ANA akummanyilila m’bale kapena mlongo jwaŵasamile ku cilambo kwakukusosekwa ŵakulalicila ya Ucimwene ŵajinji? Ana pakwete paliwusisye kuti, ‘Ana cici cacalimbikasisye jemanjaji kuja kutumicila ku cilambo cine? Ana ŵakosecele catuli? Ana unesoni mpaka ngombole kutenda yeleyi?’ Kuti tupate kwanga kwambone kwa yiwusyo yeleyi, tukusosekwa kuŵecetana ni abale ni alongowo. Kwende tuŵecetane nawo.

Ana cici cacatendekasisye kuti atande ganicisya yakuja kutumicila ku cilambo kwakusosecela ŵakulalicila ŵajinji? Amy, jwa ku United States, jwele apano akwete yaka ya m’ma 30 ŵatite, “Kwa yaka yejinji naŵele ndili mkuganicisya yakuja kutumicila ku cilambo cine, nambo nayiwonaga kuti ngaŵa mkuyikombola.” Ana cici cicamtendekasisye kucenga nganisyo syakwesi? “Mu 2004, liŵasa line lyalikusatumicila ku Belize lyambilasile kuti njawule ngakunguluce soni kutenda yalumo upayiniya kwa mwesi umo. Panajawilepo, nasangalele mnope. Cili cimasile caka cimo nasamile ku Ghana kukutenda upayiniya.”

Yaka yamunyumamu, Stephanie, jwa ku United States, jwele apano akwete yaka ya m’ma 20, ŵalolite yaŵatendaga pa umi wakwe ni ŵaganicisye kuti, ‘Une cilu cangu cili camacili soni nganingola liŵasa. Mpaka ngombole kutenda yejinji pakumtumicila Yehofa kulekangana ni mwangutendela apanomu.’ Kuliwungunyaku kwamkamucisye kuti asamile ku Ghana kuti akajonjecesye undumetume wakwe. Liŵasa lya Filip ni Ida, lyalyatendaga upayiniya kumangwawo ku Denmark, ndaŵi syosope lyasakaga lili lisamile kumalo kwakusosecela ŵakulalicila ŵajinji. Ŵalinjilelinjile kupata matala gakwanilicisya yakulinga yawo. Filip ŵasasile kuti, “Patwapatile upile wakuti tukatumicile kumalo kwakusosecela ŵakulalicila ŵajinji, yaliji mpela kuti Yehofa akutusalila kuti; ‘Ajendelecele!’” Mu 2008, jemanjaji ŵasamile ku Ghana ni ŵatumicile kweleko kwa yaka yakupunda yitatu.

 Liŵasa lya Hans ni Brook, likwete yaka ya m’ma 30 soni likutenda upayiniya ku United States. Mu 2005 ŵakamucisye pa ngosi jajatendekwe ligongo lya mbungo ja Katrina. Kaneko ŵalembile cikalata cakuŵenda kuti akamuleje nawo masengo gakutaŵataŵa ga pacilambo cosope, nambo nganaŵilanjidwa. Hans ŵaŵecete kuti, “Kaneko twapikene ngani jine pamsongano jajasasile kuti Mwenye Daudi ŵajiticisye ali amsalile kuti jwalakwe ngataŵa nyumba ja Mlungu, m’yoyo ŵacenjile yakulinga yakwe. Patwapikene yeleyi twamanyilile kuti yili yakomboleka kucenga cakulinga cetu causimu kwawula pa cakulinga cine causimu.” (1 Mbiri 17:1-4, 11, 12; 22:5-11) Brook ŵajonjecesye kuti, “Yehofa ŵasakaga kuti tupoposye pa litanga line.”

Hans ni Brook paŵapikene yakusangalasya yaŵasimene nayo acimjawo ŵaŵatumicilaga ku yilambo yine, yalimbikasisye mnope mwati ŵaganicisye yakuja kutumicila ku cilambo cine. Mu 2012 ŵajawile ku Ghana kwaŵatumicile kwa miyesi 4 ali mkamucisya mumpingo wa ciŵeceto ca makono. Atamose kuti jemanjaji ŵawujile ku United States, nambo yakusangalasya yaŵasimene nayo ku Ghana yakamucisye kusacilila mnope kuti aŵiceje yindu ya Ucimwene pasogolo. Kutandila ndaŵi jelejo, aŵele ali mkamucisya masengo gakutaŵa nyambi ku Micronesia.

Ana ŵatesile yatuli kuti akosecele kuja kutumicila ku cilambo cakusosekwa ŵakulalicila ŵajinji? Stephanie ŵasasile kuti “Nawungunyisye ngani sya mu Sanja ja Mlonda syasyasalaga yakwayana ni kutumicila ku malo kwakusosecela ŵakulalicila ŵajinji. Nasalilesoni acakulungwa ŵa mumpingo soni jwakulolela mkuli ni ŵamkwakwe kuti nasacililaga kuja kutumicila m’cilambo cine. Cakupunda payosope, ndaŵi ni katema namsalilaga Yehofa mwipopelo ya cakulinga canguci.” * Stephanie ŵalingagalingagasoni kutama umi wangasaka yejinji, yayamkamucisye kuti asunje mbiya syakuti cakakamulicisyeje masengo pacakatumicileje m’cilambo cine.

Hans ŵasasile kuti: “Twam’ŵendaga Yehofa kuti atulongolele ligongo twasacililaga kwawula kwacasace jwalakwejo kuti tujawule. Patwapopelaga, twamsalilagasoni  lisiku lisyesyene lyatwasakaga kuti tujawule ku cilambo cine kutumicila.” Hans ni ŵamkwakwe ŵalembele yikalata ku maofesi ga nyambi mcece. Ofesi ja nyambi ja ku Ghana jajanjile kuti ajawule m’cilamboco. M’yoyo jemanjaji ŵalingenye yakuti ajawule ni akatame miyesi jiŵilipe. Hans ŵatite, “Twasangalalaga mnope kamula masengo gakulalicila yimpepe ni mpingo, mwati twajonjecesye masiku gakutama kweleko.”

George ni Adria, liŵasa lya ku Canada lyalikwete yaka ya m’ma 30, lyamanyililaga kuti Yehofa akusajaliwa yakusagula yakuŵajilwa yatutesile ngaŵaga yatukwamba kuyiganicisya. M’yoyo, jemanjaji ŵatesile yakomboleka kuti akwanilisye cakulinga cawo. Ŵaŵecetene ni mlongo jwine juŵatumicilaga kwakusosecela ŵakulalicila ŵajinji m’cilambo ca Ghana soni ŵam’wusisye yiwusyo yejinji. Jemanjaji ŵalembelesoni yikalata ku nyambi ja ku Canada ni ja ku Ghana. Adria ŵatite, “Twawungunyaga matala gakutukamucisya kuti tutameje umi wangasaka yejinji kupunda mwatutamileje.” Yaŵasagwileyi yakamucisye kuti akombole kusamila ku Ghana mu 2004.

Ana ŵasimene ni yakusawusya yatuli paŵasamile ku cilambo cine, soni ŵamalene nayo catuli? Kwa Amy, cakusawusya candanda caliji kwasoŵa ŵandu ŵakumangwawo. Jwalakwe ŵatite,“Cilicose caliji cakulekangana mnope ni yanasyoŵelele.” Ana cici cacamkamucisye? Ŵasasile kuti, “Ŵandu ŵamwiŵasa mwangu ŵanjimbilaga foni ni kusalilaga kuti akusayamicila mnope undumetume wangu. Yeleyi yangamucisye kuti nganicisyeje mnope ligongo lyanasamile kumaloko. Kaneko natandite kunguluka ni ŵamwiŵasa mwanguwo pa kompyuta jakola fidiyo. Ligongo lyakuti twawoneganaga pa fidiyopo yaŵaga mpela kuti nganitutalicilana.” Amy ŵasasilesoni kuti ŵakungulukaga mnope ni Mlongo jwine jwakumanyilila yejinji jwakukoko  jwaŵamkamucisye kuti asimanyilile cenene ndamo sya m’cilamboco. Jwalakwe ŵatite, “Mlongoju ŵaŵele mjangu jwapamtima junamjegamilaga soni ŵangamucisyaga pa ndaŵi jilijose jele ŵandu ŵatendaga yindu yanganinayipikanicisyaga. Ligongo lya cikamucisyo cakwe, nalijiganyisye yindu yanasosekwaga kutenda soni kuŵambala, mwati yeleyi yangamucisye kuti ndendeje undumetume wangu mwakusangalala.”

George ni Adria ŵasasile kuti paŵasamile ku Ghana, yaliji mpela kuti awujile mu ndaŵi jakala. Adria ŵatite, “M’malo mwakucapa pamacini, twacapaga payala. Kuteleka yakulya kwatujigalilaga ndaŵi jelewu kulekangana ni muyaŵelaga kumangwetu. Nambo pali papitile ndaŵi twasyoŵelele umi welewo.” Brook ŵatite, “Atamose kuti m’weji apayiniya tukusasimana ni yakusawusya yejinji, nambo tukusaŵa ŵakusangalala. Patukuganicisya yindu yakusangalasya yatuŵele tuli mkusimana nayo, tukusayiwona kuŵa cipanje capajika.”

Ligongo cici akuwuwona undumetume welewu kuŵa wakusangalasya mnope? Stephanie ŵatite, “Kulalicila mu mkuli mwatukusasimana ni ŵandu ŵalung’wanu ŵakusasacilila kulijiganya usyesyene wa m’Baibulo lisiku lililyose, kukusaŵa kwakusangalasya mnope. Nguyiwona kuti nasagwile cenene kwawula kukutumicila kumalo kwakusosecela ŵakulalicila ŵajinji.” Mu 2014, Stephanie ŵalombene ni Aaron, soni apano akutumicila ku ofesi ja nyambi ja ku Ghana.

Christine, mpayiniya jwa ku Germany jwakwete yaka ya m’ma 30 ŵatumicile ku Bolivia mkanajawule ku Ghana. Jwalakwe ŵatite, “Undumetumewu wuli wambone mnope.” Ŵasasilesoni kuti, “Ligongo lyakutalikangana ni ŵamwiŵasa mwangu, ndaŵi syosope ngusinam’ŵenda Yehofa kuti angamucisyeje. Apano ngusinamjegamila mnope jwalakwe kupundana ni kala kose. Ngusisangalalasoni mnope ni mkamulano wapajika wawupali pasikati pa ŵandu ŵa Yehofa. Undumetume welewu ungamucisye mnope pa umi wangu.” Pacangakaŵapa, Christine ŵalombene ni Gideon, soni akwendelecela kutumicila yalumo ku Ghana.

Filip ni Ida ŵasasile yaŵatendaga kuti ŵakamucisye ŵakusiŵajiganya Baibulo kuti ajawule pasogolo. Ŵatite, “Munyumamu twakolaga majiganyo ga Baibulo 15 kapena kupunda, nambo twanandiye ciŵalanjiloco kwika pa majiganyo 10 pakusaka kuti tukomboleje kwajiganya mwakwanila.” Ana yeleyi yakamucisye ŵakulijiganyawo? Filip ŵatite, “Namjiganyaga Baibulo mnyamata jwine lina lyakwe Michael. Jwalakwe ŵakosecelaga cenene soni ŵalijiganyaga lisiku lililyose mwati twamalisisye kulijiganya buku ja Baibulo Jikusajiganya Cici kwa mwesi umo. Kaneko Michael ŵaŵele jwakulalicila jwangabatiswa. Palisiku lyakwe lyandanda kwawula mu undumetume wamumgunda, jwalakwe ŵambusisye kuti, ‘Ana mpaka angamucisye kutendesya majiganyo gangu ga Baibulo?’ Namlolite mwakusimonga mnope. Michael ŵasasile kuti ŵatandisye majiganyo ga Baibulo gatatu nambo ŵasosecelaga kumkamucisya kuti amanyilile mwampaka atendecesyeje.” Agambe ganicisya, ŵakulijiganya Baibulo ayikene pakuŵa ŵakwiganya Baibulo, kulosya kuti pakusosecela ŵakwiganya ŵajinji.

Amy ŵasasile mwaŵayiwonele kuti m’cilamboco mwasosecelaga ŵakulalicila ŵajinji. Jwalakwe ŵatite, “Panagambile kwika ku Ghana, twalalicile m’musi wine wamwana soni twawungunyaga ŵandu ŵangapikana soni ŵangaŵeceta. Twapatile ŵandu 8 m’musi welewupe.” Mkupita kwandaŵi, Amy ŵalombene ni Eric, soni wosope akutumicila mpela apayiniya ŵapajika. Jemanjaji akuwukamucisya mpingo wa ciŵeceto camakono kuti wakamucisyeje ŵangapikana soni ŵangaŵeceta ŵakupunda 300 ŵali ŵakulalicila ni ŵane ŵalung’wanu ŵali m’cilamboco. Kwa George ni Adria, kutumicila ku Ghana kwakamucisye kulola mwawukusaŵela umi wa umishonale. M’yoyo, jemanjaji ŵasangalele mnope paŵaŵilasile kuti akajinjile kalasi nambala 126 ku Sukulu ja Gilead. Apano jemanjaji akutumicila mpela amishonale ku Mozambique.

Yili yakusangalasya mnope kulola kuti abale ni alongo ŵajinji ŵa m’yilambo yine pampepe ni ŵakulalicila ŵa m’yilambo yakutumicila akukamula mwamtawu masengo gagowola. (Yoh. 4:35) Pa cijuma cilicose ŵandu ŵakwana 120 akusabatiswa ku Ghana. Mpela mwatendele ŵandu ŵakwana 17 ŵakutumicila kumkuli kwakusosecela ŵakulalicila ŵajinji m’cilambo ca Ghana, ŵakulalicila ŵajinji pacilambo cosope ‘alipelecesoni ni mtima wosope’ ligongo lyakumnonyela Yehofa. Jemanjaji akutumicila m’mikuli mwamukusosekwa ŵakulalicila ya Ucimwene ŵajinji. Mwangakayicila, kulipeleka kwakutenda ŵanduŵa kukutendekasya kuti mtima wa Yehofa wusangalaleje.—Sal. 110:3; Miy. 27:11.