1. Ana M’bale Russell ni achimjakwe ŵakamulichisyaga masengo litala lyapi pakulijiganya, soni ligongo chichi litalali lyaliji lyambone?

YAKA yakupunda 100 munyumamu, M’bale Charles T. Russell pampepe ni kagulu ka ŵandu ŵakulijiganya Maloŵe ga Mlungu ŵatandite kusimana pampepe. Jemanjaji ŵasachililaga kulijiganya yajikusasala Baibulo pakwamba ya Yehofa Mlungu, Yesu Klistu, mwaŵelele ŵandu ŵawe soni yakwamba kuwomboledwa. Jemanjaji ŵakamulichisyaga masengo litala lyangasawusya pakulijiganya. Mundu jumo ŵawusyaga chiwusyo, kaneko ŵandu wosope ŵakambilanaga lilemba lililyose lyalyakamulanaga ni nganijo. Kaneko ŵayilembaga yapatile pakuwungunyapo. Yehofa ŵakamuchisyaga ŵanduŵa kupikanichisya usyesyene wakusosekwa mnope wa m’Baibulo, soni usyesyene welewu wuli wakusosekwape mpaka lelo.

2. Ana chichi chachikusatendekasya kuti tuganisyeje mwakulemwecheka patukulinga kupikanichisya yakulochesya ya m’Baibulo?

² Ŵakulijiganya Baibuloŵa, ŵayiweni kuti kupikanichisya ngopolelo ja yakulochesya ya m’Baibulo kuli kwakusawusya pakulandanya ni kupikanichisya yindu yine yajikusajiganya Baibulo. Ligongo chichi ŵayiwonaga kuŵa yakusawusya? Ligongo limo lili lyakuti, ndaŵi syejinji tukusapikanichisyaga ngopolelo ja yakulochesya payikukwanilichikwa kapena panyuma pakuti yikwanilichikwe kala. Nambope panasoni ligongo line. Kuti tuyipikanichisye chenene yakulochesya, tukusasosekwa kujilola chenene ngani josope jakwamba yakulochesyayo. Naga tugamba kulola mbali jimpepe ja yakulochesya, mpaka yitendekasye kuti tuyipikane mwakulemwecheka. Yikuwoneka kuti yeleyi ni yayatendekwe pangani ja yakulochesya yayikusimanikwa m’buku ja Yoweli. Kwende sambano tulolesoni kane yakulochesyayi, nambosoni tulole ligongo lyakwe tukusosekwa kuchenga kapikane ketu ka yakulochesyayi.

3-4. Ana kutandila munyumamu mpaka apano tuŵele tuli mkupikana chamtuli yakulochesya ya pa Yoweli 2:7-9?

³ Aŵalanje Yoweli 2:7-9. Yoweli jwalochesye ya likuga lya sombe lyalichijonanga chilambo cha Isalaeli. Sombesi sichikola meno mpela ga lisimba soni sichilya chakumela chilichose chachikusimanikwa  m’chilambo cha Isalaeli. (Yow. 1:4, 6) Kwa yaka yejinji tuŵele mkuyiwona yakulochesyayi kuti yikwimila ŵandu ŵa Yehofa ŵakukamula masengo gakulalichila mpela sombe syele pangali jwampaka asilekasye. Twaganisyaga kuti masengo gakulalichilaga gali mpela yindu yakonanga ‘chilambo,’ kapena kuti ŵandu ŵakulongoleledwa ni achimlongola ŵadini. *

⁴ Naga tuli tugambile kuŵalanga pa Yoweli 2:7-9, mpaka tuganisyeje kuti lilembali likugopolela yeleyi. Nambope patuganichisyesoni ngani josope jakwamba yakulochesyayi, tuyiweni kuti tukusosekwa kuchenga kapikane ketu. Kwende tukambilane magongo mcheche gagakututendekasya kutenda yeleyi.

5-6. Ana tukusakola chiwusyo chapi patuŵalasile (a) Yoweli 2:20? (b) Yoweli 2:25?

⁵ Ligongo lyandanda, alole yaŵasasile Yehofa pakwamba ya likuga lya sombe. Jwalakwe jwatite, “Tinjatoposya amagongo ŵakumpoto [sombe] kuti aŵe kwakutalika ni jemanja.” (Yow. 2:20) Naga likuga lya sombeli likwimila Ŵamboni sya Yehofa ŵakusapikanila lilamusi lya Yesu lyakuti alalichileje, nambi ligongo chichi Yehofa akusala kuti chachatoposya kuti aŵe kwakutalika? (Esek. 33:7-9; Mat. 28:19, 20) Kusala yisyene, Yehofa ngakwatopolela kwakutalika ŵakutumichila ŵakwe ŵakulupichika, mmalo mwakwe akwamba ya ŵandu ŵakwalagasya ŵakutumichila ŵakwe.

⁶ Ligongo lyaŵili, aganichisye yayikusimanikwa pa Yoweli 2:25. Pelepa Yehofa jwatite, “Tinjimwuchisya yosope yiyajonanjidwe ni sombe. Unetu ni junatumile likuga lya yitete yila, lilyayiche kukulimbana ni jemanja.” Pa lilembapa mpaka ayiwone kuti Yehofa akusala kuti ‘tachiwuchisya’ yindu yosope yayajonanjidwe ni sombe. Naga sombesi sikwimila ŵandu ŵa Yehofa ŵakusalalichila, nikuti mpaka yigopolele kuti utenga wakulalichilawo ukutendekasya yindu konasika. Nambope, yisyesyene yakwe yili yakuti utenga wakusalalichilawu mpaka watendekasye ŵandu ŵakusakala kupitikuka mtima. (Esek. 33:8, 19) Kusala yisyene, utengawu wuli wambone mnope kwa jemanjaji.

7. Ana maloŵe gakuti pali papite ndaŵi, gagakusasimanikwa pa Yoweli 2:28, 29 gakutukamuchisya kupikanichisya chichi?

⁷ Aŵalanje Yoweli 2:28, 29. Ligongo lyatatu likutyochela pakujigalila mndandanda wa yindu yayikutendekwa mu yakulochesyayi. Ana ayiweni kuti palilembapa Yehofa ŵatite, “Pali papite ndaŵi lisiku tilichiyika pandaŵi jele tinjitumisya msimu wangu,” yayikulosya kuti akutumisya msimuwu panyuma pakuti sombe sila simalisisye masengo gakwe? Naga sombesi sikwimila ŵakulalichila ya Uchimwene wa Mlungu, nambi ligongo chichi Yehofa akutumisya msimu kwa jemanjaji pambesi pakuti amalisisye masengo gakulalichila? Yisyesyene yakwe yili yakuti, masengo gakulalichilaga ngamkanigakomboleka kwa yaka yosopeyi yikaŵe kuti Mlungu ngakupeleka chikamuchisyo cha msimu wakwe weswela. Tukuŵecheta myoyo ligongo lyakuti pakusapagwa ŵakusisya soni ŵane ŵakulekasya masengoga.

8. Ana likuga lya sombe lyakulikolanga pa Chiwunukuko 9:1-11, likwimila ŵani? (Alole chiwulili cha pachikuto.)

⁸ Aŵalanje Chiwunukuko 9:1-11. Kwende sambano tulole ligongo lyamcheche. Munyumamu twasalaga kuti likuga lya sombe lyakulikolanga m’buku ja Yoweli likwimila masengo getu gakulalichila ligongo lyakuti yalandanaga ni yakulochesya yayikusimanikwa m’buku ja Chiwunukuko. Yakulochesya ya pa Chiwunukukoyi yikusala ya likuga lya sombe syasikwete ngope syakuwoneka mpela sya ŵandu soni pa mitwe pawo ‘pali pana yisoti ya golide.’ (Chiw. 9:7) Sombesi sikwalagasya kwa miyesi msano “ŵandu ŵimkanakola chimanyisyo cha Mlungu pawusyo pawo.” Miyesi  msanoji jili ulewu wandaŵi jasikusatama sombe ni umi. (Chiw. 9:4, 5) Pelepa pakuwoneka kuti akusala ya ŵakutumichila ŵasagulwe ŵa Yehofa. Jemanjaji akusasala ya chilango chachachipeleka Mlungu pa chilambochi, yayikutendekasya kuti ŵandu ŵali kumbali ja chilambochi akayiwonaga yindu chenene.

9. Ana pana kulekangana kwamtuli pasikati pa sombe syaŵasisasile Yoweli ni syaŵasisasile Yohane?

⁹ Atamose kuti pana kulandana pa yakulochesya yayikusimanikwa m’buku ja Chiwunukuko ni ja Yoweli, nambope pana yindu yine yakusosekwa mnope yayikulekangana. Aganichisye yindu yakuyichisyayi. Mu yakulochesya ya Yoweli yikulosya kuti sombe sikonanga yakumela. (Yow. 1:4, 6, 7) Mu yakulochesya ya m’buku ja Chiwunukuko, yikulosya kuti sombe “syalamulidwe kuti sikajonanga manyasi.” (Chiw. 9:4) Likuga lya sombe lyaŵaliweni Yoweli lyatyochele kumpoto. (Yow. 2:20) Likuga lya sombe lyaŵaliweni Yohane lyakopweche kwisimbo. (Chiw. 9:2, 3) Sombe syaŵasiweni Yoweli syatopoledwe kuti sijawule kwakutalika, pele syakusikolanga m’buku ja Chiwunukuko ngasikutopoledwa, nambo akusikunda kuti simalisye masengo gakwe. M’Baibulo pangali papakusalosya kuti Yehofa nganasangalala ni yasyatesile sombe sya m’buku ja Chiwunukukosi.—Alole libokosi lyakuti “Yakulochesya Yakwamba Sombe Yakulandana Nambo Yili Yelekangane.”

10. Asale chisyasyo cha m’Malemba chachikulosya kuti sombe siŵasisasile Yoweli soni Yohane mpaka sijimile yindu yiŵili yakulekangana.

¹⁰ Kulekangana kwa yakutendekwa yayili mu yakulochesya yiŵiliyi, kutendekasisye kupikanichisya  chenene kuti yakulochesyayi ngayikukamulana. Ana pelepa tujile kuti sombe syasikukolanjidwa m’buku ja Yoweli sili syakulengana ni syakusikolanga m’buku ja Chiwunukuko? Elo. Ndaŵi sine Baibulo jikusakamulichisya masengo chindu chimo kuti chijimile yindu yiŵili yakulekangana. Mwachisyasyo pa Chiwunukuko 5:5, akusamkolanga Yesu kuti ali “lisimba lya lukusyo lwa Yuda,” pelesoni pa 1 Petulo 5:8, akusamkolanga Satana kuti ali mpela “lisimba lyakubangula.” Mwakamulana ni magongo mcheche gatukambilene kala, pelepa pakulosya kuti tukusosekwa kupata kagopolele kane ka yakulochesya ya Yoweliyi. Ana ngopolelo jakwe mpaka jiŵe jamtuli?

11. Ana pa Yoweli 1:6 soni 2:1, 8, 11, pakutukamuchisya chamtuli kupikanichisya yalikwimila likuga lya sombe?

¹¹ Patukulola ngani josope ja yakulochesya ya Yoweliyi, tukuyiwona kuti jwakulochesyaju pelepa ŵasalaga ya likuga lya ngondo. (Yow. 1:6; 2:1, 8, 11) Yehofa jwasasile kuti chachikamulichisya masengo “likuga lya ngondo” (asilikali ŵa ku Babulo) kuti lipeleche chilango kwa Aisalaeli ŵangapikanila. (Yow. 2:25, NWT) Asilikali ŵangondoŵa akukolanjidwa kuti “ŵakumpoto” ligongo lyakuti Ababulo ŵaŵayiche kukwajimuchila Aisalaeli ŵaliji ŵakutyochela kumpoto. (Yow. 2:20) Likuga lya ngondoli akuliwanichisya ni likuga lya sombe syasijimi mwadongosolo. Pakwamba ya likugali, Yoweli jwatite, ‘[Msilikali] jwalijose akwenda mwakongoka. . . . Akusawugumbilila msindawo, akukwela penani pa mapupa. Akwinjila m’nyumba, kupitila pa liwindo mpela ŵawiyi.” (Yow. 2:8, 9) Aganichisye mwayikutendechela yeleyi. Asilikali ŵangondo ali palipose. Pangali malo galigose gakuti mundu mpaka ajuŵe, soni pangali jwampaka akombole kutila kuti akawulajidwa ni asilikali ŵa ku Babuloŵa.

12. Ana yakulochesya ya Yoweli yakwamba sombe yakwanilichikwe chamtuli?

¹² Mpela mwasikusatendela sombe, Ababulo (kapena kuti Akaladeya) ŵajimuchile msinda wa Yelusalemu mu 607 B.C.E. Baibulo jikusasala kuti, “Mwenye jwa ku Babulo . . . , ŵawuleje achachanda ŵa ku Yuda ŵiŵaliji m’Nyumba ja Ambuje ni upanga. Ŵelewo nganakola chanasa ni mundu jwalijose, mwanache kapena jwamkulungwa, ŵalume kapena ŵakongwe, ŵakulwala kapena ŵamlama. Mlungu ŵapeleche wosopeŵa myala mwa Nebukadinesa. Kaneko asilikali ŵa Nebukadinesa ŵajochile Nyumba ja Ambuje, ŵagwisisyesoni lipupa lyele lyasyungulile msinda wa Yelusalemu, ŵajochilesoni nyumba syosope sya uchimwene nipo ŵajonasile yida yosope yiyaliji yamtengo wapenani.” (2 Mbi. 36:17, 19) Ababulo piŵamalisisye konanga chilambochi, ŵandu ŵaŵalolaga yayatendekwagayo ŵaŵechetaga kuti chilambochi chili ‘masame ligongo lyakuti ŵachipeleche kwa Ababulo.’—Yel. 32:43.

13. Ana lilemba lya Yelemiya 16:16, 18 likusagopolela chichi? Alondesye.

¹³ Pali papitile yaka 200 panyuma pa yakulochesya ya Yoweli, Yehofa ŵamkamulichisye masengo Yelemiya kuti asale yakwamba kwimuchilidwaku. Yelemiya jwasasile kuti ŵandu ŵachachiyika kukwimuchilaŵa, chachasosasosa Aisalaeli ŵaŵatendaga yakusakala kuti ŵakamule. Jwalakwe jwatite, “‘Ambuje akuŵecheta kuti tinjaŵilanga amagongo ŵajinji ŵati mpela ŵandu ŵakuwulaga somba, ni tachakamula ŵanduŵa mpela somba. Kaneko tinjaŵilangasoni amagongo ŵane ŵajinji ŵati mpela ŵakusakula yinyama kuti akasakule ŵanduŵa ku matumbi, m’mikuli nambosoni mumbanga sya m’malwala. Tinjapa chilango mwakupelenganya, ligongo lya ulemwa ni kusakala kwawo.’” Pelepa pakulosya kuti Aisalaeli ŵangapitikuka mtima nganaŵa akombwele kutila pakusaka kuti akajonanjidwa ni Ababulo.—Yel. 16:16, 18.

14. Ana lilemba lya Yoweli 2:28, 29, lyakwanilichikwe chakachi?

¹⁴ Pana yindu yinesoni yambone yaŵasasile Yoweli kuti yichitendekwa. Jwasasile kuti chilambo  chichikolasoni yakulya yejinji. (Yow. 2:23-26) Jwasasilesoni kuti msogolomo chakulya cha usimu ngasichisoŵaga. Kupitila mwa Yoweli Yehofa jwatite, “Tinjitumisya msimu wangu pamtundu wuliwose wa ŵandu; ŵanache ŵenu ŵachalume ni ŵachakongwe tachilochesya . . . Pa masiku gelego tinjitumisya msimu wangu kwa ŵakutumichila ŵangu ŵachalume ni ŵachakongwe.” (Yow. 2:28, 29) Mlungu nganiŵapa Aisalaeli msimu weswela pandaŵi jiŵagambile kuwuja kutyochela ku Babulo. Mmalo mwakwe ŵapele msimuwu pali papitile yaka yejinji pa Pentekosite mu 33 C.E. Ana tukumanyilila chamtuli yeleyi?

15. Mwakamulana ni Masengo 2:16, 17, ana Petulo jwachenjile maloŵe gapi ga pa Yoweli 2:28, soni yeleyi yikulosya chichi?

¹⁵ Mwakusalilidwa, ndumetume Petulo jwakamulichisye masengo maloŵe gagali pa Yoweli 2:28, 29 pa chakutendekwa chakusimonjesya chachatendekwe pa lisiku lya Pentekosite. Pa lisikuli cha m’ma 9 koloko kundaŵi, ŵandu ŵapochele msimu weswela mwakusimonjesya, mwamti jwalijose jwatandite kuŵecheta yakwamba “masengo gamakulungwa gatesile Mlungu.” (Mase. 2:11) Petulo pajwalembaga maloŵe gakwe mwakusalilidwa, jwakamulichisye masengo kaŵechete kane pajwasalaga maloŵe gagali mu yakulochesya ya Yoweli. Ana akumanyilila yajwatite pakuchenga kaŵechete? (Aŵalanje Masengo 2:16, 17.) Mmalo mwakutanda kuŵecheta ni maloŵe gakuti “pali papitile ndaŵi,” Petulo jwaŵechete kuti, “M’masiku gakumalisya.” Pelepa jwalakwe jwagopolelaga kuti masiku gakumalisya ga mu ndaŵi ja Ayuda, Mlungu chachipeleka msimu wakwe kwa “ŵandu wosope.” Yeleyi yalosisye kuti papitile ndaŵi yakulochesya ya Yoweli mkaniyikwanilichikwe.

16. Ana msimu wa Mlungu wakamuchisye chamtuli pa masengo gakulalichila m’yaka 100 yandanda, soni ukukamuchisya chamtuli masiku agano?

¹⁶ Panyuma pakuti Mlungu apeleche msimu weswela kwa Aklistu ŵa m’yaka 100 yandanda, jemanjaji ŵatandite kukamula masengo gakulalichila pachilambo chosope. Ni ligongo lyakwe pandaŵi  jele ndumetume Paulo jwalembaga chikalata chakwawula kwa Akolose cha m’ma 61 C.E., jwalakwe jwasasile kuti ngani syambone silalichidwe ku “yakupanganyikwa yosope ya pachilambo chapasi.” (Akolo. 1:23, NWT) Paulo jwakamulichisye masengo maloŵe gakuti “yakupanganyikwa yosope” pakusala ya mbali syosope sya pachilambo chapasi. Kusala yisyene, ni chikamuchisyo cha machili ga msimu weswela wa Yehofa, masiku agano masengo gakulalichila gapite pasogolo mnope mpaka kumbesi kwa “chilambo chosope.”—Mase. 13:47; alole libokosi lyakuti “Tinjitumisya Msimu Wangu.”

17. Ana kapikane ketu ka yakulochesya ya Yoweli pakwamba ya sombe kachenjile chamtuli?

¹⁷ Ana chachichenjile ni chichi? Apano sambano tupikanichisye chenene ngopolelo ja yakulochesya yayikusimanikwa pa Yoweli 2:7-9. Kusala mwakupikanika chenene, ndime sya palilembali ngasikugopolela masengo getu gakulalichila iyayi, mmalo mwakwe sikugopolela yakutendekwa ya pandaŵi jele asilikali ŵa ku Babulo ŵajimuchilaga msinda wa Yelusalemu mu 607 B.C.E.

18. Ana changanichichenga ni chichi pangani ja ŵandu ŵa Yehofa?

¹⁸ Ana changanichichenga ni chichi? Ŵandu ŵa Yehofa akupitilisyape kulalichila ngani syambone kulikose pakamulichisya masengo litala lililyose. (Mat. 24:14) Pangali chilichose champaka boma jitende pakusaka kutulekasya masengo gakulalichilaga. Kupundana ni kalakose, apano tukusalalichila utenga wa Uchimwenewu mwakulimba mtima ligongo lyakuti Yehofa akutukamuchisya. Mwakulinandiya tukusapitilisya kumdalila Yehofa kuti atukamuchisyeje kupikanichisya yakulochesya ya m’Baibulo. Tukusatenda yeleyi pakulupilila kuti pandaŵi jakwe, jwalakwe chachitulongolela kuti tumanyilile “yakuwona yosope yene.”—Yoh. 16:13.