1. Ana ni chindu chimpepe chapi chachikusatendekasya ŵakutumichila ŵa Yehofa kuŵa ŵakulekangana ni ŵane?

 CHINDU chimpepe chachikusichamanyikasya ŵakutumichila ŵa Yehofa chili kulipeleka a kwawo pa masengo gakulalichila. (Tit. 2:14) Ndaŵi sine mpaka agawoneje masengo gakulalichila kuŵa gakusawusya. Mwamti ndaŵi sine mpaka alipikaneje mpela jwamkulungwa jwa mumpingo jwine jwakulimbichila juŵatite, “Pane jwangasakaga kulalichila.”

2. Ligongo chichi ndaŵi sine mpaka yiŵe yakusawusya kukamula masengo gakulalichila mwakulipeleka?

² Mpaka tusangalaleje mnope patukutenda mautumiki gane gejinji patukumtumichila Yehofa. Ligongo chichi tukuŵecheta yeleyi? Mpaka tuyiwoneje yakuyichisya yambone patukutaŵa soni kulinganya malo gakulambilila, kukamuchisya pasitendekwe ngosi sya m’chilengedwe kapenasoni kwalimbikasya abale ni alongo ŵetu. Tukusaŵa ŵakusangalala patukukamula masengo yimpepe ni abale ni alongo ŵetu. Mwamti yikusaŵa yakulimbikasya kumanyilila kuti abaleŵa akusayamichila yindu yosope yatukutenda pakwakamuchisya. Ndaŵi sine mpaka tulalichileje mu dela jetu kwa ndaŵi jelewu nambo ŵandu ni ngapikanilaga utenga wetu, kapenasoni kututopola kwene. Myoyo, naga yikututendechela yeleyi tukajasaga mtima. Mmalomwakwe, tumanyilileje kuti mbesi pajikuŵandichila ŵandu ŵajinji chatusisyeje mnope. (Mat. 10:22) Nambo ana chichi champaka chitukamuchisye kuti tukamuleje masengo gakulalichila mwakulipeleka?

3. Ana lilemba lya Luka 13:​6-9 likulosya chamti uli kulipeleka kwa Yesu?

³ Mpaka tulijiganye yejinji pakwamba ya kukamula masengo ga kulalichila mwakulipeleka patukuganichisya chisyasyo cha Yesu. Jwalakwe jwakamulaga masengo gakulalichila mwakulipeleka mnope.  Mwamti pa utumiki wakwe wosope, Yesu nganawujila munyuma pamasengo gakulalichila. (Aŵalanje Luka 13:​6-9.) Mpela muyaŵelele ni mundu jwine juŵakwete chitela cha mkuju chele nganichisogolaga yisogosi kwa yaka yitatu, Yesu jwalalichile Ayuda kwa yaka chiŵandika yitatu atamose kuti ŵajinji mwa jemanjajo nganapikanilaga utenga wakwe. Myoyo, mpela muyaŵelele ni mundu juŵakwete chitela cha mkuju jula kuti nganaleka kuchisamalila, nombe najo Yesu nganaleka kwalalichila ŵandu ŵanganampikanilaga. Kusala yisyene, Yesu jwatendaga yakomboleka kuti ŵayiche pamtima ŵandu ŵeleŵa.

4. Ana ni yindu mcheche yapi yajwatendaga Yesu yachitukambilane munganiji?

⁴ Mungani ajino, chitukambilane yaŵatite Yesu pakulosya kulipeleka pamasengo gakulalichila, mnopemnope mu miyesi 6 ja kumbesi kwa utumiki wakwe. Kulijiganya pa yindu yaŵasasile Yesu soni kusyasya yindu yaŵatesile mpaka kutukamuchisye masiku agano kuti tukamuleje masengo gakulalichila mwakulipeleka. Kwende tukambilane ya chisyasyo cha Yesu m’matala mcheche gakuyichisyaga. (1) jwatendaga yajwasakaga Yehofa, (2)  jwayipikanichisyaga yakulochesya ya m’baibulo, (3) jwamdalilaga Yehofa kuti amkamuchisyeje soni (4) jwamanyililaga kuti ŵandu ŵane chapikanile utenga wakwe.

JWATENDAGA YAJWASAKAGA YEHOFA

5. Ana Yesu jwalosisye chamti uli kuti jwamalilaga ndaŵi jakwe pakutenda yakusasaka Mlungu?

⁵ Yesu jwalimbichilaga kulalichila “ngani syambone sya Uchimwene” ligongo jwayimanyi kuti Mlungu jwasakaga kuti jwalakwejo alalichileje (Luk. 4:43) Yesu jwawuwonaga utumiki wakwe kuŵa chindu chakusosekwa mnope. Atamose chakumbesi kwa utumiki wakwe, jwalakwe jwajendaga “mumsinda ni msinda soni musi ni musi,” kukwajiganya ŵandu. (Luk. 13:22) Jwalakwe jwajiganyisyesoni ŵakulijiganya ŵakwe ŵane kuti nombenawo alalichileje.—Luk. 10:1.

6. Ana ma utumiki gane gatukusatendaga gakusakamuchisya chamti uli masengo gakulalichila ? (Alolesoni chiwulili.)

⁶ Masiku aganosoni, kulalichila ngani syambone gali masengo gakusosekwa mnope gakusaka Yehofa ni Yesu kuti tukamuleje. (Mat. 24:14; 28:​19, 20) Pana kukamulana kwekulungwa pasikati pamasengo gakulalichila soni masengo gane gatukusakamulaga m’guluji. Mwachisyasyo, tukusakamula masengo ga yakutaŵataŵa kapena kutumichila nawo pa Beteli. Yindu yosopeyi yikusakamuchisya  pamasengo gakulalichila. Mwamti pasitendekwe ngosi syachilengedwe, tukusalolechesya kuti abale ni alongo apochele yindu yakusosechela yayikusiyakamuchisya kuti apitilisye kusongana soni kulalichila. Patukugawona masengo gakulalichila kuŵa gakusosekwa mnope soni kukumbuchila kuti gali masengo gakusaka Yehofa kuti tukamuleje, yichitukamuchisya kuti ndaŵi syosope tukamuleje nawo masengoga. Jwamkulungwa jwa mumpingo jwine jwa ku Hungary lina lyakwe János jwatite, “Ngusalikumbusya kuti pangali utumiki uliwose m’guluji wampaka ujinjile mmalo mwa kulalichila, ligongo masengoga ni gagali gakusosekwa mnope.”

7. Ligongo chichi Yehofa akusaka kuti tupitilisyepe kulalichila? (1 Timoteyo 2:​3, 4)

⁷ Mpaka tukamuleje masengo gakulalichila mwakulipeleka naga tukusitwawona ŵandu mpela mwakusiŵawonela Yehofa. Jwalakwe akusaka kuti naga yili yakomboleka ŵandu ŵajinji apikane ngani syambone soni asikulupilile. (Aŵalanje 1 Timoteyo 2:​3, 4.) Kuti yeleyi yikomboleche, Yehofa atujiganyisye m’weji kuti tukomboleje kwalalichilaga ŵandu mwakwayika pamtima ni chakulinga chakuti chakulupuche. Mwachisyasyo, kabuku kakuti Twanonyeleje ŵandu—Twajiganyeje kakusasala yindu yampaka yitukamuchisye kuti tutandeje kuŵechetana ni ŵandu tuli tukwete chakulinga chakuti tutande kwajiganya Baibulo. Atamose ŵandu akapikanilaga utenga wetu nambope ŵanduŵa chachikolasoni upile wakulijiganya ya Mlungu mkaniyimale yakusawusya yekulungwa. Myoyo yatukusitwasalilaga apano, mwine ni yayichakamuchisya kuti chakunde kulijiganya Baibulo kusogoloku. Nambotu yeleyi yichitendekwa naga apano tukupitilisyape kulalichila.

JWAYIPIKANICHISYAGA YAKULOCHESYA YA M’BAIBULO

8. Ana kumanyilila yakulochesya ya m’Baibulo kwamkamuchisye uli Yesu kuti akamulichisyeje masengo mwalunda ndaŵi jakwe?

⁸ Yesu jwamanyililaga mwayichijila pakukwanilichikwa yakulochesya ya m’Baibulo. Mwamti jwalakwe jwayimanyi kuti utumiki wakwe uchimala panyuma pa yaka yitatu ni hafu. (Dan. 9:​26, 27) Jwalakwe jwamanyililagasoni yakulochesya yayasalaga ya ndaŵi ja chachiwulajidwa soni yachachijila pakumwulaga. (Luk. 18:​31-34) Ligongo lyakuti Yesu jwamanyililaga yachiyimtendechele, jwakamulichisyaga masengo mwalunda ndaŵi jakwe. Yakuyichisya yakwe jwalakwe jwalalichilaga mwakulipeleka mnope kuti amalisye kukamula masengo gaŵampele Mlungu.

9. Ana yakulochesya ya m’Baibulo yikusatulimbikasya chamti uli kuti tulalichileje mwakulipeleka mnope?

⁹ Naga tukumanyilila chenene yakulochesya ya m’Baibulo, yichitukamuchisya kuti tulalichileje mwakulipeleka mnope. M’weji tukumanyilila kuti ndaŵi jakuti chilambo chakusakalachi chijonanjidwe jisigele panandi. Tukumanyilila kuti yakutendekwa ya masiku agano soni ndamo sya ŵandu yikusakamulana ni yajasasile Baibulo pakwamba ya yimanyisyo ya m’masiku gambesi. Tukukuwona kulimbana kwakupali pasikati pa Ulamusi Wamachili wa Pachilambo Chosope wa Britain ni America ni chilambo cha Russia pampepe ni yilambo yine yayili pamkamulano ni chilambochi. Yeleyi yikukwanilisya yakulochesya yakwamba mwenye jwa kummwela soni mwenye jwakumpoto “pandaŵi jakumalisya.” (Dan. 11:40) Tukumanyililasoni kuti ulamusi wa Britain ni America welewu ukwimila sajo sya mu chiwanichisyo chaŵachisasile pa Daniyele 2:​43-45. Mwamti patukuyiwona yakulochesyayi yili mkukwanilichikwa, yikusatutendekasya kuŵa ŵakusimichisya kuti pachangakaŵapa Uchimwene wa Mlungu chiwujonanje maboma ga ŵanduga. Yakulochesya yosopeyeneyi yikulosya kuti tukutama kumbesi kusyesyene kwa chilambochi. Myoyo tukusosekwa kutenda yiliyose yampaka tukombole kuti tulalichileje ngani syambone.

10. Ana ni matala gane gapi gele yakulochesya ya m’Baibulo mpaka yitukamuchisye kuti tulalichileje mwakulipeleka?

¹⁰ Yakulochesya ya m’Baibulo yikusatusalila yindu yatukusasachilila kuti twasalileje ŵane. Mlongo jwine lina lyakwe Carrie, jwakusatumichila ku Dominican Republic jwatite, “Yindu yambone yaŵasasile Yehofa kuti chachitutendela kusogoloku yikusangamuchisya kuti nasalileje ŵane yisyesyene  ya m’Baibulo.” Jwalakwe jwasasilesoni kuti, “Pangwawona ŵandu ali mkusimana ni yakusawusya masiku agano, ngusakumbuchila kuti yaŵasasile Mlungu kuti chachitutendelayi ngayikusagamba kungwaya unepe nambo yikusiyakwayagasoni jemanjajo.” Yakulochesya ya m’Baibulo yikusatulimbikasya kuti tukaleka kulalichila ligongo tukumanyilila kuti Yehofa ni jwakulongolela pa masengo gakulalichilaga. Leila, jwakusatama ku Hungary jwatite, “Lilemba lya Yesaya 11:​6-9 likusangamuchisya kuti lalichileje ngani syambone atamose kwa ŵandu ŵakuwoneka kuti ngapikanila yangusaka kwasalila. Ngusatenda yeleyi ligongo lyakumanyilila kuti ni chikamuchisyo cha Yehofa jwalijose mpaka achenje.” Nombe najo m’bale Christopher jwakusatama ku Zambia jwatite, “Mpela mwalikusaŵechetela lilemba lya Maliko 13:​10, ngani syambone sikulalichidwa kwa ŵandu ŵamitundu josope, mwamti ngusayiwona kuti uli upile wangu kukamuchisya nawo kuti yakulochesya yeleyi yikwanilichikwe.” Ana ni yakulochesya yapi ya m’Baibulo yayikusiyakamuchisya wawojo kuti apitilisyeje kulalichila?

JWAMDALILAGA YEHOFA KUTI AMKAMUCHISYEJE

11. Ligongo chichi Yesu jwasosekwaga kumdalila Yehofa kuti apitilisye kulalichila mwakulipeleka? (Luka 12:​49, 53)

¹¹ Yesu jwadalilaga chikamuchisyo chakutyochela kwa Yehofa kuti apitilisye kulalichila mwakulipeleka. Atamose kuti jwalalichilaga mwakwachimbichisya ŵane, nambo jwamanyilile kuti ngani syambone sya Uchimwene chisyatendekasye ŵandu ŵane kuti atumbile ni kutanda kusisya yajwaŵechetaga. (Aŵalanje Luka 12:​49, 53.) Mwakuwilisyawilisya, achimlongola ŵa dini ŵasakaga kumwulaga Yesu ligongo lya yindu yajwalalichilaga. (Yoh. 8:59; 10:​31, 39) Nambo Yesu jwapitilisye kulalichila ligongo jwayimanyi kuti Yehofa ŵaliji ni jwalakwe. Jwalakwe jwatite, “Nganimba jika, nambo Atati ŵaŵandumilewo ni ŵali ni une. . . . soni jwalakwe nganandeka jika, ligongo ndaŵi syosope ngusatenda yindu yakumsangalasya jwalakwejo.”—Yoh. 8:​16, 29.

12. Ana Yesu jwasalile yamti uli ŵakulijiganya ŵakwe yayakamuchisye kuti apitilisye kulalichila ŵane pakwasisya?

¹² Yesu jwakumbwisye ŵakulijiganya ŵakwe kuti akusosekwa kumdalilaga Yehofa kuti ŵakamuchisyeje. Mwakuwilisyawilisya, jwalakwe jwasimichisyaga jemanjajo kuti Yehofa chiŵakamuchisyeje atamose ŵane pakwalagasya. (Mat. 10:​18-20; Luk. 12:​11, 12) Jwalakwe jwagombelechesyesoni kuti atendeje yindu mwakusamala. (Mat. 10:16; Luk. 10:3) Jwasalilesoni kuti akasiŵakanganyichisyaga ŵandu ŵangakusaka kupikanila utenga wajigele. (Luk. 10:​10, 11) Jwalakwe jwasalilesoni kuti atileje ŵane pakwalagasya. (Mat. 10:23) Atamose kuti Yesu jwaliji jwakulipeleka  soni jwamdalilaga Yehofa, jwalakwejo nganagambaga kulipelechela kuti asimane ni yakogoya.—Yoh 11:​53, 54.

13. Ligongo chichi akusosekwa kukulupilila kuti Yehofa chachakamuchisya wawojo?

¹³ Kusala yisyene, masiku agano tukusasosechela chikamuchisyo cha Yehofa kuti tupitilisye kulalichila mwakulipeleka ŵane pakutusisya. (Chiw. 12:17) Ligongo chichi akusasosekwa kukulupilila kuti Yehofa chiŵakamuchisye? Aganichisye ya lipopelo lya Yesu lyakusalisala m’buku ja Yohane chaputala 17. Yesu jwamŵendile Yehofa kuti ŵaloleleje ŵandumetume ŵakwe, mwamti Yehofa jwajanjile yajwaŵendileyi. Buku ja Masengo jikusasala yaŵatite Yehofa pakwakamuchisya ŵandumetumeŵa kuti apitilisye kulalichila mwakulipeleka atamose kuti ŵalagasyaga. Mu lipopelo lyakwe, Yesu jwamŵendilesoni Yehofa kuti ŵaloleleje ŵandu ŵachachikulupilila yachachilalichilaga ŵandumetumeŵa. Mwamti jumo mwa ŵandu ŵeleŵa ali wawojo. Mwamti Yehofa chachakamuchisyasoni wawojo mpela muŵatendele ni ŵandumetumeŵa.—Yoh. 17:​11, 15, 20.

14. Ana ni chichi chachikusatukamuchisya kumanyilila kuti chitukomboleje kulalichila mwakulipeleka? (Alolesoni chiwulili.)

¹⁴ Mbesi pajikuŵandichila chitusimaneje ni yakusawusya yachiyitendekasyeje kuti kulalichila ngani syambone kuŵeje kwakusawusya. Nambope Yehofa chapitilisye kutukamuchisya. (Luk. 21:​12-15) Mpela muŵatendelaga Yesu ni ŵakulijiganya ŵakwe, m’wejisoni tukusitwaleka ŵandu kuti asagule kupikanila yatukwasalila kapena iyayi soni tukusaŵambala kangana nawo. Atamose m’yilambo yele masengo getu ŵagalekasisye, abale ni alongo ŵetu akusapitilisya kulalichila ngani syambone ligongo akusamdalilaga Yehofa ngaŵaga machili gawo. Mpela muyaŵelele kuti Yehofa ŵapele machili ŵakutumichila ŵakwe ŵa m’yaka 100 yandanda, masiku aganosoni Yehofa akutupa machili kuti “ngani syambone silalichidwe mwakwanila” mpela mwakusachila jwalakwejo. (2 Tim. 4:17) Myoyo, akusosekwa kulupilila kuti naga akumdalila Yehofa, chachikombola kupitilisya kulalichila mwakulipeleka mnope.

JWAKWETE CHIKULUPI CHAKUTI ŴANE CHAPIKANILE UTENGA WAKWE

15. Ana chichi chachikulosya kuti Yesu jwawuwonaga mwakuŵajilwa utumiki wakwe?

¹⁵ Yesu jwakwete nganisyo syakuŵajilwa pa ngani ja masengo gakulalichila. Yeleyi yamkamuchisye kuti alipelecheje mnope pautumiki wakwe. Mwachisyasyo, chakumbesi kwa chaka cha 30 C.E.  Yesu jwayiweni kuti ŵandu ŵajinji ŵasachililaga kupikana yiŵalalichilaga mwamti jwalandenye ŵanduŵa ni yagowola yayikusosekwa kugowoledwa. (Yoh. 4:35) Mwamti pali papite chaka chiŵechetele yeleyi, Yesu jwasalile ŵakulijiganya ŵakwe kuti, “Yagowola yili yejinji.” (Mat. 9:​37, 38) Kanekosoni jwagombelechesye kuti, “Yagowola yili yejinji . . . mumŵende Msyene masengo gakugowola kuti atumisye ŵandu ŵajinji kumasengo gakwe gakugowola.” (Luk. 10:2) Yeleyi yikulosya kuti Yesu jwakwete chikulupi chakuti ŵandu ŵane chapikanileje ngani syambone mwamti jwasangalele mnope paŵapatikene ŵandu ŵamti mpela ŵelewo.—Luk. 10:21.

16. Ana yiwanichisyo ya Yesuyi yalosisye chamti uli kuti jwalakwe jwagawonaga masengo gakulalichila mwakuŵajilwa? (Luka 13:​18-21) (Alolesoni chiwulili.)

¹⁶ Yesu jwasalile ŵakulijiganya ŵakwe kuti ayiwoneje mwakuŵajilwa yindu yiŵajiganyaga ligongo yeleyi ni yayikakamuchisye kuti apitilisye kulalichila mwakulipeleka. Mwachisyasyo , aganichisye ya yiwanichisyo yiŵili ya Yesu. (Aŵalanje Luka 13:​18-21.) Yesu jwakamulichisye masengo kambeju kamwana pakusaka kwiganya yakuti utenga wa Uchimwene uchiwanda m’litala lyakusimonjesya mnope. Jwalakwe jwakamulichisyesoni masengo yakusasaŵisya pakusaka kusala mwawuchijila utenga wa Uchimwene pakuwanda soni kuchenkga kwele ŵandu ŵane ngasakuwona. Yajwasasile Yesuyi yakamuchisye ŵakulijiganya ŵakwe kumanyilila kuti yaŵalalichilaga jemanjajo yichikola yakuyichisya yambone.

17. Ana ni magongo gapi gakututendekasya kuti tuwuwoneje mwakuŵajilwa utumiki wetu?

¹⁷ Patukuyiwona yasikuti ngani syambone pakwakamuchisya ŵandu pa chilambo chosope, yikusatulimbikasya kuti tupitilisye kulalichila mwakulipeleka. Mwamti chaka chilichose ŵandu mamiliyoni gejinji akusasimanikwa pa mwambo wa Chikumbuchilo soni akusalijiganya Baibulo ni m’ŵeji. Konjechesya pelepa, ŵandu masausande gejinji akusabatisidwaga nikutanda kukamula masengo gakulalichila ni m’ŵeji. Ngatukumanyilila kuti ni ŵandu ŵalingwa ŵachajitichisye yatukusitwalalichila,nambo yatukumanyilila ni yakuti Yehofa akusonganganya gulu jekulungwa ja ŵandu ŵachachikulupuka pa yakusawusya yekulungwa. (Chiw. 7:​9, 14) Msyene masengoga akuyiwonape kuti pana yindu yejinji yayikusosekwa kugowoledwa, myoyo m’weji tukwete magongo gejinji gakututendekasya kuti tupitilisye kulalichila.

18. Ana tukusaka kuti ŵandu amanyilileje chichi patuweni tuli mkulalichila?

¹⁸ Kulalichila mwakulipeleka kuŵele kuli mkwamanyikasya ŵakulijiganya ŵa Yesu. Ŵandu paŵapikene yaŵaŵechetaga ŵandumetume, “ŵayikopochele kuti ŵakulijiganyawo ŵajendaga ni Yesu.” (Mase. 4:13) Myoyo, nombe ŵandu pakutuwona tuli mkulalichila mu utumiki, jemanjaji ayiwonejesoni kuti m’weji tukujigalila chisyasyo cha Yesu juŵalalichilaga mwakulipeleka.