SANJA JA MLONDA (JAKULIJIGANYILA) June 2019
Magasini ajino jikwete ngani syakulijiganya mu Ogasiti 5–Sepetemba 1, 2019
“Msamale Kuti Jwine Akasamkamula Jemanja”
Satana akusamanyilila cenene kwaloŵesya ŵandu. Ana jwalakwe akusatusokonasya camtuli kuti tumlece Yehofa?
Tutyosyeje Nganisyo Silisyose Syakutindana ni Kummanyilila Mlungu
Yindu yatwasimene nayo munyuma, ndamo jetu nambosoni majiganyo yikusakwaya kaganisye ketu. Ana mpaka tutyosye camtuli yindu yakusakala “yayitamilicice” munganisyo mwetu
Tumdalileje Yehofa Patukulagasika Mnope Nganisyo
Kulagasika nganisyo kwa ndaŵi jelewu mpaka kujonanje cilu cetu soni kaganisye ketu. Mpaka tulijiganye yejinji patukuganicisya yaŵatite Yehofa pakwakamucisya ŵakutumicila ŵakwe ŵakala kumalana ni kulagasika nganisyo.
Twakamucisyeje Ŵane Kuti Akombole Kumalana ni Kulagasika Nganisyo
Loti, Yobu soni Naomi ŵatumicile Yehofa mwakulupicika. Nambope jemanjaji ŵapilile mundaŵi jaŵasimanaga ni yakusawusya. Ana mpaka tulijiganye cici kutyocela pa yaŵasimene nayo jemanjaji?
Ana Mpaka Tulicenjele Camtuli ku Yitega ya Satana
Ŵakutumicila ŵajinji ŵa Yehofa atanjile m’citega cakulolela yakuŵagula. Ana mpaka tuŵambale camtuli ndamo jakusakalaji?
Mpukutu Wakalakala “Wetambasukule”
Mu 1970, ŵandu ŵakuwukula yindu ya mmasame ŵasimene mpukutu wepye ni moto soni wawasililice pasi ku Ein Gedi ca ku Isalaeli. Ŵandu ŵakamulicisye masengo makina gakulolela yindu yamwanamwana mnope (3-D), pakusaka kulola cenene yayalembedwe mu mpukutuwo, yayatendekasisye kuti yiŵe mpela “wetambasukule.” Ana panyuma pakuwulola mpukutuwu ni makina gakulolela yindu gala, ŵapatile yamtuli?
