1. Ana alongo akusatenda yindu yambone yapi mumpingo? Ana ŵajinji mwa jemanjaji akusasimana ni yakusawusya yamtuli? (Alole chiwulili chapachikuto)

TUKUSAYAMICHILA kwawona alongo ŵajinji ali mkukamula masengo mwakulipeleka. Alongoŵa akusapeleka ndemanga syakulimbikasya soni akusalipeleka pamasengo gakulalichila. Ŵane mwa alongoŵa akusalipeleka pakulinganya nawo yindu yayijonasiche pa Nyumba ja Uchimwene soni kwalimbikasya Aklistu achimjawo. Nambopetu akusasimanaga ni yakusawusya. Ŵane, akusakamula masengo gakwasamalila achinangolo ŵawo ŵachekulupe. Pele ŵane, ŵandu ŵamwiŵasa mwawo akusiŵasisyaga mnope. Nambosoni, ŵane akusalela jika ŵanache soni akusakamula masengo mwakulipeleka mnope pakusaka kwakamuchisya ŵanache ŵawo.

2. Ligongo chichi tukusosekwa kwakamuchisya alongo?

² Tukukambilana ngani jeleji ligongo lyakuti ŵandu kuchilamboku ŵangachimbichisyaga achakongwe. Baibulo jikusatulimbikasyasoni kuti twakamuchisyeje achakongwe. Mwachisyasyo, ndumetume Paulo ŵawusalile mpingo wa ku Loma kuti umpochele chenene Febe soni ‘umkamuchisye naga akusaka chikamuchisyo chilichose.’ (Alo. 16:1, 2) Pandaŵi jele Paulo jwaliji Mfalisi, komboleka kuti jwajigaliche ni ndamo ja Chiyuda jakwawona achakongwe kuŵa ŵangasosekwa. Nambo pandaŵi jaŵagambile kuŵa Mklistu, jwatandite kusyasya chisyasyo cha Yesu mwamti jwatandite kwachimbichisya achakongwe soni kutenda nawo yindu mwakwaganichisya.—1 Akoli. 11:1.

3. Ana Yesu jwawonaga mwamtuli achakongwe?

³ Yesu ŵamchimbichisyaga jwamkongwe jwalijose. (Yoh. 4:27) Jwalakwe nganiŵawonaga achakongwe mpela mwaŵatendelaga achimlongola ŵane ŵa Chiyuda. Buku jine jakulondesya ngani sya m’Baibulo jasasile kuti, “Yesu nganaŵecheta chilichose chakwanyosya achakongwe.” Jwalakwe ŵayichimbisyaga mnope achakongwe ŵaŵatendaga yakusasaka Mlungu. Yesu jwawonaga achakongweŵa kuti ali mwanja chemwali ŵakwe. Mwamti pandaŵi jaŵasalaga ya  achalume ŵaŵaliji achalongo achimjakwe ŵausimu, ŵakolasilesoni achakongweŵa.—Mat. 12:50.

4. Ana chitukambilane chichi munganiji?

⁴ Yesu jwaŵaga jwakoseka kwakamuchisya achakongwe ŵaŵamtumichilaga Mlungu. Jwalakwe ŵayamichilaga jemanjaji soni kwachenjela. Kwende tukambilane yampaka tutende kuti tusyasyeje yaŵatendaga Yesuyi.

5. Ana chichi chachikusatendekasya alongo ŵane kulipikana kuti ali jikajikape?

⁵ Wosopewe tukusasosekwa kola achimjetu ŵambone. Nambope ndaŵi sine yikusaŵa yakusawusya kuti alongo apate achimjawo ŵambone. Apikane yaŵaŵechete alongo ŵane. Mlongo Jordan * jwasasile kuti, “Ligongo lyakuti nganimba peŵasa ngusaliwona kuti ndili jwangasosekwa mumpingo.” Nombenajo Mlongo Kristen jwaŵasamile kudela jine kukutenda upayiniya jwatite, “Pamsamile mumpingo wine mkusagamba kuliwona kuti mli jikajikape.” Panasoni abale ŵane ŵakusalipikana chamti myiyi. Ŵandu ŵakusatyochela m’liŵasa lyele nganiliŵa lya Mboni, akusalipikana kuti ŵalekangene ni ŵachibale ŵawo. Nambope pandaŵi jijojo mpaka alipikaneje kuti ali ŵakutalikangana ni Aklistu achimjawo. Alongo ŵane akusalipikana kuti ali jikajikape pangakutyoka panyumba ligongo lyakulwala kapena pakusamalila ŵachinasi ŵawo ŵakulwala. Mlongo Annette jwasasile kuti, “Yaliji yakusawusya kuti njawule kukukunguluka ni abale ni alongo ligongo lyakuti nasamalilaga mama ŵandu ŵaŵalwalaga.”

6. Ana lilemba lya Luka 10:38-42 likulosya chamtuli kuti Yesu ŵamkamuchisye Malita soni Maliya?

⁶ Yesu jwapataga ndaŵi jakunguluka ni achakongwe ŵa Chiklistu, mwamti jwalakwe jwawonaga jemanjaji kuti ali achimjakwe ŵasyesyene. Mwachisyasyo, Yesu jwapataga ndaŵi jakunguluka ni Maliya soni Malita. Achakongwe ŵaŵiliŵa ŵaliji ŵangalombela. (Aŵalanje Luka 10:38-42.) Achakongweŵa ŵaliji ŵagopoka kuŵechetana ni Yesu ligongo lyakuti jwalakwe ŵaŵechetaga soni kutenda yindu mwakwalimbikasya. Maliya ŵaliji jwakulijiganya jwa Yesu soni nganataŵikaga kutama mwakuŵandikana ni Yesu. * Nombenajo Malita pandaŵi jine paŵayiweni kuti Maliya ngakumkamuchisya kukamula masengo, yamsakalisye, mwamti jwapite kwa Yesu kukumsalila nganisyo syakwe mwagopoka. Pandaŵiji, Yesu jwakombwele kwakamuchisya wosopeŵa mwausimu. Yesu jwalosisye kuti akusaŵaganichisya achakongweŵa yimpepe ni mchimwene jwawo Lasalo mwakwajendela ndaŵi ni katema. (Yoh. 12:1-3) Ni ligongo lyakwe Malita soni Maliya ŵapite kwa Yesu kukuŵenda chikamuchisyo pandaŵi jele Lasalo ŵalwasile.—Yoh. 11:3, 5.

7. Ana mpaka tutende wuli kuti twalimbikasyeje alongo?

⁷ Alongo ŵane akusayiwona kuti kumisongano ni malo gambone gampaka akunguluche chenene ni ŵakulambila achimjawo. Myoyo patuli pamisongano, tukusosekwa kwapochela chenene alongo ŵeleŵa, kuŵechetana nawo soni kwasalila mwatukusapikanila mumtima patukwawona. Mlongo Jordan jwatite, “Ngusasangalala abale ni alongo pakuyamichila ndemanga syangu, pakwenda ni une mu utumiki, soni pakulosya kuti akusanganichisya.” Kwende twalosyeje alongo ŵetu kuti ali ŵakusosekwa mnope. Nombenajo Mlongo Kia ŵatite, “Pandepele kwawula kumisongano, ngusamanyilila kuti jwine chanjimbile foni pakusaka kumanyilila naga ndili chenene. Yeleyi yikusangamuchisya kumanyilila kuti abale ni alongo akusanonyela mnope.”

8. Ana mpaka tumsyasye Yesu chamtuli?

⁸ Tukusosekwa tupateje ndaŵi jakunguluka ni alongo mpela mwaŵatendelaga Yesu. Mpaka twaŵilanjileje kunyumba kwetu kuti tulye nawo yimpepe yakulya kapena kwawula nawo kumalo ganegakwe kukusangalala. Nambotu patukutenda yeleyi tukaliŵalilaga kuti chakulinga chetu  chekulungwa chili kulimbikasyana. (Alo. 1:11, 12) Nombenawo achakulungwa ŵamumpingo akusosekwa kola nganisyo mpela syaŵakwete Yesu. Yili myoyo ligongo lyakuti, Yesu jwamanyililaga kuti ŵandu ŵangalombela mpaka asimaneje ni yakusawusya. Nambope jwasasile mwangapita mumbali kuti kulombela kapena ngalombela nganichiŵa chindu champaka chimtendekasye mundu kuŵa jwakusangalala. (Luk. 11:27, 28) Jwalakwe jwamanyililaga kuti mundu mpaka aŵe jwakusangalala yisyesyene naga akukuwona kumtumichila Yehofa kuŵa kwakusosekwa mnope paumi wakwe.—Mat. 19:12.

9. Ana achakulungwa mpaka atende chichi pakwakamuchisya alongo?

⁹ Achakulungwa akusosekwa atendeje yindu ni achakongwe ŵa Chiklistu mpela mwakusatendela ni mwanja chemwali ŵawo kapena mama ŵawo. (1 Tim. 5:1, 2) Jemanjaji akusosekwa kupataga ndaŵi jakuŵechetana ni alongo misongano mkanijitande kapena pajimasile. Mlongo Kristen jwatite, “Jwamkulungwa jwine jwayiweni kuti ngusatanganidwa mnope. Myoyo ŵayiche kukumbusya mwajiŵelele ndandanda jangu. Nayamichile mnope ligongo nayiweni kuti m’baleju akusanganichisya mnope.” Achakulungwa pakulingalinga kupata ndaŵi jakuŵechetana ni alongo mumpingo, akusalosya kuti akusiŵaganichisya mnope. * Annette jwasasilesoni umbone wakuŵechetana ni achakulungwa  ndaŵi syosope. Jwalakwe jwatite, “Panguŵechetana ni achakulungwa ŵa mumpingo, yikusangamuchisya kuti namanyilileje chenene. Soni jemanjaji akusatanda kumanyilila une chenene. Yeleyi yikusakamuchisya kuti pasimene ni yakusawusya njawuleje kwa jemanjaji kukuŵenda chikamuchisyo.”

10. Ana mpaka twakamuchisye chamtuli alongo ŵetu kuti aŵeje ŵakusangalala?

¹⁰ Wosopewe, tukusapikana chenene ŵandu ŵane patuyamichile ligongo lya yindu yatutesile. Nambo yikusaŵa yakuwujikasya munyuma naga ŵane ngakusatuyamichila. Mlongo jwine jwanganaŵa peŵasa lina lyakwe Abigail jwasasile kuti ndaŵi sine akusalipikana kuti ŵandu ngakusamŵalanjilaga. Jwalakwe jwatite, “Ŵandu ŵajinji ngakusamanyilila atamose lina lyangu, mwamti akusagamba kungolanga ni mena ga ŵachibale ŵangu. Ngusagamba kuliwona mpela kuti une kwangali kuchilambo kuno.” Mwakulekangana ni yeleyi, alole yaŵaŵechete Mlongo Palm. Mlongoju ŵatumichile kwa yaka yejinji mpela m’mishonale ali jwangalombela. Kaneko ŵawujile kumangwakwe kukwasamalila achinangolo. Apano jwalakwe akwete yaka 70 nambo akutendape upayiniya. Jwalakwe jwatite, “Pangumanyilila kuti abale akusayamichila masengo gangutenda, yikusalimbikasya kwabasi.”

11. Ana Yesu jwalosisye chamtuli kuti jwayamichilaga achakongwe ŵaŵatumichilaga najo?

¹¹ Mundaŵi ja Yesu papali achakongwe ŵane ŵaŵamtumichilaga Mlungu “pakamulichisya masengo yindu yiŵakwete.” Sonitu Yesu ŵayamichilaga jemanjaji. (Luk. 8:1-3) Yesu nganagamba kwakunda jemanjaji kuti atumichileje yimpepe ni jwalakwe. Mmalo mwakwe ŵasalilagasoni usyesyene wa m’Maloŵe ga Mlungu. Mwachisyasyo, ŵasalile achakongweŵa mkanipaŵe kuti jwalakwe chachiwa ni kwimuka. (Luk. 24:5-8) Yesu ŵasalilesoni achakongweŵa yakusawusya yachachisimana nayo mpela yaŵatite pakwasalila ŵakulijiganya ŵane. (Maliko 9:30-32; 10:32-34) Yesu paŵataŵidwaga ŵandumetume ŵakwe ŵatisile, nambo jwalakwe paŵawaga ŵane mwa achakongweŵa ŵaliji papopo.—Mat. 26:56; Maliko 15:40, 41.

12. Ana Yesu ŵapele achakongwe masengo gapi?

¹² Yesu ŵapele achakongwe ŵa Chiklistu masengo gakusosekwa mnope. Mwachisyasyo, Yesu ali awile ni kwimuka, achakongwe ŵaŵatumichilaga Mlungu ni ŵaŵaliji ŵandanda kutendela umboni yakuti jwalakwe ajimwiche. Soni Yesu ŵatumile achakongweŵa kuti akasalile ŵandumetume ŵakwe yeleyi. (Mat. 28:5, 9, 10) Yikuwonekasoni kuti ŵandu paŵapochelaga msimu weswela pa Pentekosite mu 33 C.E., palijisoni achakongwe. Nikuti jemanjaji ŵapochele nawo machili gakwakamuchisya kuŵecheta yiŵecheto yachilendo soni kwasalila ŵane yakwamba “masengo gamakulungwa gatesile Mlungu.”—Mase. 1:14; 2:2-4, 11.

13. Ana achakongwe ŵa Chiklistu ŵamasiku agano akukombola kutenda yapi? Ana mpaka atende chichi pakulosya kuti akusiŵayamichila?

¹³ Alongo akusosekwa kuyamichilidwa pamasengo gosope gakusatendaga pakumtumichila Yehofa. Jemanjaji akusakamula masengo mpela gakutaŵa soni kulinganya majumba, kukamuchisya tumagulu twatukusaŵecheta chiŵecheto chine soni kukamula nawo mautumiki gane ga pa Beteli. Akusakamuchisyasoni kumalo kwakutendekwe ngosi, kukamula nawo masengo gakugopolela mabuku soni kusatumichila mpela apayiniya kapena amishonale. Mpelasoni mwayikusaŵela ni abale, alongoŵa akusatenda nawo sukulu ja apayiniya, Sukulu ja Ŵakulalichila ya Uchimwene soni ja Gileadi. Jemanjaji akusiŵakamuchisyasoni achiŵamkwawo kuti atumichileje chenene pa maudindo gawo m’gulu ja Yehofa. Kusala yisyene, yikaŵele yangakomboleka kuti abaleŵa atumichileje chenene m’maudindo gawo mpela “mituka” ja achalume yikaŵe kuti ngakupochela chikamuchisyo kutyochela kwa achiŵamkwawoŵa. (Aef. 4:8) Ana wawojo mpaka atende chichi kuti ŵalimbikasye alongo mpela ŵeleŵa?

14. Pakujigalila yalikusaŵecheta lilemba lya Salimo 68:11, ana achakulungwa ŵalunda akusatenda wuli?

 ¹⁴ Achakulungwa ŵamumpingo ŵalunda akusamanyilila kuti alongo ali mpela gulu jekulungwa ja ŵandu ŵakulipeleka pamasengo. Kusala yisyene, alongoŵa akusagamanyilila chenene masengo gakulalichila. (Aŵalanje Salimo 68:11.) Ni ligongo lyakwe achakulungwa akusalijiganya yejinji kutyochela kwa alongoŵa. Mlongo Abigail jwasasile kuti akusayamichila achakulungwa pakumwusya matala gakusakamulichisya masengo pakulalichila. Jwalakwe jwatite, “Achakulungwaŵa payiche kukumbusya yangusatenda, yikusalimbikasya mnope, soni ngusayiwona kuti Yehofa akusambalanjila m’gulu jakweji.” Achakulungwa akusamanyililasoni kuti alongo ŵakomangale mwausimuŵa, akusakombola kwakamuchisya chenene alongo ŵachisikana pasimene ni yakusawusya. (Tit. 2:3-5) Kusala yisyene, tukusasosekwa kwayamichilaga alongoŵa.

15. Ana alongo mpaka asache chikamuchisyo cha mundu jwine pandaŵi japi?

¹⁵ Ndaŵi sine alongo akusosechela mundu jwine kuti ŵachenjele pasimene ni chakusawusya. (Yes. 1:17) Mwachisyasyo, mlongo jwamasije kapena jwele ulombela wakwe wamasile, mpaka asache mundu jwine kuti ŵaŵechetele mmalo mwawo yindu payisawisye. Kapena mpaka asache kuti mundu jwine ŵakamuchisyeje kukamula masengo gele gakamulidwaga ni ŵamkwawo. Mlongo jwachikulile nombenajo mpaka asache mundu jwakuti akamjimile pakuŵechetana ni madokotala. Mwinesoni mlongo jwali mpayiniya soni akusatenda mautumiki gane m’guluji mpaka asache chikamuchisyo naga ŵandu ŵane akumgamba kuti ngakulalichila mpela mwakusatendela apayiniya ŵane. Ana mpaka tutendesoni chichi pakusaka kwakamuchisya alongo? Kwende tulolesoni chisyasyo cha Yesu.

16. Ana lilemba lya Maliko 14:3-9, likusalosya kuti Yesu ŵamchenjele chamtuli Maliya?

¹⁶ Yesu jwajanguyaga kwachenjela achakongwe ŵa Chiklistu naga ŵandu ŵane ngakwapikanichisya chenene. Mwachisyasyo, ŵamchenjele Maliya pandaŵi jele Malita ŵaliji mkumdandawula. (Luk. 10:38-42) Yesu ŵamchenjelesoni Maliya pandaŵi jine pele ŵandu ŵaganisyaga kuti Maliyajo atesile yindu mwangaganisya chenene. (Aŵalanje Maliko 14:3-9.) Yesu ŵampikanichisye Maliya mwamti ŵaŵechete mwakumyamichila kuti, “Yandendele jwamkongweju yili yambone mnope.  . . Jwalakwe atesile yindu yakayikombwele kuyitenda.” Yesu jwasasilesoni kuti yatesile Maliyayi yichimanyika “kulikose kwele ŵandu tachiŵaga ali mkulalichila ngani syambone.” Ni ligongo lyakwetu lelo tukukambilana ya Maliya munganiji. Yili yakusangalasya kuti Yesu jwakolasile ya masengo gakulalichila pachilambo chosope, pandaŵi jaŵamyamichilaga Maliya. Mwangakayichila maloŵega gamlimbikasisye Maliya pandaŵi jele ŵane ŵamjelusyaga.

17. Apeleche chisyasyo chakulosya ndaŵi jatukusosekwa kwachenjela alongo.

¹⁷ Ana wawojo akusaŵa ŵakoseka kwachenjela alongo ŵetu? Aganichisye chisyasyo achi. Tuwanichisye kuti mlongo jwele ŵamkwakwe nganaŵa ŵa Mboni akusayika mwakuchelewa pamisongano soni kutyoka mwakwanguya. Masiku gane mlongoju ngakusayika ni ŵanache ŵakwe kumisongano. Yeleyi yitendekasisye kuti abale ni alongo ŵane amwusyeje mlongojo ligongo lyakwe ngakusiŵasalila mwamachili ŵamkwakwe kuti amkundeje kwajigala ŵanache kumisongano. Nambo yisyesyene yili yakuti mlongoju aŵele ali mkulingalinga kutenda yampaka akombole. Atamose yili myoyo, mlongoju ngakusakola ufulu wakutenda chilichose chakusaka soni ŵamkwakwe ni ŵakwete ulamusi wekulungwa pa ŵanache ŵawo. Ana akaŵe wawojo akatesile wuli? Naga wawojo akumyamichila mlongoju soni kwasalila ŵane yindu yambone yele mlongojo akusakombola kutenda, mpaka ŵalekasye ŵandu pakumŵecheta mwakumjelusya.

18. Asale yindu yine yampaka tutende kuti twakamuchisye alongo ŵetu.

¹⁸ Mpaka tulosye kuti tukusitwaganichisya alongo ŵetu mwakwapa chikamuchisyo cha pandaŵi jakwe. (1 Yoh. 3:18) Mlongo Annette paŵasamalilaga  mamagwe ali mkulwala, jwasasile kuti, “Abale ni alongo ŵane ŵayikaga kukulimbikasya. Soni ndaŵi sine ŵayikaga ni yakulya. Yeleyi yalimbikasyaga mnope soni nayiwonaga kuti abale akusambalanjila.” Nombe Mlongo Jordan jwapochele chikamuchisyo chapandaŵi jakwe. M’bale jwine ŵamjiganyisye mwampaka alinganyichisye galimoto jakwe pajijonasiche. Jwalakwe jwatite, “Ngusaŵa jwakusangalala mnope pangumanyilila kuti abale ni alongo akusasamala ya umi wangu.”

19. Ana yindu yapi yampaka atende achakulungwa kuti ŵakamuchisye alongo?

¹⁹ Achakulungwa ŵamumpingo akusalingalinga kutenda yampaka akombole kuti ŵakamuchisye alongo. Achakulungwaŵa akusamanyilila kuti Yehofa akusasaka kuti alongoŵa asamalidweje chenene. (Yak. 1:27) Myoyo, achakulungwa akusosekwa kutenda yindu mwaganisya chenene mpela mwaŵatendelaga Yesu. Mpaka atende yeleyi mwakuŵambala kutamilikasya malamusi pa chindu chilichose. (Mat. 15:22-28) Achakulungwa akusosekwa aŵeje ŵakoseka kwakamuchisya ŵane. Pakutenda yeleyi, yikusiyakamuchisya alongo kuliwona kuti ali ŵakusosekwa mnope kwa Yehofa. Jwamkulungwa jwine jwakulolela kagulu ka utumiki paŵamanyilile kuti Mlongo Kia akusama mnyumba jiŵatamaga, ŵapite kukumkamuchisya. Mlongo Kia paŵayiweni yeleyi, jwatite, “Naliji jwakusangalala ni yaŵatesile m’baleju soni yeleyi yangamuchisye kuliwona kuti ndili jwakusosekwa mnope mumpingo, soni kuti nganimba jikajikape.”

20-21. Ana mpaka tulosye chamtuli kuti tukusitwawona alongo kuti ali ŵakusosekwa?

²⁰ Masiku agano pana alongo ŵajinji ŵakulipeleka. Jemanjaji akusasosechela chikamuchisyo chetu. Chisyasyo cha Yesu chitukamuchisye kulola kuti tukusosekwa tupateje ndaŵi jakunguluka ni alongoŵa ni chakulinga chakuti twamanyilile chenene. Mpaka twayamichilejesoni payindu yakusatenda pakumtumichila Yehofa soni kwachenjela pasimene ni yakusawusya.

²¹ Paulo paŵamalisyaga kulemba chikalata chakwe chakwawula ku Loma, jwakolasile achakongwe ŵa Chiklistu ŵakwana 9. (Alo. 16:1, 3, 6, 12, 13, 15) Kusala yisyene, alongo ŵeleŵa ŵasangalalaga mnope papochele moni soni maloŵe gakuyamichila gakutyochela kwa Paulo. Kwende nombewe twalimbikasyeje alongo ŵali mumpingo wetu. Patukutenda yeleyi, tukusalosya kuti tukusitwaganichisya soni kwawona kuti ali ŵakusosekwa mumpingo.