Twatendeleje canasa “Ŵandu ŵa Mitundu Josope”
YESU paŵaliji ni ŵakulijiganya ŵakwe ŵajiganyisye mwampaka alalicilile ngani syambone. Jwasalilesoni kuti ngaŵa wosope ŵampaka apocele utenga wa Ucimwene. (Luk. 10:3, 5, 6) Patuli mu undumetume mpaka tusimane ni ŵandu ŵakukana utenga wetu. Ŵandu ŵane ŵatukusasimana nawo akusaŵa ŵawukali soni akusatuŵecetela yacipongwe. Ligongo lya yeleyi mpaka yiŵe yakusawusya kwa m’weji kulosya canasa kwa wosope ŵatukusitwalalicila.
Mundu jwacanasa akusamanyilila yakusoŵa ya ŵane soni akusasacilila kwakamucisya ŵandu ŵane. Nambope, naga lung’wanu lwakwatendela canasa ŵandu ŵatukusasimana nawo mu undumetume lukunandipa, mpaka tutandesoni kunandiya mtawu wetu wakusaka kwakamucisya. Nambo naga tukwatendela ŵandu canasa, yikusaŵa mpela kuti tukukwisilila sasu pamoto kuti ukasima. Nombe nawo undumetume wetu ukusalimba naga tukwatendela ŵane canasa.—1 Ates. 5:19.
Ana cici campaka citukamucisye kuŵa ŵacanasa atamose kuti mpaka yiŵe yakusawusya kutenda m’yoyo? Kwende tulijiganye yisyasyo yitatu yampaka yitukamucisye kuti tuŵeje ŵacanasa. Cisyasyo cakwe cili ca Yehofa, Yesu soni Paulo.
AJIGALILEJE CANASA CA YEHOFA
Kwa yaka masawusande gejinji, Yehofa aŵele mkupilila ligongo lya kunyosyedwa kwa lina lyakwe. Nambo jwalakwe aŵele mkwendelecela “kwatendela canasa ŵandu ŵangayamicila soni ŵakusakala.” (Luk. 6:35) Ana jwalakwe alosisye wuli canasa? Jwalakwe ali jwakuwusimana mtima. Yehofa akusasaka kuti “ŵandu ŵa mitundu josope” akulupuce. (1 Tim. 2:3, 4) Atamose kuti Yehofa akusiŵaŵenga ŵakusakala, nambo akwawona ŵandu kuŵa ŵakusosekwa mnope soni jwangasaka kuti jwalijose cawulajidwe.—2 Pet. 3:9.
Yehofa akumanyilila cenene kuti Satana ali jwakalamuka pakwatendekasya ŵandu kuti akulupilileje yaunami. (2 Akoli. 4:3, 4) Ŵajinji aŵele mkwiganyidwa yaunami yakwamba Mlungu kutandila ali ŵanace. M’yoyo yikusaŵa yakusawusya kuti ajiticisye usyesyene. Nambo Yehofa ali jwakusacilila kwakamucisya ŵandu ŵeleŵa. Ana tukumanyilila camtuli yeleyi?
Kwende tulole mwele Yehofa ŵawonelaga ŵandu ŵa mu msinda wa Ninefe. Mwangasamala kandu kuti ŵanduŵa ŵatendaga ya ciwawa, nambo Yehofa ŵamsalile Yona kuti, “Ana une kumbali jangu nganguŵajilwa kuwutendela canasa msinda wa Ninefe wawuli wekulungwa, mwamuli ŵandu ŵakupunda 120,000, ŵangakumanyilila ata panandi kulekanganya mkono wawo wakumlyo ni wakumciji?” (Yona 4:11) Yehofa ŵatendele canasa ŵandu ŵa mu msinda wa Ninefe ŵanganamanyililaga yisyesyene yakwe yakwamba jwalakwe mwamti ŵamtumile Yona kuti akakalamusye ŵanduwo.
M’wejisoni tukusitwawona ŵandu kuŵa ŵakusosekwa mnope mpela mwakusiŵawonela Yehofa. Mpaka tujigalile cisyasyo ca jwalakwe mwakuŵa ŵakusacilila kwajiganya ŵane kumanyilila ya Yehofa atamose ali mkuwoneka kuti ngakusaka kupikanila usyesyene.
AJIGALILEJE CANASA CA YESU
Mpela Atatigwe, Yesu jwatendelaga canasa ŵandu ligongo lyakuti, “Ŵaliji ŵagwagucegwaguce soni ŵakwasika mpela ngondolo syangali mkucinga.” (Mat. 9:36) Yesu jwapikanicisye ligongo lyakwe ŵanduŵa ŵaliji mu ndamo jeleji. Lyaliji ligongo lyakuti acimlongola ŵawo ŵa dini ŵatendelaga ngalwe soni ŵajiganyaga yaunami. Atamose kuti Yesu jwamanyililaga kuti ŵandu ŵakwete magongo gakwalepelekasya kupikanila utenga wakwe, nambo jwalakwe jwajendelecele “kwajiganya yindu yejinji.”—Maliko 4:1-9.
Akasatenguka naga mundu jwine ngakulosya lung’wanu pa ulendo wandanda
Ŵandu akusapocela cenene usyesyene naga yindu pa umi wawo yicenjile
Naga ŵandu ngakupikanila utenga wetu, tukusosekwa kulinga kumanyilila ligongo lyakwe ngakusaka kupikanila. Ŵane akusakola nganisyo syakulemweceka ni yajikusasala Baibulo, mwine ligongo lyakuti pakwete paŵaweni ŵane ŵakusalikolanga kuti Aklistu ali mkutenda yakusakala. Kombolekasoni kuti ŵane aŵele mkwiganyidwa yaunami pa yindu yatukusakulupilila. Nambope ŵane mpaka atendeje woga kuti ŵacibale kapena ŵandu ŵane mumkuli wakutama mpaka ŵaseceje naga ali atupocele m’nyumba syawo.
Ŵandu ŵane ŵatukusasimana nawo mu undumetume akusaŵa kuti asimene ni yindu yakogoya mnope pa umi wawo. Mlongo jwine jwali m’mishonale lina lyakwe Kim jwasasile kuti, “Ŵandu ŵajinji mumkuli mwetu ŵakulupwice pangondo nambo yindu yawo yosope yajonasice. Jemanjaji akusalipikana kuti nganakola cembeceyo cilicose ca msogolo. Akusaŵa ŵatenguce soni ŵangasaka kumkulupilila jwalijose. Ŵandu ŵajinji mu mkuliwu akusakana kupikanila utenga wetu patuyice kuti twalalicile. Pandaŵi jine, ŵandu ŵanjimucile mwamti msyene nyumba janalalicilagajo ŵanjogoyisye ni cikwakwa.”
Ana Kim jwajendelecele wuli kulosya canasa mwangasamala kandu ni yindu yaŵasimene nayoyi? Jwalakwe jwaŵecete kuti, “Pangutendeledwa yacipongwe, ngusalinga kukumbucila lilemba lya Miyambo 19:11, lyalikusati, ‘Lunda lukusamtendekasya mundu kuŵa jwangatumbila citema.’ Kukumbucila yaŵele mkusimana nayo ŵandu ŵa mu mkuli mwetu, yikusangamucisya kwendelecela kwalosya canasa. Ngaŵa kuti wosope ŵatukusasimana nawo akusatupocela cenene. Nambo mu mkuliwu mwanasoni maulendo gakuwilisya gambone.”
Tukusosekwa kuliwusya kuti, ‘Yikaŵe kuti ngangumanyilila usyesyene, ana ningajangaga wuli Ŵamboni sya Yehofa ali ayice kukulalicila?’ Mwambone, ana yikaliji wuli yikaŵe kuti salilidwe mwakuwilisyawilisya yaunami yakwamba Mboni sya Yehofa? Kombolekasoni kuti tukajangaga mwacipongwe soni tukasosecele kutendeledwa canasa. Yesu jwasasile kuti tukusosekwa kwatendela ŵane mwatukusacila m’weji kutendeledwa. M’yoyo, tukusosekwa kulingalinga kwapikanicisya mwakupikanila ŵane mumtima, ni kwatendelaga canasa atamose kuti kutenda yeleyi mpaka kuŵe kwakusawusya.—Mat. 7:12.
AJIGALILEJE CANASA CA PAULO
Ndumetume Paulo ŵalosyaga canasa atamose kwa ŵandu ŵaŵasisyaga utenga wakwe. Ligongo cici jwatendaga yeleyi? Ligongo lyakuti jwalakwe jwakumbucilaga yajwatendaga pandanda. Jwalakwe jwasasile kuti, “Naliji jwakunyosya Mlungu soni jwakwalagasya ŵandu nambosoni jwacipongwe. Nambope, natendeledwe canasa ligongo naliji jwangamanyilila cilicose soni jwangali cikulupi.” (1 Tim. 1:13) Jwalakwe jwamanyililaga kuti Yehofa soni Yesu ŵamlosisye canasa cekulungwa. Yeleyi yamtendekasyaga kwapikanicisya ŵandu ŵaŵakanaga kupocela utenga wakwe, ligongo pa ndaŵi jine jwalakwe jwatendagasoni m’yoyo.
Pandaŵi jine, Paulo jwasimene ni ŵandu ŵaŵakwete cikulupi cakulimba pa yindu yaunami. Ana jwalakwe jwatesile wuli? Lilemba lya Masengo 17:16 likusasala kuti jwalakwe paŵaliji ku Atene, “mtima wakwe wampwetece mnope pakulola kuti mu msindamo mugumbele ni milungu jakupanganyidwa ni ŵandu.” Mwangasamala kandu ya yeleyi, Paulo jwakamulicisye masengo yaŵayiweniyi pakusaka kwayika ŵandu pamtima ni utenga wambone. (Mas. 17:22, 23) Jwalakwe jwacenjile kalalicile kakwe, ni cakulinga cakuti ŵakamucisye ŵanduŵa kumanyilila yisyesyene yakwe mwakulekangana ni yaŵakulupililaga kuti “mulimose mwampaka yiŵele ŵakulupusye ŵane.”—1 Akoli. 9:20-23.
Mpaka tujigalile cisyasyo ca Paulo patusimene ni ŵandu ŵakwete nganisyo syakulemweceka kapena yikulupi ya unami. Mpaka tukamulicisye masengo yatukumanyilila yakwaya ŵanduŵa ni kwakamucisya kuti alijiganye “ngani syambone sya yindu yambone.” (Yes. 52:7) Mlongo jwine lina lyakwe Dorothy jwasasile kuti, “Mu mkuli wetu, ŵandu ŵajinji ŵajiganyidwe kuti Mlungu ali jwangalwe. Ngusinayamicila ligongo lyakola cikulupi cakulimba, kaneko ngusinasalila kuti awugule Baibulo jawo kuti alole yajikusasala pakwamba ya cinonyelo ca Yehofa soni yalagucisye msogolo.”
“AJENDELECELE KUCIGOMEKA CAKUSAKALA PAKUTENDA YAMBONE”
Patukwendelecela kuŵa “m’masiku gambesi,” ni pacituyiwoneje kuti ndamo sya ŵandu ŵajinji sikwendelecela “kusakalilasakalilape.” (2 Tim. 3:1, 13) Nambo tukakunda kuti yeleyi yitulepelekasye kwatendela ŵane canasa kapena kuleka kuŵa ŵakusangalala. Yehofa mpaka atupe macili gakutukamucisya “kwendelecela kucigomeka cakusakala pakutenda yambone.” (Alo. 12:21) Mpayiniya jwine lina lyakwe Jessica, jwasasile kuti, “Ndaŵi syejinji mu undumetume ngusasimana ni ŵandu ŵakunyada soni ŵakusatusekaga ligongo lya utenga watukulalicila. Yeleyi mpaka yiŵe yakutengusya. Nambo patugambile kupelegana moni ni msyenenyumba, ndaŵi jijojo ngusimbopela kwa Yehofa camumtima kuti angamucisye kum’wona mundujo mwakusam’wonela Yehofa. Yeleyi yikusangamucisya kuti ngasikosyaga mnope nganisyo syangu nambo kulola yampaka ndende kuti namkamucisye mundujo.”
Tukusalingalinga kusosasosa wosope ŵali ŵakuŵajilwa kuja kupocela umi wangamala
Pali papite ndaŵi, ŵandu ŵane akusakunda kulijiganya usyesyene
Tukusosekwasoni kwalimbikasya abale ni alongo ŵetu patujinjile nawo mu undumetume. Jessica jwasasile kuti, “Pandili mu undumetume ni mjangu, jwangakunda kuti tugambeje kuŵeceta ya yakutengusya yatusimene nayo. M’malo mwakwe ngusalinga kucenga yatukuŵecetanayo nikutandisya ngani syambone. Mwambone, yakuyicisya yambone yakwika ligongo lya utenga wetu atamose kuti ŵandu ŵane akusatusisya.”
Yehofa akusamanyilila cenene yakusawusya yatukusasimana nayo mu undumetume. Nambo jwalakwe akusaŵa jwakusangalala mnope patukujigalila canasa cakwe. (Luk. 6:36) Tukumanyilila kuti Yehofa ngasajendelecela kulosya canasa kwa ŵandu mpaka kalakala. Nambo mpaka tukole cikulupi cakuti jwalakwe akumanyilila ndaŵi jisyesyene jakwajonanjila ŵandu ŵakusakala. M’yoyo, masengo getu gakulalicila gakusosekwa kutendekwa mwacitema. (2 Tim. 4:2) Kwende tujendelecele kulalicila mwamtawu soni kola canasa cisyesyene kwa “ŵandu ŵa mitundu josope.”
