Napagwile mu msinda wa Székesfehérvár, m’cilambo ca Hungary. Msindawu ukwete mbili ja yindu yayaŵele mkutendekwa kutandila yaka 1,000 yipiteyo. Ngusakumbucila yindu yakutesya canasa yayatendekwe pa ngondo jaŵili japacilambo cosope.

Anganga ŵangu ni ŵaŵalelite pinaliji mwanace. Ngusakumbucila muŵanonyelelaga, mnopemnope anganga ŵangu ŵakongwe a Elisabeth. Ŵalakwewo ŵanjiganyisye yindu yejinji yayangamucisye kumkulupilila mnope Mlungu. Pinaliji ni yaka yitatu, ligulo lililyose twawilisyaga lipopelo lyakolanjikwa kuti Lipopelo lya Ambuje. Atamose kuti twatendega yeleyi, nambope yasawusyaga kupikanicisya lipopelolyo mpaka pinayice yaka ya m’ma 20.

Natamaga ni anganga ligongo lyakuti acinangolo ŵangu ŵakamulaga masengo mnope ni cakulinga cakuti apate mbiya syakwanila kusuma nyumba jambone. Nambo Lyakuŵeluka lyaŵili lililyose lya mwesi, liŵasa lyetu lyosope lyalilaga cakulya pamo. Ndaŵi jelejo jasangalasyaga mnope.

Mu 1958, acinangolo ŵangu ŵasumile nyumba jaŵasakagajo. Nasamile kwa anganga kula ni kuja kutama ni baba soni mama. Nasangalele mnope. Nambo pali papite miyesi msano ni umo, patendekwe cindu cakutesya canasa mnope. Baba ŵangu ŵawile ni ulwele wa kansa.

Yeleyi yandengwisye mnope. Ngukumbucila ndili mkupolela kuti, “Mlungu, naŵendile kuti ŵakulupusye baba ŵangu. Nasakaga mnope. Ligongo cici nganajanga mapopelo gangu?” Nasacililaga mnope kumanyilila kwaŵaliji baba ŵangu. Naliwusyaga kuti, ‘Ana nikuti ajawile kwinani? Kapena ngasapagwasoni mpaka kalakala?’ Natendelaga wiwu ŵanace ŵaŵakwete baba ŵawo.

Kwa yaka yejinji, ciŵandika lisiku lililyose najawulaga kumalembe kwaŵasicile baba ŵanguwo. Natindiŵalaga pamtumbila ni kupolelaga kuti, “Mlungu, ngusaka kumanyilila kwakuli baba ŵangu.” Napopelagasoni kuti manyilile cakulinga ca umi.

Pinakwete yaka 13, natandite kulijiganya ciŵeceto ca Cijelemani. Naganisyaga kuti mwine cimbate kwanga kwa yiwusyo  yanguyo m’mabuku ga Cijelemani ligongo lyakuti gapali gejinji. Mu 1967, natandite kulijiganya mu msinda wa Jena, wawaliji cakungopoko lyuŵa m’cilambo ca Germany. Naŵalangaga mnope mabuku gaŵalembile ŵandu ŵalunda ŵa ku Germany, mnopemnope gakusala ligongo lyakwe ŵandu ŵapali. Atamose kuti m’mabukuga napatagamo yindu yine yakusangalasya, nambope nganigangamulaga mtima. Napopelagape kuti mbate kwanga kwa yiwusyo yangu.

Mu 1970, nawujile ku Hungary, kunacingagene ni jwamkongwe jwanamsacile kuti aŵe ŵamkwangu, lina lyakwe Rose. Pandaŵiji, cilambo ca Hungary caliji pasi pa ulamusi wacikomyunisimu. Tuli tugambile kulombana kwene, twajile kutama ku Austria, ni cakulinga cakuti kaneko tusamile kwa mjomba ŵangu mu msinda wa Sydney ku Australia.

Kaneko napatile masengo ku Austria. Lisiku line, mjangu junakamulaga najo masengo ŵasalile kuti mpaka mbate kwanga kwa yiwusyo yangu yosope m’Baibulo. Jwalakwe ŵambele mabuku gakutagulila ya m’Baibulo. Naŵalalisile mabukugo mwakwanguya soni nasacililaga kulijiganya yejinji. Kaneko nalembele cikalata ŵa Mboni sya Yehofa, kuti andumicisye mabuku gane.

Palisiku lyatwakumbucilaga kuti tumasile caka cimo tuli mwiŵasa, kwayice mnyamata Jwamboni. Jwalakwe ŵayice ni mabuku ganaŵendile gala soni ŵasalile yakuti mpaka tutande kulijiganya Baibulo, ni nakundile. Ligongo lyakuti nasacililaga mnope kulijiganya, cijuma cilicose twalijiganyaga kaŵili. Twalijiganyaga kwa ma awala mcece palisiku!

Nasangalalaga mnope ni yaŵanjiganyaga Ŵamboni yakutyocela m’Baibulo. Paŵalosisye lina lya Mlungu m’Baibulo jangu ja Cihangaliya, nganingulupilila. Kwa yaka 27 yanaŵele mkwawula ku calici, nganimbikanejeko ya lina lya Mlungu atamose kamo. Nasangalele ni kwanga kwa yiwusyo kwakupikanika cenene kwa Baibulo. Mwambone, nalijiganyisye kuti ŵawe ŵangamanyilila cilicose, akusaŵa mpela agonile lugono lwakuwa nalyo. (Mlaliki 9:5, 10; Yohane 11:11-15) Nalijiganyisyesoni ya cilanga cakusimanikwa m’Baibulo cakwamba ya cilambo casambano mwele ‘ngasimupagwa ciwa.’ (Ciunukuko 21:3, 4) Ngwembeceya kwawonasoni baba ŵangu, ligongo m’cilambo casambanoco ‘ŵandu wosope cacijimuka kuŵawe.’—Masengo 24:15.

Ŵamkwangu nombenawo ŵalijiganyaga nawo Baibulo mwakulipeleka. Twajawile paujo mwakwanguya, mwati twamalisisye buku jakulijiganya pali papite miyesi jiŵilipe. Twatendega nawo misongano josope jakusatenda Ŵamboni mu Nyumba ja Ucimwene. Twasangalalaga ni cinonyelo, cikamucisyo soni mkamulano wawuli pasikati pa Mboni sya Yehofa.—Yohane 13:34, 35.

Mu 1976, une ni ŵamkwangu Rose twajawile ku Australia. Tuli tugambile kwika kwene twasosilesosile ŵa Mboni sya Yehofa. Tuli twapatile ŵatupocele ni magasa gaŵili. Twabatiswe mu 1978.

Mbatile kwanga kwa yiwusyo yayiŵele yili mkundagasya nganisyo kwandaŵi jelewu. Ligongo lyakum’ŵandicila Yehofa Mlungu, mbatile Atati ŵambone mnope. (Yakobo 4:8) Soni ngwete cembeceyo cakwawonasoni baba ŵangu ŵakumbeleka m’cilambo capasi casambano.—Yohane 5:28, 29.

Mu 1989, une ni ŵamkwangu twawujile ku Hungary ni cakulinga cakuti tukasalile yikulupi yetu acanasi ŵetu, acimjetu soni ŵane ŵampaka tucingangane nawo. Tuŵele tuli mkwajiganya Baibulo ŵandu ŵajinji. Ŵandu ŵakupunda 70 mwa ŵeleŵa kupwatikapo mama ŵangu, akutumicila Yehofa pampepe ni m’weji.

Napopesile kwa yaka 17 kuti mbate kwanga kwa yiwusyo yangu. Sano papite yaka yine yakwana 39 ndili mkupopelape, nambo ndema ajino ngupopelaga kuti, “Sikomo kwejinji Atati ŵangu ŵakwinani, ligongo lyakwanga mapopelo gangu ganapopelaga ndili mwanace.”