1, 2. (a) Ligongo cici ngatukusosekwa kusimonga patukulagasika nganisyo? (Alole ciwulili cacili penanipa.) (b) Ana citutagulilane cici munganiji?

TUKUTAMA mu ndaŵi jakusawusya mnope. Satana atumbile mnope ni ‘akwendajenda aku nakuku mpela lisimba lyakutongola, kupita mcisosa jwakuti amlye.’ (1 Pet. 5:8; Ciu. 12:17) Ni ligongo lyakwe nganiyiŵa yakusimonjesya kuti atamose m’weji, ŵakutumicila ŵa Mlungu ndaŵi sine tukusalagasika nganisyo. Mwambone, ŵakutumicila ŵakogopa Mlungu munyumamu, mpela Mwenye Daudi, ‘ŵalagasikaga nganisyo’ ndaŵi sine. (Sal. 13:2) Ndumetume Paulo nombenajo ŵalagasikaga nganisyo pakuganicisya ya abale ni alongo m’mipingo. (2 Akoli. 11:28) Nambo ana tukusosekwa kutenda cici patulagasice mnope nganisyo?

² Ŵakutumicila ŵakala ŵapataga cikamucisyo kutyocela kwa Atati ŵetu ŵacinonyelo ŵakwinani pati alagasice nganisyo. Masiku aganosoni, Yehofa akwendelecela kutukamucisya patulagasice nganisyo. Baibulo jikusatulimbikasya kuti, ‘Atule pa jwalakwe yayikwalagasya nganisyo [“yakudandawula,” Maloŵe gamwiŵanda], pakuŵa jwalakwe akusiŵaganicisyaga.’ (1 Pet. 5:7) Ana mpaka tutende catuli yeleyi? Kwende tutagulilane matala mcece gampaka tutendele yeleyi. Matalaga gali, kupopela ni mtima wetu wosope, kuŵalanga soni kuganicisya  mwakusokoka Maloŵe ga Mlungu, kuŵenda msimu weswela wa Yehofa, soni kutagulilana ni mundu jwatukusamkulupilila mnope yayikutulagasya nganisyo. Kwende tulole yatukusosekwa kutenda patukutagulilana matala mcece gelega.

3. Ana litala lyandanda lyampaka ‘tumtulile Yehofa yakusawusya yetu’ lili lyapi?

³ Litala lyandanda lyampaka tumtulile Yehofa yakusawusya yetu lili kupopela mwakutyocela pasi pa mtima. Naga tusimene ni yakututendekasya kulagasika nganisyo tukusosekwa kumsalila Yehofa jwali Mtati jwetu jwacinonyelo. Jwamalumbo Daudi ŵam’ŵendile Yehofa kuti, “Apikane lipopelo lyangu, Wawo Mlungu.” Kaneko jwalakwe ŵasasile kuti, ‘Amtulile Yehofa yakusawusya yawo, ni jwalakwe cacakamucisya.’ (Sal. 55:1, 22) Panyuma pakutenda yiliyose yakomboleka kuti tumasye cakusawusya, lipopelo lyakutyocela pasi pa mtima mpaka litukamucisye kutamika mtima wetu pasi. Nambo ana lipopelo mpaka litukamucisye catuli kuŵambala kulagasika nganisyo mnope?—Sal. 94:18, 19.

4. Naga tukulagasika nganisyo, ana lipopelo mpaka litukamucisye catuli?

⁴ Aŵalanje Afilipi 4:6, 7. Ana Yehofa mpaka ajanje catuli mapopelo getu gakutyocela pasi pa mtima soni gakuŵenda mwakucondelela? Jwalakwe mpaka ajanje mwakutupa mtendele wamumtima wampaka utukamucisye kuŵambala kulagasika nganisyo. Ŵajinji mpaka ajiticisye yeleyi kutyocela pa yasimene nayo. Jemanjaji ayiweni kuti pandaŵi jaŵalagasikaga nganisyo, Mlungu ŵakamucisye kolasoni mtendele wamumtima wawukusapunda kuganisya mwakusokoka kulikose. Kombolekasoni kuti wawojo akwiticisya yeleyi. “Mtendele wa Mlungu” mpaka wutukamucisye kumalana ni cakusawusya cilicose campaka tusimane naco. Tukusosekwa kumkulupilila mnope Yehofa juŵalagucisye kuti, “Une ndili Mlungu jwenu, mkajasa mtima. Tinjimpa macili, soni kumkamucisya.”—Yes. 41:10.

5. Ana Maloŵe ga Mlungu mpaka gatukamucisye catuli kola mtendele wa mumtima?

⁵ Litala lyaŵili lyampaka tupatile mtendele wamumtima lili kuŵalanga Baibulo nambosoni ganicisyaga mwakusokoka yatuŵalasileyo. Ligongo cici kutenda yeleyi kuli kwakamucisya? M’Baibulo mwana songa syampaka situkamucisye kuŵambala, kunandiya, atamose kumalana kwene ni kulagasika nganisyo. Tukusosekwa kumanyilila kuti Maloŵe ga Mlungu gali gakamucisya mnope ligongo gakwete lunda lusyesyene lwakutyocela kwa Mkupanganya jwetu. Patukuganicisya mwakusokoka nganisyo sya Yehofa ndaŵi syosope soni kulola mwampaka tukamulicisye masengo maloŵe ga m’Baibulo, tukusaŵa ŵakulimba mnope. Yehofa akutusalila kuti naga tukusaka kuŵa ‘ŵakulimba soni ŵamacili’ ngaŵaga ‘ŵawoga’, tukusosekwa tuŵalanjeje Baibulo.—Yos. 1:7-9.

6. Ana maloŵe ga Yesu mpaka gatukamucisye catuli?

⁶ M’Baibulo, tukusapatamo maloŵe gakamucisya gaŵaŵecete Yesu. Yaŵaŵecetaga nambosoni yaŵajiganyaga, yakamucisye mnope ŵandu ŵaŵampikanilaga. Ŵandu ŵajinji ŵamnonyelaga Yesu ligongo lyakuti jwalakwe ŵajiganyaga mwakwaganicisya ŵandu ŵakasice mtima, ŵacimbicisyaga ŵakulopotoka, soni kwatondoya ŵakulagasika nganisyo. (Aŵalanje Matayo 11:28-30.) Yesu ŵaganicisyaga mnope mwaŵapikanilaga ŵane mumtima. (Maliko 6:30-32) Yesu ali jwakoseka kutukamucisyasoni m’weji mpela muŵatendelaga ni ŵandumetume ŵakwe. Ngaŵa kuti tukusosekwa kuŵa ni Yesu mwakucilu mpela muyaŵelele ni ŵandumetume ŵakwe kuti tupate cikamucisyo celeci. Atamose pali kwinani mpela Mwenye, jwalakwe akwendelecelape kupikanicisya mwatukupikanila mumtima soni kuŵa jwakusacilila kutukamucisya. Cati m’yoyo, patulagasice nganisyo, jwalakwe ali jwakoseka kutukamucisya pandaŵi jakuŵajilwa. Yisyene, Yesu mpaka atukamucisye kumalana ni yakusawusya yatukusimana nayo, ni kutupa cembeceyo soni kutulimbisya.—Ahe. 2:17, 18; 4:16

7. Ana mpaka tupindule catuli Mlungu patupele msimu wakwe weswela patum’ŵendile?

⁷ Yesu ŵatusimicisye kuti Atati ŵetu ŵakwinani ngasalepela kutupa msimu wakwe weswela patukum’ŵenda. (Luk. 11:10-13) Yeleyi yikutuyikasya pa litala lyatatu lyakusosekwa mnope lyakumacisya kulagasika nganisyo, lyalili msimu weswela. Msimu weswelawu ukusatukamucisya kola ndamo syambone syasikusalosya umundu wa Mlungu jwamacili gosope. (Aŵalanje Agalatia 5:22, 23; Akolo. 3:10) Patukulingalinga kola ndamo syelesi, unasi wetu ni ŵane uciŵa wambone. Yakuyicisya yakwe, tuciŵambala yindu yampaka yitutendekasye kulagasika nganisyo. Kwende tulole mwele ndamo syasikusayika ligongo lya msimu weswela mpaka situkamucisye.

8-12. Ana kola ndamo syawukusakoposya msimu weswela mpaka kutukamucisye catuli?

⁸ “Cinonyelo, kusangalala, mtendele.” Patukulingalinga kutama cenene ni ŵandu ŵane, tuciyiwona kuti pandaŵi jakulandanajo tukunondiya kulagasika nganisyo. Ligongo cici tukuŵeceta m’yiyi? Tukusosekwa kumanyilila kuti patukulosya cinonyelo cisyesyene nambosoni kwacimbicisya abale, tukusaŵambala yakutendekwa yampaka yitulagasyeje nganisyo.—Alo. 12:10.

⁹ “Kuwusimana mtima, canasa, umbone mtima.” Tukusaŵa pa mtendele ni ŵane naga tukupikanila maloŵe gakuti, ‘Aŵe ŵambone mtima kwa jwine ni mjakwe, ŵacanasa cekulungwa, soni ŵakululucilana kutyocela pasi pa mtima.’ (Aef. 4:32) Patukulosya ndamo syelesi, tuciŵambala yakutendekwa yampaka yiyikasye kulagasika nganisyo. Nambosoni kulosya ndamosi kucitukamucisya kumalana ni yakusawusya yayikusayika ligongo lya ungali umlama.

¹⁰ “Cikulupi.” Masiku agano, ŵandu ŵajinji akusalagasika nganisyo ligongo lya kusoŵa kwa mbiya soni yindu yakucilu. (Miy. 18:11) Ni ligongo lyakwe tukusosekwa kola cikulupi cakulimba mwa Yehofa Mlungu jwakusatusamalila mwacinonyelo kuti tuŵambale kapena kumasya kwene kulagasika nganisyo kweleku. Ana yeleyi mpaka yikombolece catuli? Mpaka tuŵambale kulagasika nganisyo mwakupikanila maloŵe gakusalilidwa ga ndumetume Paulo gakuti, ‘Aŵeje ŵakwikutila ni yindu yakwete.’ Paulo ŵajendelecele kuŵeceta kuti, “Pakuŵa Mlungu ŵatite, ‘Ngasinamleka kapena kumjasa ata panandi.’ Mwati tulimbeje mtima ni kujila kuti, ‘Yehofa ali jwakungamucisya jwangu. Ngasinjogopa. Ana mundu mpaka andende cici?’”—Ahe. 13:5, 6.

¹¹ “Kufasa, kuligosa.” Aganicisye yakuyicisya yambone yayikusapagwa patukulosya ndamo syelesi. Kulosya ndamo syelesi kukusatukamucisya kuŵambala yakutendekwa yampaka tulagasice nayo nganisyo, soni tucipindula mwakuŵambala ndamo syacabe mpela, ‘kukalipa, kupya mtima, kutenda njojo, soni kuŵeceta maloŵe gacipongwe.’—Aef. 4:31.

¹² Tukusasosekwa kuŵa ŵakulinandiya kuti tukombole kulupilila ‘mkono wamacili wa Mlungu’ soni kuti ‘tumtulileje yayikutulagasya nganisyo.’ (1 Pet. 5:6, 7) Naga tukuŵa ŵakulinandiya, tucilingalinga kutenda yindu yampaka Yehofa ayinonyele. (Mika 6:8) Patukumjegamila Yehofa, tuciyiwona kuti tukunandiya kulagasika nganisyo.

13. Ana Yesu ŵagopolelaga cici paŵaŵecete kuti, ‘Akadandawulaga’?

¹³ Pa Matayo 6:34 (aŵalanje), tukusapata camuko cambone mnope cakuti, ‘Akadandawulaga.’ Ndaŵi sine kutenda yeleyi mpaka kuwonece kuŵa kwakusawusya. Nambo ana Yesu ŵagopolelaga cici paŵaŵecete kuti, ‘Akadandawulaga’? Jwalakwe nganagopolelaga kuti jwakutumicila jwa Mlungu nganaŵa asimene ni yakumtendekasya kulagasika nganisyo ndaŵi sine, ligongo tuyiweni kala yeleyi pa maloŵe gaŵaŵecete Daudi soni Paulo. Nambo Yesu ŵakamucisyaga ŵakulijiganya ŵakwe kupikanicisya kuti kulagasika nganisyo mnope nganikuŵa kumasisye yakusawusya. Ligongo lyakuti lisiku lililyose likwete yakusawusya yakwe,  m’yoyo Aklistu ngakusosekwa kulagasika nganisyo ligongo lya yakusawusya yaŵasimene nayo kala kapena yacacisimana nayo kusogolo. Ana kupikanila yaŵasasile Yesuyi mpaka yitukamucisye catuli kunandiya kulagasika nganisyo?

14. Ana mpaka tumalane catuli ni kulagasika nganisyo ligongo lyakumbucila yakulemwa yakala?

¹⁴ Ŵandu ŵane akusalagasika nganisyo ligongo lyakumbucila yakulemwa yaŵatesile kala. Jemanjaji akusalijimba magambo ligongo lyaganicisya mnope yakulemwa yaŵatesile yaka yejinji munyumamo. Ndaŵi sine Mwenye Daudi ŵalijimbaga magambo pakuyiwona kuti ‘yakulemwa yakwe yapundile msingu wakwe.’ Jwalakwe ŵasasile kuti, ‘Ngulila mwagumila ligongo lya kupweteka mnope kwa mtima wangu.” (Sal. 38:3, 4, 8, 18) Ana Daudi ŵatesile cici ligongo lya yeleyi? Jwalakwe ŵamkulupilile Yehofa jwali jwacanasa soni jwakululucila. Mwakulimba mtima jwalakwe ŵasasile kuti, “Jwakusangalala ali mundu jwele yakulemwa yakwe yikululucidwe.”—Aŵalanje Salimo 32:1-3, 5.

15. (a) Ligongo cici ngatukusosekwa kulagasika nganisyo ni yindu yayikututendecela? (b) Ana matala gapi gatukusosekwa kugakuya kuti tunandiye kulagasika nganisyo? (Alole libokosi lyakuti, “Matala gane gampaka gakamucisye kunandiya kulagasika nganisyo.”)

¹⁵ Ndaŵi sine mpaka tulagasice nganisyo ligongo lya yindu yayikututendecela. Mwacisyasyo, yaŵalembile Daudi pa Salimo 55, yalosisye kuti ŵalagasikaga nganisyo ligongo lyakuti ŵandu ŵasakaga kum’wulaga. (Sal. 55:2-5) Nambope, jwalakwe nganakunda kuti kulagasika nganisyo kweleku kusokonasye cikulupi cakwe pa Yehofa. M’malo mwakwe ŵapopelaga kwa Yehofa mwakutyocela pasi pa mtima soni kupata matala gakumacisya yayamtendekasyaga kulaga nganisyo. (2 Sam. 15:30-34) Ana tukulijiganya cici kutyocela kwa Daudi? M’malo mwakunda kuti kulagasika nganisyo kutusokonasye, tukusosekwa kupata matala gakumalanilana ni yayikutulagasya nganisyoyo soni kuleka nganijo m’miyala mwa Yehofa.

16. Ana kumanyilila gopolela kwa lina lya Mlungu mpaka kulimbisye catuli cikulupi cetu?

¹⁶ Ndaŵi syejinji Mklistu mpaka alagasice nganisyo ligongo lyaganicisya mnope yindu yampaka yitendekwe msogolo. Nambope ngatukusosekwa kulagasika nganisyo ni yindu yangatukumanyilila kuti ciyitendekwe kapena yanganiyitendekwe. Ligongo cici? Ligongo lyakuti ndaŵi syejinji yindu yangayika pakusakala mnope mpela mutwaganicisyaga. Nambosoni tukusosekwa kumanyilila kuti pangali cilicose campaka cimleme Yehofa. Paja lina lyakwe lisyesyenelyo likusagopolela kuti, ‘Akusatendekasyaga.’ (Eks. 3:14) M’yoyo ngatukusosekwa kulagasika nganisyo ligongo gopolela kwa lina lyakwe kukulosya kuti Mlungu cacikwanilisya yosope yalagucisye kwa ŵakutumicila ŵakwe. Mpaka tuŵe ŵakusimicisya kuti Mlungu cacapa mbote ŵakutumicila ŵakwe ŵakulupicika soni kwakamucisya kumalana ni kulagasika nganisyo ligongo lya yindu yaŵatesile kala, yayikwatendecela apanopano soni yamsogolo.

17, 18. Ana kutagulilana mwatukupikanila mumtima ni mundu jwatukusamkulupilila mpaka kutukamucisye catuli?

¹⁷ Litala lyamcece lyakutukamucisya kumalana  ni kulagasika nganisyo lili kutagulilana mwatukupikanila mumtima ni mundu jwatukusamkulupilila. Mwambone, ŵamkwetu, mjetu jwapamtima soni acakulungwa ŵa mumpingo mpaka atukamucisye. Baibulo jikusatusalila kuti, ‘Kudandawula kwa mundu kukusaŵa mpela msigo wa usito mumtima mwakwe, nambo maloŵe gambone gakusamsangalasya.’ (Miy. 12:25) Kuŵecetana mwagopoka soni mwakuwona mtima mpaka kutukamucisye kupikanicisya soni kumalana ni yayikutulagasya nganisyo. Baibulo jikusatusalila kuti, ‘Pali pangali kutamila pamo, yakuganisya yikusalepecekwa. Nambo ali atupile apungu yikusakomboleka.’—Miy. 15:22.

¹⁸ Yehofa akusiŵakamucisyasoni Aklistu kumalana ni kulagasika nganisyo kupitila m’misongano ja mpingo jajikusatendekwa cijuma cilicose. Ku misonganoku tukusasimana ni ŵakulupilila acimjetu ŵakusatuganicisya mnope soni ŵakusaŵa ŵakusacilila kutulimbikasya. (Ahe. 10:24, 25) ‘Kulimbikasyanaku,’ mpaka kutukamucisye kuŵa ŵakulimba mwausimu soni kumalana ni kulagasika nganisyo mwangasawusya.—Alo. 1:12.

19. Ligongo cici mpaka aŵe ŵakusimicisya mtima kuti unasi wawo ni Mlungu mpaka walimbisye?

¹⁹ Kwende tuganicisye ya cisyasyo ca jwamkulungwa jwa mumpingo jwine ku Canada, juŵakuweni kusosekwa kwa kumtulila Yehofa yayamlagasyaga nganisyo. Jwalakwe ali pa masengo ga uticala gagali gakupesya mnope soni akusalagasika nganisyo ligongo lya ulwele wakwete. Ana cici cacimkamucisye m’baleju kupilila yakusawusya yakweyi? Jwalakwe ŵasasile kuti, “Cakupunda pa yosope, nalinjilelinjile kulimbisya unasi wangu ni Yehofa kuti malane ni kulagasika nganisyo. Acimjangu ŵa pamtima soni abale ni alongo ni ŵaŵangamucisyesoni mnope. Natagulilanaga mwagopoka ni ŵamkwangu yindu yayikulagasya nganisyo. Acakulungwa ŵa mumpingo acimjangu soni jwakulolela mkuli jwetu ŵangamucisye kuti nayiwoneje yakusawusya yangu mwakuŵajilwa. Nambosoni, madokotala gangamucisye kupikanicisya munaŵelele soni nakombwele kucenga mwanatendelaga yindu ni kupata ndaŵi jakupumula soni kutenda yakulimbisya cilu. Pambesi pakwe, nalijiganyisye mwampaka malanile ni yakusawusya yangu. Nambo naga pana yakusawusya yine yanguyilepela kumalana nayo, ngusinayileka m’miyala mwa Yehofa.”

20. (a) Ana mpaka tumtulile catuli Mlungu yayikutulagasya nganisyo? (b) Ana mungani jakuyicisya tucitagulilana cici?

²⁰ Mungani ajino tulijiganyisye kusosekwa kwa kumtulila Mlungu yakusawusya yetu mwa kupopela mwakutyocela pasi pa mtima, kuŵalanga Maloŵe gakwe soni kuganicisya mwakusokoka yatuŵalasileyo. Tulijiganyisyesoni kusosekwa kwa kola ndamo syawukusakoposya msimu weswela, kutagulilana mwagopoka yayikusatulagasya nganisyo ni mundu jwatukusamkulupilila, soni kusongana ni Aklistu acimjetu. Mungani jakuyicisya tucitagulilana yatesile Yehofa pakutulimbisya mwakutupa cembeceyo cakuti tucipocela mbote.—Ahe. 11:6.