1. Ana chindu chambone mnope champaka mundu asagule kutenda chili chichi?

NDAŴI syejinji, yindu yakusasagula achinangolo yikusiyakwayaga ŵanache kwa ndaŵi jelewu. Naga achinangolo akusagula yindu mwangali lunda, yikusayikasya yakusawusya kwa ŵanache. Nambo naga akusagula yindu mwalunda, yikusiyakamuchisya ŵanache kola umi wambone msogolo. Nambope ŵanache nombenawo akusasosekwasoni kusagula yindu mwalunda. Nambotu chindu chambone mnope champaka mundu asagule kutenda chili kutumichila Atati ŵetu ŵachinonyelo, Yehofa.—Sal. 73:28.

2. Ana Yesu ni achinangolo ŵakwe ŵasagwile yindu yamtuli?

² Achinangolo ŵa Yesu ŵasimichisye mtima kuti ŵakamuchisye ŵanache ŵawo kumtumichila Yehofa. Yaŵasagulaga kutenda jemanjaji yalosisye kuti ŵaliji ŵakusachilila kwakamuchisya ŵanache ŵawo. (Luk. 2:40, 41, 52) Nombenajo Yesu ŵasagulaga chenene yindu paumi wakwe kuti akwanilisye yaŵasakaga Yehofa kuti atende. (Mat. 4:1-10) Yesu paŵakulaga, jwaŵele mundu jwambone, jwakulupichika soni jwakulimba mtima. Jwaŵele mwanache jwele nangolo jwalijose jwakogopa Mlungu mpaka amnyadileje soni kusangalala najo.

3. Ana munganiji chitukambilane yiwusyo yapi?

³ Munganiji chitukambilane kwanga kwa yiwusyo yakuyichisyayi, Ana Yehofa ŵasagwile kutenda chichi pakusaka kumkamuchisya Yesu? Ana achinangolo ŵa Chiklistu akulijiganya chichi kutyochela pa yindu yele achinangolo ŵa Yesu ŵasagwile kutenda? Pambesi pakwe chitukambilanesoni chiwusyo chakuti, Ana ŵachinyamata akulijiganya chichi kutyochela pa yindu yele Yesu ŵasagulaga kutenda?

4. Ana Yehofa jwatesile chichi pakusaka kumkamuchisya Yesu?

⁴ Yehofa ŵasagwile achinangolo ŵambone kuti amsamalile Yesu. (Mat. 1:18-23; Luk. 1:26-38) Yatukusaŵalanga m’Baibulo pakwamba  ya Maliya, yikusalosya kuti jwalakwe wamnonyelaga mnope Yehofa soni Maloŵe gawe. (Luk. 1:46-55) Yaŵatesile Yosefe pandaŵi jele Yehofa ŵamsalilaga yakuti atende yalosisye kuti jwalakwe jwaliji mundu jwakogopa Mlungu.—Mat. 1:24.

5-6. Ana Yehofa ŵakundile kuti Mwanache jwakwe asimane ni yindu yapi?

⁵ Yehofa nganasagula ŵandu ŵakusichila kuti aŵe achinangolo ŵa Yesu. Mbopesi jaŵapeleche Yosefe ni Maliya pandaŵi jele Yesu ŵapagwile, jalosisye kuti jemanjaji ŵaliji ŵakulaga. (Luk. 2:24) Komboleka kuti masengo gaŵakamulaga Yosefe galiji gakupala matabwa basi panyumba jakwe, ku Nasaleti. Kombolekasoni kuti jemanjaji nganakola yindu yejinji paumi wawo, mnopemnope ligongo lyakuti panyuma pa kupagwa kwa Yesu, ŵaŵelechesoni ŵanache ŵane, mwine ŵakupunda 7.—Mat. 13:55, 56.

⁶ Yehofa ŵamŵambasyaga Yesu ku yindu yine yakogoya, nambo nganamteteya mwanache jwakweju kuti akasimanaga ni yakulingwa. (Mat. 2:13-15) Mwachisyasyo, ŵachibale ŵakwe ŵane nganamkulupililaga jwalakwejo. Agambe ganisya mwaŵapikanile Yesu ŵachibale ŵakwe paŵakanaga kwitichisya kuti jwalakwe ali Mesiya. (Maliko 3:21; Yoh. 7:5) Konjechesya pelepa, Yesu ŵalagasiche nganisyo ni chiwa cha Yosefe, babagwe. Chiwa cha babagwechi chatendekasisye kuti Yesu akole udindo wakusamalila liŵasa lyosope. (Maliko 6:3) Paŵakulaga, Yesu ŵamanyililagasoni yampaka atende kuti asamalileje liŵasali. Komboleka kuti jwalakwe ŵakamulaga masengo mwakulipeleka mnope kuti apateje yakusosechela ya liŵasa. Jwalakwe ŵamanyililaga mwakusapikanila mundu jwapesile panyuma pakamula masengo lisiku lyosope.

7. (a) Ana ni yiwusyo yapi yampaka aliwusye ŵandu ŵali peŵasa pangani ja kulela ŵanache? (b) Ana lilemba lya Misyungu 2:1-6 mpaka lyakamuchisye chamtuli achinangolo pakwajiganya ŵanache?

⁷ Naga wawojo ali peŵasa soni akusaka kola ŵanache, mpaka aliwusye kuti, ‘Ana une ni ŵamkwangu tuli ŵandu ŵakulinandiya yisyesyene? Ana tukusamnonyela Yehofa soni Maloŵe gakwe? Ana Yehofa ali asachile kusagula achinangolo ŵakuti asamalile mwanache jwakupagwa kwene, ana mpaka asagule une ni ŵamkwangu?’ (Sal. 127:3, 4) Naga wawojo ali nangolo, aliwusye kuti, ‘Ana ngusinajiganya ŵanache ŵangu kukamula masengo mwakulimbichila?’ (Jwak. 3:12, 13) Ana ngutenda yakomboleka kuti nachenjeleje ŵanache ŵangu ku ndamo syakusakala syampaka asimane nasyo kuchilamboku?’ (Mis. 22:3) Akusosekwa kumanyilila kuti yili yangakomboleka kuti  ŵachenjeleje ŵanache ŵawo payakusaŵusya yosope yampaka asimaneje nayo. Nambope akusosekwa kuti ŵakamuchisyeje kumanyilila yakusawusya yampaka asimane nayo soni ŵajiganyeje kusosekwa kwakudalila Maloŵe ga Mlungu pasimene ni yakusawusyayi. (Aŵalanje Misyungu 2:1-6.) Mwachisyasyo, naga jwachibale jwawo ali alesile kumtumichila Yehofa, akusosekwa amjiganye mwanache jwawo kusosekwa kwakupikanila yagakusasala Maloŵe ga Mlungu soni umbone ŵakuŵa jwakulupichika kwa Yehofa. (Sal. 31:23) Kapena naga mundu jwakusamnonyela ali awile, akusosekwa amŵalanjile mwanache jwawo yajikusasala Baibulo yayindu yakusosekwa kutenda kuti amalane ni chanasa soni kuti aŵeje jwakusangalala.—2 Akoli. 1:3, 4; 2 Tim. 3:16.

8. Ana Yosefe ni Maliya ŵakamulichisye masengo chamtuli maloŵe ga pa Detulonomo 6:6, 7?

⁸ Yosefe ni Maliya ŵamjiganyisye Yesu kuti aŵe paunasi wambone ni Yehofa. Jemanjaji ŵatendaga yeleyi ligongo lyakuti ŵakuyaga yaŵasasile Mlungu kuti achinangolo atendeje. (Aŵalanje Detulonomo 6:6, 7.) Yosefe ni Maliya ŵamnonyelaga mnope Yehofa. Chakulinga chekulungwa chaŵakwete jemanjaji chaliji kwalimbikasya ŵanachewo kuti amnonyelejesoni Yehofa.

9. Ana Yosefe ni Maliya ŵatendaga yindu yapi yayaliji yakusosekwa mnope?

⁹ Yosefe soni Maliya ŵamtumichilaga Yehofa ndaŵi syosope. Jemanjaji ŵajawulaga ku sunagogi jwa ku Nasaleti wiki jilijose kukusongana, soni chaka chilichose ŵajawulaga ku Yelusalemu kamo kukutenda Pasaka. (Luk. 2:41; 4:16) Jemanjaji pandaŵi jaŵajawulaga ku Yelusalemu, ŵajiganyaga ŵanache ŵawo ya mbili ja ŵandu ŵa Yehofa mnopemnope paŵapitaga mmalo gagasalidwe m’Malemba. Liŵasali palyakulaga yikaŵele yakusawusya kuti Yosefe ni Maliya apitilisye kumtumichila Yehofa ndaŵi syosope. Nambope Yehofa jwapele upile jemanjaji ligongo lyakuti ŵakuwonaga kumtumichila jwalakwe kuŵa kwakusosekwa mnope. Yeleyitu yakamuchisye kuti ŵandu wosope mwiŵasamo aŵe paunasi wambone ni Yehofajo.

10. Ana achinangolo ŵa Chiklistu mpaka alijiganye chichi kutyochela kwa Yosefe ni Maliya?

¹⁰ Ana achinangolo ŵakusamjogopa Mlungu mpaka alijiganye chichi kutyochela kwa Yosefe ni Maliya? Yakusatenda yilosyeje kwa ŵanache ŵawo kuti wawojo akusamnonyela mnope Yehofa. Amanyilileje kuti chindu chakusosekwa  champaka ŵape ŵanache ŵawo chili kwakamuchisya kuti amnonyeleje mnope Yehofa. Chindu chinesoni chakusosekwa champaka ŵajiganye jemanjaji chili kwakamuchisya yampaka atende kuti alijiganyeje, apopeleje, asimanikweje pamisongano soni kuti alalichileje.  (1 Tim. 6:6) Yili yisyene kuti akusasosekwa kwapatila ŵanache ŵawo yakusosechela ya paumi. (1 Tim. 5:8) Nambope, akusosekwa akumbuchileje kuti chindu champaka chakamuchisye ŵanache ŵawo kuja kwinjila m’chilambo chasambano chili kuŵa paunasi wambone ni Yehofa, ngaŵaga kupata yindu ya paumi. *—Esek. 7:19; 1 Tim. 4:8.

11. (a) Ana lilemba lya 1 Timoteo 6:17-19 mpaka lyakamuchisye chamtuli achinangolo kusagula yindu mwalunda pakulela ŵanache ŵawo? (b) Ana liŵasa lyawo mpaka lisagule kutenda yindu yapi? Ana mpaka papagwe yakuyichisya yamtuli ligongo lyakusagula yaleyi? (Alole libokosi lyakuti, “ Ana Akwete Yakulinga Yamtuli?”)

¹¹ Yikusaŵa yakusangalasya kwawona achinangolo ŵa Chiklistu ali mkwakamuchisya ŵanache ŵawo kuti amtumichileje Yehofa. Jemanjaji akusamtumichila Yehofa yimpepe ni ŵanache ŵawo. Akusajawula kumisongano ja mpingo, jekulungwakulungwa soni akusalalichila ni ŵanache ŵawo. Achinangolo ŵane akusajawula ni ŵanache ŵawo kukulalichila ku madela kwakukusosekwa ŵakulalichila ŵajinji. Ŵane akusajawula ni ŵanache ŵawo kukulola Beteli soni ndaŵi sine akusakamuchisya pamasengo gakutaŵataŵa. Maŵasa gagakusasagula kutenda yeleyi ndaŵi sine gakusasimana ni yakusawusya soni ngakusajonanga mbiya syejinji. Nambope Yehofa akusiŵapa upile jemanjaji ligongo lyakusagula kutenda yeleyi. (Aŵalanje 1 Timoteo 6:17-19.) Ŵanache ŵakusaleledwa mmaŵasa mpela gelega akusakola ndamo syambone soni ngakusalijimbanga magambo msogolo. *—Mis. 10:22.

12. Ana Yesu jwasosekwaga kutenda chichi paŵakulaga?

¹² Yehofa, ŵali atati ŵakwe ŵa Yesu, ndaŵi syosope akusasagula yindu mwalunda. Yosefe ni Maliya, ŵasagulagasoni yindu mwalunda. Nombenajo Yesu pajwakulaga jwasosekwaga kuti asaguleje yindu mwalunda. (Agal. 6:5) Mwakulandana ni wosopewe, nombenajo Yesu jwakwete ufulu ŵakusagula yindu. Jwalakwe yikakomboleche kusagula ngamtumichila Mlungu. Nambope, Yesu jwasagwile kuŵa paunasi wambone ni Yehofa. (Yoh. 8:29) Ana yaŵasagwile Yesuyi mpaka yakamuchisye chamtuli ŵanache masiku agano?

13. Ana Yesu jwasagwile chindu chakusosekwa mnope chapi?

¹³ Yesu jwapikanilaga mnope achinangolo ŵakwe kutandila ali mwanache. Jwalakwe nganalinga amta panandi kutenda yindu yakulosya kuti ngakwachimbichisya achinangolo ŵakwe, soni nganalipikanaga kuti akumanyilila yindu yejinji kwapunda jemanjaji. Mmalo mwakwe, Yesu “ŵaliji mkwapikanila jemanjajo.” (Luk. 2:51) Pakuŵa  Yesu jwaliji mwanache jwandanda kupagwa, komboleka kuti jwakwete udindo wakusamalila liŵasa. Jwalakwe nganawujigalaga udindowu mwachibwana soni jwakamulaga mwakulipeleka masengo gaŵamlechele Yosefe.

14. Ana tukumanyilila chamtuli kuti Yesu jwagamanyililaga chenene Maloŵe ga Mlungu?

¹⁴ Komboleka kuti achinangolo ŵa Yesu ŵamsalilaga jwalakwe yindu yakusimonjesya yayatendekwe pandaŵi jiŵapagwaga soni yagaŵechete malayika yakwamba jwalakwe. (Luk. 2:8-19, 25-38) Nambope Yesu nganagamba kwikutila ni yindu yaŵasalilidwagayi. Mmalo mwakwe jwalijiganyagasoni jikape Malemba. Ana tukumanyilila chamtuli kuti Yesu jwagamanyililaga chenene Maloŵe ga Mlungu? Yeleyi yawonechele ali mnyamata, ligongo achiŵalimu ŵa ku Yelusalemu “ŵasimonjile pa lunda luŵakwete Yesu ni muŵajanjilaga yiwusyo.” (Luk. 2:46, 47) Yesu ali ni yaka 12, jwaliji ali amanyilile kala kuti Yehofa ali Atati ŵakwe.—Luk. 2:42, 43, 49.

15. Ana Yesu jwalosisye chamtuli kuti ŵasagwile kutenda chakulinga cha Yehofa?

¹⁵ Yesu pajwamanyilile chakulinga cha Yehofa, jwasagwile kutenda yindu mwakamulana ni chakulingacho. (Yoh. 6:38) Yesu jwamanyililaga kuti ŵandu chachimŵenga. Atamose kuti jwalakwe ŵamanyililaga kuti yeleyi yichimtendechela, nambope jwasagwile kumpikanila Yehofa. Yesu paŵagambile kubatisidwa mu 29 C.E., chindu chakusosekwa mnope kwa jwalakwe chaliji kutenda yaŵasakaga Yehofa. (Aheb. 10:5-7) Atamose paŵawaga ali pachitela chakulagachisya, jwalakwe jwaliji jwakusachililape kukwanilisya chakulinga cha Mlungu.—Yoh. 19:30.

16. Ana ŵachinyamata mpaka alijiganye chichi kwa Yesu?

¹⁶ Mwapikanileje achinangolo ŵenu. Mpela mwaŵaŵelele Yosefe soni Maliya, achinangolo ŵenu nombenawo nganaŵa ŵamlama. Nambope Yehofa ni jwapeleche masengo kwa jemanjaji kuti amchenjeleje, kumjiganya soni kumlongolela. Naga mkwapikanila soni kwachimbichisya “timchiŵa ni upile.”—Aef. 6:1-4.

17. Ana lilemba lya Yoswa 24:15 likulosya kuti ŵachinyamata akusosekwa kusagula jikape kutenda chichi?

¹⁷ Msagule jika jwamkusaka kumtumichila. Mlosyeje kuti mkusammanyilila chenene Yehofa. Mmanyililejesoni chakulinga chakwe, soni mmanyilileje yampaka mtende kuti mkwanilisye chakulinga chakwecho. (Alo. 12:2) Yeleyi yichimkamuchisya kuti msagule kutenda chindu chakusosekwa mnope, chachili kumtumichila Yehofa. (Aŵalanje Yoswa 24:15; Jwak. 12:1) Naga  mkujikuya chenene ndandanda jenu jakulijiganya soni kuŵalanga Baibulo, chimchitanda kumnonyela soni kumkulupilila mnope Yehofa.

18. Ana ŵachinyamata akusosekwa kusagula kutenda chichi? Ana mpaka papagwe yakuyichisya yamtuli ali asagwile kutenda yeleyi?

¹⁸ Msagule kutenda yakusasaka Yehofa. M’chilambochi, ŵandu akusasalaga kuti, naga mundu akusaka kuti asangalaleje akusosekwa kukamulichisya masengo lunda lwakwe. Nambotu yisyesyene yakwe yili yakuti ŵandu ŵakusasosa mnope yindu yakuchilu ‘akusalijigalila yipwetesi m’mitima mwawo.’ (1 Tim. 6:9, 10) Nambo naga mkumpikanila Yehofa soni kusagula kutenda yakusasaka jwalakwe, chimchiŵa ŵakusangalala soni chimchitenda yindu mwalunda.—Yos. 1:8.

19. Ana achinangolo akusosekwa kuti akumbuchileje chichi?

¹⁹ Achinangolo, tukwaŵenda kuti atende yampaka akombole pakwakamuchisya ŵanache ŵawo kuti amtumichile Yehofa. Akusosekwa amdalileje mnope soni jwalakwe chachakamuchisya kuti asaguleje yindu mwalunda. (Mis. 3:5, 6) Akumbuchileje kuti ŵanache ŵawo mpaka ajigalile mnope yakusatenda wawojo ngaŵaga yindu yakusaŵechetape. Myoyo akusosekwa asaguleje yindu yampaka yakamuchisye ŵanache ŵawo kuŵa paunasi wambone ni Yehofa.

20. Ana ŵachinyamata chachisangalala ni yindu yapi naga akusagula kumtumichila Yehofa?

²⁰ Ŵachinyamatamwe, achinangolo ŵenu mpaka amkamuchisye kusagula yindu mwalunda. Nambo yikudalila mwachimsyene kuti mŵe paunasi wambone ni Yehofa. Myoyo mkusosekwa mumsyasyeje Yesu soni msagule kumtumichila Yehofa. Naga mkutenda yeleyi chimchikola umi wambone soni chimchiŵa ŵakusangalala mnope pakumtumichila Yehofa. (1 Tim. 4:16) Pachangakaŵapa chimchiŵa ŵakusangalala kola umi wambone mnope m’chilambo chasambano.