1. Ligongo chichi lisiku lya Chikumbuchilo lili lyakusosekwa mnope? (Luka 22:​19, 20)

 KWA ŵandu ŵa Yehofa, Chikumbuchilo cha chiwa cha Klistu uli mwambo wakusosekwa mnope wawukusatendekwa chaka chilichose. Chelechi chili chakutendekwa chele Yesu ŵalamwile ŵakulijiganya ŵakwe kuti akumbuchileje. (Aŵalanje Luka 22:​19, 20.) Tukwembecheya mwachidwi Chikumbuchilo cha chaka achino pamagongo gejinji. Kwende tukambilane gane mwa magongo gelega.

2. Ana ni magongo gane gapi gagakusatutendekasya kutenda Chikumbuchilo?

² Chikumbuchilo chikusatukamuchisya kumanyilila kusosekwa kwa mbopesi jakutuwombola. Chikusatukumbusya yatukusosekwa kutenda pakulosya kuyamichila mbopesi ja Yesu. (2 Akoli. 5:​14, 15) Chikusatupasoni upile ‘wakulimbikasyana’ ni ŵakutumichila achimjetu. (Alo. 1:12) Chaka chilichose ŵandu ŵaŵawujile munyuma akusatenda nawo Chikumbuchilo. Ligongo lya kwapochela chenene, ŵane mwa jemanjaji akusawujilasoni kwa Yehofa. Nambosoni ligongo lya yindu yapikene soni yayiweni pa Chikumbuchilo, ŵandu ŵajinji ŵachidwi akusatanda kwenda pa msewu wakuja kupata umi. Yeleyi yikusatendekasya kuti Chikumbuchilo chiŵe chakusosekwa mnope.

3. Ana Chikumbuchilo chikusichatendekasya chamtuli abale ni alongo pachilambo chosope kuŵa ŵakamulana? (Alole chiwulili.)

³ Chikumbuchilo chikusatukamuchisyasoni kuŵa ŵakamulana pachilambo chosope. Tukusasongana kuti tutende Chikumbuchilo lyuŵa palikapile. Wosope tukusapikanila ngani jajikusagombelechesya kusosekwa kwa mbopesi jakutuwombola. Tukusajimbaga nyimbo siŵili syakumchimbichisya Mlungu. Tukusajendesya mkate soni finyo yayikusajimila chilu soni myasi ja Yesu. Nambosoni ni mtima wetu wosope tukusajanga kuti “ame” pa mapopelo mcheche gagakusapelechedwa palisikuli. Pa maawala 24 mipingo josope  jikusaŵa jili jitesile yeleyi. Agambe ganichisya yakusati Yehofa soni Yesu pakusangalala pakutuwona tuli mkwachimbichisya jemanjaji mwakamulana chamti myiyi.

4. Ana chitukambilane chichi munganiji?

⁴ Munganiji chitukambilane yiwusyo yakuyichisyayi: Ana mpaka tukosechelesye chamtuli mtima wetu ku mwambo wa Chikumbuchilo? Ana mpaka twakamuchisye chamtuli ŵane kuti chapindule ni mwambowu? Soni ana mpaka twakamuchisye chamtuli ŵandu ŵaŵawujile munyuma? Kumanyilila kwanga kwa yiwusyoyi chikutukamuchisye kukosechela chakutendekwa chapajikachi.

ANA MPAKA TUKOSECHELESYE CHAMTULI MTIMA WETU KU MWAMBO WA CHIKUMBUCHILO?

5. (a) Ligongo chichi tukusosekwa kuganichisya kusosekwa kwa mbopesi jakutuwombola? (b) Ana alijiganyisye yamtuli mu fidiyo jakuti, Ligongo Chichi Yesu Ŵawile?

⁵ Chindu chakusosekwa mnope champaka tutende kuti tuwukosechelesye mtima wetu chili kuganichisya ya mbopesi jakutuwombola jaŵapeleche Yesu Klistu. Mwajika jetu ngamkanitukombola kuliwombola ku ulemwa ni chiwa. (Aŵalanje Salimo 49:​7, 8; alole fidiyo jakuti, Ligongo Chichi Yesu Ŵawile?) a Yehofa ŵalinganyisye yakuti Yesu apeleche umi wakwe kuti atukulupusye. Pelepatu Yehofa ni Yesu ŵalosisye kulijima kwekulungwa. (Alo. 6:23) Kuganichisya yaŵatesile Yehofa soni Yesu pakulijima ligongo lya m’weji yikusatutendekasya kuti tuyamichileje mnope mbopesi jakutuwombola. Kwende tukambilane yindu yine yaŵasosekwaga kuyipilila Yehofa soni Yesu ligongo lya m’weji. Chandanda kwende tukambilane yajikusagopolela mbopesiji.

6. Ana mbopesi jakutuwombola jikusagopolelaga chichi?

⁶ Mbopesi jakutuwombola jili mpela mtengo wampaka alipile mundu pakusaka kuwuchisya chindu chinechakwe chachijonasiche. Pandanda Adamu ŵaliji ŵamlama. Ali alemwisye, jwalakwe jwajasile upile wakola umi wangamala. Yeleyi yakwayiyesoni ŵanache ŵakwe wosope. Myoyo, pakusaka kuwuchisya yindu yaŵajasile Adamu, Yesu jwapeleche umi wakwe wamlama. Ali pachilambopa Yesu “nganatenda kose yakulemwa, soni nganaŵecheta yaunami ni pakamwa pakwe.” (1 Pet. 2:22) Yesu jwawile ali jwamlama, mwamti umi wakwe wamlama wajimile ndendende umi waŵajasile Adamu.—1 Akoli. 15:45; 1 Tim. 2:6.

7. Ana ni yakusawusya yine yapi yaŵasimene nayo Yesu ali pachilambo chapasi?

⁷ Yesu jwapitilisye kuŵa jwakulupichika kwa Atati ŵakwe mwangasamala kandu kuti ŵasimanaga ni yakusawusya. Ali mwanache, jwapikanilaga achinangolo ŵakwe ŵaŵaliji ŵangali umlama atamose kuti jwalakwe jwaliji jwamlama. (Luk. 2:51) Ali jwachinyamata, jwalakwe jwakanile yindu yayikamtendekasisye kuŵa jwangakulupichika kwa achinangolo ŵakwe soni kwa Mlungu. Yesu ali akusile jwakanilesoni yakulingwa ya Satana kupwatikapo yakumtendekasya kuti akaŵa jwakulupichika kwa Mlungu. (Mat. 4:​1-11) Satana jwaliji jwakusachilila kuti Yesu atende ulemwa yayikamtendekasisye kuti alepele kupeleka mbopesi jakutuwombola.

8. Ana ni yakusawusya yine yapi yaŵapilile Yesu?

⁸ Paŵatendaga utumiki wakwe pachilambo chapasichi, Yesu jwapililaga yakulingwa. Adani ŵakwe ŵamlagasyaga soni kusaka kumwulaga. (Luk. 4:​28, 29; 13:31) Nambosoni ŵasosekwaga kulimbana ni ungali umlama wa ŵakumkuya ŵakwe. (Maliko 9:​33, 34) Paŵaliji myala mwa adani ŵakwe ŵamnyosyaga soni kumlagasya. Kaneko ŵamwuleje chiwa chakupweteka mnope soni chakutesya sooni. (Aheb. 12:​1-3) Jwalakwe jwasosekwaga kupilila jika pa chakulingwa chakumalisya paumi wakwe pali pangali chikamuchisyo cha Yehofa. b—Mat. 27:46.

9. Ana tukusapikana uli mumtima ni mbopesi jaŵapeleche Yesu? (1 Petulo 1:8)

⁹ Kusala yisyene Yesu jwalasile mnope kuti apeleche mbopesi jakutuwombola. Patukuyiwona  yindu yosope yaŵatutendele Yesu, ana ngayikututendekasya kuti tumyamichileje mnope?—Aŵalanje 1 Petulo 1:8.

10. Ana Yehofa jwalosisye chamtuli kulijima pakumkunda Yesu kupeleka umi wakwe mpela mbopesi jakutuwombola?

¹⁰ Nambi uli pakwamba ya Yehofa? Ana jwalakwe jwalosisye chamtuli kulijima kuti amkunde Yesu kupeleka umi wakwe mbopesi jakutuwombola? Yehofa ni Yesu ŵaliji pamkamulano wakulimba mnope wawukusaŵaga pasikati pa nangolo ni mwanache jwakwe. (Mis. 8:30) Agambe kuganichisya muŵapikanile Yehofa paŵamwonaga Yesu ali mkulaga soni kupilila yakulingwa pachilambopa. Ngatukukayichila kuti Yehofa yampweteche mnope paŵamwonaga Mwanache jwakwe ali mkulagasidwa soni kukanidwa.

11. Asale chisyasyo chachikulosya mwaŵapikanile Yehofa paŵamwonaga Yesu ali mkuwulajidwa?

¹¹ Nangolo jwele mwanache jwakwe ajasiche akusamanyilila kupweteka soni chanasa chachikusapagwa ligongo lya chiwa cha mwanache. Atamose kuti tukwete chikulupi chakulimba chakuti ŵawe chachijimuka, nambo yeleyi ngayikusatutendekasya kuti tukapikanaga kupweteka mundu jwatukusamnonyela pawile. Chisyasyochi chikutukamuchisya kumanyilila muŵapikanile Yehofa paŵamwonaga Mwanache jwakwe jwakunonyelwa ali mkulaga soni kuwa m’chaka cha 33 C.E. c—Mat. 3:17.

12. Ana tukusosekwa kutenda chichi patukuŵandichila Chikumbuchilo?

¹² Kutandila apano mpaka pandaŵi ja Chikumbuchilo uli ngalinganya yakulijiganya ngani syakwayana ni mbopesi jakutuwombola palijiganyo lyawo lyapajika kapena pa Kulambila kwa Peŵasa? Mpaka akamulichisye masengo Kabuku Kakamuchisya Kuwungunya Ngani ka Mboni sya Yehofa (naga akwete m’chiŵecheto chawo) kapena mabuku gane gampaka gakamuchisye kujipikanichisya chenene mbopesi jakutuwombola. d Alolechesye kuti akukuya chenene ndandanda jakuŵalanjila Baibulo pa ndaŵi ja Chikumbuchilo jajikusasimanikwa mu Utumiki ni Umi Wetu Wachiklistu—Pologalamu ja Misongano. Nambosoni palisiku lya Chikumbuchilo, akasaliŵalila kulolela pologalamu japadela ja Kulambila kwa Kundaŵi. Naga tukuwukosechelesya mtima wetu ku mwambo wa Chikumbuchilo, yichitukamuchisya kuti chitwakamuchisye ŵane kuti nombenawo chapindule.—Esa. 7:10.

ŴAKAMUCHISYE ŴANE KUTI CHAPINDULE

13. Ana ni chindu chandanda chapi chatukusosekwa kutenda kuti chitwakamuchisye ŵane kupindula ni Chikumbuchilo?

¹³ Ana mpaka ŵakamuchisye chamtuli ŵandu  ŵane kuti chapindule ni mwambo wa Chikumbuchilo? Chandanda akusosekwa kwaŵilanjila ku mwambowu. Kupwatika pa ŵandu ŵakusasimana nawo mu utumiki, mpaka atende chenenesoni kola ndandanda ja ŵandu ŵakusaka kwaŵilanjila. Jemanjaji mpaka aŵe ŵachibale ŵawo, achimjawo ŵakumasengo, ŵakusukulu soni ŵandu ŵane. Atamose yili mkuti nganakola tumapepala twakwanila, mpaka akamulichisyesoni masengo yipangiso yamakono mpela foni pakwaŵilanjila ŵanduwo. Kusala yisyene yeleyi mpaka yikamuchisye kuti ŵandu ŵajinji chasimanikwe pa Chikumbuchilo.—Jwak. 11:6.

14. Asale chisyasyo chakulosya yakuyichisya yambone yayikusapagwa ligongo lya kwaŵilanjila ŵane ku Chikumbuchilo?

¹⁴ Tukakayichilaga patukwaŵilanjila ŵandu ku Chikumbuchilo. Lisiku line mlongo jwali peŵasa ni mundu jwangakulupilila jwasimonjile ŵamkwakwe ali mkusalila mwakunyadila kuti chachiŵa yalumo ku mwambo wa Chikumbuchilo. Jwalakwe jwasimonjile ligongo lyakuti kwandaŵi jelewu ŵaŵele ali mkwalimbikasya ŵamkwakwewo kuti ajawule ku mwambo wa Chikumbuchilo nambo ŵakanaga. Ana ligongo chichi pandaŵiji ŵalumeŵa ŵakundile? Jwamlumeju jwatite, “Napochele kapepala kakumbilanjila ku mwambowu.” Jwalakwe jwasasile kuti jwasimene ni jwamkulungwa jwa mumpingo jwine jwaŵampele kapepalaka. Kutandila pelepa jwamlumeju juŵele juli mkusimanikwa pa mwambo wa Chikumbuchilo.

15. Ana tukusosekwa kukumbuchilaga chichi patukwaŵilanjila ŵane ku Chikumbuchilo?

¹⁵ Tukumbuchileje kuti ŵandu ŵatukusitwaŵilanjila ku Chikumbuchilo akusakolaga yiwusyo, mnopemnope ŵanganasimanikwejepo pamisongano jetu. Myoyo mpaka tutende chenene kuganichisya yiwusyo yampaka atuwusyeje ni kosechela yampaka twajanje. (Akolo. 4:6) Mwachisyasyo, ŵandu ŵane mpaka awusyeje kuti, ‘Ana chikukatendekwe yamtuli?’ ‘Yikajigale ndaŵi jelewu uli?’ ‘Ana ngusosekwa kuwala yakuwala yamtuli?’ ‘Ana akusalipisyaga?’ Nambosoni ‘Ana akusajendesya mbale kuti ŵandu akaponyeje mbiya?’ Patumŵilanjile mundu ku mwambo wa Chikumbuchilo mpaka tutende chenene kumwusya kuti, “Ana akwete chiwusyo chilichose?” Naga akwete chiwusyo chilichose mpaka atende chenene kumjanga. Pakusaka kumkamuchisya mundu kupikanichisya yayikusatendekwa pa misongano jetu,  mpaka tukamulichisyesoni masengo mafidiyo gakuti, Akumbuchileje Chiwa cha Yesu soni Ana ku Nyumba ja Uchimwene Kukusatendekwa Yamtuli? Mu lijiganyo 28 m’buku ja Asangalale Mpaka Kalakala mwana mfundo syambone syampaka tukambilane najo.

16. Ana ni yiwusyo yine yapi yampaka akole ŵandu ŵayiche ku Chikumbuchilo?

¹⁶ Panyuma pakuti mwambo wa Chikumbuchilo umasile, mwine ŵandu ŵachidwi mpaka awusyeje yiwusyo yine. Jemanjaji mpaka asimonjeje ligongo lyakwe ŵandu ŵamnono (naga apali) ni ŵakusalya mkate soni kumwa finyo. Komboleka mpaka asachesoni kumanyilila kuti tukusatenda kalingwa Chikumbuchilo. Mwine mpaka asachesoni kumanyilila naga ŵa Mboni sya Yehofa wosope akusatenda misongano mwakulandana. Atamose kuti mfundosi akusasikolanga mungani ja Chikumbuchilo, nambope ŵandu ŵa chidwi mpaka asosekwe kwalondechesya chenene mfundosi. Ngani ja pa jw.org jakuti, “Ana Ligongo Chichi ŵa Mboni sya Yehofa Akusakumbuchila Chakulya Chaligulo cha Ambuje Mwakulekangana ni ma Dini Gane?” mpaka jakamuchisye kwanga yiwusyo yine yakwete. Tukusosekwa kutenda yampaka tukombole kuti twakamuchisye ŵandu ŵakwete “nganisyo syambone” kupindula ni mwambowu. Mpaka tutende yeleyi mwambowu mkaniwutande, uli mkati soni pawumasile.—Mase. 13:48.

TWAKAMUCHISYEJE ŴANDU ŴAŴAWUJILE MUNYUMA

17. Ana achakulungwa ŵa mumpingo mpaka ŵakamuchisye chamtuli ŵandu ŵaŵawujile munyuma? (Esekiele 34:​12, 16)

¹⁷ Pandaŵi ja mwambo wa Chikumbuchilo, achakulungwa ŵa mumpingo akusosekwa kwakamuchisya ŵandu ŵaŵawujile munyuma. Mpaka atende yeleyi mwakwalosya kuti akusiŵaganichisya. (Aŵalanje Esekiele 34:​12, 16.) Mkanatende Chikumbuchilo, alinjelinje mwampaka akombolele kuŵechetana ni ŵandu ŵajinji ŵaŵawujile munyuma. Ŵasimichisyeje kuti akusiŵanonyela soni kuti ali ŵakusachilila kwakamuchisya. Ŵaŵilanjile jemanjajo ku mwambo wa Chikumbuchilo. Naga jemanjaji ayiche ku mwambo wa Chikumbuchilo ŵapocheleje mwachinonyelo. Panyuma pa mwambowu, apitilisyeje kunguluka nawo soni kwakamuchisya mwausimu abale ni alongoŵa kuti awujile kwa Yehofa.—1 Pet. 2:25.

18. Ana wosopewe mpaka tutende yamtuli kuti twakamuchisye ŵandu ŵaŵawujile munyuma? (Aloma 12:10)

 ¹⁸ Abale ni alongo wosope mpaka ŵakamuchisye ŵandu ŵaŵawujile munyuma kuti chatende nawo Chikumbuchilo. Mpaka atende yeleyi mwakutenda nawo yindu mwachinonyelo, mwakwaganichisya soni mwakwachimbichisya. (Aŵalanje Aloma 12:10.) Amanyilileje kuti mwine abale ni alongo ŵeleŵa aŵele ali mkutenda sooni kuti ayiche ku misongano. Kombolekasoni aŵele ali mkogopa kuti ngapocheledwa chenene. e Aŵambaleje kwawusya yiwusyo yakutesya sooni kapena kwaŵechetela maloŵe gampaka gakuŵasye. (1 Ates. 5:11) Abale ni alongo ŵeleŵa ali ŵakulupilila achimjetu. Mwamti mpaka tusangalale kutumichila nawosoni yalumo.—Sal. 119:176; Mase. 20:35.

19. Ana tukusapindula chamtuli patukukumbuchila chiwa cha Yesu?

¹⁹ Tukusayamichila mnope kuti Yesu jwasasile kuti tutendeje mwambo wakukumbuchila chiwa chakwe chaka chilichose. Tukusamanyililasoni kuti mwambowu uli wakusosekwa mnope. Patukutenda mwambowu tukusapindula achimsyewe soni ŵandu ŵane m’matala gejinji. (Yes. 48:​17, 18) Yikusatukamuchisya kuti tumnonyeleje mnope Yehofa soni Yesu. Tukusalosya kuyamichila mnope pa yindu yatutendele jemanjaji. Tukusalimbisyasoni unasi wetu ni ŵakulupilila achimjetu. Nambosoni tukusakola upile wakwakamuchisya ŵane kuti nombenawo asangalaleje ni yindu yambone yayikusayika ligongo lya mbopesi jakutuwombola. Myoyo kwende tutende yampaka tukombole kuti chitusimanikwe pa Chikumbuchilo cha chaka achino lyalili lisiku lyakusosekwa mnope.