1. Ana ndumetume Paulo jwalembile maloŵe gamtuli pakwakalamusya Aklistu ŵasagulwe?

NDUMETUME PAULO jwatukalamwisye kuti, “Mkasimkuyaga ndamo syakusakala sya ŵandu ŵa cilambo capasi pano.” (Alo. 12:2) Paulo jwalembele maloŵega Aklistu ŵa m’yaka 100 yandanda. Ligongo cici Paulo jwaŵecete yeleyi kwa acalume soni acakongwe ŵaŵaliji ali alipelece kala kwa Mlungu soni ŵaŵaliji ŵasagulwe ni msimu weswela?—Alo. 1:7.

2-3. Ana Satana akusasokonasya unasi wetu ni Yehofa camtuli, soni mpaka tutyosye camtuli yindu yakusakala “yayitamilicice” munganisyo mwetu?

² Paulo jwakwayidwaga mnope ligongo lyakuti Aklistu ŵane ŵakolaga nganisyo soni kwendela lunda lwa ŵandu ŵa m’cilambo cakulongoleledwa ni Satanaci. (Aef. 4:17-19) Yeleyi mpaka yitutendecelesoni m’weji. Satana ali jwakulamulila jwa cilambo capasici soni jwalakwe mpaka atende yiliyose pakusaka kutusokonasya. Mwacisyasyo, naga tuli mkusaka kuŵa ŵakumanyika kapena kuŵa ŵakusosekwa mnope, Satana akusakamulicisya masengo mpata welewu ni kututendekasya konanga unasi wetu ni Yehofa. Satana akusakamulicisyasoni masengo yindu yatwalijiganyisye ku sukulu, ndamo jetu kapena acimjetu ŵatusyungulile pakusaka kuti tuganisyeje mpela mwakusaganicisya jwalakwejo.

³ Ana yili yakomboleka kutyosya yindu ‘yayatamilicice mnope’ munganisyo mwetu? (2 Akoli. 10:4) Pakwanga Paulo jwatite, “tukutyosya nganisyo silisyose soni cindu cilicose  cakutindana ni kummanyilila Mlungu, soni tukugomeka nganisyo silisyose ni kusitaŵa mpela mkayidi kuti sipikanileje Klistu.” (2 Akoli. 10:5, NW.) Ni cikamucisyo ca Yehofa yili yakomboleka kutyosya nganisyo syakusakalasi. Mpela mwayikusaŵela kuti mtela wukusatyosyaga macili ga ulwele, nombesoni Maloŵe ga Mlungu mpaka gatukamucisye kutyosya yindu yakusakala ya m’cilambo ca Satanaci yayili munganisyo mwetu.

4. Ana ni kucenga kwapi kwatwasosekwe kutenda pandaŵi jitwagambile kulijiganya usyesyene?

⁴ Aganicisye yindu yaŵasosekwaga kucenga pandanda ali agambile kulijiganya kwene usyesyene wa m’Maloŵe ga Mlungu ni kusagula kumtumicila Yehofa. Ŵane mwa m’weji kuti tuyice pakumtumicila Yehofa twasosekwe kuleka yindu yakusakala yatwatendaga. (1 Akoli. 6:9-11) Kusala yisyene, tukusayamicila ligongo lyakuti Yehofa ŵatukamucisye kuti tukombole kusileka ndamo syakusakalasi.

5. Mwakamulana ni lilemba lya Aloma 12:2, ana ni yindu yiŵili yapi yakutusalila kuti tutendeje?

⁵ Ngatukusosekwa kulipikana kuti basi ngatukusosekwa kucenga panyuma pakulijiganya usyesyene. Atamose kuti twalesile kutenda maulemwa gekulungwa gatwatendaga mkanituŵe kubatiswa, tukusosekwa kuŵambala kutenda yindu yampaka yitutendekasye kuwujilasoni ku yitendo yakalayo. Ana mpaka tutende wuli yeleyi? Paulo jwasasile kuti, “Akajigalilaga lunda lwa ndaŵi ajino, nambo agalawuce mwakucenga nganisyo syawo.” (Alo. 12:2, NW.) Kuti yeleyi yikombolece, tukusosekwa kutenda yindu yiŵili ayi. Candanda, tukusosekwa kuŵambala “kujigalila lunda” lwa kucilamboku. Cindu caŵili, tukusosekwa “kugalawuka” mwakucenga nganisyo syetu.

6. Ana tukulijiganya cici pa maloŵe ga Yesu gagakusimanikwa pa Mateyu 12:43-45?

⁶ Kucenga kwaŵasalaga Paulo ngaŵa kwakusape. Kucengaku kukusakwaya umi wetu wosope. (Alole libokosi lyakuti “ Ana Twacenjile Yisyesyene Kapena Twagambile  Kuŵa Mpela Tucenjile?”) Tukusosekwa kucenga yisyesyene kaganisye ketu, ndamo syetu sisyesyene, mwatukusapikanila mumtima nambosoni yindu yatukusakumbilaga. Jwalijose akusosekwa kuliwusya kuti, ‘Ana kucenga kwangutenda pakusaka kumsyasya Mklistuku, kuli kwakwamba kulilosya, kapena ngutenda yeleyi kutyocela pasi pamtima soni mu nganisyo mwangu?’ Kupata kwanga kwa ciwusyoci kuli kwakusosekwa mnope. Mwakamulana ni maloŵe gagali pa Mateyu 12:43-45, Yesu jwalosisye cindu catukusosekwa kutenda. (Aŵalanje.) Maloŵega gakutujiganya cindu cine cakusosekwa mnope, cakuti nganikuŵa kwakwanila gamba kutyosya nganisyo syakusakala, nambo patutyosisye tukusosekwa kuŵika nganisyo syakusasiwona Mlungu kuti sili syakuŵajilwa.

7. Ana mpaka tucenje camtuli nganisyo kapena mtima wetu?

⁷ Ana yili yakomboleka kucenga mtima soni nganisyo syetu? Maloŵe ga Mlungu gakusati, “Mitima ni nganisyo syenu sicenje kuŵa sya sambano, nipo m’wale umundu wasambano, ŵawupanganyisye Mlungu mwakulandana najo. Pelepo timciŵa ŵakulungamika ni ŵaswela mtima kusyesyene.” (Aef. 4:23, 24) Yili yakomboleka kucenga mwatuŵelele nambo kutenda yeleyi nganijiŵa ngani jang’anda. Tukusosekwa kutenda yejinji kupunda gamba kuŵambala nganisyo syakusakala nambosoni kuleka kutenda yindu yakusakala. Tukusosekwa kucenga “mitima ni nganisyo” syetu. Yeleyi yikupwatikapo kucenga yindu yatukusayikumbilaga, ndamo syetu nambosoni magongo gatukusatendela yindu yine yakwe. Kutenda yeleyi kukusasosekwa macili.

8-9. Ana yaŵasimene nayo m’bale jwine yikulosya camtuli kusosekwa kwa kucenga nganisyo nambosoni mtima wetu?

⁸ Kwende tulole cisyasyo ca m’bale jwine juŵaliji jwaciwawa. M’baleju jwanonyelega kumwa ukana soni kutimba ŵandu, nambo kaneko pajwagambile kubatiswa, ŵalesile yosopeyi. Yeleyi yatendekasisye kuti ŵandu ŵaŵatamaga mu mkuli wakumangwawo apikane usyesyene. Panyuma pakubatiswa, cilo cine jwasimene ni cakulingwa canganacijembeceyaga. Lisiku line mundu jwine juŵakolelwe jwayice kumangwakwe m’baleju ni cakulinga cakuti ampute. Pandanda pene m’baleju jwakanile kumenyanako. Nambo kaneko mundu jwaukana jula paŵatandite kuŵeceta yindu yakumnyosya Yehofa, m’baleju yamsakalisye mnope mwamti ŵalepele kuwukamula mtima mpaka ŵamputile mundujo. Ana ligongo cici m’baleju jwatesile yeleyi? Atamose kuti kulijiganya Baibulo kwamkamucisye kuleka ndamo sya ciwawa, nambo jwalakwe nganacenga nganisyo ni mtima wakwe.

⁹ Atamose kuti yaliji m’yiyi, m’baleju nganawujila munyuma pakucenga. (Mis. 24:16) Ni cikamucisyo ca acakulungwa ŵa mumpingo, ŵapitilisye kwawulape pasogolo. M’baleju mpaka ŵayikene pakuŵa jwamkulungwa jwa mumpingo. Lisiku line ligulo ali pasa pa Nyumba ja Ucimwene, m’baleju jwasimene ni cakulingwa cakulandana ni cilacila. Mundu jwinesoni juŵakolelwe ukana ŵasakaga kuti ampute jwamkulungwa jwa mumpingo jwine. Ana m’baleju jwatesile wuli? Mwakuwusimana mtima soni mwakulinandiya, jwalakwe ŵamtamice mtima pasi jwaukanajo soni ŵampecesye kumangwakwe. Ana ligongo cici m’baleju ŵatesile yindu mwakulekangana ni pandanda pala? M’baleju ŵacenjile sambano nganisyo ni mtima wakwe. Jwalakwe jwaliji mundu jwamtendele soni jwakulinandiya. Kutenda yeleyi kwatendekasisye kuti wosope amlumbe Yehofa.

10. Ana tukusosekwa kutenda cici kuti tukombole kucenga nganisyo nambosoni mtima wetu?

¹⁰ Kucengaku kwangagamba kutendekwa mwajikape. Kuti yikombolece tukusosekwa ‘kutenda yakomboleka’ kwa yaka yejinji. (2 Pet. 1:5) Kucengaku kwangatendekwa ligongo lyakuti tutemi “mu usyesyene” kwa yaka yejinji. Tukusosekwa kulimbicila kuti  tucenje nganisyo syetu nambosoni mtima wetu. Pana yindu yakusosekwa mnope yampaka tutende kuti tukombole kucengaku. Kwende tulole yine mwa yinduyi.

11. Ana lipopelo mpaka litukamucisye camtuli kucenga nganisyo nambosoni mtima wetu?

¹¹ Lipopelo lili cindu candanda cakusosekwa mnope. Tukusosekwa kupopela mpela mwaŵatendele jwamasalimo. Jwalakwe jwatite, “Ambanganyicisye une mtima weswela, conde Mlungu aŵice mwa une mtima wasambano ni wakutamilicika.” (Sal. 51:10) Tukusosekwa kuwuwona umbone wa kucenga nganisyo nambosoni mtima wetu kwineku tuli mkumŵenda Yehofa kuti atukamucisye. Ana mpaka tuŵe ŵakusimicisya camtuli kuti Yehofa mpaka atukamucisye kucenga? Mpaka tulimbikasidwe mwakulola cilanga caŵatesile ni Aisalaeli ŵaŵaliji ŵakumula mitima mundaŵi ja Esekieli. Jwalakwe jwatite, “Tinjapa jemanjajo mtima wasambano ni nganisyo sya sambano . . . ni kwapa mtima wakupikanila.” (Esek. 11:19) Yehofa jwaliji jwakusacilila kwakamucisya Aisalaeli kuti acenje, mwamti m’wejisoni ali jwakusacilila kutukamucisya.

12-13. (a) Mwakamulana ni lilemba lya Salimo 119:59, ana tukusosekwa ganicisya mnope ya cici? (b) Ana akusosekwa kuliwusya yiwusyo yapi?

¹² Kuganicisya mwakusokoka cili cindu caŵili cakusosekwa mnope. Patukuŵalanga Maloŵe ga Mlungu mwakusamala, tukusosekwa kupata ndaŵi jakugaganicisya mwakusokoka ni cakulinga cakuti tumanyilile yindu yatukusosekwa kucenga. (Aŵalanje Salimo 119:59; Aheb. 4:12; Yak. 1:25) Tukusosekwa kuyimanyilila yitendo yiliyose yayili yakamulana ni lunda lwa kucilamboku. Tukusosekwa kwiticisya kuti pana yindu yine yayikusatulema kaneko ni kongolela yeleyo.

¹³ Mwacisyasyo, mpaka aliwusye kuti, ‘Ana ngwete mtima wakwatendela ŵane jelasi?’ (1 Pet. 2:1) ‘Ana ngusaliwona kuti ndili jwakusosekwa mnope kwapunda ŵane ligongo lya kwangutyocela, majiganyo gangu kapena winji wa cipanje cangwete?’ (Mis. 16:5) ‘Ana ngusinawona ŵandu ŵakwete yindu yakulekangana ni yangwete kuti ali ŵangasosekwa, kapena ngusinawona kuŵa ŵakutuluka ligongo lyakuti ali ŵamtundu wine?’ (Yak. 2:2-4) ‘Ana ngusanonyela yindu ya Satana yayili m’cilamboci?’ (1 Yoh. 2:15-17) ‘Ana ngusanonyela yindu yakusakala kapena yakusangalasya yaciwawa?’ (Sal. 97:10; 101:3; Amo. 5:15) Pajanjile yiwusyo yeleyi mpaka amanyilile mbali jakusosekwa kucenga. Naga tuli mkukombola kucenga yindu ‘yayatamilicice mnope’ munganisyo mwetu, tucasangalasya Atati ŵetu ŵakwinani.—Sal. 19:14.

14. Ligongo cici kusagula acimjetu ŵambone kuli kwakusoseka?

¹⁴ Kusagula acimjetu ŵambone cili cindu catatu cakusosekwa mnope. Cinga tukumanyilila kapena iyayi, yitendo ya ŵandu ŵatukusakunguluka nawo yikusatukwayaga. (Mis. 13:20) Nambope, atamose yili m’yoyo mpaka tupate acimjetu ŵambone ku misongano jetu ja Ciklistu. Kweleku ni kwampaka tulimbikasidwe soni “kunonyelana ni kutenda yambone.”—Aheb. 10:24, 25.

15-16. Ana Satana akusatenda wuli pakusaka kucenga kaganisye ketu?

¹⁵ Tukaliŵalila kuti Satana akusasakaga kutucenga kaganisye ketu. Jwalakwe akusakamulicisya masengo nganisyo silisyose pakusaka konanga kaganisye ketu kambone kakakusakomboleka ligongo lya Maloŵe ga Mlungu.

¹⁶ Satana akupitilisya kuwusya ciwusyo mpela caŵamŵusisye Hawa ali mu mgunda wa Edeni, cakuti, “Ana yakuwona kuti Mlungu ŵatite . . . ?” (Gen. 3:1) M’cilambo cakulongoleledwa ni Satanaci, tukusapikanaga ŵandu ali mkuwusya yiwusyo yakutendekasya kayicila  mpela yakuti, ‘Ana yili yisyene kuti Mlungu ngakusakunda kulombana kwa acalume kapena acakongwepe? Ana yili yisyene kuti Mlungu jwangasakaga kuti tusangalalileje Kilisimasi soni lisiku lyakupagwa? Ana yili yisyene kuti Mlungu akusasakaga kuti tukaneje kutajidwa miyasi? Ana yili yisyene kuti Mlungu jwali jwacinonyelo akusasakaga kuti tuŵambaleje kunguluka ni ŵakunonyelwa ŵetu ŵaŵatyosisye mumpingo?

17. Ana tukusosekwa kutenda cici jwine pakutuwusya yiwusyo yakwayana ni yatukusakulupililaga, pakusaka kututendekasya kuti tukayicileje? (b) Ana lilemba lya Akolose 2:6, 7, likulosya kuti mpaka papagwe yakuyicisya yamtuli?

¹⁷ Tukusosekwa kwikutila ni yatukusakulupililaga. Naga tuli ngatukupata kwanga kwa yiwusyo yakusosekwa mnope yakwayana ni yindu yatukusakulupililaga, mpaka tutande kayicila naga yatukusakulupililagayo yili yisyesyene. Kayicilaku mpaka kutendekasye kuti cikulupi soni kaganisye ketu kajonasice. Sambano, ana tukusosekwa kutenda cici? Maloŵe ga Mlungu gakusatusalila kuti tukusosekwa kucenga kaganisye ketu ni cakulinga cakuti tuŵe ŵakupakombola kumanyilila “yakusaka Mlungu nipo timcimanyilila yele yili yambone ni yakumsangalasya jwalakwe.” (Alo. 12:2) Naga tuli mkuŵalanga Baibulo mwakutamilicika, mpaka tuŵe ŵakusimicisya kuti yatukulijiganya m’Baibulo yili yisyesyene. Mpaka tusimicisyesoni kuti ndamo sya Yehofa sili syambone. Kaneko, mpela citela cacikwete miciga jakulimbangana, tuciŵa “ŵakulimba m’cikulupi.”—Aŵalanje Akolose 2:6, 7, NW.

18. Ana cici campaka citukamucisye kuŵambala yindu yakusakala yayili m’cilambo ca Satanaci?

¹⁸ Pangali mundu jwine jwampaka alimbisye cikulupi cawo. M’yoyo, akusosekwa kupitilisya kucenga kaganisye kawo soni mtima wawo. Akusosekwa kuŵenda msimu wa Yehofa kuti wakamucisye. Aganicisyeje mwakusokoka soni kupitilisya kuwungunya cenene kaganisye kawo soni magongo gagakusatendekasya kutenda yine yakwe. Asaguleje acimjawo ŵambone ŵampaka ŵakamucisye kucenga kaganisye kawo. Naga akutenda yeleyi, caciŵambala yindu yakusakala soni cacikombola kucipunda “cilicose cakutindana ni kummanyilila Mlungu.”—2 Akoli. 10:5.