Ndaŵi jine Yesu ali m’malile mwa cilambo ca Yisalayeli mu upande wa Loma wa ku Siliya, jwamkongwe jwine jwa Cigiliki jwayice kwa jwalakwe kukuŵenda cikamucisyo. Yesu jwamjanjile mwakumsalila ciwanicisyo cakwalandanya ŵandu ŵanganaŵa Ayuda ni “tumbwa.” Mwakamulana ni Cilamusi ca Mose, mbwa syaliji m’likuga lya nyama syangasosekwa. (Levitiko 11:27) Ana Yesu pakuŵeceta maloŵe gelega nikuti jwamnyosyaga jwamkongwe jwa Cigilikiju soni ŵandu ŵanganaŵa Ayuda?

Nganiyiŵa m’yoyo. Pakuŵeceta maloŵega, jwalakwe jwagopolelaga kuti jwayice kukwakamucisya mnopemnope Ayuda. Yeleyi yawonecele cenene paŵaŵecetaga ni ŵakulijiganya ŵakwe. Ni ligongo lyakwe jwamsalile jwamkongwe jwa Cigilikiju kuti, “Nganiyiŵa yakuŵajilwa kujigala cakulya ca ŵanace ni kutuponyela tumbwa.” (Matayo 15:21-26; Maliko 7:26) Mu ndaŵiji ŵandu ŵamtundu wa Cigiliki soni Ciloma, ŵanonyelaga kulanga mbwa m’nyumba syawo soni ndaŵi syejinji syang’andaga ni ŵanace ŵawo. M’yoyo maloŵe gakuti “tumbwa,” gakwete ngopolelo jambone kwa jwamkongweju. Pakwanga jwamkongwe jwa Cigilikiju jwatite, “Yisyene Ambuje, nambotu tumbwa, tukusalya nyenyeswa syasigwile pasi kutyocela patebulo ja ambuje ŵawo.” Yesu jwam’yamicile ligongo lya cikulupi cakwe mwakuti ŵamposisye mwanace jwakwe jwamkongwe.—Matayo 15:27, 28.

Combo caŵakwesile Paulo paulendo wakwe wakwawula ku Italy, casimene ni mbungo jamacili pa nyasa. Nambope ali mkupumulila ulendowu paciko cinecakwe, Paulo ŵakalamwisye ŵakwendesya combowo kuti akanyakuka, ajembeceye kaje. (Masengo 27:9-12) Ana paliji magongo gakupikanika gakuti Paulo ŵakalamusye?

Ŵakwendesya combowo ŵamanyililaga cenene kuti kwenda pa nyasa ja Mediterranean, kwaliji kwakogoya m’miyesi jakusisima. Kutandila m’mwesi wa November mpaka March, yombo nganiyikangalaga kwenda pa nyasaji. Nambope ulendo waŵakalamusyaga Paulo kuti akanyakuka, watendekwe m’mwesi wa September, kapena October. Mkulemba jwine jwa Ciloma lina lyakwe Vegetius, jwalembile mwayaŵelega yakusawusya kwenda pa nyasaji. M’buku jakwe jakolanjikwa kuti Epitome of Military Science, jwalembile kuti, “Miyesi jine jaliji jambone, nambo jine jaliji jakusawusya soni jakogoya kwenda” pa nyasaji. Jwalakwe jwasasile kuti kutandila pa May 27, mpaka pa September 14, jaliji miyesi jambone kwenda pa nyasaji. Nambo kutandila pa September 15, mpaka November 11, soni March 11, mpaka May 26, jaliji miyesi jakusawusya nambosoni jakogoya kwenda pa nyasaji. Pakuŵa Paulo ndaŵi syejinji ŵajendaga pa nyasa, ngatukukayicila kuti ŵamanyililaga cenene yeleyi. Mwangakayicila, ŵakwendesya soni msyene comboco ŵamanyililagasoni yeleyi, nambo nganasaka kumpikanila Paulo. Mbesi jakwe comboco cakasice.—Masengo 27:13-44.