusosekwa mnope kuti akusye unasi wawo ni jwalakwe. Nambope, kulupilila kuti Yehofa cacakamucisya payakusosecela yosope mpaka kuŵe kwakusawusya. Ligongo cici? Ligongo lyakuti ndaŵi sine Yehofa jwangajanga mapopelo mwacitema.
7. Ligongo cici ndaŵi sine Yehofa jwangajanga mwacitema mapopelo getu?
7 Ligongo cici ndaŵi sine Yehofa ngakusatujanga mwacitema yatuŵendile? Akaliŵalila kuti unasi wetu ni Yehofa uli wakulandana ni unasi wa baba ni mwanagwe. (Sal. 103:13) Mwanace jwangajembeceya kuti acinangolo campe yaŵendile ndaŵi jijojo. Yine yakusaŵenda mwanace yikusaŵa yangasosekwa mnope. Pane nangolo mpaka ajembeceye kaje mpaka pandaŵi jakuŵajilwa. Yine yakusaŵenda mwanace mpaka yiŵe yangakamucisya mnope kwa mwanacejo kapena kwa ŵane. Konjecesya pelepa, naga nangolo akwamba kumpa yaŵendile mwanagwe ndaŵi jijojo, nangolojo mpaka aŵe mpela kapolo. Mwakulandana ni yeleyi, Yehofa akusamanyilila yatukusosecela soni akusamanyilila ndaŵi jambone jakuti ajanje mapopelo getu. Jwalakwe jika ni jwali Mkupanganya jwetu, soni Mtati jwakwinani jwacinonyelo. Kwamba kutupa yiliyose yatuŵendile ndaŵi jijojo, mpaka kusokonase unasi wetu ni jwalakwe.
8. Ana Yehofa akusatusimicisya yatuli pakwamba yampaka tuyikombole kupilila?
8 Ligongo line lili lyakuti Yehofa akusamanyilila yampaka tuyikombole. (Sal. 103:14) M’yoyo, jwalakwe jwangasaka kuti tulimbaneje ni yakulingwa ni macili getugetupe nambo ni cikamucisyo cakwe. Nambope, ndaŵi sine mpaka tulipikane kuti nganitukola cikamucisyo cilicose. Yehofa akusatusimicisya kuti jwalakwe ngaŵa mkunda kuti tulaje mwakupunda macili getu. Nambo ‘cacitulinganyicisya litala lyakuti tukulupucile.’ (Aŵalanje 1 Akolinto 10:13) M’yoyo, yili yakulimbikasya kumanyilila kuti Yehofa akusamanyilila yindu yampaka tuyikombole kupilila.
9. Ana ngatukusosekwa kutenda cici naga tukuwona kuti Yehofa ngakutujanga mwacitema mapopelo getu?
9 Naga tukuwona kuti Yehofa ngakutujanga mwacitema mapopelo, ngatukusosekwa kwasa mtima. Tukaliŵalila kuti jwalakwe akusajembeceya mwakuwusimana mtima mpaka ndaŵi jambone jakuti atukamucisye. ‘Yehofa akusaka nditu kuti ŵasalalile mtima. Ali cile kuti ŵatendele canasa, ligongo Yehofa ali Mlungu jwacilungamo. Wosope ŵakusakulupilila jwalakwe akwete upile.’
“MKAMWA MWA LISIMBA”
10-12. (a) Ligongo cici Mklistu jwakusamalila mlongo mjakwe jwakulwala ulwele wakogoya mpaka yimsawusye kulupilila Yehofa? (b) Ana kumkulupilila Yehofa pandaŵi jakusawusya mpaka kukwaye catuli unasi wetu ni jwalakwe? Alondesye.
10 Pasimene ni yipwetesi mpaka aliwone kuti ali “mkamwa mwa Lisimba” kapena asigele panandi kuŵamo. Amu ni muŵapikanilesoni Paulo. Pandaŵi mpela jeleji kumkulupilila Yehofa kukusaŵa kwakusawusya nambo kuli kwakusosekwa mnope. Mwambone, awanicisye kuti akusamalila mlongo mjawo jwakulwala ulwele wakogoya mnope. Tujile kuti aŵele ali mkupopela kuti Mlungu ŵape lunda, soni macili. * Ali atesile yosope yampaka akombole, ana ngakusalipikana kuti ali pamtendele pakumanyilila kuti Yehofa akwawona soni ciŵakamucisye kupilila yeleyo?
11 Ndaŵi sine mpaka aliwone kuti Yehofa ngakwakamucisya. Mwine madokotala mpaka ŵasalile yindu yakwasokonasya. Kapena acalongo acimjawo ŵaŵawonaga kuti ciŵakamucisye mpaka atende yindu yakwasokonasya. Pandaŵi mpela jeleji akusosekwa kwegamila mnope kwa Yehofa kuti ŵape macili. Ajendelecele kum’ŵandicila. (Aŵalanje 1 Samueli 30:3, 6) Papatile cikamucisyo, unasi wawo ni jwalakwe ucilimba mnope.
12 Mlongo jwine lina lyakwe Linda, * ŵasimene ni yakulandana ni yeleyi. Kwa yaka yejinji, jwalakwe ŵasamalilaga acinangolo ŵakwe ŵaŵalwalaga ŵele kaneko ŵajasice. Jwalakwe ŵasasile kuti, “Pitwasamalilaga acinangolowo, une, ŵamkwangu, soni mlumbu gwangu twasoŵaga cakutenda. Ndaŵi sine twaliwonaga kuti pangali campaka citukamucisye. Nambope apano, tukuwona kuti Yehofa ŵaliji ni m’weji. Jwalakwe ŵatupaga macili, soni yakusosecela yetu, atamose pandaŵi jatwasoŵaga citela cakamula.”
13. Ana kulupilila Yehofa kwamkamucisye catuli mlongo jwine kupilila yakusawusya yaŵasimene nayo?
13 Kumkulupilila Yehofa ni umi wetu wosope mpaka kutukamucisye kupilila patusimene ni yakusawusya yangayijembeceya. Aganicisye yayamtendecele mlongo jwine lina lyakwe Rhonda. Ŵamkwakwe ŵanganaŵa ŵa Mboni ŵasakaga kuti ulombela wawo umale. Pandaŵi jijojo, mlumbugwe ŵamsimene ni ulwele wakogoya mnope. Pali papite miyesi jakuŵalanjika mlumbugwejo ŵamkwakwe ŵajasice. Nambo Rhonda piŵatandite kuwona kuti yakusawusya yakweyi yikumala jwalakwe ŵatandite upayiniya wakutamilicika. Pali papite kandaŵi kamnono mamagwe ŵajasicesoni. Cici cicamkamucisye Rhonda kupilila yosopeyi? Jwalakwe ŵatite, “Naŵecetanaga ni Yehofa lisiku lililyose atamose payakusagula yangu yamwanamwana. Kutenda yeleyi kwangamucisye kum’wona Yehofa mpela mjangu jusyesyene. Yangamucisyesoni kwegamila mnope kwa Yehofa m’malo mwakulijegamila namsyene kapena kwa ŵandu ŵane. Jwalakwe ŵambaga yosope yanasakaga. Ligongo lya yeleyi, nguliwona kuti ngukamulana mnope ni Yehofa.”
Atamose muliŵasa mpaka mutendekwe yindu yampaka yisokonasye unasi wetu ni Yehofa (Alole ndime 14-16)
14. Ana Mklistu jwakulupicika jwele mlongo mjakwe ŵamtyosisye mumpingo mpaka aŵe ni cikulupi catuli?
14 Aganicisyesoni ya cakusawusya cine. Awanicisye kuti mlongo mjawo amtyosisye mumpingo. Wawojo akumanyilila yajikusasala Baibulo pakwamba ya kamulana ni ŵandu ŵaŵatyosisye mumpingo. (1 Akoli. 5:11; 2 Yoh. 10) Nambo, ligongo lyakuti akusamnonyela mnope mundujo mpaka ayiwone kuti yili yakusawusya kapena ngakomboleka kwene kuya lilamusi lya m’Baibulo lyakwamba ŵandu ŵaŵatyosisye mumpingo. * Ana mpaka akulupilile kuti Atati ŵawo ŵakwinani cacakamucisya kuŵa ŵakulimba mtima pakuya lilamusi lya m’Baibulo lyakwamba ŵandu ŵaŵatyosisye mumpingo? Ana akuwona kuti pandaŵi mpela jeleji mpaka apate lipesa lyakulimbisya unasi wawo ni Yehofa?
15. Ligongo cici Adamu nganapikanila lilamusi lya Yehofa?
15 Ngani jakwamba kamulana ni acalongo acimjetu ŵaŵatyosisye mumpingo jili jakulandana ni yaŵatesile Adamu. Ana jwalakwe ŵakulupililaga yisyene kuti komboleka kuŵape ni umi nambo ali ngakumpikanila Yehofa? Iyayi. Ligongo malemba gakusatusalila kuti Adamu ‘nganalambusidwa.’ (1 Tim. 2:14) Ni ligongo cici jwalakwe nganampikanila Mlungu? Komboleka kuti Adamu ŵalile cisogosi caŵampele Hawa ligongo lyakuti ŵamnonyelaga mnope. Jwalakwe ŵapikanile ŵamkwakwe mmalo mwakumpikanila Mlungu jwakwe, Yehofa.
16. Ana ŵani jwatukusosekwa kumnonyela mnope soni ligongo cici?
16 Ana yeleyi yikulosya kuti ngatukusosekwa kwanonyela acalongo acimjetu? Iyayi. Nambo tukusosekwa kumnonyela mnope Yehofa. (Aŵalanje Matayo 22:37, 38) Soni naga tukumnonyela mnope Yehofa yicakamucisya mnope acalongo acimjetuwo, cinga ali ŵakutumicila Yehofa kapena iyayi. M’yoyo, tukusosekwa kulimbisya cinonyelo soni cikulupi cetu pa Yehofa. Nambo naga yikwasawusya kuleka kamulana ni mundu jwaŵamtyosisye mumpingo akusosekwa kumsalila yeleyo Yehofa mwipopelo. * (Alo. 12:12; Afi. 4:6, 7) Kuleka kamulana ni ŵaŵatyosisye mpaka kuŵe kwakupweteka, nambo akusosekwa kuwuwona welewu kuŵa upile wakulimbisya unasi wawo ni Yehofa. Yeleyi yicakamucisya kwegamila kwa Yehofa ligongo jwalakwe akusatusosela yindu yambone.
YAMPAKA TUTENDEJE PATUKWEMBECEYA
Alosye kuti akusamkulupilila Yehofa pakamula masengo gakulalicila mwamtawu (Alole ndime 17)
17. Ana tukusalosya catuli kuti tukulupilila Yehofa patukamula masengo gakulalicila mwakulipeleka?
17 Ana ligongo cici Mlungu ŵamkulupwisye Paulo “mkamwa mwa lisimba”? Jwalakwe ŵatite, “Kuti lalicile maloŵe gosope ga ngani syambone, kuti ŵandu ŵamitundu jine agapikane.” (2 Tim. 4:17) M’wejisoni mpela Paulo, tukusosekwa kuŵa ŵamtawu pamasengo gakulalicila. Tukusosekwasoni kulupilila kuti Yehofa ‘cacitupa’ yatukusosecela. (Mat. 6:33) Mpela ŵakulalicila ya Ucimwene, Yehofa “ŵatujiticisye ni kutukulupilila kuti tulalicile ngani syambone,” soni jwalakwejo akusatuwona mpela ‘ŵamasengo acimjakwe.’ (1 Ates. 2:4; 1 Akoli. 3:9) Naga tukamula masengo gakulalicilaga mwakulipeleka, ngasituwona kuti Yehofa akokoŵa kwanga mapopelo getu.
18. Ana yindu yapi yampaka yitukamucisye kulimbisya cikulupi, soni unasi wetu ni Yehofa?
18 Kwende tukamulicisye masengo ndaŵi jajipaliji pakulimbisya unasi wetu ni Mlungu. Naga tusimene ni yindu yakutulagasya nganisyo, kwende tuyiwone kuŵa upile wakum’ŵandicila Yehofa. Kulijiganya Maloŵe ga Mlungu, kupopela ndaŵi syosope, soni kutenda nawo mwamtawu masengo ga mulikuga, yicitukamucisya kulupilila kuti Yehofa mpaka atukamucisye kupilila yakusawusya yatukusimana nayo.
^ ndime 2 Komboleka kuti Paulo ŵakulupwice “mkamwa mwa Lisimba” lisyesyene kapena ku yindu yakogoya.
^ ndime 10 Ngani syakamucisya Aklistu kupilila ulwele soni syakwakamucisya ŵakusamalila ŵakulwala siŵele sili mkukopoka m’magasini getu. Alole magasini ga Galamukani! ga, February 8, 1994; February 8, 1997; June 8, 2000; ni February 8, 2001.
^ ndime 12 Mena tugacenjile.
^ ndime 14 Alole ngani jakuti ““Ligongo Cici Kumtyosya Mundu Mumpingo Kuli Kwakamucisya?” M’magasini ajino.
^ ndime 16 Ngani syakamucisya ŵandu ŵamwiŵasa ŵakulupicika pakutenda yindu ni acalongo acimjawo ŵaŵamlesile Yehofa siŵele sili mkukopoka m’magasini getu. Alole Sanja ja Mlonda ja September 1, 2006 mapeji 17-21, ni ja January 15, 2007 mapeji 17-20.
