1. Ana Mose jwalosisye chamti uli kuti jwamkulupililaga Yehofa paŵalongolele Ayisalayeli kuti atyoche ku Iguputo?

 BUKU ja Ahebeli jikusatusalila ya ŵandu ŵajinji ŵaŵamkulupililaga mnope Yehofa. Jwine mwa ŵanduŵa ali Mose. (Aheb. 3:​2-5; 11:​23-25) Jwalakwe jwalosisye chikulupi paŵalongolele Ayisalayeli kuti atyoche ku Iguputo. Jwalakwe nganakunda kuti amjogope Falao soni asilikali ŵakwe. Mose jwamkulupililaga mnope Yehofa mwamti jwalongolele Ayisalayeli mpaka ku Nyasa Jechejewu soni mpaka kuja kwika ku chipululu. (Aheb. 11:​27-29) Ayisalayeli ŵajinji ŵatandite kukayichila naga Yehofa chiŵapeje yindu yakusosechela paumi wawo. Atamose yaliji myoyo, Mose jwapitilisye kumkulupilila Mlungu jwakwe. Yehofa nganamtengusya Mose, jwalakwe ŵapele Ayisalayeli yakulya soni mesi kuti apitilisye kuŵa chijumi mu chipululu chakusawusya chila. a—Eks. 15:​22-25; Sal. 78:​23-25.

2. Ligongo chichi Mlungu ŵamwusisye Mose kuti, “Ana mkono wa Yehofa uli wejipi?” (Numeli 11:​21-23)

² Yili yisyene kuti Mose jwakwete chikulupi chakulimba. Nambope pali pagambile kumala chaka chimo Yehofa ali ŵakulupwisye Ayisalayeli ku Iguputo, Mose jwamwusisye Yehofa naga chachikwanilisya yakwapa nyama jemanjajo. Mose jwayiwonaga kuti yili yangakomboleka kuti Yehofa ŵape nyama jakuti alye ŵandu ŵajinji ŵaŵaliji m’chipululumo. Nambo pakwanga Yehofa ŵamwusisye Mose kuti, “Ana mkono wa Yehofa uli wejipi?” (Aŵalanje Numeli 11:​21-23.) Pelepa maloŵe gakuti “mkono wa Yehofa” gakugopolela msimu weswela wa Mlungu, kapena machili gakwe gakutendela yindu. Myoyo yaliji mpela Yehofa akumwusya Mose kuti, ‘Ana yisyene mkuganisya kuti nganimba ngombwele kutenda yindu yanamsalile kuti chinjimtendela jemanja?’

3. Ana tukulijiganya chichi pa yindu yayamtendechele Mose ni Ayisalayeli?

³ Ana pakwete pakayichile naga Yehofa chiŵapeje wawojo yakusosechela paumi wawo soni ya ŵandu ŵamwiŵasa mwawo? Munganiji  chitukambilane ligongo lyakwe Mose soni Ayisalayeli ŵalepele kukulupilila kuti Yehofa mpaka ŵape yindu yaŵasosechelaga. Malemba gachitukambilane munganiji, chigatukamuchisye kuti tukulupilileje kuti mkono wa Yehofa nganiwuŵa wejipi.

YATUKULIJIGANYA KWA MOSE SONI AYISALAYELI

4. Ligongo chichi Ayisalayeli ŵajinji ŵatandite kukayichila yakuti Yehofa chiŵapeje yakusosechela ya paumi wawo?

⁴ Ligongo chichi Ayisalayeli ŵajinji ŵakayichilaga yakuti Yehofa chiŵapeje yakusosechela paumi? Jemanjaji yimpepe ni “gulu ja ŵandu ŵakulekanganalekangana” ŵele nganaŵa Ayisalayeli, ŵatemi mu chipululu kwa ndaŵi jelewu paŵatyokaga ku Iguputo kwawula ku chilambo chele Mlungu ŵasalile kuti chachapa. (Eks. 12:38; Deut. 8:15) Ŵandu ŵele nganaŵa Ayisalayeli ŵapesile ni kulya mana mwamti Ayisalayeli nombenawo ŵapesile nago. Myoyo wosopeŵa ŵatandite kudandawula kwa Mose. (Num. 11:​4-6) Jemanjaji ŵatandite kukumbila yakulya yaŵayilesile ku Iguputo. Ligongo lyakuti ŵanduŵa ŵamkanganikaga mnope Mose, jwalakwe jwatandite kuganisya kuti akusosekwa kwapa nyama nambo nganamanyililaga kwampaka akajipate.—Num. 11:​13, 14.

5-6. Ana tukulijiganya chichi pa yindu yaŵatesile ŵandu ŵamitundu jine pakwatendekasya Ayisalayeli ŵajinji kuti akakola mtima wakuyamichila?

⁵ Ŵandu ŵele nganaŵa Ayisalayeli nganayamichilaga yindu yambone yaŵatendelaga Yehofa, mwamti Ayisalayeli ŵajigalile kamtima keleka. Yeleyisoni mpaka yitutendechele m’weji. Mpaka tutande kujigalila msimu wangayamichila wakusalosya ŵandu ŵane nikutanda kuyiwona kuti yakutupa Yehofa ngayikukwanila. Yeleyi mpaka yitendekwe naga tukuganichisya mnope yindu yatwakwete pandanda kapena naga tukwatendela jelasi ŵane ligongo lya yindu yakwete. Nambo kuti tuŵeje ŵakusangalala, tukusosekwa kuti tujikutileje ni yindu yatukwete chinga yili yamnono kapena yejinji.

⁶ Ayisalayeli ŵasosekwaga kukumbuchila kuti Mlungu jwasimichisye kuti chachapa yindu yejinji yakuchilu. Nambotu yeleyi ngamkaniyitendekwa paŵaliji m’chipululu, nambo yaliji yakuti yichitendekwa m’chilambo chiŵasalile kuti chachapa. Mwakulandanamo, m’wejisoni tukusosekwa kuŵambala kuganichisya mnope yindu yele nganitukola apano. Nambo mmalomwakwe tuganichisyeje ya yindu yambone yasasile Mlungu kuti chachitupa m’chilambo chasambano. Tukusosekwasoni kuti tuganichisyeje ya malemba gampaka gatukamuchisye kuti tumkulupilileje mnope Yehofa.

7. Ligongo chichi ngatukusosekwa kayichila mfundo jakuti mkono wa Yehofa nganiwuŵa wejipi?

⁷ Komboleka akusimonga soni akuliwusya kuti ligongo chichi Mlungu ŵamwusisye Mose kuti, “Ana mkono wa Yehofa uli wejipi?” Yehofa paŵamwusisye Mose chiwusyochi jwasakaga kuti jwalakwe aganichisye yindu yiŵili ayi: (1) Machili gakwe gali gangali malile. (2) Jwalakwe mpaka akamulichisye masengo machili gakwe pakumkamuchisya mundu kulikose kwali. Mwamti yaliji yakomboleka kuti Yehofa ŵape Ayisalayeli nyama jejinji atamose kuti ŵaliji mchipululu. Pakamulichisya masengo ‘yala yakwe yamachili ni mkono wakutambasukuka,’ Mlungu ŵalosisye kuti mpaka ŵakamuchisye jemanjaji kulikose kwaŵaliji. (Sal. 136:​11, 12) Myoyo patukusimana ni yakusawusya, tukakayichilaga kuti jwalakwe mpaka atukamuchisye ni mkono wakwe.—Sal. 138:​6, 7.

8. Ana mpaka tuŵambale chamti uli kutenda yindu mpela yaŵatesile Ayisalayeli paŵaliji mchipululu? (Alolesoni chiwulili.)

⁸ Kaneko Yehofa jwapele Ayisalayeli nyama. Jwalakwe jwatumichisye yiwuti yejinji. Nambope jemanjaji nganamyamichila Yehofa ligongo lyakwapa nyamaji mmalomwakwe ŵalosisye mtima wakutunduka. Jemanjaji ŵakamwile yiwuti yejinji kwa lisiku limo ni hafu. Ligongo lya yeleyi, Yehofa jwatumbilile mnope “ŵandu ŵaŵalosisye mtima wakutunduka” mwamti ŵapele chilango. (Num. 11:​31-34) Ana tukulijiganya chichi pa  yindu yaŵatesile Ayisalayeliyi? Tukusosekwa kuŵa ŵakusamala kuti tukakola mtima wakutunduka. Chinga tuli ŵakusichila kapena ŵakulaga tukusosekwa kusunga ‘chipanje chetu kwinani.’ Mpaka tutende yeleyi mwakuŵa paunasi wambone ni Yehofa soni Yesu. (Mat. 6:​19, 20; Luk. 16:9) Naga tukutenda yeleyi ngatukusosekwa kayichila yakuti Yehofa chachitupa yindu yatukusosechela.

9. Ana tukusosekwa kuŵa ŵakusimichisya kuti Mlungu chachitutendela chichi?

⁹ Yehofa ali jwakoseka kwakamuchisya ŵandu ŵakwe masiku agano. Nambope, yeleyi ngayikugopolela kuti ngatulagaga ni sala soni kuti chitugambeje kupata chilichose chatukusaka. b Atamose yili myoyo, tumanyilileje kuti Yehofa nganaŵa atulesile. Jwalakwe chachipitilisya kutupa machili soni kutukamuchisya patukusimana ni yakusawusya. Kwende sambano tukambilane yakutendekwa yiŵili yampaka tusosekwe kukulupilila kuti Yehofa chachitambasukula mkono wakwe ni kutupa yindu yatukusosechela. Yakutendekwa yakwe yili (1) patukulaga kuti tupate mbiya, soni (2) patukudandawula naga tuchikola mbiya syakwanila patuchikalambala.

PATUKULAGA KUTI TUPATE MBIYA

10. Pangani ja mbiya, ana mpaka tusimane ni yakusawusya yapi?

¹⁰ Mbesi pajikuŵandichila mnope tujembecheyeje kuti chitulajeje kuti tupate mbiya. Yindu mpela yachiwawa, ngondo, ngosi syachilengedwe soni milili mpaka yitendekasye kuti yindu yikwele mitengo, masengo gatumalile soni pane mpaka tusosekwe kusama kudela jatukutama. Patutilile  kudela jine, mpaka tusosekwe kupata masengo gane kapena mpaka tuganisyeje yakusamila dela jinesoni kuti tukakomboleje kulisamalila liŵasa lyetu. Ana ni chichi champaka chitukamuchisye kuti tusagule yindu yampaka yilosye kuti tukusamdalila mnope Yehofa?

11. Ana chichi champaka chakamuchisye pakulaga kupata mbiya syakwanila? (Luka 12:​29-31)

¹¹ Chindu chakusosekwa mnope champaka atende chili kumsalila Yehofa yakusawusya yawo. (Mis. 16:3) Amŵendeje jwalakwe kuti ŵape lunda ni chakulinga chakuti asaguleje yindu mwalunda soni kuti mtima wawo uŵe mmalo kuti ‘aleche kulaga mnope nganisyo’ ni yindu yakusimana nayo. (Aŵalanje Luka 12:​29-31.) Amŵendeje kuti ŵakamuchisye kuŵa ŵakwikutila ni yindu yakwete pandaŵijo. (1 Tim. 6:​7, 8) Awungunyeje m’mabuku getu kuti amanyilileje yampaka atende pakulaga kuti apateje mbiya. Ŵajinji ayiweni kuti mafidiyo soni ngani syakusala ya kusoŵa kwa mbiya syasili pa jw.org yakamuchisye pandaŵi jakulepela kupata mbiya syakwanila.

12. Ana ni yiwusyo yapi yampaka yimkamuchisye Mklistu kusagula yindu yampaka yikamuchisye liŵasa lyakwe?

¹² Ŵajinji ajitichisye kukamula masengo gakwatendekasya kuti atameje mwakutalikangana ni liŵasa lyawo. Nambope ŵane ayikopochele kuti kutenda yeleyi nganikuŵa kwambone. Mkanajitichisye masengo galigose, aganichisyeje kaje naga chigapeje mpata wakumtumichila Yehofa mmalo mwagamba kuganichisya ya mbiya syampaka apate. (Luk. 14:28) Aliwusyeje kuti, ‘Naga ngutalikangana mnope ni ŵamkwangu, ana liŵasa lyangu chilisimaneje ni yamti uli? Naga ngusama, ana chingomboleje kulalichila, kusimanikwa pamisongano soni kunguluka ni Aklistu achimjangu?’ Naga akwete ŵanache mpaka atendesoni chenene kuliwusya chiwusyo chakusosekwa mnope achi, ‘Ana chingomboleje “kwajamuka soni kwajiganya [ŵanache ŵangu] yakwamba Yehofa” ndili mkutama kudela jine?’ (Aef. 6:4) Pakusagula yakutenda pangani jeleji, akuyeje yakusasaka Yehofa mmalo mwakukuya yampaka ŵasalile ŵachibale ŵawo soni achimjawo ŵangatumichila Mlungu. c Tony, jwakusatama ku western Asia, jwakolaga upile wakuti akakamule masengo ku chilambo chine. Nambo ali ajipopelele nganiji soni kukambilana ni ŵamkwakwe, ŵaganisisye yakuti akasama. Myoyo ŵakamulene yakuti anandiye yindu yine yakusasumaga kuti akajonangaga mbiya syejinji. Tony jwatite, “Ngwete upile wakwakamuchisya ŵandu ŵajinji kummanyilila Yehofa soni ŵanache ŵetu akusanonyela mnope yayili yisyesyene. Twalijiganyisye kuti naga tukukamulichisya masengo yayili pa Mateyu 6:​33, nikuti Yehofa chapitilisye kutupa yindu yatukusosechela.”

KUGANICHISYA MWATUCHIPATILAGA MBIYA MSOGOLO

13. Ana mpaka tutendeje chichi kuti chitukole mbiya syakwanila pandaŵi jatuchikalambala?

¹³ Kumdalila kwetu Yehofa mpaka kulinjidwe patukuganichisya yatuchitenda pandaŵi jatuchikalambala. Baibulo jikusatulimbikasya kuti tukamuleje masengo mwakulimbichila ni chakulinga chakuti tukole mbiya syakwanila syampaka situkamuchisye kusogolo. (Mis. 6:​6-11) Naga mpaka tukombole mpaka tutendeje chenene kusunga mbiya sine kuti chitukamulichisye masengo msogolo. Tumanyilileje kuti mbiya mpaka situkamuchisye yindu payitutinile. (Jwak. 7:12) Atamose yili myoyo, tuŵambaleje kusiwona mbiya kuŵa syakusosekwa mnope paumi wetu.

14. Ligongo chichi tukusosekwa kuganichisya yayili pa Ahebeli 13:5 pandaŵi jatukuganichisya naga tuchikola mbiya syakwanila patuchikalambalapo?

¹⁴ Yesu jwasasile ngani jinejakwe jakulosya kuti mundu akusaŵa jwakuloŵela naga akusanonyela mnope kusosasosa chipanje nambo yili mkuti “nganaŵa jwakusichila kwa Mlungu.” (Luk. 12:​16-21) Pangali jwakusamanyilila yampaka tusimane nayo malaŵi. (Mis. 23:​4, 5; Yak. 4:​13-15) Pakuŵapo tuli ŵakumkuya ŵa Klistu tujembecheyeje kuti chitusimaneje ni yakusawusya paumi  wetu. Sonitu Yesu jwasasile kuti ‘tukusosekwa kuleka yindu yetu’ kuti tuŵe ŵakulijiganya ŵakwe. (Luk. 14:33) Yeleyitu ni yayatendechele Aklistu ŵa ku Yudeya mundaŵi ja ŵandumetume. Jemanjaji ŵaliji ŵakusangalala soni ŵakoseka kuleka yindu yawo yosope. (Aheb. 10:34) Masiku aganosoni, abale ŵetu ŵajinji masengo gamalile soni asumulidwe katundu jwawo ligongo lyakana kwinjilila nawo yandale. (Chiw. 13:​16, 17) Nambo ana ni yindu yapi yayakamuchisye jemanjaji? Akusakulupilila mnope yaŵasasile Yehofa kuti, “Une ngasinamleka, soni ngasinamjasa ata panandi.” (Aŵalanje Ahebeli 13:5.) Myoyo mpaka tutendeje chenene kusungaga mbiya syakuti chisitukamuchisye patuchikalambalapo. Nambope chakusosekwa mnope chili kumdalila mnope Yehofa kuti chachipitilisya kutukamuchisya patuchisimana ni yindu yakuti nganituyijembecheyaga.

15. Ana achinangolo akusosekwa ŵawoneje chamti uli ŵanache ŵawo? (Alolesoni chiwulili.)

¹⁵ M’madela gane, maŵasa gakusakola ŵanache ni chakulinga chakuti ŵanachewo chapateje mbiya syakwakamuchisya achinangolo ŵawo pachachikalambalapo. Pelepatu achinangoloŵa akusiŵawona ŵanache ŵawo kuŵa mpela pakupatila mbiya. Nambotu Baibulo jikusatusalila kuti achinangolo ni ŵakusosekwa kwasamalila ŵanache ŵawo. (2 Akoli. 12:14) Yili yisyene kuti achinangolo pakalambele mpaka asosekwe chikamuchisyo  kutyochela kwa ŵanache ŵawo mwakwapa mbiya soni yindu yine. Mwamti ŵanache ŵajinji akusaŵa ŵakusangalala kutenda yeleyi. (1 Tim. 5:4) Nambope achinangolo ŵakusamkulupilila Yehofa akusaŵa ŵakusangalala kwakamuchisya ŵanache ŵawo kuti chamtumichileje Yehofa. Jemanjaji ngakusiŵalimbikasya ŵanache ŵawo kuti chapateje mbiya syejinji ni chakulinga chakuti chiŵakamuchisyeje jemanjajo pachachikalambalapo.—3 Yoh. 4.

16. Ana achinangolo mpaka ŵakamuchisye chamti uli ŵanache ŵawo kuti chakomboleje kulipatila yakusosekwa paumi? (Aefeso 4:28)

¹⁶ Pakusagula yakutenda alosyeje kuti akusamkulupilila mnope Yehofa. Yeleyi mpaka yakamuchisye ŵanache ŵawo kumanyilila yampaka atende kuti chakomboleje kupata yakusosechela yawo msogolo. Kutandila ali ŵanache ŵakamuchisyeje kuti akamuleje masengo mwakulimbichila. (Mis. 29:21; Aŵalanje Aefeso 4:28.) Pakukula ŵakamuchisyejesoni kuti alimbichileje sukulu. Achinangolo akusosekwa kuwungunya mfundo sya m’Baibulo syampaka syakamuchisye ŵanache ŵawo kuti asagule mwalunda pangani ja majiganyo gampaka atende. Yeleyi yichakamuchisya ŵanache ŵawo kuti chakomboleje kulisamalila achimsyene kwineku ali mkutenda yejinji pakumtumichila Yehofa.

17. Ana tukusosekwa kuŵa ŵakusimichisya ya chichi?

¹⁷ Ŵandu wosope ŵakusamkulupilila Yehofa soni kutenda yakusasaka jwalakwe ngakusosekwa kukayichila yakuti chachakamuchisya kuti apateje yakusosechela yawo ya paumi. Apano ni patukusosekwa kumkulupilila mnope Yehofa ligongo tuli kumbesi kusyesyene kwa chilambochi. Chinga chitusimaneje ni yamti uli, tukusosekwa kukulupilila kuti Yehofa chachikamulichisya masengo machili gakwe pakutupa yatukusosechela. Myoyo, tukumbuchileje kuti mkono wa Yehofa uli wamachili soni wetambasukuche, mwamti jwalakwe ngasalepela kutukamuchisya.