1-3. (a) Ana komboleka kuti Salimo 147 jalembedwe pandaŵi japi? (b) Ana mpaka tulijiganye cici patukuŵalanga Salimo 147?

NAGA mundu jwine atesile cenene masengo ganegakwe kapena alosisye ndamo jambone mnope jaciklistu, tukusasosekwa kum’yamicila. Naga tukusitwayamicila ŵandu, kuli wuli Yehofa Mlungu! Mpaka tum’yamicile Mlungu ligongo lya macili gakwe gekulungwa gatukusagawona mu yakupanganyikwa yakwe, kapena ligongo lya cinonyelo cakwe pa ŵandu caŵacilosisye mwakupeleka Mwanagwe mpela mbopesi ja ciwombolo.

² Juŵalembile Salimo 147 ŵasacililaga mnope kumlumba Yehofa. Jwalakwe ŵasalilesoni ŵane kuti amlumbe nawo Mlungu.—Aŵalanje Salimo 147:1, 7, 12.

³ Ngatukummanyilila juŵalembile Salimo 147, nambo komboleka kuti juŵalembileju ŵatemi ni umi pandaŵi jele Ayisalayeli ŵatyocelaga ku ukapolo ku Babulo kuwujila kumangwawo ku Yelusalemu. (Sal. 147:2) Ligongo lyakuti Yehofa ŵakamucisye ŵandu ŵakwe kuwujila ku malo gawo kuti akamlambileje, yamtendekasisye jwamalumboju kuti amlumbe Yehofa. Nambope, jwalakwe ŵasasilesoni magongo gane gaŵatendele yeleyi. Ana magongo gakwe galiji gamtuli? Ana  magongo gapi gampaka gatendekasye wawojo kumlumba Yehofa?—Sal. 147:1.

4. Mwenye Kolesi paŵakulupwisye Ayisalayeli, ana komboleka kuti jemanjaji ŵapikene uli mumtima soni ligongo cici?

⁴ Agambe ganisya muŵapikanilaga mumtima Ayisalayeli paŵaliji ku ukapolo ku Babulo. Ŵandu ŵaŵajigele Ayisalayeliŵa kwawula nawo ku ukapolo ŵaŵecetaga mwacipongwe kuti, “Mtujimbile jimo mwa nyimbo sya ku Siyoni.” Pandaŵiji, Yelusalemu jwakatendekasisye kusangalala ŵaliji ali ajonanjidwe. (Sal. 137:1-3, 6) M’yoyo, Ayisalayeliŵa nganaŵa ŵakusacilila kwimba. Mitima jawo jaliji jili jikasice, mwamti ŵasosekwaga kwatondoya. Nambope, mwakamulana ni maloŵe gaŵalocesye Mlungu, Yehofa ŵakulupwisye kupitila mwa Kolesi, juŵaliji mwenye jwa ku Pelisiya. Jwalakwe ŵagomece Ababulo ni ŵaŵecete kuti, “Yehofa . . . asalile une kuti namtaŵile nyumba jakwe ku Yelusalemu . . . Jwalijose jwali pasikati penu mwa ŵandu wosope ŵakusamtumicila, Yehofa Mlungu jwakwe aŵe najo, soni awujile.” (2 Mbiri 36:23) Gelega galiji maloŵe gakutondoya mnope kwa Ayisalayeli ŵaŵatamaga ku Babulo.

5. Ana jwamalumbo ŵasasile yamtuli yakwamba macili gakuposya ga Yehofa?

⁵ Yehofa nganagambaga kwatondoya Ayisalayeli mpela likuga nambo ŵamtondoyagasoni jwalijose pajika. Yeleyi ni yakusatendasoni masiku agano. Jwamalumbo ŵalembile yakwamba Yehofa kuti, ‘Akwaposya ŵakasice mtima, ni kutaŵa maŵanga gawo.’ (Sal. 147:3) Kusala yisyene, Yehofa akusiŵasamalila wosope ŵakusimana ni yakusawusya. Yehofa ali jwakusacilila kututondoya soni kuposya maŵanga getu ga munganisyo. (Sal. 34:18; Yes. 57:15) Jwalakwe akusatupa macili soni lunda kuti tukombole kupilila yakusawusya yiliyose yampaka tusimane nayo.—Yak. 1:5.

6. Ana maloŵe gaŵaŵecete jwamalumbo pa Salimo 147:4 gali gakamucisya camtuli kwa m’weji? (Alole ciwulili cacili kundanda kwa nganiji.)

⁶ Kaneko jwamalumbo ŵalolite kwinani ni ŵasasile kuti Yehofa “akusaŵalanga ndondwa syosope,” soni “akusajikolanga jilijose lina.” (Sal. 147:4) Ligongo cici jwamalumboju ŵacenjile ngani ni kutanda kusala yakwinani? Kwende tuganicisye ayi. Jwamalumboju ŵasiwonaga ndondwa, nambo nganamanyililaga kuti kwana ndondwa silingwa. Kwa yaka yejinji, ŵasayansi aŵele ali mkusala kuti kwinani kwana ndondwa syejinji. Akusasalasoni kuti kwinani kwana makuga ga ndondwa gejinji soni kuti mu likuga limo mwana ndondwa mabiliyoni gejinji. Kwa m’weji nganituŵa tukombwele kuŵalanga ndondwa. Nambo Mkupanganya jwetu ŵasipele ndondwa syosope mena soni akusamanyilila pajili ndondwa jilijose. Yeleyi yikugopolela kuti ndondwa jilijose jili jakusosekwa mnope kwa Yehofa. (1 Akoli. 15:41) Nambi uli m’weji? Yehofa Mlungu akusammanyilila jwalijose jwetuwe pajika. Akusamanyilila patuli, mwatukupikanila mumtima, soni yindu yatukusosecela pandaŵi jakwe.

7, 8. (a) Ana Yehofa akusakumbucila cici pakwakamucisya ŵandu ŵakwe? (b) Apelece cisyasyo cakulosya kuti Yehofa akusiŵapikanicisya ŵandu.

⁷ Yehofa ngakusagamba kolape lung’wanu ni m’weji pajika, nambo akwetesoni macili gakutukamucisya kumalana ni yakusawusya yatukusasimana nayo. (Aŵalanje Salimo 147:5.) Ndaŵi sine mpaka tuganisye kuti yakusawusya yatukusimana nayo yili yekulungwa mnope mwamti nganituŵa tukombwele kumalana nayo. Nambo Mlungu akusamanyilila malile getu, soni “akusakumbucilaga kuti tuli luwundu.” (Sal. 103:14) Ligongo lyakuti tuli ŵangali umlama, tukusawilisyaga yakulemwa yiyoyo ndaŵi ni katema. Ndaŵi sine tukusalijimba magambo ligongo lya yindu yatuŵecete, kumbila yindu yakulemweceka kapena kwatendela ŵane wiwu ligongo lya yindu yakwete. Yehofa ngakusalemwesya cilicose,  nambope akusapikanicisya mwatukusapikanila mumtima payitutendecele yeleyi.—Yes. 40:28.

⁸ Komboleka kuti Yehofa ŵakamucisye kala kumalana ni yakusawusya yine yaŵele ali mkusimana nayo. (Yes. 41:10, 13) Mwambone, mlongo jwine jwali mpayiniya lina lyakwe, Kyoko, jwatengwice mnope ali amsalile kuti akatendeje undumetume ku mkuli wine. Ana Yehofa ŵalosisye camtuli kuti ŵapikanicisyaga yakusawusya ya mlongoju? Kyoko ali mumpingo wakwe wasambano, ŵayiweni kuti ŵandu ŵajinji ŵampikanicisyaga yaŵatiga pakulagasika nganisyo. Jwalakwe ŵalipikene mpela kuti Yehofa akumsalila kuti, “Ngusinamnonyela, ngaŵape ligongo lyakuti mli mpayiniya, nambo ligongo lyakuti mli mwanangu soni kuti mwalipelece kwa une. Ngusaka kuti msangalaleje ligongo mli Mboni jangu!” Ana Mlungu jwamaciligose alosisye camtuli kuti akusiŵapikanicisya mnope wawojo?

9, 10. Ana Yehofa akusatukamucisya mwamtuli candanda? Apelece cisyasyo.

⁹ Ndaŵi sine yakusoŵa yetu mpaka yiŵe yindu yakucilu. Mwambone, mpaka tudandawuleje kuti ngasitukola yakulya yakwanila. Nambope, Yehofa ŵapanganyisye cilamboci kuti cikoposyeje yakulya yakwanila jwalijose, atamose kwa ŵanace ŵa makungulu. (Aŵalanje Salimo 147:8, 9.) Naga Yehofa akusalisya makungulu, nikuti mpaka tuŵe ŵakusimicisya kuti jwalakwe cacitupa yakusosecela yetu.—Sal. 37:25.

¹⁰ Cakusosekwa mnope cili cakuti, Yehofa akusapeleka cikamucisyo causimu. Jwalakwe akusatupa “mtendele wa Mlungu wawukusapunda kuganisya mwakusokoka kulikose.” (Afi. 4:6, 7) Aganicisye ya Mutsuo ni ŵamkwakwe ŵele ŵayiweni kuti Yehofa ŵakamucisye mnope cili citendekwe cisicinya ca m’nyasa mu 2011 ku Japan. Jemanjaji ŵakulupwice ligongo ŵatemi cilo cosope m’cipinda caŵili camwinani ca nyumba jawo cacaliji cacipi soni cakusisima. Nambope, palisikuli yindu yawo yosope yajonasice. Pakwacele kundaŵi, ŵaŵele mkusosasosa cinecakwe cakuti calimbikasye. Cindu cimo caŵapatile caliji Buku Lapachaka la Mboni za Yehova la 2006. Jwalakwe paŵawunukulaga bukuji ŵasimene kamtwe kakuti, “Cisicinya Cakogoya Canganicitendekwejepo.” Kamtwe keleka kasalaga ya cisicinya cacatendekwe ku Sumatra m’caka ca 2004 cacajonasile mnope kupunda yisicinya yayatendekwepo munyuma. Mutsuo ni ŵamkwakwe paŵaŵalangaga nganiji ŵalilaga pakulola yaŵasimene nayo abale ni alongo. Jemanjaji ŵalipikene kuti Mlungu ŵalimbikasisye pandaŵi jakuŵajilwa. Yehofa ŵakamucisyesoni pa yakusosecela yawo yakucilu. Ŵatesile yeleyi kupitila mwa abale ŵawo ŵausimu ŵaŵapele yakulya soni yakuwala. Nambo cacalimbikasisye mnope caliji kwika kwa abale ŵakwimila likuga lya Mlungu kumipingo jakulekanganalekangana. Mutsuo ŵaŵecete kuti, “Nalipikene kuti Yehofa ŵajimi pambali pa jwalijose jwetuwe nikutusamalilaga. Yaliji yakutondoya mnope!” Yeleyi yikulosya kuti candanda Yehofa akusatusamalila mwausimu kaneko mwakucilu.

11. Ana tukusosekwa kutenda cici kuti tupindule ni cikamucisyo ca Yehofa?

¹¹ Yehofa ali jwakoseka ‘kwakamucisya ŵandu ŵakufasa.’ (Sal. 147:6a) Nambo, ana mpaka tupindule camtuli ni cikamucisyo cakwe? Tukusosekwa kuŵa paunasi wambone ni jwalakwe. Kuti tutende yeleyi, tukusosekwa kuŵa ŵandu ŵakulinandiya. (Zef. 2:3) Ŵandu ŵakulinandiya akusajembeceya Yehofa kuti alinganye yangali cilungamo yayikutendekwa soni kumasya yakusawusya yosope. Yehofa akusiŵajiticisya jemanjaji.

12, 13. (a) Ana tukusosekwa kuŵambala cici kuti tupindule ni cikamucisyo ca Yehofa? (b) Ana jwalakwe akusasangalala ni ŵandu ŵamtuli?

¹² Nambi wuli ŵandu ŵakusakala? Baibulo  jikusati, Mlungu “akusiŵagwicisya pasi ŵandu ŵakusakala.” (Sal. 147:6b) Gelega gali maloŵe gamacili mnope! Kuti tupindule ni cinonyelo cangamala ca Yehofa, tukusosekwa kuŵambala cilicose cakusaciŵenga jwalakwe. (Sal. 97:10) Mwambone, tukusasosekwa kuŵambala kutenda yamsese. Yeleyi yikugopolela kuti tukusosekwa kuŵambala cilicose campaka citulongolele kuti tutende cakusakala, kupwatikapo kulolela yakuŵagula. (Sal. 119:37; Mat. 5:28) Kutenda yeleyi mpaka kuŵe kwakusawusya, nambope tukusosekwa kulingalinga ligongo yikusayikasya majali.

¹³ Kuti tukombole kuŵambala kutenda yakusakala tukusosekwa kwegamila Yehofa kuti atukamucisye. Ana Yehofa mpaka asangalale naga tukulingalinga kulijegamila acimsyewe kapena ŵandu? Iyayi! Jwalakwe nganaŵa asangalele naga tukwegamila “macili ga haci” kapena “kuwutuka kwa ngongolo sya mundu,” yayili kulijegamila acimsyewe kapena ŵandu. (Sal. 147:10) M’malo mwakwe, tukusosekwa kwendelecela kupopela kwa Yehofa kuti atukamucisye. Jwalakwe ngasapela kutupikanila patukum’ŵenda kuti atukamucisye, atamose patukum’ŵenda mwakuwilisyawilisya. Baibulo jikusasala kuti “Yehofa akusasangalala ni ŵandu ŵakusamjogopa, ŵakusajembeceya umbone mtima wakwe wangamala.” (Sal. 147:11) Ligongo lya cinonyelo cakwe, mpaka tuŵe ŵakusimicisya kuti Yehofa cajendelecele kutukamucisya kuti tumalane ni yakumbila yetu yakusakala.

14. Ana jwamalumbo ŵasimicisye ya cici?

¹⁴ Yehofa ŵasimicisye kuti cacakamucisya ŵandu ŵakwe pandaŵi jakusaka cikamucisyo. Paganicisya yaŵatesile Yehofa pakwakamucisya Ayisalayeli kuwujila ku Yelusalemu, jwamalumbo ŵajimbile yakwamba Yehofa kuti, “Jwalakwe akulimbisya yipata yenu; akwapa upile ŵanace ŵenu. Jwalakwe akutamilikasya mtendele m’cilambo mwenu.” (Sal. 147:13, 14) Yaliji yakulimbikasya mnope kwa jwamalumbo kumanyilila kuti Mlungu cacilimbisya yipata ya msinda. Yeleyi yamsimicisye jwamalumboju kuti Yehofa cacateteya ŵakulambila ŵakwe.

15-17. (a) Ana ndaŵi sine patusimene ni yakusawusya tukusapikana wuli mumtima, nambo ana Yehofa akusakamulicisya masengo camtuli Maloŵe gakwe pakusaka kutukamucisya? (b) Asale cisyasyo cakulosya mwele ‘maloŵe ga Mlungu gakusawutucila’ kuti gatukamucisye

¹⁵ Ndaŵi sine mpaka asimane ni yakusawusya yampaka yatendekasye kulagasika nganisyo, nambo Yehofa mpaka ŵape lunda lwakumalana nayo. Jwamalumbo ŵasasile yakwamba Mlungu kuti ‘akusatumisya maloŵe gakwe pa cilambo capasi, soni maloŵe gakwego gakusawutuka mnope.’ Kaneko ŵasasile kuti ‘akusatumisya matalila geswela, akusamwasanya lipundugulu, soni akusaponya mesi gamakamulane.’ Kaneko jwamalumboju ŵawusisye kuti, ‘Ŵani ŵampaka akombole kupilila kusisima kwakwe?’ Jwalakwe ŵajonjecesye kuti Yehofa ‘akusatumisya maloŵe gakwe, ni gakusasungunukuka.’ (Sal. 147:15-18) Mlungu jwetu, jwakusamanyilila cilicose, jwakusalamulila lipundugulu soni matalila, mpaka atukamucisye kupilila yakusawusya yiliyose yatukusasimana nayo.

¹⁶ Masiku agano, Yehofa akusatulongolela kupitila m’Maloŵe gakwe, Baibulo. Soni “maloŵe gakwe gakusawutuka” m’litala lyakuti, jwalakwe mwacitema akusatupa cikamucisyo causimu pandaŵi jatukucisosa. Agambe ganicisya mwapindulile ni kuŵalanga Baibulo, kulijiganya mabuku ga “kapolo jwakulupicika ni jwalunda,” kulolela JW Broadcasting, kuŵalanga mabuku pa jw.org, kuŵecetana ni acakulungwa ŵa mumpingo, soni kunguluka ni Aklistu acimjetu. (Mat. 24:45) Ana yeleyi ngayikwatendekasya kulola kuti Yehofa ngakusacelewa kutupa cikamucisyo?

¹⁷ Simone ŵayiweni kuti Maloŵe ga Mlungu gamkamucisye mnope. Jwalakwe ŵaliwonaga kuŵa jwangasosekwa, soni jwaganisyaga kuti Mlungu nganasangalalaga najo. Nambo, pandaŵi jaŵatengwiceji, ŵajendelecelepe kupopela  kwa Yehofa kuŵenda kuti amkamucisye. Ŵajendelecelesoni kulijiganya Baibulo pajika. Jwalakwe ŵaŵecete kuti, “Nganisimaneje ni yakusawusya nikulipikana kuti Yehofa nganamba macili soni cikamucisyo.” Yeleyi ni yayimkamucisye Simone kuti akoleje nganisyo syambone pasimene ni yakusawusya.

18. Ana akusapikana wuli mumtima ligongo lyakuŵa paunasi wambone ni Yehofa, soni ana magongo gapi gakwatendekasya gumila kuti “Amlumbe Ya!”?

¹⁸ Jwamalumboju ŵamanyililaga kuti mwa mitundu josope ja ŵandu ŵaŵapali pandaŵijo, Yehofa ŵasagwile mtundu wa Ayisalayeli kuti uŵe ŵandu ŵakwe. Yehofa ŵawupaga mtunduwu “maloŵe,” soni “malamusi gakwe.” (Aŵalanje Salimo 147:19, 20.) Masiku agano, tuli ŵakusangalala mnope kolanjidwa ni lina lyakwe. Tukwete upile wakuŵa paunasi wambone ni jwalakwe ligongo lyakumanyilila lina lyakwe soni kulongoleledwa ni Maloŵe gakwe. Mpela muŵatendele juŵalembile Salimo 147, tukwete magongo gamajinji gakututendekasya ‘kumlumba Ya,’ soni kwalimbikasya ŵane kutenda yakulandanayo.