1, 2. (a) Ana ŵakutumicila ŵa Yehofa akusajembeceya kuti cacipocela mbote syapi? (b) Ana cici cacikusatukamucisya kulolecesya pa mbote? (Alole ciwulili cacili penanipa.)

NDUMETUME Paulo jwakwete cembeceyo capenani cakulandana ni cakwetesoni Aklistu ŵasagulwe ni msimu masiku agano. Cembeceyo cakwe cili kupocela “mbote jakuŵilanjidwa kwinani ni Mlungu.” (Afi. 3:14) Jemanjaji akusajembeceya ndaŵi jacacilamulilaga ni Yesu Klistu mu Ucimwene wakwinani ni kamusyanganaga kuti ŵandu pacilambo capasi caŵe ŵamlama. (Ciu. 20:6) Kusala yisyene, kwa jemanjaji kuŵilanjidwa ni Mlungu uli upile wapenani mnope! Nombe ŵangondolo sine akwete cembeceyo cine. Jemanjaji akusajembeceya kuti cacipocela mbote ja umi wangamala pacilambo capasi soni cembeceyoci cikusiŵatendekasya kuŵa ŵakusangalala mnope.—2 Pet. 3:13.

² Paulo pakusaka kwakamucisya Aklistu acimjakwe kuti aŵepe ŵakulupicika kuti capocele mbote, jwasalile kuti, “Aŵice nganisyo syawo pa yindu yakwinani.” (Akolo. 3:2) Jemanjajo ŵasosekwaga kumbucila cembeceyo caŵakwete cakupocela mbote jakuja kwinani. (Akolo. 1:4, 5) Kusala yisyene, kuganicisya ya majali gasasile Yehofa  kuti cacapa ŵandu ŵakwe kukusakamucisya jemanjajo kulolecesya pa mbote jawo, cinga jakwawula kwinani kapena cembeceyo cakutama pacilambo capasi.—1 Akoli. 9:24.

3. Ana Paulo jwakalamwisye Aklistu acimjakwe ya cici?

³ Paulo jwakalamwisyesoni Aklistu acimjakwe pakwamba ya yindu yayikatendekasisye kulepela kuja kupocela mbote. Mwambone, jwawulembele mpingo wa ku Kolose yakwamba Aklistu ŵane ŵaŵalimbikasyaga acimjawo kuya cilamusi mmalo mwakulupilila Klistu. (Akolo. 2:16-18) Jwasasilesoni ya yindu yampaka yimtendekasye mundu kulepela kuja kupocela mbote soni yampaka atende kuti ayiŵambale. Yindu yakwe yili mpela, yamsese, kulekangana nganisyo ni acimjetu, soni yakusawusya ya m’liŵasa. Yaŵasalile Aklistu acimjakweyi mpakasoni yitukamucisye masiku agano. Sambano kwende tutagulilane yine mwa yindu yele Paulo ŵakalamwisye Aklistu ŵa ku Kolose.

4. Ligongo cici nganisyo syakumbila yamsese mpaka situlepekasye kuja kupocela mbote?

⁴ Pambesi pakwakumbusya abale ya cembeceyo cawo cambone mnope, Paulo jwalembile kuti, “M’yiwulaje sambano yakumbila ya mtima wenu ya cilambo capasi yayili mwa jemanja, mpela cikululu, yausakwa, yakusaka yangalumbana, kumbila yakusakala, soni umbombo.” (Akolo. 3:5) Nganisyo syakumbila yamsese mpaka siŵe syamacili mnope soni komboleka kutusokonasya mwausimu. Mwambone, m’bale jwine juŵatesile yamsese, pali papite kandaŵi paŵawujile kumpingo jwatite, “Nganisyo syakumbila yamsese syaŵele syamacili mnope mwamti nalepele kulilekasya, mpakana yayice pakusawusya.”

5. Ana mpaka tulicenjele camtuli ku yakutendekwa yampaka yitulinje kuti tutende yamsese?

⁵ Yili yakusosekwa mnope kuwucenjela mtima wetu kuti tuŵambale yakutendekwa yampaka yitulepelekasye kupikanila ndamo syapenani sya Yehofa. Mwambone, yikusaŵa yakamucisya kwa Aklistu ŵali pacitomelo kuliŵicila malile gakulosyana cinonyelo mpela kamulanakamulana, kumbatilana, kapena kutama pa malo pangawonecela. (Miy. 22:3) Mklistu mpaka alinjikwesoni kuti atende yamsese papite kutali kukukamula masengo kapena kumalonda kapenasoni naga akukamula masengo ni mundu jwanganaŵa jwamlume kapena jwamkongwe mjakwe. (Miy. 2:10-12, 16) Kuti alicenjele, akusosekwa kulimanyikasya kuti ali Jwamboni sya Yehofa, atendeje yindu mwakulicimbicisya, soni akumbucileje kuti naga akutanda kopana mpaka yiyikasye ngosi jekulungwa. Tukusosekwasoni kusamala pakutenda yindu patutengwice. Ligongo yeleyi mpaka yitutendekasye kusaka mundu jwampaka atunonyele. Mpaka yitutendekasyesoni kuŵa ŵakusacilila kupata mundu jwakuti atupikanicisye. Wawojo patengwice, awutucileje kuŵenda cikamucisyo kwa Yehofa, soni kwa Aklistu acimjawo kuti ŵakamucisye. Kutenda yeleyi kucakamucisya kuti akasalepela kuja kupocela mbote.—Aŵalanje Salimo 34:18; Miyambo 13:20.

6. Pakusagula yakusangalasya, ana tukusosekwa kumbucila cici?

⁶ Kuti tuyiwulaje yakumbila yakulemweceka, kapena kuŵeceta kwine, kuti tulece kumbila yakulemweceka, tukusosekwa kuŵambala yakusangalasya yakusakala. Yakusangalasya yejinji masiku agano yikusalimbikasya yindu yakusakala mpela yayatendekwaga m’misinda ja Sodomu ni Gomola. (Yuda 7) Ŵakupanganya yakusangalasyayi akusalimbikasya nganisyo syawo syakuyiwona yamsese mpela yambone, soni kuti nganiyikola yipwetesi yiliyose. Tukusosekwa kuŵa ŵakusamala kuti tukagambaga kusangalala ni yiliyose, ni yakulemweceka yakwe. Tusaguleje yakusangalasya yanganiyiŵa yitulepelekasisye kuja kupocela mbote ja umi wangamala.—Miy. 4:23.

7. Ana mumpingo wa Ciklistu mpaka mupagwe yakusawusya yamtuli ndaŵi sine?

⁷ Wosopewe tukusajiticisya kuti kuŵa mumpingo wa Ciklistu uli upile wekulungwa. Maloŵe ga  Mlungu gatukusalijiganya kumisongano jetu, nambosoni cinonyelo ni umbone mtima yatukusalosyana yikusatukamucisya kuti tuŵiceje nganisyo syetu pa mbote. Nambope, ndaŵi sine tukusalepela kupikangana pa yindu yine, mwamti naga ngasamala mpaka twasunjileje cakulukosi acimjetu. Yeleyi mpaka yisokonasye mkamulano pasikati petu.—Aŵalanje 1 Petulo 3:8, 9.

8, 9. (a) Ana tukusosekwa kola ndamo syapi kuti citupocele mbote? (b) Ana cici campaka citukamucisye kusunga mtendele ni Mklistu mjetu patulemwecesye?

⁸ Ana mpaka tutende wuli kuti tukasungaga cakulukosi ni kulepela kuja kupocela mbote? Ndumetume Paulo jwacondelele Aklistu ŵa ku Kolose kuti, “Mpela ŵandu ŵasagulwe ni Mlungu, ŵaswela soni ŵakunonyelwa, awale canasa cekulungwa, umbone mtima, kulinandiya, kufasa, ni kupilila. Ajendelecele kundililana ni kululucilana ni mtima wosope atamose jwine ali akwete ligongo lyakudandaulila ya mjakwe. Mpela muŵatendele Yehofa pakumkululucila ni mtima wosope, nombe jemanja mtendeje yeleyo. Nambo konjecesya pa yosopeyi, awale cinonyelo, pakuŵa cikusakamulanya ŵandu mwamacili kupunda cindu cilicose.”—Akolo. 3:12-14.

⁹ Kola umbone mtima ni cinonyelo mpaka kutukamucisye kuti twakululucileje ŵane. Mwambone, naga tukuyiwona kuti Mklistu mjetu atuŵecetele kapena kututendela yakupweteka, tukumbucileje ndaŵi jele nombe m’weji twaŵecetele kapena kwatendela ŵane yangaŵajilwa. Ana pandaŵijo nganitusangalala abale ni alongo ŵetu paŵatulosisye cinonyelo ni umbone mtima pakutukulucila? (Aŵalanje Mlaliki 7:21, 22.) Tukusayamicilasoni mnope ligongo lya umbone mtima wa Klistu pakutuŵika mumpingo wakamulana. (Akolo. 3:15) Tukusalambila Mlungu jumo, tukusalalicila yakulandana, soni ndaŵi syejinji tukusasimana ni yakusawusya yakulandana. Kwalosya ŵane umbone mtima ni cinonyelo mwa kwakululucila, nikuti tukukamucisya kuti Aklistu tuŵeje ŵakamulana soni kuti tuganicisyeje ya mbote jetu ja umi wangamala.

10, 11. (a) Ligongo cici jelasi jili jakogoya? (b) Ana mpaka tutende wuli kuti jelasi jikatulepelekasya kuja kupocela mbote jetu?

¹⁰ M’Baibulo mwana yisyasyo yine yakutukalamusya kuti jelasi mpaka jitulepelekasye kuja kupocela mbote. Mwambone, ligongo lya jelasi, Kaini jwam’wuleje mpwakwe Abele. Kola, Datani, ni Abilamu wamtendelaga jelasi Mose mwamti ŵamsisyaga. Nambosoni, Mwenye Sauli jwatandite kumtendela jelasi Daudi ligongo yindu yamjendelaga cenene, mpaka ŵasakaga kum’wulaga. Ni ligongo lyakwe Maloŵe ga Mlungu gakusati, “Papali jelasi ni mtima wakunonyela kangana, pakusaŵa ungapikangana ni yitendo yangalumbana yamtundu wuliwose.”—Yak. 3:16.

¹¹ Naga tukulingalinga kola cinonyelo ni umbone mtima, tuciŵambala kwatendela ŵane jelasi. Maloŵe ga Mlungu gakusati, ‘Cinonyelo cili cakuwusimana mtima soni cacanasa. Cinonyelo cangatenda jelasi.’ (1 Akoli. 13:4) Kuti tuŵambale jelasi kutamilicika munganisyo mwetu, tukusosekwa kumbucila kuti m’weji pampepe ni abale ni alongo wosope tuli yiŵalo ya mpingo wa Ciklistu. Mwelemu ni mwakusatuwonela Yehofa. Kola nganisyo syelesi, kucitukamucisya kuya maloŵe gakuti, “Ciŵalo cimo pacikupocela ucimbicimbi, yiŵalo yine yosope yikusasangalala nawo.” (1 Akoli. 12:16-18, 26) Nikuti, ŵane papatile upile winewakwe, tucisangalalaga nawo ngaŵaga kwatendela jelasi. Yonatani, mwanace jwa Mwenye Sauli, jwalosisye cisyasyo cambone panganiji. Jwalakwe nganamtendela jelasi Daudi paŵamsagwile kuti caŵe mwenye m’malo mwa jwalakwejo. Nambo ŵamlimbikasisye. (1 Sam. 23:16-18) Ana tukusaka kulosya umbone mtima ni cinonyelo mpela muŵatendele Yonatani?

12. Ana kamulicisya masengo songa sya m’Malemba mpaka kukamucisye wuli wosope mwiŵasa kuti capocele mbote?

¹² Kamulicisya masengo songa sya m’Baibulo mpaka kukamucisye liŵasa kuŵa lyamtendele,  lyakusangalala, soni mpaka yikamucisye wosope kuja kupocela mbote. Paulo jwasalile Aklistu ŵa ku Kolose songa syakamucisya maŵasa. Jwalakwe jwatite, ‘Jemanja acakongwe, mwapikanileje aciŵamkwenu, ligongo yeleyi yili yakuŵajilwa kwa ŵandu ŵakusiŵakuya Ambuje. Jemanja acalume, mjendelecele kwanonyela aciŵamkwenu, soni mkapilaga mtima mnope. Ŵanacemwe, mwapikanileje acinangolo ŵenu pa cilicose, pakuŵa kutenda yeleyi kukusasangalasya Ambuje. Mwanja baba, mkasimwatumbilikasya ŵanace ŵenu kuti akatenguka.’ (Akolo. 3:18-21) Mwangakayicila, mpaka asimicisye kuti kamulicisya masengo maloŵega mpaka kukamucisye liŵasa lyawo.

13. Ana Mlongo jwali paulombela ni jwamlume jwangakulupilila, mpaka atende wuli kuti capocele mbote pampepe ni ŵamkwakwe?

¹³ Komboleka kuti wawojo ali paulombela ni jwamlume jwangakulupilila soni mwine akusalipikana kuti ŵamkwawowo ngakwatendela yacilungamo. Ana cacitanda kangana nawo pakusaka kuti alece yayikwasakalisyayo? Naga kanganako kwatendekasisye ŵamkwawowo kucenga ndamo jawo, ana nikuti yeleyi mpaka yatendekasye kutanda usyesyene? Iyayi. Nambo naga akwacimbicisya mpela mtwe wa liŵasa, caciyikasya mtendele mwiŵasa mwawo, cacimsangalasya Yehofa, soni cacatendekasya ŵamkwawowo kutanda usyesyene ni kuja kupocela mbote wosope.—Aŵalanje 1 Petulo 3:1, 2.

14. Ana Mklistu jwali paulombela ni jwamkongwe jwangakulupilila akusosekwa kutenda cici naga ŵamkwakwewo ngakumcimbicisya?

 ¹⁴ Kombolekasoni kuti wawojo ali paulombela ni jwamkongwe jwangakulupilila, ni mwine akusayiwona kuti ŵamkwawowo ngakwacimbicisya. Ana cacakalipilaga pakusaka kulosya kuti wawojo ali bwana jwa panyumbapo? Ngakusosekwa kutenda yeleyi! Mlungu ŵasagwile wawojo kuti aŵe jwamlume jwambone jwakusosekwa kumsyasya Yesu. (Aef. 5:23) Yesu jwali mtwe wa mpingo ali jwakuwusimana mtima. (Luk. 9:46-48) Jwamlume mpaka ŵatendekasye ŵamkwakwe kutanda usyesyene naga akumsyasya Yesu.

15. Ana jwamlume jwa Ciklistu mpaka alosye wuli cinonyelo kwa ŵamkwakwe?

¹⁵ Yehofa akwasalila acalume kuti, ‘Mjendelecele kwanonyela aciŵamkwenu, soni mkapilaga mtima mnope.’ (Akolo. 3:19) Jwamlume jwacinonyelo akusiŵacimbicisya ŵamkwakwe soni kwapa lipesa lyakuŵeceta ya kumtima kwawo. (1 Pet. 3:7) Atamose kuti nganaŵa atesile yosope yakusaka jwamkongwejo, nambope mpaka asagule cenene yakutenda naga akwapikanila ŵamkwakwewo. (Miy. 15:22) Jwamlume ngakusosekwa kwalamula ŵamkwakwe kuti amcimbicisyeje. Jwamlume jwakusiŵanonyela ŵamkwakwe soni ŵanace ŵakwe, akusaŵa jwakusacilila kola liŵasa lyakutumicila Yehofa mwakusangalala soni kuti wosope capocele mbote ja umi wangamala.

16, 17. Mpela jwacinyamata, ana akusosekwa kutenda cici kuti akamulaneje ni acinangolo ŵawo?

¹⁶ Nambi wuli naga wawojo ali jwacinyamata soni akusalipikana kuti ngakukamulana ni acinangolo ŵawo ŵa Ciklistu? Yeleyi mpaka yasokonasye ni kutanda kuganisya kuti kutumicila Yehofa nganikuŵa kwakamucisya. Nambo naga akukunda kuti yeleyi yatendekasye kumleka Yehofa, caciyiwona kuti kucilamboku kwangali jwampaka ŵanonyele kupunda acinangolo ŵawo ŵakogopa Mlungu soni abale ni alongo.

¹⁷ Naga acinangolo ŵawo akusagamba kwaleka kuti atendeje yakusaka, ana nganaŵa aganicisye kuti ngakusamala ya wawojo? (Ahe. 12:8) Mwine litala lyakusakamulicisya masengo acinangolo ŵawo pakwajamuka ni lyalikwatendekasya kutenguka. M’yoyo mmalo mwakudandawula ni litalali, alinjeje kuganicisya kuti komboleka acinangolo ŵawo akwete magongo gakutendela yeleyi. Yeleyi yicakamucisya kuti akawutucila kuŵecetaga yakudandawula ni camukoco. Maloŵe ga Mlungu gakusati, ‘Mundu jwalunda akusalamulila pakamwa pakwe, soni mundu jwakumanyilila yindu akusaŵa jwakufasa.’ (Miy. 17:27) Akole cakulinga cakuti aŵe mundu jwamkomangale mu nganisyo, jwakombola kupocela cenene camuko soni jwangadandawula mnope ni mwaciyicile. (Miy. 1:8) Gali majali gekulungwa kola acinangolo ŵakusamnonyela Yehofa yisyesyene. Acinangoloŵa akusasacilila kuti jemanja cimpocele Mbote ja umi wangamala.

18. Ligongo cici wawojo ali ŵakusimicisya kuŵika meso gawo pa mbote?

¹⁸ Cinga tukwete cembeceyo cakwawula kwinani kapena cakutama ni umi wangamala pa cilambo capasi, jwalijose jwetuwe mpaka asangalaleje ni cembeceyo cakwete. Cembeceyoci cili cisyene, ligongo jwatulagwisye ali Mkupanganya jwetu. Pakwamba ya Paladayiso pa cilambo capasi, Mlungu ŵatite, “Cilambo capasi cicigumbala ni umanyilisi wa Yehofa.” (Yes. 11:9) Jwalijose jucacitamaga pa cilambo capasi cacijiganyidwaga ni Mlungu. Jelejitu jili mbote jambone jatukusosekwa kutendapo kandu kuti tukajipate. M’yoyo ndaŵi syosope tukusosekwa tukumbucileje yatulagwisye Yehofa, soni tukakunda cilicose kutulepelekasya kuja kupocela mbote!