Ngani Jakulijiganya 41
Twakamuchisyeje Ŵakulijiganya Baibulo Kuti Abatisidwe—Mbali Jandanda
“Jemanja mli chikalata chakutyochela kwa Klistu kupitila mwetuwe.”—2 AKOLI. 3:3.
NYIMBO NA. 78 “Kwiganya Maloŵe ga Mlungu”
YACHITULIJIGANYE *
Yikusaŵa yakusangalasya kumwona jwakulijiganya Baibulo jwetu ali mkubatisidwa. (Alole ndime 1)
1. Ana lilemba lya 2 Akolinto 3:1-3 likusatukamuchisya chamtuli kumanyilila upile watukwete wakwakamuchisya ŵane kuti abatisidwe? (Alole chiwulili chapachikuto)
ANA akusapikana uli pam’weni mundu juŵalijiganyaga Baibulo ali mkubatisidwa? Kusala yisyene, yikusaŵa yakusangalasya mnope. (Mat. 28:19) Soni naga wawojo ni ŵaŵamjiganyaga, mwangakayichila akusaŵa ŵakusangalala mnope kumwona mundujo ali mkubatisidwa. (1 Ates. 2:19, 20) Ŵakulijiganya ŵasambano ŵabatisidwe akusaŵa mpela “yikalata ya umboni” kwa ŵandu wosope mumpingo.—Aŵalanje 2 Akolinto 3:1-3.
2. (a) Ana mpaka tuliwusye chiwusyo chapi? Ligongo chichi tukusosekwa kuliwusya chiwusyochi? (b) Ana lijiganyo lya Baibulo likusagopolela chichi? (Alole maloŵe gamwiŵanda.)
2 Yili yakusangalasya kuyiwona kuti mu yaka mcheche yipiteyi tuŵele tuli mkutendesya majiganyo ga Baibulo * gakupunda 10 miliyoni mwesi uliwose. Mu yaka yeleyi, ŵandu wakupunda 280,000 ŵabatisidwaga chaka chilichose ni kuŵa ŵakulijiganya ŵa Yesu Klistu ŵasambano. Ana mpaka twakamuchisye chamtuli ŵandu ŵajinjiŵa kuti abatisidwe? Pakuŵa Yehofa akupelekape upile wakuti ŵandu aŵe ŵakulijiganya ŵa Klistu, tukusosekwa kutenda yiliyose yampaka tukombole kuti twakamuchisye jemanjaji kubatisidwa ndaŵi mkanijimale.—1 Akoli. 7:29a; 1 Pet. 4:7.
3. Ana chitukambilane chichi munganiji?
3 Pakusaka kulosya kusosekwa kwa masengo gakwakamuchisya ŵandu kuti aŵe ŵakulijiganya ŵa Yesu, maofesi ga nyambi gasalilidwe kuti gapate matala gampaka gakamuchisye ŵandu ŵakusalijiganya Baibulo kuti aŵajilwe kubatisidwa. Munganiji soni jakuyichisya, chitulole yampaka tulijiganye kutyochela kwa apayiniya ŵakusamanyilila yindu yejinji, amishonale, soni ŵakulolela madela. * (Mis. 11:14; 15:22) Jemanjaji akusala yindu yampaka yikamuchisye kuti lijiganyo lya Baibulo lijawuleje pasogolo soni yakusosekwa kutenda ŵakwiganya Baibulo soni ŵandu ŵakusalijiganya Baibulo. Chitukambilanesoni yindu msano yakusosekwa kutenda ŵandu ŵakusalijiganya Baibulo ni chakulinga chakuti ayikane pakubatisidwa.
ALIJIGANYEJE WIKI JILIJOSE
Amwusye jwakulijiganya Baibulo jwawo naga yili yakomboleka kupata malo gakuti alijiganyileje (Alole ndime 4-6)
4. Ana tukusosekwa kumanyilila chichi patukutendesya majiganyo ga Baibulo panyumba ja mundu tuli tujimi?
4 Abale ni alongo ŵane akusatendesya majiganyo ga Baibulo ali ajimi payiche panyumba ja mundu. Yisyene kuti pelepa mpaka paŵe pakutandila pambone, nambope yakusakambilana yikusagamba kuŵa yakata soni mpaka yiŵe yakusawusya kuti lijiganyoli litendekweje wiki jilijose. Pakusaka kumkamuchisya jwakulijiganya Baibulo kola chidwi, abale ni alongo ŵane akusaŵenda nambala ja foni kuti amjimbile kapena kumlembela utenga ni chakulinga chakuti akambilane ngani sine sya m’Baibulo. Yeleyi mpaka yitendekwe kwa miyesi jejinji, nambope mundujo nganaŵa ajawile pasogolo. Ana yili yakomboleka kuti mundu alipeleche soni kubatisidwa, naga mwelemu ni mwakusatendela ndaŵi syosope pakulijiganya Maloŵe ga Mlungu? Kusala yisyene, nganiyiŵa yikomboleche.
5. Pa Luka 14:27-33, ana Yesu jwasasile chindu chapi chakusosekwa mnope champaka chitukamuchisye patukwajiganya ŵandu?
5 Pandaŵi jine Yesu jwasasile yakusosekwa kutenda mundu kuti aŵe jwakulijiganya jwakwe. Jwalakwe jwasasile chisyasyo cha mundu jwakusaka kutaŵa sanja soni cha mwenye jwakusaka kwawula kungondo. Yesu jwasasile kuti mundu jwakusaka kutaŵa sanja mpaka ‘atame kaje pasi ni kuŵalanjila mbiya sitisisosekwe’ kuti apakombole kumalisya kutaŵa sanjajo. Nambosoni mwenye jwakwawula kungondo akusasosekwa ‘kutama kaje pasi ni kuganichisya chenene’ kuti alole naga asilikali ŵakwe mpaka apakombole kupunda ngondojo. (Aŵalanje Luka 14:27-33.) Mwakulandana ni yeleyi mundu jwakusaka kuŵa jwakulijiganya jwa Yesu akusasosekwa kumanyilila yindu yampaka atende kuti aŵe jwakumkuya jwakwe. Ni ligongo lyakwe tukusosekwa kwalimbikasya ŵandu ŵatukusitwajiganya Baibulo kuti tulijiganyeje nawo wiki jilijose. Ana mpaka tutende chamtuli yeleyi?
6. Ana mpaka tutende chichi kuti lijiganyo lyetu lijawuleje pasogolo?
6 Naga akusatenda lijiganyolo ali chimile alinje konjechesya ndaŵi jakusalijiganyila. Malo mwagamba kukambilana lilemba limo, alinjeje kukambilana najo malemba gaŵili kapena gatatu ulendo wuliwose wasimene. Naga msyene nyumbajo atandite kusyoŵelela kukambilana yindu yejinji, amwusye naga pa nyumbajo pana malo gampaka atame ni kukambilanaga. Yampaka ajanje mpaka yakamuchisye kumanyilila naga akusakuwona kusosekwa kwa kulijiganya Baibulo. Pakusaka kumkamuchisya kuti ajawule pasogolo, mpaka amwusyesoni naga yili yakomboleka kulijiganya kaŵili pa wiki. Nambopetu kulijiganya kaŵili kapena katatu pa wiki nganikuwa kwakwanila, pakusasosekasoni yindu yine.
AKOSECHELEJE CHENENE LIJIGANYO LILILYOSE
Akosecheleje chenene lijiganyo soni amlosye jwakulijiganyajo mwampaka akosecheleje (Alole ndime 7-9)
7. Ana jwakwiganya mpaka akosechele chamtuli lijiganyo lililyose?
7 Mpela jwakwiganya, akusosekwa kukosechela chenene ndaŵi jilijose pakusaka kulijiganya ni mundu. Mpaka atande ni kuŵalanga ngani josope jachakalijiganye soni malemba gakwe. Ayimanyilileje chenene yiwundo yekulungwakulungwa yanganijo. Yikusawa chenene kuganichisya mtwe wa nganijo, mitwe jamwanamwana, yiwusyo, malemba gakusosekwa kuŵalanga, yiwulili soni mafidiyo gampaka gakamuchisye kulondesya chenene nganijo. Kaneko akusosekwa kuganichisya mwampaka akayilondesye yeleyi mwangasawusya soni mwakupikanika chenene kwa jwakulijiganya jwawo, ni chakulinga chakuti akayipikanichisye mwangalajilila ni kuyikamulichisya masengo.—Neh. 8:8; Mis. 15:28a.
8. Ana lilemba lya Akolose 1:9, 10 likusatujiganya chichi pangani jakwapopelela ŵakulijiganya Baibulo ŵetu?
8 Pakukosechela akusosekwasoni kumpopelela jwakulijiganya jwawo. Amŵendeje Yehofa kuti ŵakamuchisye kumjiganya mwakamula mtima. (Aŵalanje Akolose 1:9, 10.) Akusosekwa kumanyilila yindu yampaka yiŵe yakusawusya kwa jwakulijiganyajo kuyipikanichisya chenene. Akaliŵalila kuti chakulinga chawo chili kumkamuchisya kuti abatisidwe.
9. Ana jwakwiganya mpaka amkamuchisye chamtuli jwakulijiganya Baibulo kukosechela lijiganyo?
9 Tukukulupilila kuti ŵandu ŵakusalijiganya Baibulo mwakutamilichika chachitanda kuyamichila yindu yaŵatendele Yehofa soni Yesu, mwamti chachiŵa ŵakusachilila kulijiganya yindu yejinji. (Mat. 5:3, 6) Kuti apinduleje chenene, jwakulijiganya akusasosekwa kuti aŵicheje mtima ŵakwe pa yindu yakulijiganyayo. Kuti yeleyi yikomboleche, akusosekwa kumsalila umbone wakukosechela lijiganyolyo. Aŵalanjeje yachachilijiganya ni kulola mwampaka ayikamulichisye masengo paumi wakwe. Ana wawojo mpaka amkamuchisye chamtuli jwakulijiganyajo? Akosechele pampepe ni jwakulijiganyajo. Kutenda yeleyi mpaka kumkamuchisye jwakulijiganyajo kulola yatukusatenda pakosechela. * Akusosekwa kumsalila yampaka atende kuti apateje kwanga kwa yiwusyo. Amlosyejesoni mwampaka alembele msele pasi pa yiwundo yekulungwakulungwa. Yeleyi yichimkamuchisya kuti akaliŵalilaga papali kwanga kwa chiwusyo. Kaneko amsalile kuti ajanje yiwusyo m’maloŵe gakwe ngaŵaga mwakwamba kuŵalanga. Yeleyi yichakamuchisya kumanyilila naga jwakulijiganyajo akupikanichisya yalijiganyisye. Panasoni chindu chine, chakusosekwa kumsalila jwakulijiganya Baibulo jwawo kuti atende.
AMJIGANYE MWAMPAKA AŴECHETEJE NI YEHOFA LISIKU LILILYOSE
Amjiganyeje jwakulijiganya Baibulo jwawo mwampaka aŵecheteje ni Yehofa (Alole ndime 10-11)
10. Ligongo chichi kuŵalanga Baibulo lisiku lililyose kuli kwakusosekwa? Ana akusasosekwa kutenda chichi kuti apinduleje pakuŵalanga Baibulo?
10 Jwakulijiganya Baibulo mpaka apindule naga akusatendasoni yindu yine pajika. Jwalakwe akusasosekwa kuti ampikanileje Yehofa soni aŵechetaneje najo. Jwalakwe mpaka ampikanile Yehofa mwakuŵalanga Baibulo lisiku lililyose. (Yos. 1:8; Sal. 1:1-3) Mpaka amlosyesoni ndandanda jakuŵalanjila Baibulo jajili pa jw.org. * Nambo kuti apindule ni yindu yakusaŵalanga m’Baibulo, akusosekwa kumlimbikasya kuti aganichisyeje mnope yalijiganyisye pakwamba Yehofa soni mwampaka ayikamulichisye masengo.—Mase. 17:11; Yak. 1:25.
11. Ana jwakulijiganya Baibulo mpaka alijiganye chamtuli kupopela? Ligongo chichi yili yakusosekwa kuti jwakulijiganya Baibulo apopeleje kwa Yehofa ndaŵi syosope?
11 Amlimbikasye jwakulijiganya Baibulo jwawo kuti aŵechetaneje ni Yehofa mwakupopela lisiku lililyose. Akusosekwa atandeje lijiganyo lyawo soni kumalisya ni lipopelo lyakutyochela pasi pamtima. Akusosekwasoni asaleje lina lya jwakulijiganya jwawojo m’lipopelolyo. Pakupikanila mapopelo gawo nombenajo chachilijiganya mwampaka apopelele kwa Yehofa kutyochela mumtima. Kaneko jwalakwe chachitanda kupopela kwa Yehofa Mlungu mu lina lya Yesu Klistu. (Mat. 6:9; Yoh. 15:16) Mwangakayichila kuŵalanga Baibulo lisiku lililyosye soni kupopela yichimkamuchisya jwakulijiganya Baibulo jwawo kuŵa paunasi wambone ni Mlungu. (Yak. 4:8) Naga akutenda yeleyi, jwakulijiganya Baibulo jwawo chachiŵa jwakoseka kutendasoni chindu chine chakusosekwa mnope champaka chimkamuchisye kuti alipeleche soni kubatisidwa.
AMKAMUCHISYEJE KUTI AŴE PAUNASI WAMBONE NI YEHOFA
12. Ana mpaka atende yamtuli pakumkamuchisya jwakulijiganya Baibulo jwawo kuti aŵe paunasi ni Yehofa?
12 Jwakulijiganya Baibulo ngakusosekwa kwambaga kusangalalape ni yakulijiganya nambo akusasosekwasoni kuti yakulijiganyayo yim’yicheje pamtima. Yeleyi yichimkamuchisya kuti akomboleje kuyikamulichisya masengo yindu yakusalijiganya. Yesu jwaliji jwakwiganya jwambone soni ŵandu ŵasangalalaga kwiganyidwa ni jwalakwe. Nambope ŵandu ŵamkuyaga Yesu ligongo lyakuti yaŵajiganyagayo yayikaga pamtima. (Luk. 24:15, 27, 32) Ŵakulijiganya Baibulo akusosekwa amwoneje Yehofa kuŵa mundu jusyesyene, jwampaka aŵe najo paunasi. Jemanjaji akusasosekwa amwoneje Yehofa kuti ali Mtati jwawo, Mlungu jwawo, soni Mjawo. (Sal. 25:4, 5) Pakutenda lijiganyo, amkamuchisyeje jwakulijiganyajo kusiwona ndamo syambone sya Yehofa kuti sili sisyesyene. (Eks. 34:5, 6; 1 Pet. 5:6, 7) Pandaŵi jilijose jakulijiganya ni mundujo akusosekwa amkamuchisyeje kummanyilila chenene Yehofa. Amkamuchisyejesoni kuyamichila ndamo syambone sya Yehofa mpela chinonyelo, umbone mtima soni chanasa. Paja Yesu jwasasile kuti “lilamusi lyekulungwa soni lyandanda” lili lyakuti ‘mwanonyeleje Ambuje Mlungu jwenu.’ (Mat. 22:37, 38) Amkamuchisye jwakulijiganya Baibulo jwawo kuti amnonyeleje mnope Mlungu.
13. Ana mpaka tumjiganye chamtuli jwakulijiganya Baibulo ndamo syakwete Yehofa? Apeleche chisyasyo.
13 Pakulijiganya Baibulo ni jwakulijiganya jwawo, akusosekwa amsalileje yayikusiyatendekasya wawojo kumnonyela mnope Yehofa. Yeleyi yichimkamuchisya kuti nombe najo aŵe paunasi wambone ni Yehofajo. (Sal. 73:28) Mwachisyasyo, ana pana maloŵe ganegakwe m’buku kapena mu lilemba line lyakwe gagakusalosya ya chinonyelo cha Yehofa, lunda lyakwe, chilungamo chakwe kapena machili gakwe yayikusiyakwaya mtima mnope wawojo? Amsalile yeleyi jwakulijiganyajo soni amsimichisye kuti lyeleli ni ligongo lyakwe wawojo akusamnonyela mnope Yehofa. Panasoni chindu chine chele jwakulijiganya Baibulo akusasosekwa kutenda kuti abatisidwe.
AMLIMBIKASYE KUTI ASIMANIKWEJE PAMISONGANO JA MPINGO
Amlimbikasye mwachitema jwakulijiganya Baibulo jwawo kuti atande kusimanikwa pamisongano (Alole ndime 14-15)
14. Ana lilemba lya Ahebeli 10:25 likusatusalila yamtuli pakwamba ya misongano?
14 Wosopewe, tukusasaka kwawona ŵakulijiganya Baibulo ŵetu ali abatisidwe. Kuti yeleyi yikomboleche, tukusosekwa kwakamuchisya ŵakulijiganyawo kuti asimanikweje pamisongano ja mpingo. Ŵakulalichila ŵane akusasala kuti jwakulijiganya akusajawula pasogolo mwachitema naga akusimanikwa pa misongano ja mpingo. (Sal. 111:1) Ŵakulalichila ŵane akusiŵasalila ŵakulijiganya kuti naga akusaka kulijiganya chenene Baibulo, akusosekwa kusimanikwaga pamisongano. Aŵalanje najo jwakulijiganyajo lilemba lya Ahebeli 10:24, 25 kuti amsalile umbone wampaka apate naga akusimanikwa pamisongano. Amlosyesoni fidiyo jakuti, Ana ku Nyumba ja Ucimwene Kukusatendekwa Yatuli? * Amkamuchisye jwakulijiganyajo kuti ajiwoneje misongano kuŵa jakusosekwa mnope.
15. Ana mpaka tutende chichi pakumkamuchisya jwakulijiganya Baibulo kuti asimanikweje pamisongano mwakutamilichika?
15 Ana mpaka atende uli naga jwakulijiganya Baibulo ngakusayika kumisongano, kapena ngakusayika mwakutamilichika? Amsalile jwalakwejo yindu yalijiganyisye wawojo pamisongano pamkaŵapa. Kutenda yeleyi kukusaŵa kwakamuchisya mnope mmalo mwakwamba kumŵilanjila kumisongano. Ampe Sanja ja Mlonda kapena kabuku ka Undumetume ni Umi Wachiklistu yakuyikamulichisya masengo pakulijiganya pandaŵijo. Amlosye yindu yachachilijiganya mu wiki jakuyichisya, soni amwusye mbali jajiweni kuti jili jakusangalasya kwa jwalakwejo. Yindu yampaka ayiwone jwakulijiganya jwawo payiche pamisongano, yichiŵa yambone mnope kupunda yiliyose yampaka ayiwone pamisongano ja dini sine. (1 Akoli. 14:24, 25) Kumisongano, chachisimana ni ŵandu ŵakwete yisyasyo yambone yampaka yimkamuchisye jwalakwe kusaka kubatisidwa.
16. Ana mpaka twakamuchisye chamtuli ŵandu ŵatukusitwajiganya Baibulo kuti ayikane pakubatisidwa? Ana tuchikambilana chichi mu ngani jakuyichisya?
16 Ana mpaka twakamuchisye chamtuli ŵandu ŵatukusitwajiganya Baibulo kuti ayikane pakubatisidwa? Tumkamuchisyeje jwakulijiganyajo kuti akuwoneje kusosekwa kwa kulijiganya. Tumkamuchisyejesoni kuti akosecheleje lijiganyo lililyose. Tukusosekwa kumlimbikasya kuti aŵechetaneje ni Yehofa lisiku lililyose soni kuti aŵe najo paunasi wambone. Tumlimbikasyeje jwakulijiganyajo kuti asimanikweje pamisongano ja mpingo. (Alole libokosi pa peji 12, lyakuti: “ Yakusosekwa Kutenda Jwakulijiganya Baibulo.”) Mungani jakuyichisya, tuchikambilana yindu yine msano yampaka ŵakwiganya Baibulo atende pakwakamuchisya ŵakulijiganya Baibulo kuti abatisidwe.
NYIMBO NA. 76 Ana Akusapikana Uli Mumtima?
^ ndime 5 Kumjiganya mundu kukusagopolela kumkamuchisya mundujo kuti aganisyeje kapena atendeje yindu mu litala lyasambano. Lilemba lya chaka cha 2020, lya Mateyu 28:19, liŵele mkutukamuchisya kumanyilila kusosekwa kwa kwajiganya ŵandu kuti abatisidwe ni kuŵa ŵakulijiganya ŵa Yesu Klistu. Munganiji, soni mu ngani jakuyichisya, chitulole yampaka yitukamuchisye kuti tukamuleje chenene masengo gakusosekwaga.
^ ndime 2 YAGAKUGOPOLELA MALOWEGA: Naga aŵele ali mkukambilana ni mundu ngani syambone pakamulichisya masengo Baibulo nikuti pelepo akutendesya lijiganyo lya Baibulo. Mpaka apelechele lipoti naga aŵele ali mkulijiganya kwa maulendo gaŵili kutandila paulendo wandanda waŵatandite lijiganyolyo, soni naga akuyiwona kuti lijiganyolyo chilipitilisye.
^ ndime 3 Mungani syelesi mukusasimanikwasoni ngani syakuti “Kuchititsa Maphunziro a Baibulo Opita Patsogolo” mu kabuku ka Undumetume wa Ucimwene ka Chichewa ka Julayi 2004 mpaka Meyi 2005.
^ ndime 9 Alolele fidiyo ja maminisi mcheche jakuti, Twajiganyeje Ŵakulijiganya Ŵetu Kosechela. Ajawule pa JW Library®, MEDIA > OUR MEETINGS AND MINISTRY > IMPROVING OUR SKILLS.
^ ndime 10 Ajawule pa BIBLE TEACHINGS > BIBLE STUDY TOOLS.
^ ndime 14 Ajawule pa JW Library®, MEDIA > OUR MEETINGS AND MINISTRY > TOOLS FOR THE MINISTRY
