1-2. Ana Sadoki ŵaliji ŵani? (1 Mbili 12:​22, 26-28)

 AGANICHISYE ayi. Gulu ja ŵandu ŵakupunda 340,000 jasongene pampepe kukumkamuchisya Daudi kuti aŵe mwenye jwa Ayisalayeli. Kwa masiku gatatu, ŵanduŵa ŵaliji ali mkutama m’matumbi chiŵandika ku Hebuloni. Mwamti kwamasikuga jemanjaji ŵasekaga, kunguluka, soni kwimba nyimbo syakumchimbichisya Yehofa. (1 Mbi. 12:39) Nombe Sadoki jwele pandaŵijo jwaliji kamchanda jwaliji nawo yimpepe m’gulu ja ŵanduwo. Nambotu ŵandu ŵajinji ngamkanakombola kummanyilila. Atamose yaliji myoyo, Yehofa jwamanyilile kuti Sadoki jwaliji mu gulujo mwamti jwatesile yakuti m’wejisoni tumanyilile yeleyi. (Aŵalanje 1 Mbili 12:​22, 26-28. a) Nambo chiwusyo chakusosekwa mnope chili chakuti, Ana Sadoki ŵaliji ŵani?

² Sadoki jwaliji jwakutaga mbopesi juŵakamulaga masengo ni Jwamkulungwa jwa Ŵakutaga Mbopesi Abiyatala. Mlungu ŵampelesoni Sadoki lunda lwejinji lwakumanyilila yakusasaka jwalakwe. (2 Sam. 15:27) Mwamti ŵandu ŵajawulaga kwa Sadoki kukuŵenda lunda. Jwalakwe jwalijisoni mundu jwakulimba mtima. Mwamti kulimba mtima kwa Sadoki ni kwatukusaka tukambilane mnope munganiji.

3. (a) Ligongo chichi ŵakutumichila ŵa Yehofa akusasosekwa kuŵa ŵakulimba mtima? (b) Ana chitukambilane chichi munganiji?

³ Apano Satana alukele mnope kupundana ni kalakose, mwamti jwalakwe akulingalinga kututendekasya kuti tukamkulupililaga Yehofa. (1 Pet. 5:8) Myoyo, tukusosekwa kuŵa ŵakulimba mtima kuti tupitilisye kupilila mpaka ndaŵi jele Yehofa chachimjonanga Satana soni chilambo chakusakalachi. (Sal. 31:24) Sambano kwende tukambilane yindu yitatu yampaka tutende pakusyasya kulimba mtima kwa Sadoki.

 AŴEJE KUMBALI JA UCHIMWENE WA MLUNGU

4. Ligongo chichi ŵakutumichila ŵa Yehofa akusasosekwa kulimba mtima kuti akombole kuŵa kumbali ja Uchimwene wa Mlungu? (Alole chiwulili.)

⁴ M’weji ŵakutumichila ŵa Yehofa, ndaŵi syosope tukusaŵa kumbali ja Uchimwene wa Mlungu. Nambo kuti tukombole kutenda yeleyi tukusasosekwa kulimba mtima. (Mat. 6:33) Patukutama m’chilambo chakusakalachi, tukusasosekwa kuŵa ŵakulimba mtima kuti tukombole kupikanila malamusi ga Yehofa nambosoni kuti tulalichileje ngani syambone sya Uchimwene. (1 Ates. 2:2) Tukusosekwasoni kuŵa ŵakulimba mtima kuti tukajinjililaga nawo yandale. (Yoh. 18:36) Mwamti ŵakutumichila ŵa Yehofa ŵajinji akulaga ligongo lya kusoŵa kwa mbiya, kulagasidwa, kapena kutaŵidwa kwene. Jemanjaji akusimana ni yosopeyi ligongo lyakana kwinjilila nawo yandale kapena ligongo lyakana kuputa ngondo.

5. Ligongo chichi Sadoki jwasosekwaga kulimba mtima kuti akombole kumkamuchisya Daudi?

⁵ Sadoki nganajawula ku Hebuloni pakwamba kusaka kusangalalilape umwenye wa Daudi. Nambo jwalakwe jwapite juli jukoseche kuputa ngondo, mwamti jwajigele yida yakwe yangondo. (1 Mbi. 12:38) Jwalakwe jwaliji jwakoseka kumkuya Daudi ku ngondo soni kwachenjela Ayisalayeli kwa adani ŵawo. Atamose kuti Sadoki nganamanyililaga kuputa ngondo mpela msilikali, jwalakwe jwaliji jwakulimba mtima mnope.

6. Ana ni yindu yapi yajwatesile Daudi pakulosya kulimba mtima yayamkamuchisye Sadoki kujigalila chisyasyo chakwe? (Salimo 138:3)

⁶ Ana Sadoki juŵalijisoni jwakutaga mbopesi jwalijiganyisye kwapi kulimba mtima? Jwalakwe jwamanyililaga ŵandu ŵajinji ŵaŵaliji ŵamachili soni ŵakulimba mtima. Mwamti chisyasyo cha jemanjajo chamkamuchisye mnope. Mwachisyasyo, ligongo lyakuti Daudi jwaliji msilikali jwakulimba mtima, yatendekasisye Ayisalayeli kumŵika jwalakwe kuŵa mwenye jwawo. (1 Mbi. 11:​1, 2) Ndaŵi syosope, Daudi jwamdalilaga mnope Yehofa kuti ni jwampaka amkamuchisye kulimbana ni adani ŵakwe. (Sal. 28:7; 138:3; aŵalanje Salimo 138:3.) Sadoki jwalijiganyisyesoni kulimba mtima kutyochela kwa ŵandu ŵane mpela Yehoyada soni Benaya juŵaliji mwanache jwa Yehoyadajo. Nambosoni papali ŵandu ŵane 22 ŵaŵaliji kumbali ja Daudi  ŵaŵalongolelaga mbumba sya Ayisalayeli. (1 Mbi. 11:​22-25; 12:​26-28) Ŵandu wosopeŵa ŵaliji ŵakoseka kumkamuchisya Daudi kuti aŵe mwenye jwawo.

7. (a) Ana ni yisyasyo yapi ya ŵandu ŵa masiku agano ŵaŵalosisye kulimba mtima ŵampaka tujigalile yisyasyo yawo? (b) Mwakamulana ni fidiyoji, ana ŵalijiganyisye yamti uli kwa M’bale Nsilu?

⁷ M’wejisoni, tukusapata machili soni kuŵa ŵakulimba mtima patukuganichisya yisyasyo ya ŵandu ŵaŵatesile yindu mwakulimba mtima pakukamuchisya ulamusi wa Yehofa. Mwakulimba mtima, mwenye jwetu Yesu Klistu pajwaliji pachilambopa, jwakanile kuŵa kumbali ja ulamusi wa Satana. (Mat. 4:​8-11; Yoh. 6:​14, 15) Mwamti ndaŵi syosope, jwalakwe jwamdalilaga mnope Yehofa kuti ampe machili. Konjechesya pelepa, tukwetesoni yisyasyo yejinji ya m’masiku getu gano ya ŵachinyamata ŵalosisye kulimba mtima mwakukana kwinjila usilikali kapena kutenda nawo yandale. Mpaka atende chenene kuŵalanga sine mwa ngani sya ŵachinyamata ŵeleŵa pa jw.org. b

ŴAKAMUCHISYEJE AKLISTU ACHIMJAWO

8. Ana ni ndaŵi syapi syele achakulungwa ŵa mumpingo mpaka asosekwe kutenda yindu mwakulimba mtima kuti ŵakamuchisye Aklistu achimjawo?

⁸ Ŵakutumichila ŵa Yehofa akusasangalala pakukamusyangana. (2 Akoli. 8:4) Nambope, ndaŵi sine tukusasosekwa kulimba mtima kuti tukombole kumkamuchisya mlongo mjetu. Mwachisyasyo, pajitandite ngondo, achakulungwa ŵa mumpingo akusamanyilila kuti abale ni alongo ŵawo chasosekwe kwalimbikasya, kwapa yakusosechela yawo, nambosoni kwakamuchisya kuŵa paunasi wambone ni Yehofa. Ligongo lyakwanonyela Aklistu achimjawo, achakulungwaŵa akusaŵika umi wawo pangosi pakusaka kwakamuchisya achalongo achimjawoŵa. (Yoh. 15:​12, 13) Pakutenda yeleyi, jemanjaji akusaŵa kuti akumsyasya Sadoki.

9. Mwakamulana ni 2 Samuele 15:​27-29, ana Daudi jwamsalile Sadoki kutenda chichi? (Alole chiwulili.)

⁹ Pandaŵi jine, umi wa Daudi waliji pangosi. Abisalomu juŵaliji mwanache jwakwe jwalinganyisye yakusumula umwenye. (2 Sam. 15:​12, 13) Mwamti Daudi jwasosekwaga kutyoka ku Yelusalemu mwachitema. Daudi ŵasalile ŵakutumichila ŵakwe kuti, “Nyakukani, kwende tutile ni mkaŵa kusoŵa  ndaŵi jakumtilila Abisalomu.” (2 Sam. 15:14) Jemanjaji paŵatilaga, Daudi jwalinganyisye yakuti mundu jwine asigale ku Yelusalemu kuti amŵalanjeje Abisalomu pa mapulani gakwe. Myoyo, Daudi ŵamtumisye Sadoki ni ŵakutaga mbopesi ŵane ku Yelusalemu kuti akaŵe mpela ŵakusonda. (Aŵalanje 2 Samuele 15:​27-29.) Jemanjaji ŵasosekwaga kutenda yindu mwakusamala mnope. Kusala yisyene, masengo gaŵapele Daudi ŵakutaga mbopesiŵa galiji gakogoya mnope. Tukuŵecheta yeleyi ligongo lyakuti, Abisalomu jwaliji mundu jwachiwawa soni jwakulinonyela juŵayikene pakwajimuchila babagwe. Agambe ganichisya yayikamtendechele Sadoki pampepe ni achimjakwe ŵala, yikaŵe kuti Abisalomu ayikopochele kuti jemanjajo ali kumbali ja Daudi.

10. Ana Sadoki pampepe ni achimjakwe ŵamchenjele chamti uli Daudi?

¹⁰ Kaneko, Daudi jwalinganyisye pulani. Kuti pulaniji jikomboleche, Daudi jwasosekwaga kumkamulichisya masengo Sadoki ni Hushai, nambosoni achimjakwe ŵane ŵa Daudi ŵakulupichika. (2 Sam. 15:​32-37) Pulaniji jaliji jakuti Hushai akalambuchisye kuti ali kumbali ja Abisalomu soni kuti akusaka kumkamuchisya jwalakwe ni mtima wosope kuti amgomeche Daudi. Mwenye Daudi jwalinganyisye pulaniji ni chakulinga chakuti Abisalomu pachacheleweje kupikanila mapulani ga Hushai, Daudijo akole ndaŵi jakwanila jakosechela chenene kulimbana najo. Kaneko, Hushai jwammanyisye pulanijo Sadoki soni Abiyatala. (2 Sam. 17:​8-16) Achalume ŵaŵiliŵa ŵammanyisyaga Daudi ma pulani gosope ga Abisalomu. (2 Sam. 17:17) Mwamti ni chikamuchisyo cha Yehofa, Sadoki pampepe ni achimjakwewo ŵakombwele kumchenjela Daudi mmyala mwa Abisalomu.—2 Sam. 17:​21, 22.

11. Ana mpaka tusyasye chati uli kulimba mtima kwa Sadoki patukwakamuchisya Aklistu achimjetu?

¹¹ Ana mpaka tutende uli kuti tulosye kulimba mtima mpela Sadoki patuŵendile kuti twakamuchisye Aklistu achimjetu pandaŵi jakusawusya? (1) Tupikanileje malangiso. Mundaŵi mpela syelesi, yikusaŵa yakamuchisya mnope kuŵa ŵakamulana. Tukusasosekwasoni kupikanila malangiso gakutyochela ku ofesi ja nyambi. (Aheb.  13:17) Ndaŵi syosope, achakulungwa ŵa mumpingo akusasosekwa kuŵalangaga malangiso gakusala yampaka atende pakukosechela ngosi syachilengedwe soni yampaka atende pajikutendekwa ngosi jachilengedwe. (1 Akoli. 14:​33, 40) (2) Tuŵeje ŵakulimba mtima soni tutendeje yindu mwalunda. (Mis. 22:3) Tuganisyeje mkanitutende chindu. Ndaŵi syosope tulolechesyeje kuti tuli pamalo gambone. (3) Tumdalileje mnope Yehofa. Tukumbuchileje kuti Yehofa akusasaka kuti m’wejo pampepe ni achalongo achimjetuwo tuŵe ŵakuteteyeka. Mwamti jwalakwe mpaka atukamuchisye kuti tukombole kwachenjela achalongo achimjetu.

12-13. Ana alijiganyisye chichi payindu yaŵatesile M’bale Viktor ni M’bale Vitalii? (Alole chiwulili.)

¹² Aganichisye yaŵatesile M’bale Viktor soni M’bale Vitalii ŵaŵakamulaga masengo gakutumisya yakulya soni mesi kwa Aklistu achimjawo ku Ukraine. M’bale Viktor jwasasile kuti, “Twasosagasosaga palipose pampaka tupate yakulya. Mwamti ndaŵi syejinji, malo gatwapitaga twawonaga ŵandu ali mkugombelana uti. M’bale jwine jwapeleche yakulya yajwasunjile kuti yikakamuchisye abale. Yakulya yatwajigele kwa m’baleju, yakamuchisye abale ni alongo ŵajinji kwa kandaŵi. Patwalongaga yakulyayi mu galimoto jetu, bomba jagwilile chapakuŵandika ni m’weji, lutando lwa mamita 20, nambo mwaupile nganiliwulika. Lisiku lyosopeli, namŵendaga Yehofa kuti angamuchisye kuŵa jwakulimba mtima kuti mbitilisye kwakamuchisya Aklistu achimjangu.

¹³ M’bale Vitalii jwatite, “Twasosekwaga kuŵa ŵakulimba mtima mnope. Ulendo wangu wandanda kukupeleka yakulya najesile maawala 12. Mwamti nagambaga kupopela kwa Yehofa paulendo wosopewo.” M’baleju jwaliji jwakulimba mtima soni jwatendaga yindu mwalunda. Jwalakwe jwasasilesoni kuti, “Ndaŵi syosope namŵendaga Yehofa kuti angamuchisye kuŵa jwalunda soni jwakulinandiya. Napitaga ni galimoto m’misewu jajaliji jakwitichika ni ŵa boma basi. Chikulupi changu chalimbaga mnope panaweni abale ali mkukamula masengo yimpepe. Abaleŵa ŵalinganyaga m’misewu, kulonga mu galimoto yakulya soni yindu yine, nambosoni ŵatupaga yakulya.”

AŴEJE ŴAKULUPICHIKA KWA YEHOFA

14. Ana mpaka yitukwaye chamti uli mundu jwatukusamnonyela palesile kumtumichila Yehofa?

¹⁴ Chimo mwa yakusawusya yakupweteka mnope chikusaŵa jwachinasi jwetu palesile kumtumichila Yehofa. (Sal. 78:40; Mis. 24:10) Mwamti yeleyi yikusatupweteka mnope naga mundujo twakamulanaga najo mnope. Naga pakwete payatendechele yeleyi, yaŵatesile Sadoki pakulosya kukulupichika mpaka yalimbikasye mnope.

15. Ligongo chichi Sadoki jwasosekwaga kulimba mtima kuti apitilisye kuŵa jwakulupichika kwa Yehofa? (1 Ayimwene 1:​5-8)

¹⁵ Sadoki jwapitilisye kuŵa jwakulupichika kwa Yehofa pandaŵi jele Abiyatala juŵaliji mjakwe jwapamtima jwalesile kuŵa jwakulupichika. Yeleyi yatendekwe kumbesi kwa ulamusi wa Daudi. Mwenye Daudi ali asigele panandi kuwa, Adoniya juŵaliji mwanache jwakwe jwasakaga kuliŵika jika kuŵa mwenye atamose kuti Yehofa jwasakaga kuti umwenyewu ajinjile Solomoni. (1 Mbi. 22:​9, 10) Chakutesya chanasa chaliji chakuti, Abiyatala jwasagwile kuŵa kumbali ja Adoniya. (Aŵalanje 1 Ayimwene 1:​5-8.) Yeleyi yatendekasisye kuti Abiyatala aŵe jwangakulupichika kwa Daudi soni kwa Yehofa. Kusala yisyene, yeleyi yamtengwisye mnope Sadoki. Kwa yaka chiŵandika 40, Sadoki ni Abiyatala ŵaŵele ali mkukamulila masengo yimpepe mpela ŵakutaga mbopesi. (2 Sam. 8:17) Pandaŵi jine, jemanjaji ŵasamalilaga yimpepe “Libokosi lya Chilanga cha AMBUJE.” (2 Sam. 15:29) Konjechesya pelepa, achalume ŵaŵiliŵa ŵamkamuchisyaga Daudi mpela mwenye jwawo soni ŵatesile yimpepe yindu yejinji pakumtumichila Yehofa.—2 Sam. 19:​11-14.

16. Ana chichi chachamkamuchisye Sadoki kuti aŵepe jwakulupichika?

¹⁶ Sadoki jwapitilisye kuŵa jwakulupichika kwa Yehofa atamose kuti Abiyatala jwasagwile yindu yakulemwecheka. Nombe Daudi jwapitilisye kumkulupilila Sadoki. Ali achikopochele chiwembu cha Adoniya, Daudi jwalinganyisye yakuti Sadoki,  Natani, soni Benaya amŵiche Solomoni kuŵa mwenye. (1 Ayi. 1:​32-34) Ngatukukayichila kuti Sadoki yamlimbikasyaga mnope kuganichisya chisyasyo cha Natani soni ŵandu ŵane ŵaŵaliji ŵakulupichika kwa Yehofa soni ŵaŵamkamuchisyaga Mwenye Daudi. (1 Ayi. 1:​38, 39) Solomoni pajwaŵele mwenye, jwamsagwile “Sadoki jwakutaga mbopesi kwinjila m’malo mwa Abiyatala.”—1 Ayi. 2:35.

17. Ana mpaka amsyasye chamti uli Sadoki naga mundu jwakusamnonyela alesile kumtumichila Yehofa?

¹⁷ Ana mpaka amsyasye chamti uli Sadoki? Naga mjawo jwapamtima asagwile kumleka Yehofa, atendeje yindu yakulosya kuti wawojo asagwile kuŵa ŵakulupichika kwa Yehofa. (Yos. 24:15) Mwamti Yehofa chachapa machili soni chachakamuchisya kuŵa ŵakulimba mtima. Amdalileje Yehofa mwakupopela kwa jwalakwe soni mwakupitilisya kutenda yindu ni ŵandu ŵali ŵakulupichika kwa jwalakwe. Yehofa akusayamichila mnope kulupichika kwawo, mwamti chachapa upile.—2 Sam. 22:26.

18. Ana alijiganyisye chichi pa yindu yaŵasimene nayo M’bale Marco ni ŵamkwakwe?

¹⁸ Aganichisye yayamtendechele M’bale Marco ni ŵamkwakwe lina lyawo Sidse. Ŵanache wosope ŵaŵili ŵa achakongwe ŵa jemanjaji ŵalesile kumtumichila Yehofa. M’bale Marco jwatite, “Kutandila papagwile mwanache, ukusamnonyela mnope. Mwamti ukusatenda yiliyose yakomboleka pakusaka kumchenjela mwanachejo ku yindu yakogoya. Myoyo, ŵanache ŵetu paŵalesile kumtumichila Yehofa yatupweteche mnope mumtima.” M’baleju jwasasilesoni kuti, “Nambo Yehofa aŵele ali mkutukamuchisya kuti tukombole kupilila. Jwalakwe aŵele ali mkutukamuchisya une ni ŵamkwangu kuti tukomboleje kulimbikasyana jwine patengwiche.” Ŵamkwakwe m’baleju ŵasasile kuti, “Ngamkanitukombola kupilila yikaŵe kuti Yehofa ngakutupa machili gatwasosechelaga. Pandanda, naganisyaga kuti unejo ni junatendekasisye kuti ŵanache ŵangu aleche kumtumichila Yehofa. Yeleyi yandendekasyaga kuti ndajeje mnope ligongo lyakulijimba magambo. Myoyo, namsalile Yehofa mwanapikanilaga. Kaneko, pali papitile masiku gakuŵalanjika, nasimene ni mlongo jwine junawonegene najo yaka yejinji munyumamo. Jwalakwe jwangamwile m’makoyo, kaneko juli mkundola mmeso jwaŵechete kuti, ‘Mlongo Sidse, mkumbuchileje kuti nganimtendekasya mmwejo kuti ŵanache ŵenu aleche kumtumichila Yehofa.’ Yehofa angamuchisye kuti ngombole kupitilisya kumtumichila jwalakwe mwakusangalala.”

19. Ana wawojo ali ŵakusimichisya kutenda chichi?

¹⁹ Yehofa akusasaka kuti ŵakutumichila ŵakwe wosope aweje ŵakulimba mtima mpela Sadoki. (2 Tim. 1:7) Nambope, jwalakwe jwangasaka kuti tudalileje machili getu. Jwalakwe akusasaka kuti tumdalileje. Myoyo, pachingangene ni yakutendekwa yakusosekwa kutenda yindu mwakulimba mtima, amŵendeje Yehofa kuti ŵakamuchisye. Mwamti jwalakwe chachakamuchisya kuŵa ŵakulimba mtima mpela Sadoki.—1 Pet. 5:10.