1. Ana mundu akusasosekwa kutenda chichi kuti agalawuche mtima?

 Patutesile chakulemwa yikusaŵa chenene kugalawuka mtima. Mwakamulana ni yajikusasala Baibulo, mundu jwagalawiche mtima akusachenga kaganisye kakwe payindu yakulemwecheka yajwatesile, kuleka ndamo jaŵatesilejo, soni kuŵa jwakusachilila kuti akawilisya yajwatesileyo.—Mat. 3:8; Mase. 3:19; 2 Pet. 3:9.

2. Ligongo chichi tukusasosekwa kujipikanichisya ngani jakwamba kugalawuka mtima? (Nehemiya 8:​9-11)

² Mundu jwalijose akusasosekwa kujipikanichisya chenene ngani ja kugalawuka mtima. Yili myoyo ligongo lyakuti wosopewe tukusalemwa lisiku lililyose. Ligongo lyakuti tuli ŵanache ŵa Adamu ni Hawa, wosopewe twajigalile ulemwa soni chiwa. (Alo. 3:23; 5:12) Mwamti wosopewe tuli ŵakulemwa. Atamose ŵandu ŵaŵakwete chikulupi mpela ndumetume Paulo, ndaŵi sine ŵalagaga ni ulemwa. (Alo. 7:​21-24) Ana yeleyi yikugopolela kuti ndaŵi syosope tutengucheje ligongo lya ulemwa wetu? Iyayi. Ligongo lyakuti Yehofa ali jwachanasa, jwalakwe akusasaka kuti m’weji tusangalaleje. Aganichisye yayatendechele Ayuda ŵa mundaŵi ja Nehemiya. (Aŵalanje Nehemiya 8:​9-11.) Yehofa nganasakaga yakuti jemanjaji adandawuleje ligongo lya yakulemwa yaŵatesile kala. Mmalomwakwe, jwalakwe jwasakaga kuti jemanjaji asangalaleje pakumtumichila. Jwalakwe jwamanyililaga kuti mundu pagalawiche mtima akusasangalalaga. Mwamti akusasakasoni kuti m’weji tumanyilile mfundo jeleji. Naga tugalawiche mtima pa yakulemwa yetu, mpaka tukole chikulupi chakuti Atati ŵetu ŵachanasa chachitukululuchila.

3. Ana chitukambilane chichi munganiji?

³ Kwende sambano tukambilane yejinji pakwamba ya kugalawuka mtima. Mungani ajino chitulole yindu yitatu yakuyichisyayi: Chandanda, chitulijiganye yindu yaŵajiganyisye Yehofa Ayisalayeli pakwamba ya kugalawuka mtima. Kaneko, chitukambilane yaŵele ali mkutenda Yehofa pakwakamuchisya ŵandu ŵatesile ulemwa kuti agalawuche mtima. Pakumalisya, chitukambilane yindu yaŵajiganyisye Yesu ŵakumkuya ŵakwe pakwamba ya kugalawuka mtima.

 YAŴAJIGANYISYE YEHOFA AYISALAYELI PAKWAMBA YA KUGALAWUKA MTIMA

4. Ana Yehofa jwawujiganyisye yamti uli mtundu wa Ayisalayeli pakwamba ya kugalawuka mtima?

⁴ Yehofa paŵawusagwile mtundu wa Ayisalayeli, jwatesile chilanga ni jemanjaji. Chilanga chakwe chaliji chakuti, naga jemanjaji chachipikanila malamusi gakwe, jwalakwe chachipitilisya kwachenjela soni kwapa upile. Pakwamba ya malamusiga, Jwalakwe jwasimichisye jemanjajo kuti, “Sambano malamusi gangumlamula jemanja lelojinoga nganigaŵa gakusawusya kugakuya soni nganigaŵa kwakutalichila ni jemanja.” (Det. 30:​11, 16) Yehofa jwasalile kuti naga jemanjajo akulepela kupikanila malamusi gakwe, kapena kusagula kujitumichila milungu jine, jwalakwe , chachileka kwachenjela soni kwakamuchisya. Atamose yaliji myoyo, yeleyi nganiyigopolelaga kuti paliji pangalisoni upile wakuwujila kwa Yehofa. Jemanjaji ŵakwete upile ‘wakuwujila kwa Yehofa Mlungu [jwawo] ni kutandila kupikanila maloŵe gakwe.’ (Det. 30:1-3, 17-20) Kasale kane pelepa mpaka tujile kuti jemanjaji ŵakwete upile wakugalawuka mtima. Mwamti pagalawiche mtima Yehofa jwaŵaga jwakoseka kuŵa nawosoni paunasi wambone soni kutandila kwapa upile.

5. Ana Yehofa jwalosisye chamti uli kuti jwangajasa ŵandu ŵakwe? (2 Ayimwene 17:​13, 14)

⁵ Ayisalayeli ŵamjimuchilaga Yehofa mwakuwilisyawilisya. Konjechesya pakujitumichila milungu jaunami, jemanjaji ŵatendagasoni yakusakala yine. Yakuyichisya yakwe, Ayisalayeli ŵasimanaga ni yakusawusya. Nambotu, Yehofa nganagamba kwajasa ŵakutumichila ŵakwe ŵaŵatendaga yakusakalaŵa. Mmalomwakwe, Yehofa mwakuwilisyawilisya jwatumichisyaga ŵakulochesya kuti ŵalimbikasye ŵandu ŵakweŵa kuwujila kwa jwalakwe.—Aŵalanje 2 Ayimwene 17:​13, 14.

6. Ana Yehofa jwakamulichisye masengo chamti uli ŵakulochesya ŵakwe pakwajiganya ŵakutumichila ŵakwe kusosekwa kwa kugalawuka mtima? (Alolesoni chiwulili.)

⁶ Ndaŵi syejinji, Yehofa jwakamulichisyaga masengo ŵakulochesya ŵakwe pakwakalamusya soni kwajongolela ŵandu ŵakwe. Mwachisyasyo, kupitila mwa Yelemiya, Mlungu jwaŵechete kuti: “M’mwe Isalayeli ŵangakulupichika mwujile . . . Une ndili chiŵela jwa chanasa soni nganinamtumbilila mpaka kalakala. Mgambe kwitichisya kulemwa kwenu, mjitichisye kuti mwalemwechesye AMBUJE Mlungu jwenu.” (Yel. 3:​12, 13) Kupitila mwa Yoweli, Yehofa jwatite, “Mwujile kwa une ni mtima wenu wosope.” (Yow. 2:​12, 13) Yehofa  jwamsalilesoni Yesaya kulemba kuti, “Mliswejesye, mleche yakusakala yosope yanguyiwona mli mkutenda.” (Yes. 1:​16-19) Kupitila mwa Esekiele Yehofa jwawusisye kuti, “Ana mkuganisya kuti ngusasangalala kumwona mundu jwakusakala ali mkuwa? . . . Ngasangalele kumwona jwakulemwa ali alesile ulemwa wakwe ni kuŵa ni umi. Ngangusosa mundu jwalijose kuti awe. Myoyo [mgalawuche] mtima ni kuleka kutenda yangalumbana kuti mŵe ni umi.” (Esek. 18:​23, 32) Yehofa akusasangalala mnope pakwawona ŵandu ali mkugalawuka mtima, ligongo jwalakwe akusasaka kuti jemanjajo akole umi mpaka kalakala. Myoyo, Yehofa jwangagamba kutama ni kwembecheyaga kuti mundu jwatesile chakulemwa achenje kaje ndamo syakwe mkanaŵe kumkamuchisye mulitala lililyose. Kwende tulole yisyasyo yine yakulosya mujwatendelaga yeleyi.

7. Ana Yehofa jwajiganyisye chichi ŵandu ŵakwe kupitila mungani ja jwakulochesya Hoseya ni ŵamkwakwe?

⁷ Yehofa ŵajiganyisye ŵandu ŵakwe lijiganyo lyakusosekwa mnope kupitila mu chisyasyo cha yakutendekwa yisyesyene cha Gomeli juŵaliji ŵamkwakwe ŵa jwakulochesya Hoseya. Panyuma pakuti jwamkongweju atesile chikululu, jwamlesile Hoseya ni kwawula kwa achalume ŵane. Ana nikuti ngamkaniyikomboleka kumkamuchisya Gomeli kuti awujile? Yehofa jwakusamanyilila mitima ja ŵandu ŵamsalile Hoseya kuti, “Jawulanisoni mkamnonyele jwamkongwe jwali jwachikululu jula jwali ni uganja wakwe mkamnonyele mpela mwele une AMBUJE ngusinanonyelela ŵandu ŵangu ŵa ku Yisalayeli atamose kuti jemanjajo akusalambila milungu jine.” (Hos. 3:1; Mis. 16:2) Ayiweni, palilembali pakulosya kuti ŵamkwakwe Hoseya ŵaliji mkanaleche ndamo syawo syakusakala. Atamose yaliji myoyo, Yehofa jwamsalile Hoseya kuti ŵakululuchile ŵamkwakwewo ni kutandilasoni kutamila yimpepe. a Mwakulandana ni yeleyi, Yehofa jwakamulichisye masengo chisyasyochi pakusaka kwasimichisya ŵakutumichila ŵakwe ŵatesile yakulemwa kuti ngasiŵajasa. Atamose kuti jemanjajo ŵatendaga yakulemwa yekulungwakulungwa, jwalakwe jwapitilisye kwanonyela soni jwapitilisye kwakamuchisya kuti agalawuche mtima ni kuchenga ndamo syawo. Ana chisyasyochi chikulosya kuti Yehofa ‘jwakusajilinga mitima ja ŵandu’ chachayichila ŵandu ŵakusatenda yakulemwa yekulungwakulungwa ni kulinga kwakamuchisya kuti agalawuche mtima? (Mis. 17:3) Kwende tulole.

YAŴELE ALI MKUTENDA YEHOFA PAKWAKAMUCHISYA ŴANDU ŴATESILE ULEMWA KUTI AGALAWUCHE MTIMA

8. Ana Yehofa jwatesile yamti uli pakusaka kumkamuchisya Kaini kuti agalawuche mtima? (Genesesi 4:​3-7) (Alolesoni chiwulili.)

⁸ Kaini jwaliji mwanache jwamlume jwandanda kupagwa jwa Adamu ni Hawa. Jwalakwe jwajigalile ulemwa wa achinangolo ŵakwe. Konjechesya pelepa, pakwamba ya jwalakwe Baibulo jikusati, “Yitendo yakwe yaliji yakusakala.” (1 Yoh. 3:12) Kombolekatu yeleyi ni yayatendekasisye kuti Yehofa akasangalala ni Kaini soni mbopesi jaŵapeleche. Mmalo mwakuchenga ndamo syakwe, “Kaini jwapile mtima soni jwatumbile mnope.” Ana kaneko Yehofa jwatesile chichi? Jwalinganyisye yakuŵechetana ni Kaini. (Aŵalanje Genesesi 4:​3-7.) Mwachinonyelo Yehofa jwaŵechetene ni Kaini. Jwalakwe ŵamsalile kuti yindu mpaka yimjendele chenene soni ŵamkalamwisye kogoya kwakutenda ulemwa. Nambo chakutesya chanasa chili chakuti, Kaini jwakanile kupikanila. Jwalakwe nganakunda kuti Yehofa amkamuchisye kugalawuka mtima. Pakuŵapo Yehofa jwalepele kumkamuchisya Kaini kuti agalawuche mtima, ana nikuti jwalakwe jwalesile kwakamuchisya ŵandu ŵane kuti agalawuche mtima? Iyayi jwalakwe nganatenda yeleyo.

9. Ana Yehofa ŵamkamuchisye chamti uli Daudi kuti agalawuche mtima?

⁹ Yehofa jwamnonyelaga mnope Mwenye Daudi. Jwalakwe jwayikene pakumkolanga Daudi kuti “jwa pamtima jwangu.” (Mase. 13:22) Nambotu kaneko, Daudi jwatesile yakulemwa yekulungwa  mpela kutenda chikululu soni kuwulaga mundu. Mwamti mwakamulana ni Chilamusi cha Mose, Daudi jwasosekwaga kuwulajidwa. (Lef. 20:10; Num. 35:31) Nambotu, mwachinonyelo Yehofa jwalinganyisye yakumkamuchisya Daudi. b Jwalakwe jwamtumisye jwakulochesya Natani kuti akaŵechetane ni mwenyeju atamose kuti pandaŵijo, Daudi nganalosyaga kuti apitikwiche mtima. Myoyo, Natani jwakamulichisye masengo chisyasyo kuti amyiche pamtima Daudiju. Panyuma pa yeleyi, Daudi jwagalawiche mtima. (2 Sam. 12:​1-14) Mwamti jwalakwe jwalembile salimo jajalosisye kugalawuka mtima kwakwe. (Sal. 51, tumaloŵe twapenani) Salimoji, jiŵele jili mkwakamuchisya ŵandu ŵajinji ŵaŵatesile yakulemwa soni kwalimbikasya kuti agalawuche mtima. Ana nganiyiŵa yakusangalasya kumanyilila kuti Yehofa ŵamkamuchisye Daudi mwachinonyelo kuti agalawuche mtima?

10. Ana wawojo akupikana uli mumtima pakuganichisya yakusatenda Yehofa pakulosya kuwusimana mtima soni kwakululuchila ŵandu ŵatesile yakulemwa?

¹⁰ Yehofa akusaŵengana ni ulemwa, mwamti jwalakwe jwangasangalalaga ni ulemwa wamtundu uliwose. (Sal. 5:​4, 5) Nambope, jwalakwe akusamanyilila kuti wosopewe tuli ŵakulemwa. Mwamti ligongo lyakutunonyela jwalakwe akusatukamuchisya kuti tukombole kulimbana ni ulemwa. Yehofa akusiŵakamuchisya atamose ŵandu ŵatesile yakulemwa yekulungwa mnope kuti aŵe paunasi ni jwalakwe. Kusala yisyene, kumanyilila yeleyi kuli kwakulimbikasya mnope. Patukuganichisya mnope yakusatenda Yehofa pakutulosya chanasa soni kutukululuchila, yikusatukamuchisya kuti tupitilisye kuŵa ŵakulupichika kwa jwalakwe soni kugalawuka mtima mwachitema patutesile chakulemwa. Sambano kwende tukambilane yindu yine yawasalilidwe mpingo wa Chiklistu pakwamba ya kugalawuka mtima.

YAŴAJIGANYISYE YESU ŴAKUMKUYA ŴAKWE PAKWAMBA YA KUGALAWUKA MTIMA

11-12. Ana Yesu jwajiganyisye chichi ŵakumkuya ŵakwe pakusaka kwakamuchisya kumanyilila yakusatenda Atati ŵakwe pakwakululuchila ŵandu? (Alolesoni chiwulili chapachikuto.)

¹¹ Cha mma 100 C.E., Mesiya jwaliji ali asigele panandi kwika. Mpela mwajaŵechetele ngani jipite jila, Yehofa jwamkamulichisye masengo Yohane M’batisi soni Yesu pakwajiganya ŵandu kusosekwa kwa kugalawuka mtima.—Mat. 3:​1, 2; 4:17.

¹² Ndaŵi josope jaŵatendaga utumiki wakwe, Yesu ŵajiganyisye ŵakulijiganya ŵakwe yakusatenda  Yehofa pakwakululuchila ŵandu. Yesu jwatesile yeleyi mwakukamulichisya masengo chisyasyo chakupikanika chenene cha mwanache jwamsokonechele. Mwanacheju jwasagwile kutyoka pamlango pa achinangolo ŵakwe ni kuja kutendaga yakusakala. Nambo kaneko ‘lunda lwamyichile’ mwamti jwawujile kumangwakwe. Ana babagwe ŵatesile yamti uli? Yesu jwasasile kuti mwanacheju “pajwaliji chapakutalichila, babagwewo ŵam’weni ni ŵamtendele chanasa. Myoyo ŵamwutuchile ni kumkumbatila mwachinonyelo.” Kaneko jwaŵendile babagwewo naga mpaka amkunde kuti juŵe jwamasengo jwawo. Nambo babagwewo, ŵamkolasile kuti “mwanangu” mwamti ŵamkundile kuwujilasoni mu liŵasa lyawo. Babagwewo ŵatite, “Jwasokonechele nambo sambano jupatikene.” (Luk. 15:​11-32) Ngatukuyichila kuti Yesu mkanaŵe kwika pachilambopa, jwawonaga Atati ŵakwe ali mkwalosya chinonyelo ŵandu ŵajinji ŵaŵagalawukaga mtima pa yakulemwa yawo. Kusala yisyene, chisyasyo chajwakamulichisye masengo Yesuchi, chikusatukamuchisya kumanyilila kuti Atati ŵetu Yehofa ali ŵachanasa chekulungwa.

13-14. Ana ndumetume Petulo jwalijiganyisye yamti uli yakwamba kugalawuka mtima? Ana jwalakwe jwajiganyisye ŵane yamti uli panganiji? (Alolesoni chiwulili.)

¹³ Ndumetume Petulo jwalijiganyisye lijiganyo lyakusosekwa mnope kutyochela kwa Yesu pakwamba ya kugalawuka mtima soni kululuchila. Ndaŵi syejinji Petulo jwasosekwaga kumkululuchila, soni Yesu jwamkululuchile jwalakwe ni mtima wosope. Mwachisyasyo, Petulo ali amkanile Yesu kwa maulendo gatatu kuti ngakummanyilila, jwatengwiche mnope soni jwalijimbaga magambo. (Mat. 26:​34, 35, 69-75) Nambo panyuma pakuti Yesu ajimwiche ku chiwa, jwalinganyisye yakuwonegana ni Petulo paŵaŵili. (Luk. 24:​33, 34; 1 Akoli. 15:​3-5) Ngatukukayichila kuti pandaŵiji Yesu ŵamkululuchile Petulo soni ŵamlimbikasisye ndumetume jwakwe juŵagalawiche mtimaju.—Alole Maliko 16:7.

¹⁴ Yayamtendechele Petuloyi yamkamuchisye kuti nombenajo akombole kwajiganya ŵane pakwamba ya kugalawuka mtima soni kukululuchila. Pali pagambile kupita kandaŵi kamnono panyuma pa Pentekosite jwa mu 33 C.E., Petulo jwaŵechete ngani ku gulu jekulungwa ja Ayuda ŵangakulupilila.  Jwalakwe jwasalile jemanjajo kuti ŵamwuleje Mesiya. Nambope, mwachinonyelo jwalimbikasisye jemanjajo mwakwasalila kuti, “Myoyo mgalawuche mtima soni mchenje matala genu, ni chakulinga chakuti Yehofa amkululuchile yakulemwa yenu soni kuti ampe ndaŵi jakupumula.” (Mase. 3:​14, 15, 17, 19) Apatu, Petulo jwalosisye kuti kugalawuka mtima kukusamtendekasya mundu jwatesile chakulemwa kuchenga ndamo syakwe soni kuchenga kaganisye kakwe nikutanda kutenda yindu yakumsangalasya Mlungu. Petulo jwalosisyesoni kuti Yehofa chachityosya ulemwa wawo kapena kuti kuwutendekasya kuti ukawonechelasoni. Kaneko pali papitile yaka yejinji, Petulo jwalimbikasisye Aklistu kuti, “Yehofa . . . ngakusaka kuti jwine jwalijose ajonasiche nambo akusaka kuti wosope agalawuche mtima.” (2 Pet. 3:9) Ayitu, yikwamba kulosya kuti Yehofa akusiŵakululuchila Aklistu ŵatesile yakulemwa atamose yekulungwakulungwa naga akugalawuka mtima.

15-16. (a) Ana ndumetume Paulo jwalijiganyisye chamti uli pakwamba ya kululuchila? (1 Timoteyo 1:​12-15) (b) Ana mungani jakuyichisya tuchikambilana chichi?

¹⁵ Pachilambopa, ŵandu ŵajinji akusatenda yakusakala mwamti akusosekwa kugalawuka mtima soni kwakululuchila. Nambo yakusakala yakusatenda ŵanduyi nganiyiŵa yilandene ni yajwatesile Paulo jwa ku Taliso. Jwalakwe jwalagasisye mnope ŵandu ŵaŵamkuyaga Klistu. Mwamti Aklistu ŵajinji ŵayiwonaga kuti Saulo nganaŵa achenjile ni kugalawuka mtima. Nambotu, Yesu jwamanyililaga kuti Saulo mpaka achenje ni kugalawuka mtima. Pakwamba ya Saulo, Yesu jwatite, “Mundu jweleju ali mpela chida chakunyakulila lina lyangu.” (Mase. 9:15) Yesu jwayikene pakutenda chakusimonjesya pakusaka kumkamuchisya Saulo kuti agalawuche mtima. (Mase. 7:58–8:3; 9:​1-9, 17-20) Panyuma pakuti aŵele Mklistu, Saulo jwatandite kumanyika kuti ndumetume Paulo. Komboleka jwalakwe jwatesile yeleyi pakusaka kulosya kuyamichila chinonyelo soni chanasa chaŵamlosisye. (Aŵalanje 1 Timoteyo 1:​12-15.) Ndumetume Paulo jwele pandaŵijo jwasangalalaga mnope soni kuyamichila yindu yaŵamtendele jwasasile kuti, Mlungu “akumlosya umbone mtima pakusaka kumkamuchisya kuti mgalawuche mtima.”—Alo. 2:4.

¹⁶ Ana Paulo jwatesile wuli pajwapikene kuti mumpingo wa Chiklistu wa ku Kolinto mukutendekwa ndamo syakusakala? Yajwatesile Paulo pakusaka kwakamuchisya Aklistu achimjakwewo, yikusatujiganya chindu chakusosekwa mnope kuti Yehofa akusapeleka malangiso mwachinonyelo soni kusosekwa kwakulosya chanasa. Mwamti mungani jakuyichisya tuchikambilana mnope ngani jeleji.